Referensi tu Parpunguan Hangoluan dohot Pangkobasion Na Laho Diparsiajari
4-10 SEPTEMBER
ARTA NA ARGA NA ADONG DI BIBEL | HESEKIEL 42-45
”Panombaon na Sintong Dipauli!”
(Hesekiel 43:10-12) ”On pe, ho ale anak ni jolma, patuduhon ma tu pinompar ni Israel joro on, asa tung maila nasida ala ni hajahatonnasida i, ingkon suhatannasida ungkuran tiruan i. 11 Ia dung maila nasida ala saluhut na binahennasida i, pabotohononmu ma tu nasida rumang ni joro i dohot parpaulina angka dalanna laho ruar dohot laho masuk ro di sandok rumangna dohot angka patikna, angka panjadianna dohot angka patik ni uhumna, jala surathon di adopannasida, asa diramoti nasida sandok panjadianna dohot angka patikna laos diulahon nasida antong. 12 Jala on do aturan ni joro i: Di atas punsu ni dolok i do sandok parbolatanna tuk humaliang, i ma na songkal sahali. Ida ma, i ma aturan ni joro i.
w99-IN 1/3 8 ¶3
”Parateatehon ma” Bagas Joro ni Debata!
3 Disurat do parnidaan taringot janji ni Debata di sia pasal buku Hesekiel. On patoguhon haporseaon ni angka halak Juda di habuangan. Panombaon na sintong laho dipauli! Nang pe nunga marratus taon, alai tongtong dope parnidaan on boi patoguhon hita. Boasa? Taida ma songon dia parnidaan on mangkorhon tu halak Israel di habuangan. Adong opat na digombarhon di parnidaan i. I ma bagas joro, hamalimon, na manguluhon, dohot tano Israel.
it-1-IN 274 ¶2
Bagas Joro
Bagas joro di parnidaan ni si Hesekiel. Taon 593 SM, 14 taon dung lengse Jerusalem dohot bagas joro na dipauli ni si Salomo di luat i, mandapot parnidaan ma si Hesekiel. Di parnidaan diboan ma ibana tu dolok na timbo. Diida ibana ma bagas joro na balga, i ma bagas joro ni Jahowa. (Hes 40:1, 2) Disuru do si Hesekiel asa paboahon na niidana i tu ”pinompar ni Israel”. Asa serep roha ni halak Jahudi na di habuangan jala asa marhamubaon nasida. Jala on patoguhon halak Jahudi na marsihohot. (Hes 40:4; 43:10, 11) Tangkas do dipatorang taringot ungkuran di parnidaan i. ”Tolong pangungkur” (ganjangna 3,11 m) dohot ”asta” (saasta dos dohot 51,8 cm) do na dipangke laho mangungkur. (Hes 40:5) Pigapiga halak mandok, ala laho dipajongjong do bagas joro di tingki ni si Serubabel. Tangkas ma dipatorang taringot ukuran ni bagas joro i. Asa boi tiruon ni halak Israel di joloan ni ari. Alai ndang adong bukti na patuduhon na tutu do i manang na ndang.
(Hesekiel 44:23) ”Ingkon podaannasida huhut bangsongku, asa diboto nasida parsirang ni na badia martimbangkon na ursam dohot parsirang ni na ramun martimbangkon na pansing.
(Hesekiel 45:16) ”Ingkon sandok bangso ni tano i margugu tu pelean tatingan i di induk ni Israel.
w99-IN 1/3 10 ¶10
”Parateatehon ma” Bagas Joro ni Debata!
10 Tontu dipatogu do roha ni halak na di habuangan alani i! Dipapos do roha ni ganup keluarga, sai na dapot nasida parbagianan di tano i. (Bandingkon Mika 4:4.) Dipatimbul ma panombaon na sintong. Di parnidaan ni si Hesekiel, tading di tano na dilehon bangso i do angka induk manang malim ni Israel. (Hes 45:16) Alani i, ingkon lehonon ni bangso i do pelean, laho mangurupi angka halak na dipillit laho marhobas tu Jahowa manguluhon bangso i. Ingkon dioloi nasida do tudutudu sian angka malim. Sudena on, manggombarhon songon dia organisasi diatur, jala mangkilala hadameon.
Mangalului Arta na Adong di Bibel
(Hesekiel 43:8, 9) Uju na binahennasida lobulobunasida hombarhon lobulobungku, jala tiang nasida di lambung ni tiangku, gabe dorpi sambing parholanganku sian nasida; asa diramuni nasida goarhu na badia i marhitehite hasogiron angka na niulahonnasida i, gabe suda nasida dipangan rimashu. 9 Ianggo nuaeng paholangonnasida ma parmainanonnasida i sian ahu ro di bangke ni angka rajanasida, asa maringan ahu di tongatonganasida ro di salelenglelengna.
it-2-IN 201 ¶2
Goar
Gabe ramun do goar ni Debata ala ndang diulahon halak Israel parenta ni Debata. (Hes 43:8; Am 2:7) Ala ndang marsihohot nasida, diuhum Debata ma nasida. Alai gabe direhei angka bangso na asing do goar ni Debata. (Bandingkon Ps 74:10, 18; Jes 52:5.) Dirimpu nasida ma na so tolap do Jahowa mangalinggomi bangsoNa, umbahen na ro mara tu bangso Israel. Alani i, asa unang direhei be goarNa, dipalua Jahowa ma muse bangso Israel sian panabanan.—Hes 36:22-24.
