Akka Sintua, Urupi ma Akka Halak na Dipakaluar sian Huria

1-2. (a) Boha do perasaan ni Jahowa mangida halak na so olo bertobat? (b) Aha do na diharappon Jahowa sian halak na mangulahon dosa na balga?

DANG lomo roha ni Jahowa molo taulahon na sala. Sogo do rohana mangida dosa. (Ps. 5:​4-6) Dipangido Ibana do asa taoloi parettana na disurat di Bibel. Alai diboto Jahowa do dang sempurna dope hita. Alani i, dang dipangido Ibana hita asa sempurna mangulahon parettana. (Ps. 130:​3, 4) Nang pe songon i, dang lomo rohana mangida akka halak na ‘so pasangappon Ibana, alana dipakke nasida do asi ni roha ni Debata na massai balga i lao mangulahon ulaon ni halak na so ubboto ila’. (Jud. 4) Didok di Bibel, lao diripasson ma ‘halak na so pasangappon Debata’ di porang Armagedon.—2 Ptr. 3:7; Pgk. 16:16.

² Alai taboto do muse, dang lomo roha ni Jahowa diripasson manang ise pe. Songon naung tabahas di akka artikel na sebelumna, lomo do roha ni Jahowa asa “sude jolma marhamubaon”. (2 Ptr. 3:9) Ditiru akka sintua do Jahowa. Sabar do nasida mangurupi halak na marsala asa bertobat jala jonok muse hubunganna tu Jahowa. Alai, adong do na so olo bertobat. (Jes. 6:9) Nang pe nungnga marsitutu akka sintua mangurupi, adong do na tetap mangulahon dosa. Molo songon i, aha do na ikkon diulahon akka sintua?

“PAKALUAR HAMU MA HALAK NA MANGULAHON NA JAHAT”

3. (a) Molo halak na mangulahon dosa na balga dang olo bertobat, aha do na ikkon diulahon akka sintua? (b) Boasa boi tadok ibana sandiri do na mamillit asa dipakaluar sian huria?

³ Molo halak na mangulahon dosa na balga dang olo bertobat, ikkon diihutton akka sintua do petunjuk na disurat di 1 Korint 5:13: “Pakaluar hamu ma halak na mangulahon na jahat sian huria.” Diboto halak na mangulahon dosa i do, molo dang bertobat ibana, ikkon dipakaluar do ibana sian huria. Jadi sebenarna, ibana sandiri do na mamillit asa dipakaluar sian huria. Boi ma tadok, na disuan ibana do panenonna. (Gal. 6:7) Alana, ibana do na so olo muba, hape nungnga mulak-ulak akka sintua berupaya mangurupi. (2 Raj. 17:​12-15) Jadi, dipatudu ibana do sian tindakanna i na so dioloi ibana do paretta ni Jahowa.—5 Mus. 30:​19, 20.

4. Molo adong halak na dipakaluar sian huria, boasa ikkon dibahen pengumuman?

⁴ Molo adong sasahalak na so olo bertobat jala ikkon dipakaluar sian huria, dibahen ma pengumuman di huria na paboahon dang Saksi Jahowa be ibana. Tujuanna dang naeng pailahon ibana. Alai asa boi do diihutton akka dongan na asing paretta ni Bibel na mangorai nasida “mardongan”, bahkan “rap mangan” dohot ibana. (1 Kor. 5:​9-11) Adong do alasanna boasa dilehon Jahowa paretta on. Apostel Paulus mandok, “Otik pe ragi boi do mambahen kabbang sude adonan.” (1 Kor. 5:6) Molo halak na so bertobat i dang dipakaluar sian huria, olo do akka dongan na asing gabe marpikkir dang pola porlu diihutton nasida paretta ni Jahowa.—Poda 13:20; 1 Kor. 15:33.

