Aha do na Masa Dung Mate Sasahalak?

Na Didok Bibel

Bibel mandok, “Diboto halak na mangolu do na lao mate nasida. Alai anggo na mate, dang diboto agia aha. Jala dang adong be upa sijaloon ni nasida. Ai dang adong be siingoton taringot nasida.” (Parjamita 9:5; Psalmen 146:4) Alani i molo dung mate hita dang taboto be agia aha. Dang boi be hita marpikkir, makkilala manang mangulahon manang aha pe.

“Mulak tu tano”

Dipaboa Debata do tu si Adam aha na masa molo dung mate jolma. Ala mangalo si Adam didok Debata ma tu ibana, “Ai sian tano do ho jala mulak tu tano do ho sogot.” (1 Musa 3:19) Molo dang ditoppa Debata hian si Adam “sian orbuk” dang adong hian ibana. (1 Musa 2:7) Jadi molo mate si Adam, mulak ma ibana tu orbuk jala dang adong be ibana.

Songon i do tong na masa tu sude halak na mate. Didok Bibel do muse, “Sarupa do inganan na tinuju ni jolma dohot binatang. Sian tano do nasida, jala mulak tu tano.”​—Parjamita 3:19, 20.

Dang hamatean ujung ni sasudena

Dipatudos do di Bibel halak na mate i songon halak na modom. (Psalmen 13:3; Johannes 11:11-14; Ulaon ni Apostel 7:60) Halak na renges modom dang diboto aha na masa di sakalilingna. Songon i ma halak na mate, dang diboto be agia aha. Dipaboa do di Bibel, sanggup do Debata pahehehon halak naung mate jala mangalehon hangoluan tu nasida muse. (Job 14:13-15) Jadi ala boi do dipahehe Debata halak naung mate, dang ujung ni sasudena hamatean i.