(Hesekiel 45:9, 10) Songon on do hata ni Tuhan Jahowa: Tung na torbang do hamu, ale angka induk ni Israel! Paholang hamu ma pangarupaon dohot hamagoan, jala ulahon hamu ma uhum dohot hatigoran! Pasohot hamu ma panosakmuna mangonjaronjar bangsongku sian partalianna, ninna Tuhan Jahowa! 10 Ingkon masa di hamu timbangan na sintong dohot ampang na sintong dohot poting na sintong.
it-1-IN 38 ¶3
Hatigoran
Alani i, asa boi dihalomohon Jahowa, ingkon ihuthonon ni sasahalak do uhum hatigoran dohot prinsip ni Jahowa. (Jes 1:17, 18; 10:1, 2; Jer 7:5-7; 21:12; 22:3, 4; Hes 45:9, 10; Am 5:15; Mika 3:9-12; 6:8; Sak 7:9-12)
Panjahaion Bibel
(Hesekiel 44:1-9) Dung i ditogihon ibana ahu mulak sian dalan laho tu pintu ruar ni inganan na badia i na tungkan habinsaran, hape hinsu do i nidapot. 2 Dung i ninna Jahowa ma tu ahu: Ingkon laos hinsu do anggo pintu on, ndang jadi ungkapon, sahalak pe ndang jadi masuk sian i ala Jahowa, Debata ni Israel, naung masuk sian i; umbahen ingkon laos tarhinsu. 3 Taringot tu induk i, induk do ibana tongon, umbahen ingkon hundul ibana di bagasanna laho manganhon roti di adopan ni Jahowa; ingkon mardalan sian panisioan ni harbangan i ibana laho bongot, laos sian dalan i muse ibana ruar. 4 Dung i diboan ibana ahu sian dalan tu harbangan na tungkan utara tu jolo ni joro i, gabe ida ma, gok hamuliaon ni Jahowa do joro ni Jahowa huida, jadi manungkap ma ahu tu tano. 5 Dung i ninna Jahowa ma tu ahu: Ale anak ni jolma, parateatehon ma on jala ida marhitehite matam jala tangihon marhitehite pinggolmu saluhut sipaboaonku tu ho, taringot tu saluhut aturan ni joro ni Jahowa dohot taringot tu sandok patik ni uhumna, jala ingkon pampeonmu tu roham dalan laho bongot tu joro i ro di sude dalan laho ruar sian inganan na badia i! 6 Jala dohononmu ma tu pinompar ni Israel na tangkangi: Songon on do hata ni Tuhan Jahowa: Tung na torbang do hamu, ale pinompar ni Israel mangulahon luhut angka hasogiron marragamragam. 7 Tung ditogihon hamu do angka halak ruar, angka na so tarsunat rohana dohot dagingna, asa masuk tu ingananku na badia i laho paramunhon jorongki, di na pinelehonmuna rotingku, i ma tabotabo dohot mudar, tung diose nasida do padan na hubahen i marhite sian saluhut hasogiron angka na niulamuna i. 8 Jala ndang diradoti hamu ulaon ni habadiaonku, tung roharoha do dibahen hamu pabangkithon halak bahen siradoti ulaonku gantimuna di ingananku na badia i. 9 Songon on do hata ni Tuhan Jahowa: Sandok halak ruar angka na so tarsunat rohana dohot dagingna, ndang jadi masuk tu ingananku na badia i, sandok halak ruar tahe, angka na maisolat di tongatonga ni halak Israel.
11-17 SEPTEMBER
ARTA NA ARGA NA ADONG DI BIBEL | HESEKIEL 46-48
”Pasupasu Na Didapot Halak Israel Na Mulak”
(Hesekiel 47:1) Dung i ditogihon ibana ahu mulak tu pintu ni joro i, gabe ida ma, ruar angka aek sian toru ni lobulobu ni joro i tungkan purba, ai siadop habinsaran do joro i; mabaor huhut angka aek i sian toru ni sambariba ni joro i tungkan siamun, tungkan dangsina ni langgatan i.
(Hesekiel 47:7-12) Jadi dung mulak ahu, gabe ida ma, tungkan pasir ni batang aek i adong hau mansai godang angkupangkup be. 8 Dung i ninna ibana ma tu ahu: Angka aek on ruar do tu parbolatan tungkan habinsaran, jala mabaor tu adaran jala tolhas tu laut, dung tolhas tu laut aek angka na ruar i, gabe angka aek mata do. 9 Gari saluhut hosa na mangolu, na manggulmit, sai mangolu do manang tudia pe hasahatan ni batang aek na dua i, mansai deak huhut dengke disi, ala tusi angka aek i, jala hisar huhut mangolu saluhut hasahatan ni batang aek i. 10 Dung i jongjong angka pardengke di lambungna, olat ni En-Gedi sahat ro di En Eglaim bahen paninaran ni angka jala do i; marragam disi angka dengkena, songon dengke ni laut godang, mansai deak. 11 Alai anggo ombikna dohot ambarna, ndang tarinum, tong do ansim. 12 Jala di topi ni batang aek i tubu do angkupangkup be ragamragam ni hau sipanganon, ndang olo malos bulungna, jala ndang montok parbuena, manjujur bulanna marpatumonaan, ai ruar sian inganan na badia i do angka aekna; jala parbuena tau sipanganon, jala bulungna tau ubat.
w99-IN 1/3 10 ¶11-12
”Parateatehon ma” Bagas Joro ni Debata!
11 Pasupasuon ni Jahowa do tano ni nasida? Taralusi do sungkunsungkun i di parnidaan i. Adong ma batang aek na ruar sian bagas joro i, lam balga jala lam doras do aek i dung lam jonok tu Laut Mati. Alani batang ni aek i, gabe adong ma hangoluan di laut jala gabe godang ma pardengke di topi ni laut i. Di topi ni batang aek i, martubuan ma angka hau. Ganup taon marparbue ma i jala boi gabe sipanganon dohot ubat.—Hes. 47:1-12.