5. Molo adong na dipakaluar sian huria, boha do pandanganta tu ibana? Jala boasa?

⁵ Molo adong na dipakaluar sian huria, boha do pandanganta tu ibana? Memang dang olo be hita bergaul dohot ibana. Alai, ikkon taingot do boi dope ibana mulak tu Jahowa. Taingot ma muse, songon biru-biru na mago do ibana. Molo adong sada biru-biru na mago, boi do mulak muse biru-biru i tu punguanna. Songon i ma halak na dipakaluar sian huria. Taingot ma, hea do marjanji ibana lao mangalehon ngoluna tu Jahowa. Alai ala dang torus diingot ibana janjina i, gabe mago ma kesempatanna lao mangolu salelengna. (Hes. 18:31) Alai bissan adong dope tikki, jala olo dope Jahowa patuduhon asi ni roha, pasti berharap do hita asa muba ibana. Boha do cara ni akka sintua mangurupi halak naung dipakaluar sian huria?

CARA NI AKKA SINTUA MANGURUPI HALAK NAUNG DIPAKALUAR SIAN HURIA

6. Boha do cara ni akka sintua mangurupi halak naung dipakaluar sian huria?

⁶ Tikki adong sasahalak naung dipakaluar sian huria, na gabe so olo be akka sintua mangurupi ibana mulak tu Jahowa? Daong. Alana tikki dipaboa akka sintua na lao dipakaluar ibana sian huria, dipaboa nasida do tong boha carana asa boi ibana mulak muse tu huria. Alai dang holan i. Biasana, paboaon ni akka sintua do na lomo do roha ni nasida pajuppang muse dohot ibana piga-piga bulan dukkon i. Tujuanna asa boi diida akka sintua atik naung muba do sikapna manang na daong. Molo olo ibana pajuppang dohot akka sintua, dijujui akka sintua ma ibana asa mulak muse tu huria. Molo dang bertobat dope ibana di tikki i, ikkon berupaya do akka sintua manjuppangi ibana muse di tikki na asing lao manjujui ibana asa bertobat.

7. Molo adong halak na dipakaluar sian huria, boha do cara ni akka sintua maniru asi ni roha ni Jahowa? (Jeremia 3:12)

⁷ Asing ni i, berupaya do akka sintua maniru asi ni roha ni Jahowa tu akka halak na dipakaluar sian huria. Misalna dang dipaima Jahowa jolo bertobat halak Israel, baru pe diurupi Ibana nasida. Buktina, disuru Jahowa do akka panurirangna mangurupi halak Israel, nang pe dang bertobat dope nasida. Songon na dipaboa di artikel na paduahon di majalah on, disuru Jahowa do si Hosea mengampuni jala manjalo istrina muse, nang pe diulahon istrina i dope dosa na balga. Dipakke Jahowa do contoh on lao mangajari akka naposona asa mangattusi Debata parasi roha do Ibana. (Hos. 3:1; Mal. 3:7) Jadi lomo do roha ni akka sintua maniru Jahowa. Berupaya do nasida mangurupi halak naung dipakaluar sian huria asa bertobat jala mulak muse tu huria. Jala dang olo akka sintua mambahen ibana gabe maol mulak tu huria.—Jaha Jeremia 3:12.

8. Sian ilustrasi ni Jesus taringot anak na mago, aha do muse na boi taparsiajari taringot perasaan ni Jahowa tu halak na dipakaluar sian huria? (Lukas 15:7)

⁸ Taingot ma muse ilustrasi ni Jesus taringot anak na mago na dibahas di artikel na paduahon di majalah on. Tikki diida bapakna i anakna sian na dao, pittor “marlojong ma ibana, dihaol, jala diumma ma anakna i”. (Luk. 15:20) Molo tajaha ceritana, dang holan na paimahon bapakna i sappe ro anakna mangido asa diampuni. Alai pittor marlojong do ibana manjuppangi anakna, alana massai holong do rohana tu anakna. Songon i ma perasaan ni Jahowa tu akka halak na manadikkon Ibana. Jadi, berupaya do akka sintua maniru Jahowa. Lomo do roha ni nasida mangurupi biru-biru na mago asa mulak muse tu huria. (Luk. 15:​22-24, 32) Alana tikki adong sasahalak na mulak muse tu huria, las situtu do roha ni Jahowa, Jesus, akka suru-suruan, dohot sude dongan di huria!—Jaha Lukas 15:7.