12 Lam patar ma angka surirang taringot hamumulak ni angka halak na ditaban. Jotjot do angka panurirang ni Jahowa manggombarhon paradeiso, tingki paboahon taringot bangso Israel na dipalua sian panabanan. Di surirang i, didok do na laho dipauli do muse angka inganan na hasang manang padang pasir. (Jes. 35:1, 6, 7; 51:3; Hes. 36:35; 37:1-14) Pos do roha ni naposo ni Jahowa, lehononNa do pasupasu songon batang aek na marharoroan sian bagas joro. Alani i, bangso naung mate di partondion boi do muse dipangolu. Dapot ni bangso na dipangolu i ma muse pasupasu marhite angka baoa na togu di partondion. I ma angka baoa na tigor jala togu songon hau na di topi ni batang aek di parnidaan i. On ma angka baoa na manguluhon ulaon paulihon di tano i. Dipaboa si Jesaya do muse taringot ”hariara hatigoran” na laho ”paulihon angka naung leleng tarulang”.—Jes. 61:3, 4.
(Hesekiel 47:13, 14) Songon on do hata ni Tuhan Jahowa: On do parbolatan ni tano sibagionmuna bahen partalian di na sampulu dua marga ni Israel: Di Josep dua bagian. 14 Ingkon hamu do manean tano i, dos pe partalianmuna, nunga pola hupatoltol tanganku maruari, ingkon lehononku do i tu ompumuna, ingkon gabe pargolatanmuna do tano i.
w99-IN 1/3 10 ¶10
”Parateatehon ma” Bagas Joro ni Debata!
10 Tontu dipatogu do roha ni halak na di habuangan alani i! Dipapos do roha ni ganup keluarga, sai na dapot nasida parbagianan di tano i. (Bandingkon Mika 4:4.) Dipatimbul ma panombaon na sintong. Di parnidaan ni si Hesekiel, tading di tano na dilehon bangso i do angka induk manang malim ni Israel. (Hes. 45:16) Alani i, ingkon lehonon ni bangso i do pelean, laho mangurupi angka halak na dipillit laho marhobas tu Jahowa manguluhon bangso i. Ingkon dioloi nasida do tudutudu sian angka malim. Sudena on, manggombarhon songon dia organisasi diatur, jala mangkilala hadameon.
(Hesekiel 48:9, 10) Ia pelean tatingan sipapulihonmuna di Jahowa, ingkon duapulu lima ribu asta unjurna jala sampulu ribu asta bohangna. 10 Ingkon disi do pelean tatingan na badia i jambar ni angka malim: Tungkan utara duapulu lima ribu asta, jala tungkan pastima sampulu ribu asta bohangna, jala tungkan purba sampulu ribu asta bohangna, jala tungkan dangsina duapulu lima ribu asta unjurna; asa inganan na badia ni Jahowa di parsitongaanna.
Mangalului Arta na Adong di Bibel
(Hesekiel 47:1) Dung i ditogihon ibana ahu mulak tu pintu ni joro i, gabe ida ma, ruar angka aek sian toru ni lobulobu ni joro i tungkan purba, ai siadop habinsaran do joro i; mabaor huhut angka aek i sian toru ni sambariba ni joro i tungkan siamun, tungkan dangsina ni langgatan i.
(Hesekiel 47:8) Dung i ninna ibana ma tu ahu: Angka aek on ruar do tu parbolatan tungkan habinsaran, jala mabaor tu adaran jala tolhas tu laut, dung tolhas tu laut aek angka na ruar i, gabe angka aek mata do.
(Hesekiel 48:30) Jala on do angka haruaran ni huta i: Sian sambariba utara opat ribu limaratus asta.
(Hesekiel 48:32-34) Jala tungkan sambariba purba opat ribu limaratus asta, jala tolu bahalna: Bahal Josep sada, bahal Benjamin sada, bahal Dan sada. 33 Jala sambariba tungkan dangsina opat ribu limaratus asta, jala tolu bahalna, bahal Simeon sada, bahal Isasar sada, bahal Zebulon sada. 34 Ia sambariba pastima opatribu limaratus asta do, tolu bahalna: Bahal Gad sada, bahal Aser sada, bahal Naptali sada.
w99-IN 1/3 11 ¶14
”Parateatehon ma” Bagas Joro ni Debata!
14 Holan on do na manggohi surirang ni si Hesekiel? Ndang, adong dope na laho masa jala na umbalga. Parrohahon ma, bagas joro na diungkur di parnidaan ni si Hesekiel ndang boi dipauli dos songon na digombarhon. Nang pe diparrohahon jala diihuthon nasida hatorangan ni ungkuran i. Alana, pabalgahu do bagas joro na di parnidaan i. Gari Dolok Moria, inganan ni joro na parjolo ndang siat gabe ingananna. Dao do inganan ni bagas joro di parnidaan i, i ma di tano parbolatan. Alai anggo bagas joro na paduahon, di kota Jerusalem do dipauli. (Esr. 1:1, 2) Jala ndang adong batang aek sian bagas joro di Jerusalem songon na adong di parnidaan i. Alani i, ndang sude dope dipasaut parnidaan ni si Hesekiel di tingki ni halak Israel. On patuduhon, laho digohi dope surirang i, umbalga sian na masa tu halak Israel najolo.
(Hesekiel 47:6) Dung i ninna ibana ma tu ahu: Nunga tung diida ho ale anak ni jolma? Dung i ditogihon ibana ahu mulak tu topi ni batang aek i.
it-2-IN 593
Anak ni Jolma
Di Angka Buku Heber, hata on jotjot disurat di buku Hesekiel. Lobi sian 90 hali ma Debata manjou panurirang i ”anak ni jolma”. (Hes 2:1, 3, 6, 8) On patuduhon jolma do panurirang i. Gabe tangkas ma imbar ni na pasahathon surirang i tu Debata Natumimbul Silehon surirang i. Si Daniel pe dijou do anak ni jolma songon na disurat di Daniel 8:17.
Panjahaion Bibel
(Hesekiel 48:13-22) Halak Lepi pe ingkon maruli mardonokkon parbolatan ni angka malim duapulu lima ribu asta unjurna jala sampulu ribu asta bohangna; sandok unjurna ingkon duapulu lima ribu asta jala bohangna sampulu ribu. 14 Jala ndang jadi gadisonnasida sian i nanggo sada manang tungkaranna, manang pabalionna patumonaan ni tano i tu halak na leban, ai habadiaon ni Jahowa do i. 15 Ia na lima ribu asta bohang na lobi i hombarhon na duapulu lima ribu asta i riperipe ni huta do i bahenon inganan dohot partungkoan, asa huta i di parsitongaanna. 16 Jala angka on do ungkuranna: Sambariba utara opat ribu lima ratus, jala sambariba dangsina opat ribu lima ratus, jala sian sambariba purba opat ribu lima ratus, jala sambariba pastima opat ribu lima ratus. 17 Ingkon marpartungkoan huta i tungkan utara dua ratus lima pulu asta, jala tungkan dangsina dua ratus lima pulu, jala tungkan purba dua ratus lima pulu, jala tungkan pastima dua ratus lima pulu. 18 Jala lobilobi ni unjur hombarhon pelean tatingan na badia i, sampulu ribu tungkan purba jala sampulu ribu tungkan pastima, jala ingkon hombarhon pelean tatingan na badia i, jala parbuena bahen hangoluan ni angka pangula di huta i. 19 Jala taringot tu pangula di huta i, ingkon sian sandok marga ni Israel buaton mangula tano ni huta i. 20 Asa sandok pelean tatingan i ingkon duapulu lima ribu asta be unjurna dohot bohangna maropat suhi papulikonmuna pelean tatingan na badia i bahen partalian ni huta i. 21 Jala lobilobina ingkon di induk i angkupangkup be sian pelean tatingan na badia i dohot sian partalian ni huta i hombarhon na duapulu lima ribu asta ni pelean tatingan i sahat ro di parbolatan tungkan purba dohot pastima, hombarhon na duapulu lima ribu asta tungkan parbolatan pastima, tondong ni angka partalian marmargamarga di induk i ma i, jala pelean tatingan na badia i dohot habadiaon ni joro i ingkon di parsitongaanna. 22 Sian partalian ni halak Lepi pe dohot sian partalian ni huta i, di tongatonga ni partalian na di induk i, di holangkolang ni parbolatan Juda dohot Benjamin, ingkon di induk i ma i.
18-24 SEPTEMBER
ARTA NA ARGA NA ADONG DI BIBEL | DANIEL 1-3
”Pasupasuon ni Jahowa do Angka na Marsihohot tu Ibana”
(Daniel 3:16-20) Jadi ro ma alus ni si Sadrak, si Mesak dohot si Abednego mandok tu rajai: Ale Nebukadnesar, ndang pola alusannami ho, anggo taringot tu na nidokmi. 17 Molo lomo roha ni Debatanami, na huoloi hami, sai paluaonna do hami sian liang pamurunan na marnalanala i dohot sian tanganmu, ale rajanami. 18 Alai nang so lomo rohana, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere, naung pinajongjongmi. 19 Jadi piripirion situtu ma si Nebukadnesar, pola rupi bohina dompak si Sadrak, si Mesak dohot si Abednego; jala didokkon ingkon lompit pitu hali ummohop liang pamurunan i bahenon sian na somal. 20 Didokkon ma huhut deba paranganna, angka na gumogo manali si Sadrak, si Mesak dohot si Abednego, asa tinimpalhon nasida tu bagasan liang pamurunan na marnalanala i.
Marsihohot ma tu Harajaon ni Debata
15 Ias ma nian panggora ni rohanta laho manomba Jahowa, alani i ingkon imbar do hita sian dongan sakarejonta, sasingkolanta, manang keluarganta. (1 Petrus 2:19) Dipaingot Jesus do, hosoman ni angka halak ma hita ala marimbar sian nasida. Taingot ma, godang sian na mangkosomi hita ndang mamboto Harajaon ni Debata. Alani i, ndang diantusi nasida boasa hita marsihohot tu Harajaon ni Debata ndang tu pamarentaon ni jolma.
16 Aha pe na didok manang na diulahon halak tu hita, ingkon taoloi jala marsihohot do hita tu Jahowa. (Daniel 3:16-18) Tarlumobi tu angka na poso, maol do ra dihilala nasida marimbar sian angka donganna. Hamu angka natuatua, urupi ma ianakhonmuna asa barani di singkola. Ra mabiar nasida molo ndang manghormat [salut] bendera manang mabiar nasida molo ndang parsidohot di upacara nasional. Di tingki panombaon na sasaripe, parsiajari hamu ma songon dia pangkilalaan ni Jahowa taringot i. Ajari ma ianakhonmuna songon dia asa tangkas jala lambok tingki paboahon haporseaonna. (Rom 1:16) Molo porlu, mangkatai ma hamu tu guru ni nasida taringot haporseaonmuna.