9. Sian dia do taboto na lomo do roha ni Jahowa asa mulak muse halak na dipakaluar i tu huria?

⁹ Sian hatorangan naung tabahas on, takkas do taboto dang lomo roha ni Jahowa molo halak na so bertobat toktong gabe bagian ni huria. Alai dilehon Jahowa dope kesempatan tu ibana. Lomo do roha ni Jahowa asa mulak muse ibana tu huria. Di Hosea 14:​4, dipaboa Jahowa do songon dia perasaanna tu halak na olo bertobat. Didok, “Pamalumokku ma nasida. Jala toktong nama nasida setia tu Au, haholongakku ma nasida sian nasa rohakku, ai dang muruk be Au.” Dung mamboto on, pasti lomo do roha ni akka sintua maniru Jahowa tikki mangurupi halak na dipakaluar sian huria. Berupaya do nasida mangida atik na adong do keinginanna lao bertobat. Jala boi do ayat on paposson roha ni halak na dipakaluar sian huria, na holong dope roha ni Jahowa tu ibana. Jala lomo do roha ni Jahowa asa mulak muse ibana tu huria.

10-11. Aha do na ikkon diulahon akka sintua lao mangurupi halak naung martaon-taon dipakaluar sian huria?

¹⁰ Alai boha do molo sasahalak nungnga dipakaluar sian huria martaon-taon naung salpu? Aha do na ikkon diulahon akka sintua lao mangurupi ibana? Ra dang diulahon ibana be dosa na balga. Bahkan, adong do na so mangingot boasa dipakaluar ibana sian huria. Alai dang soal nungnga sadia leleng ibana dipakaluar sian huria, ikkon marsitutu do akka sintua mangalului jala manjuppangi ibana. Tikki manjuppangi ibana, boi do ditogihon akka sintua asa rap martangiang nasida dohot ibana, jala manjujui ibana asa mulak muse tu huria. Memang, molo nungnga leleng sasahalak dang marpungu jala mandao sian huria, pasti dang jonok be hubunganna tu Jahowa. Alani i molo adong keinginanna lao mulak tu huria, ikkon diatur akka sintua do asa adong na mangurupi ibana marsiajar Bibel, nang pe dang dijalo dope ibana di huria. Alai holan akka sintua do na boi manottuhon ise na lao mangurupi ibana marsiajar Bibel.

¹¹ Ikkon ditiru akka sintua do asi ni roha ni Jahowa. Jadi ikkon marsitutu do akka sintua mangalului akka halak na manadikkon Jahowa, jala manjujui nasida asa mulak muse tu Ibana. Molo nungnga muba sikapna jala bertobat, unang ma dipaleleng-leleng asa boi ibana dijalo muse di huria.—2 Kor. 2:​6-8.

12. (a) Di situasi na songon dia do ikkon manat akka sintua mamastihon pertobatan ni sasahalak? (b) Boasa dang boi hita menganggap adong piga-piga halak na so tama manjalo asi ni roha ni Jahowa? (Ida surat na di toru.)

¹² Alai di piga-piga situasi, ikkon manat do akka sintua tikki naeng manjalo sasahalak mulak muse tu huria. Misalna adong do na hea gabe murtad, mangulahon kekerasan manang pelecehan tu dakdanak, manang mambahen cara na licik asa boi marsirang sian pasanganna. Molo songon i do situasina, ikkon dipastihon akka sintua do na tutu ibana bertobat manang na daong. (Mal. 2:14; 2 Tim. 3:6) Boasa? Alana ikkon dijaga akka sintua do akka dongan di huria. Alai taingot ma, rade do Jahowa manjalo manang ise pe na olo bertobat jala dang be mangulahon dosa na balga. Jadi nang pe ikkon manat akka sintua mamastihon pertobatanna i, porlu do diingot nasida dilehon Jahowa dope kesempatan tu halak sisongon i lao manjalo asi ni rohana.a—1 Ptr. 2:10.