(Daniel 3:26-29) Dung i didapothon si Nebukadnesar ma pintu ni liang pamurunan na marnalanala i, huhut ma didok: Hamu ale Sadrak, Mesak dohot Abednego, angka naposo ni Debata na mamunjung, ruar ma hamu jala ro tuson! Jadi ruar ma si Sadrak, si Mesak dohot si Abednego sian api i. 27 Dung i marpungu ma angka pangarajai, partogi, induk dohot angka panuturi ni rajai, naeng marnida angka baoa i, angka na so tarhahua api dagingnasida i, gari obuk ni ulunasida ndang muap api, jala pangkeannasida ndang muba, nanggo uap ni api, ndang dais tu nasida. 28 Jadi ro ma hata ni si Nebukadnesar: Pinuji ma Debata ni si Sadrak, si Mesak dohot si Abednego, naung marsuru suruanna, asa paluahon naposona, angka na marhaposan tu ibana, gabe ndang dioloi patik ni harajaon, tung diseahon do dagingnasida, asal unang mangoloi manang marsomba tu debata sileban, dungkon ni tu Debatana. 29 Dibahen i mambahen patik ma ahu nuaeng: Manang ise sian angka bangso, houm dohot parpangkuling marragamragam mandok hata insahinsak dompak Debata ni si Sadrak, si Mesak dohot si Abednego: Ingkon tanggoan ibana, jala bagasna gabe partangkalan bahenon, ai ndang adong debata na asing na tuk paluahon, songon ibana.
w13-IN 15/1 10 ¶13
Unang Mabiar, Jahowa do Donganmuna!
13 Di abad papituhon SM, adong ma tolu halak Heber na dipasupasu alani habaranion dohot haporseaon. Di tingki i dipapungu Raja Nebukadnesar do angka pejabatna. Disuru ma nasida asa dohot manomba patung na timbo na dibahen sian mas. Manang ise na so olo, ingkon dipamasuk tu panutungan. Barani do nasida mangalusi Raja Nebukadnesar jala didok ma, ”Molo lomo roha ni Debatanami, na huoloi hami, sai paluaonna do hami sian liang pamurunan na marnalanala i dohot sian tanganmu, ale rajanami. Alai nang so lomo rohana, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere.” (Dan. 3:16-18) Disurat do di Daniel 3:19-30 songon dia nasida dipalua Jahowa. Ra ndang songon i na taadopi. Alai, pos do rohanta, linggoman ni Jahowa do hita molo tapatudu habaranion dohot haporseaonta songon nasida.
Mangalului Arta na Adong di Bibel
(Daniel 1:5) Dung i diboho rajai ma tu nasida bohal siganup ari sian sipanganon ni rajai, sian anggur siinumonna sandiri, jala ajaran nasida tolu taon lelengna, asa dung salpu i, ingkon marhalado nasida di jolo ni rajai.
(Daniel 1:8) Alai anggo si Daniel nunga marsangkap hian di bagasan rohana, asa unang ramunanna dirina, marhite sian sipanganon ni rajai dohot marhite sian anggur siinumonna; jadi dipangido ma sian sintua ni angka naposo i, asa unang ingkon ramunanna dirina.
it-2-IN 110
Si Mesak
Adong tolu alana boasa nasida ndang olo mangallang sipanganon ni raja na boi mambahen nasida ’ramun’: (1) Mangihuthon Patik ni si Musa, ramun do angka jagal na dipangan halak Babel; (2) olo do ra, ndang diusehon tu tano mudar ni binatang i tingki diseat, manang mate so sineat do binatang i; (3) jotjot do halak kapir mamelehon sipanganonna tu ganaganaan andorang so dipangan, jala dietong do i gabe panombaon ni nasida.—Dan 1:8; bandingkon 1Kor 10:18-20, 28.
(Daniel 2:44) Alai di tingki hinarajahon ni angka rajai, padirion ni Debata, na di surgo i, sada harajaon na so tarpapatu ro di salelenglelengna, gomgomanna pe ndang pasahatonna tu bangso na asing; ropuhanna do tahe sogot saluhut angka harajaon i, jala pansingkononna, alai hot do anggo na sasada i ro di saleleng ni lelengna.
w12-IN 15/6 17, kotak
AHA DO LAPATAN NI ”SALUHUT ANGKA HARAJAON I”?
Hombar tu surirang Daniel 2:44, Harajaon ni Debata laho mangaropukhon ”saluhut angka harajaon i”. Na didok dison i ma angka harajaon na digombarhon di angka bagian patung i.
Aha do na masa tu pamarentaon ni jolma na asing? Surirang na asing di Pangungkapon paboahon hatorangan na tangkas. Didok disi ”angka raja ni liat portibi on” marpungu laho mangalo Jahowa di ”ari na bolon i, ari ni Debata, Sigomgom saluhutna”. (Pgk. 16:14; 19:19-21) Alani i, ndang holan harajaon na digombarhon angka bagian ni patung na laho ripashononNa, alai dohot do angka pamarentaon ni jolma na asing.
w01-IN 15/10 6 ¶4
Cara Asa Boi Dame Portibi On
Alusna adong di Daniel 2:44 na mandok, ”Alai di tingki hinarajahon ni angka rajai [na mamarenta di tingki ari parpudi] padirion ni Debata na di surgo i ma harajaon na hot saleleng ni lelengna, jala ndang lehononNa tu na asing. Ropuhanna do tahe sogot saluhut angka harajaon i [pamarentaon ni jolma], jala pansingkononna, alai hot do anggo na sasada i ro di saleleng ni lelengna.” Boasa ingkon ’ropuhan’ ni Harajaon ni Debata angka pamarentaon ni jolma? Alana dijugulhon angka pamarentaon i do laho mangkaringkothon dirina, songon na binahen ni Sibolis di Porlak Eden. Jala maralo do on tu lomo ni roha ni Jahowa. (Ps. 2:6-12; Pgk. 16:14, 16) Tasungkun ma di rohanta, ’Na mangihuthon harajaon ni Debata do ahu manang na ndang?’
Panjahaion Bibel
(Daniel 2:31-43) Maralatan do ho, ale rajanami, gabe ida ma, adong gombaran sada apala na bolon tung na timbo sahali do gombaran i, jala sillamna tung na mauliutus do, jongjong di adopanmi, jala rupana mansai songkal. 32 Ia ulu ni gombaran i sian sere palangki, andorana dohot botohonna sian perak, butuhana dohot haehaena sian tombaga. 33 Bitisna sian bosi, patna deba sian bosi, deba sian tano liat. 34 I do na niidam maralatan, paima mungkit sada batu sian ginjang, alai ndada niungkit ni tangan, laos ditipa ma gombaran i di patna na sian bosi marsaor tano liat, laos maropuk dibahen. 35 Jadi rap maropuk ma bosi, tano liat, tombaga, perak dohot sere, jala gabe tudoshon hurangkam, na hinabangkon ni alogo sian pardegean, sandok tung na so jumpang be ingananna. Ia batu na manipa gombaran i manjadi dolok batu na bolon, jala digohi liat portibi on. 36 I ma nipi i, jujurna pe paboaonnami ma nuaeng di jolo ni rajai. 37 Ia ho ale rajanami! Raja ni angka raja do ho nunga dilehon Debata na di surgo i tu ho harajaon, hagogoon, huaso dohot hamuliaon. 38 Manang didia pe maringan jolma manisia ro di binatang di ladang dohot pidong na martongatonga langit, nunga dipasahat ibana tu bagasan tanganmu, jala dipabangkit ho bahen panggomgomi di nasida luhutna: Ho do tahe ulu sere i! 39 Alai dung salpu ho, soluk ma harajaon na asing sada, na moru sian ho; soluk muse harajaon na asing, i ma patoluhon i, na sian tombaga, gomgomanna ma sandok tano on. 40 Ia harajaon paopathon i, togu do songon bosi; ai suang songon bosi mangaropuhi dohot mangarosahi luhutna, ingkon songon i ropuhanna, jala rosahanna luhutna i. 41 Alai na niidam angka pat dohot jarijari ni pat, deba sian tano liat, jala deba sian bosi, boaboa ni harajaon na binagi do i; alai tading do di bagasanna hatoguon ni bosi, sandok songon na niidam bosi marsaor tano liat. 42 Ia jarijari ni pat i deba sian bosi, jala deba sian tano liat; marboaboa togap ni na sabagian harajaon i, getes na sabagiannari. 43 Alai songon na niidam bosi marsaor tano liat, boaboa ni na masialian angka jolma pangisina i, alai ndang olo sada situtu, songon bosi na so tarpasada tu tano liat.
25 SEPTEMBER–1 OKTOBER
ARTA NA ARGA NA ADONG DI BIBEL | DANIEL 4-6
”Tongtong do Hamu Mangulahon Lomo ni Roha ni Jahowa?”
(Daniel 6:8-11) Nunga martuptup saluhut angka induk ni harajaon i, angka pangarajai dohot sintua, angka panuturi dohot partogi, asa dibahen rajai sada patik, jala ditingtingkon oraora, paboa na so jadi manang ise di bagasan tolupulu ari on mangido manang aha, nang tu debata dia nang tu jolma, nda holan tu ho, ale rajanami, ingkon timpalhononhon ibana tu godung parbabiatan. 9 Dibahen i ale rajanami, ingkon pahotonmu oraora i jala bahenonmu sada surat, na so tarpauba, hombar tu uhum ni halak Madai dohot Persia, na so jadi ubaon. 10 Dung i didokkon raja Darius ma sahap on surat patik dohot oraora i. 11 Ia si Daniel, dung dibege, naung tarsurat surat sisongon i, nangkok ma ibana tu bagasan jabuna, alai adong do jandela angka na talak tungkan Jerusalem di bagasan bilutna parginjang; jadi tolu hali di na sadari ibana mangalompit ulu ni totna, laho martangiang dohot mandok mauliate tu Debatana, sandok songon na somal binahenna na sai laon.
w10-IN 15/11 6 ¶16
Hamu Angka Na Poso, Sai Hata ni Debata ma na Manogunogu Hamu
16 Boasa ingkon tongtong diulahon hamu lomo ni roha ni Jahowa nang pe ndang diida halak? Rimangi ma: Boi do hamu mambahen hansit roha ni Jahowa manang mambahen las rohaNa. (1 Mus. 6:5, 6; Poda 27:11) Mangkorhon do parniulaonmu tu pangkilalaan ni Jahowa, ala ”disarihon do hamu”. (1 Ptr. 5:7) Lomo do roha ni Jahowa molo ditangihon hamu Ibana. Jala, parohon laba do i tu hamu. (Jes. 48:17, 18) Pigapiga halak Israel najolo, ndang olo manangihon tudutuduNa, gabe hansit ma roha ni Jahowa. (Ps. 78:40, 41) Alai, holong do roha ni Jahowa tu si Daniel. Didok surusuruan do ibana ”baoa hasudungan ni roha”. (Dan. 10:11) Boasa? Ala tongtong do ibana marsihohot tu Debata, di jolo ni na torop nang tingki ndang diida halak.—Jaha Daniel 6:10.
w06-IN 1/11 24 ¶12
Songon Jahowa, Diargai Hamu do Angka na Badia?