NA BOI DIULAHON AKKA DONGAN DI HURIA

13. Aha do na boi taulahon tu halak na dipissang? Alai aha do na so boi taulahon tu halak na dipakaluar sian huria?

¹³ Songon naung tabahas di artikel sebelumna, nang pe nungnga dipaboa di huria adong sasahalak na dipissang, boi dope hita bergaul dohot ibana. Alana nungnga bertobat be ibana jala dang diulahon ibana be dosana i. (1 Tim. 5:20) Bagian ni huria dope ibana, jala porlu dope ibana dipatogu akka dongan asa toktong mangulahon na sittong. (Heb. 10:​24, 25) Alai asing do molo halak na dipakaluar sian huria. Dang boi hita “mardongan”, bahkan “rap mangan” dohot ibana.—1 Kor. 5:11.

14. Boi do tapakkulingi halak na dipakaluar sian huria? Patorang ma. (Ida gambar.)

¹⁴ Alai na gabe so boi do hita mangundang halak na dipakaluar sian huria asa ro tu parpunguan, manang mamakkulingi ibana tikki ro ibana tu parpunguan? Dang songon i maksudna. Memang, dang mardongan be hita dohot ibana. Alai mangihutton panggora ni roha naung dilatik prinsip ni Bibel, boi do hita mamillit lao mangundang ibana marpungu. Olo do ra keluargatta ibana manang dongan akrabta hian. Molo ro ibana marpungu, ikkon songon dia do sikapta? Najolo, dang boi tapakkulingi halak na dipakaluar sian huria. Alai saonari, mangihutton panggora ni roha naung dilatik prinsip ni Bibel, boi do hita mamillit lao mamakkulingi ibana tikki ro ibana marpungu. Alai, unang ma gabe palelengku hita makkata-hatai manang gabe bergaul dohot ibana.

15. Ise do na dimaksud si Johannes di 2 Johannes 9-11? (Ida muse kotak “Sarupa do na Dibahas si Johannes Dohot si Paulus?”)

¹⁵ Olo do ra didok rohatta, ‘Molo tapakkulingi halak na mangulahon dosa na balga, dang hira na parsidohot hita tu ulaonna na jahat i?’ (Jaha 2 Johannes 9-11.) Molo taida konteks ni ayat on, na dimaksud si Johannes disi, i ma halak na murtad manang halak na torus manjujui na asing asa mangalo paretta ni Jahowa. (Pgk. 2:20) Jadi molo adong halak na dipakaluar sian huria jala gabe murtad, dang porlu dibahen akka sintua panitia lao manjuppangi ibana. Nang pe adong kemungkinan di ibana asa bertobat, unang ma pola tapakkulingi manang taundang ibana ro marpungu.

TIRU MA ASI NI ROHA NI JAHOWA

16-17. (a) Aha do na diharappon Jahowa sian halak na mangulahon dosa na balga? (Hesekiel 18:32) (b) Asa boi gabe dongan saulaon ni Jahowa, aha do na diulahon akka sintua?

¹⁶ Aha do naung taparsiajari sian lima artikel di majalah on? Takkas do taboto, dang lomo roha ni Jahowa diripasson manang ise pe! (Jaha Hesekiel 18:32.) Lomo do roha ni Jahowa asa halak na mangulahon dosa na balga mulak muse tu Ibana. (2 Kor. 5:20) Alani i ma, mulai sian najolo, mulak-ulak do Jahowa manjujui akka naposona na manadikkon Ibana asa bertobat jala mulak muse tu Ibana. Jadi sada hasangapon do di akka sintua boi gabe dongan saulaon ni Jahowa lao mangurupi halak na mangulahon dosa na balga asa bertobat.—Rom 2:4; 1 Kor. 3:9.

¹⁷ Bayakkon ma las ni roha di surgo tikki bertobat sasahalak. Bayakkon ma las ni roha ni Jahowa tikki mulak muse biru-biruna na mago i tu huria. Molo tarimangi asi ni roha, holong, dohot haburjuonna i, pasti gabe lam balga do holongta tu Jahowa.—Luk. 1:78.