12 Godang do na tardok badia di hangoluan ni angka halak na miniahan, dohot di angka dongan ni nasida. Badia do paralealeonta tu Jahowa. (1 Kron. 28:9; Ps. 36:8) Alani i, ndang lomo rohanta molo adong na manegai paralealeonta tu Jahowa. (2 Kron. 15:2; Jak. 4:7, 8) Ringkot do tangiang asa boi tongtong solhot paralealeonta tu Jahowa. Nang pe diorai pamarentaon di tingki i si Daniel martangiang, alai sai tongtong do ibana martangiang. (Dan. 6:8-12) ”Tangiang ni angka na badia” manang tangiang ni angka na miniahan, dipatudos songon pelean di bagas joro. (Pgk. 5:8; 8:3, 4; 3 Mus. 16:12, 13) On manggombarhon badia do tangiang i. Hasangapon do di hita boi paboahon manang aha pe tu Jahowa, Sigomgom liat portibi on! Alani i, sada ulaon na badia do molo martangiang hita!
(Daniel 6:17) Dung i didokkon rajai ma boanon si Daniel, jala timpalhononhon tu bagasan godung parbabiatan. Alai ninna rajai huhut mandok si Daniel: Sai dipalua Debatam na tongtong nioloanmi ma ho!
(Daniel 6:21) Jadi dung jonok ibana tu godung i, lungun ma suarana manjou si Daniel; didok rajai ma mandok si Daniel: O Daniel, naposo ni Debata na mangolu i! Beha tarpalua Debata na tongtong nioloanmi do ho sian angka singa i?
w03-IN 15/9 15 ¶2
Boasa Ingkon Tajugulhon Martangiang?
2 Songon dia do Jahowa maradophon si Daniel? Tingki ro surusuruan na margoar si Gabariel mangalusi tangiangna, didok do si Daniel ”jolma hasudungan ni roha”. (Dan. 9:20-23) Di bagasan surirang ni si Hesekiel, didok Jahowa do si Daniel halak na tigor. (Hes. 14:14, 20) Tontu, ala martangiang, gabe solhot ma paralealeon ni si Daniel tu Jahowa. Tangkas do i diboto si Darius.—Dan. 6:17.
(Daniel 6:23, 24) Disuru Debatangku do surusuruanna na mangkuntam baba ni singa i, asa unang ahu dihahua, ala na lidang ahu jumpang di adopanna; di jolomi pe, ale rajanami, ndang huulahon hajahaton nanggo sada. 24 Jadi las situtu ma roha ni rajai alani, didokkon ma taiton si Daniel tu ginjang sian bagasan godung i. Jadi ditait halak ma si Daniel tu ginjang sian bagasan godung i gabe ndang adong mahua agia aha jumpang di ibana, ala marhaposan ibana tu Debatana.
w10-IN 15/2 18 ¶15
”Didok Tondi dohot Oroan I: Ro ma Ho!”
15 Dung marborngin di liang ni singa, ro ma raja i tusi. Didok ma, ”tarpalua Debata na tongtong nioloanmi do ho sian angka singa i?” Dialusi si Daniel ma, ”Sai mangolu ma ho, ale rajanami ro di salelenglelengna! Disuru Debatangku do surusuruanna na mangkuntam baba ni singa i, asa unang ahu dihahua, ala na lidang ahu jumpang di adopanna; di jolomi pe, ale rajanami, ndang huulahon hajahaton nanggo sada.” Dipasupasu Jahowa do si Daniel ala tongtong marhobas tu ibana.—Dan. 6:20-23.
Mangalului Arta na Adong di Bibel
(Daniel 4:7, 8) On do nian angka alatan ni ulungku di atas podomanku: Maralatan ahu gabe huida jongjong sada hau di parsitongaan ni tano on, tung na timbo sahali do. 8 Dung i lam tu balgana dohot tu bolonna hau i, jala timbona sahat ro di langit, jala tarida do sahat ro di ujung ni liat portibi on.
(Daniel 4:17-19) Ia hau, na niidami, lam tu balgana dohot bolonna, ianggo pala timbona sahat ro di langit, jala tarida do i di liat portibi on; 18 Jala uli dangkadangkana, jala ramos parbuena, singkop panganon marmudu saluhutna, jala marlinggomlinggom angka binatang na di harangan di toruna, jala marasari angka pidong na martongatonga langit di dangkadangkana: 19 Ho do i, ale rajanami, naung manjadi balga ho jala margogo, jala naung timbul hatongamonmu, pola tung sahat ro di langit, jala gomgomanmu sahat ro di ujung ni tano on.
w07-IN 1/9 18 ¶5
Angka na Denggan sian Buku Daniel
4:7, 8, 17-19—Aha do na digombarhon hau na balga di nipi ni Si Nebukadnesar? Mulana, hau i manggombarhon si Nebukadnesar na gabe parhuaso di portibi on. Alai ala didok pamarentaonna sahat tu ”ujung ni tano on”, on patuduhon adong dope gombaran na umbalga. Daniel 4:14 pahombarhon nipi i tu ”harajaon” ni Debata na laho marhuaso tu jolma. Alani i, boi do hau i manggombarhon huaso ni Jahowa di tano on. Dua harajaon ma na manggohi nipi i. Sada pamarentaon ni si Nebukadnesar, na sada nai pamarentaon ni Jahowa.
(Daniel 5:17) Dung i ro ma alus ni si Daniel mandok tu rajai: Ianggo angka silehonlehonmi tinggal di ho ma i, jala angka siluami tu halak na asing ma basabasahon! Alai anggo surat i sai jahaonku do di rajai, jala pajojoronku tu ibana lapatanna.
(Daniel 5:29) Dung i ro ma hata ni si Beltsasar mandokkon manolukkon baju dapdap tu si Daniel, jala horunghorung sere tu rungkungna, jala tingtingkonon ni halak taringot tu ibana paboa ibana raja paitolu di bagasan harajaon i.
dp-IN 106-107 ¶14-15
Opat Hata na Paubahon Portibi
Dijou ma si Daniel tu adopan ni Raja Beltsasar. Ndang maila nasida mangido pangurupion tu halak Jahudi. Hape diinsahi nasida do Debata ni halak Israel. Dipuji si Beltsasar do si Daniel. Molo olo si Daniel paboahon lapatan ni hata na disurat di dinding i, dilehon ma upa tu ibana. I ma gabe halak na patoluhon di pamarentaonna. (Daniel 5:13-16) Dung i, diida si Daniel surat i. Diurupi tondi parbadia ma ibana paboahon lapatanna. Surat i marisi Panguhuman ni Debata Jahowa. Boasa barani si Daniel paboahon i di adopan ni raja, tungganeboru dohot angka pejabat? Nunga dipuji ibana, dilehon hamoraon dohot hasangapon, olo dope ibana paboahon panguhuman i?
Barani do si Daniel mandok, ”Ianggo angka silehonlehonmi tinggal di ho ma i, jala angka siluami tu halak na asing ma basabasahon! Alai anggo surat i sai jahaonku do di rajai, jala pajojoronku tu ibana lapatanna.” (Daniel 5:17) Diangkui si Daniel do huaso ni si Nebukadnesar na lomolomona, mambunu, mamungkul, mangangkat, mandabuhon manang ise pe. Alai, dipaingot si Daniel do si Beltsasar na Jahowa do na mambahen si Nebukadnesar marhuaso. Jahowa do na manorui raja na marginjang ni roha. Dipaksa do si Nebukadnesar mangangkui, Jahowa”Debata na tumimbul i do angka harajaon ni manisia, jala guru lomo ni rohana pabangkithon manang ise manggomgomisa.”—Daniel 5:18-21.
dp–IN 109 ¶22
Opat Hata na Paubahon Portibi
22 Nunga taralusi be sungkunsungkun i. Taluhonon ni tentara Madai-Persia nama Babel. Nang pe songgot roha ni si Beltsasar tu barita panguhuman i, alai digohi ibana do janjina. Disuru ma suruanna asa manolukkon baju dapdap tu si Daniel. Dibahen ma horunghorung sere tu ibana jala ditingtingkon gabe halak patoluhon di harajaon i. (Daniel 5:29) Dijalo si Daniel do i, ala diboto ibana on patuduhon hasangapon ni Jahowa. Ra, dipingkiri si Beltsasar do molo dilehon upa tu panurirangNa gabe ndang saut panguhuman ni Jahowa i. Alai nunga tarlambat be sude.
Panjahaion Bibel
(Daniel 4:26-34) Dung salpu sampulu dua bulan mardalandalan ma rajai di atas tarup ni bagasna di huta Babel. 27 Jadi ro ma hata ni rajai songon on: Nda on do Babel na bolon i, naung hupauli bahen hundulan ni harajaon marhitehite gogo ni hasangaponku, bahen hamuliaon ni hatongamonku? 28 Laos di bagasan pamangan ni rajai dope hata i, ro ma sada suara sian banua ginjang: Boaboa tu ho, ale raja Nebukadnesar, ia harajaonmi nunga munsat sian ho. 29 Ingkon pabalion ni halak ma ho sian tongatonga ni jolma, jala sisada inganan do ho dohot binatang di harangan; jala lehononna ho mangan duhutduhut songon lombu, pola pitu taon lelengna masa tu ho, paima dung diparhatopot roham saguru di Debata na tumimbul i do harajaon ni manisia, jala dibasabasahon tu manang ise lomo ni rohana; 30 Laos di na sangombas i sintong ma hata i songgop tu si Nebukadnesar, ai dipabali halak ma ibana, jala manjampal duhutduhut ibana songon lombu, jala marudan marari dagingna, pola tung tubu obukna songon imput ni pidong raja ualu ganjangna, jala sisilonna nasa ganjang ni sisilon ni pidong. 31 Alai di ujung ni angka ari i manaili ma ahu, Nebukadnesar i dompak banua ginjang, gabe mulak marroha ma ahu muse, jala hupuji Debata na tumimbul i, hupasangap huhut jala marmulia hubahen Debata na mangolu ro di saleleng ni lelengna, gomgomanna pe ro di saleleng ni lelengna do, jala harajaonna marsundutsundut. 32 Saluhut isi ni tano on pe hira na soada do bilangan martimbangkon ibana; jala guru lomo ni rohana do dibahen tu parangan angka na lohot di langit dohot tu isi ni tano on; jala ndang adong nanggo sada halak na tuk manampar tanganna manang mandok tu ibana: Aha do na binahenmi? 33 Dung i uju i mulak marroha ma ahu, mulak muse dohot hamuliaon ni jujunganku, habalgaonku dohot hatongamonku, ro muse angka panuturingku hian dohot jolma angka na sangap mangalului ahu, dipajujungkon muse tu ahu harajaonku, jala tamba dope hamuliaonku. 34 Dibahen i ahu, Nebukadnesar, mamujimuji, patimbulhon dohot mangalehon hamuliaon tu raja na di surgo i; ai saluhut pambahenanna hasintongan do, jala angka lapangna hatigoran, jala tarbahensa do pajepolhon manang ise na marpangalahohon hajungkaton.