Referensi tu Parpunguan Hangoluan dohot Pangkobasion Na Laho Diparsiajari
6-12 NOVEMBER
ARTA NA ARGA NA ADONG DI BIBEL | AMOS 1-9
”Lului Hamu ma Jahowa, Asa Mangolu Hamu!”
(Amos 5:4) Ai songon on do hata ni Jahowa tu pinompar ni Israel: Lulu i hamu ma ahu, asa mangolu hamu!
(Amos 5:6) Lulu i hamu ma Jahowa, asa mangolu hamu! Asa unang dirampok bagas ni si Josep, songon api, jala suda dipangan, hape ndang adong pangintopi di Betel nanggo sahalak.
w04-IN 15/11 24 ¶20
Lului ma Jahowa, na Mangida Rohanta
20 Tontu, ndang mura di halak Israel tingki i asa tongtong marsihohot tu Jahowa. Maol do laho mangadopi elaela. Songon i do na dihilala halak Kristen saonari on, na poso manang naung matua. Alai, holong do roha ni pigapiga halak Israel tu Jahowa, jala marsitutu do nasida laho palashon rohaNa. Alani i, gabe taronjar do rohanasida laho mangulahon panombaon na sintong. Digokkon Jahowa do nasida, songon na disurat di Amos 5:4, ”Lulu i hamu ma ahu, asa mangolu hamu!” Saonari on, tongtong do dipatudu Debata asi ni rohaNa tu angka halak na olo marhamubaon, dohot angka halak na mangalului Ibana, i ma na olo manjalo parbinotoan na sintong sian Hata ni Debata jala mangulahon lomo ni rohaNa. Ndang mura laho mangulahon i, alai i do na boi parohon hangoluan salelenglelengna.—Johannes 17:3.
(Amos 5:14, 15) Lulu i hamu ma na denggan, unang tagonan na jat i, asa mangolu hamu! Asa tongon Jahowa, Debata Zebaot donganmuna, songon na nidokmuna i. 15 Hagigihon hamu ma na jat i, jala haholongi hamu na denggan, jala hajongjongkon hamu uhum di partungkoan! Anggiat tung marpangulahi roha ni Jahowa Debata Zebaot mida pasipasi ni Josep.
jd-IN 90-91 ¶16-17
Manomba Jahowa Hombar tu UhumNa
16 Ndang marbisuk si Adam tingki mamillit prinsip na dia do na ingkon diihuthon ibana. Boi do hita gabe marbisuk tingki mamillit? Dipasingot si Amos do hita asa marsitutu mamingkirhon on, tingki didok ibana, ”Hagigihon hamu ma na jat i, jala haholongi hamu na denggan.” (Amos 5:15) Si William Rainey Harper, na hea gabe dosen bahasa dohot sastra Semitik di University of Chicago mandok taringot ayat i, ”Sadalan do prinsip na dipingkiri [si Amos] tu na dihalomohon Jahowa.” I do parsiajaran na umbalga na boi tadapot sian 12 panurirang i. Rade do hita mangihuthon prinsip ni Jahowa taringot dia do na boi dohot na so boi taulahon? Dipaboa do angka prinsip i tu hita marhite Bibel jala dipatorang do i marhite angka halak Kristen na marsihohot jala berpengalaman, i ma angka ”naposo haposan jala na marroha”.—Mateus 24:45-47.
17 Molo tahasogohon do angka na sala, gabe ummura ma hita laho pasidingkon angka na so dihalomohon Debata. Umpamana, diboto sahalak baoa do ra taringot bahaya ni mangida video dohot gombar na porno, jala marsitutu do ibana asa unang mangida sisongon i. Alai, songon dia do ’pangkilalaanna’ sandiri tu situs web porno? (Epesus 3:16) Molo diulahon ibana do sipasingot sian Debata na adong di Amos 5:15, gabe ummura ma ibana laho mangkasogohon angka na roa. Ujungna, boi ma ibana monang mangadopi angka na mangambati di paralealeonta tu Debata.
Mangalului Arta na Adong di Bibel
(Amos 2:12) Hape dipainumhon hamu do anggur tu halak na pinapulik, jala ditonahon hamu tu angka panurirang: Ndang jadi hamu manurirangi!
w07-IN 1/10 14 ¶8
Angka na ringkot sian Buku Joel dohot Amos
2:12. Unang ma hita mambahen metmet roha ni angka perintis, pengawas keliling, utusan injil, manang anggota keluarga Betel. Unang ma tajujui nasida asa manadingkon ulaonnasida i, jala mangihuthon parngoluon na somal di angka halak. Alai, tajujui ma nasida asa tongtong marsihohot jala ringgas di ulaonnasida na mansai denggan i.
(Amos 8:1, 2) Songon on do dipataridahon Tuhan Jahowa tu ahu, ida ma, sada hirang na marisi parbue naung malamun. 2 Jadi ninna ibana ma: Aha do na niidam, ale Amos? Jadi ningku ma: Sada hirang marisi parbue naung malamun dung i ninna Jahowa ma tu ahu: Nunga jumpang hasisimpul ni bangsongku Israel, ndang be marsombusombu ahu mida ibana.
w07-IN 1/10 14 ¶6
Angka na ringkot sian Buku Joel dohot Amos
8:1, 2—”Sada hirang na marisi parbue naung malamun” manggombarhon aha? On manggombarhon ari ni Jahowa naung jonok. Parbue naung malamun diputik di ujung ni taon. Tingki dipatudu Jahowa ”sada hirang na marisi parbue naung malamun” tu si Amos, Ibana patuduhon naung jonok na ma ajal ni halak Israel. Alani i, didok Debata ma tu si Amos, ”Nunga jumpang hasisimpul ni bangsongku Israel, ndang be marsombusombu ahu mida ibana.”
Panjahaion Bibel
(Amos 4:1-13) Tangihon ma hata on, hamu ale lombu sian Basan, angka na di dolok ni Samaria, angka na mangarupa halak na pogos, jala dipapisatpisat halak na metmet, angka na mandok tu tuannasida: Boan hamu tuson, asa husobur hami. 2 Nunga pola marmangmang Tuhan Jahowa tu habadiaonna, ida ma, ro do angka ari sogot tu hamu, saraton ni halak ma hamu marhitehite haithait, jala pinomparmuna marhitehite hail ni pardengke. 3 Jadi ruar ma hamu sian bungbung ni parik, masitondong dalanna di jolona be do, jala timpalhononmuna ma ajiajiani, ninna Jahowa. 4 Ro ma hamu tu Betel asa manjahati! Tu Gilgal, patamba pangalaosion! Jala boan hamu manogotna i peleanmuna dohot saparsampulumuna ganup patoluarihon. 5 Jala tutung hamu pelean hamauliateon sian na niigaran, jala tingtingkon hamu pelean bagabaga, baritahon hamu! Ai i do lomo ni rohamuna, hamu ale anak ni Israel, ninna Tuhan Jahowa. 6 Ahu pe antong, hulehon do tu hamu haiason ni ipon di saluhut hutamuna, jala hararapar di sagusagu di saluhut ingananmuna, alai laos so mulak hamu tu ahu, ninna Jahowa. 7 Ahu pe antong, huontok do sian hamu udan, arga tolu bulan nari dope asa gotilon. Dung i huta nasada hupaudan, huta na sadanari ndang hupaudan; hauma santurpuk dapotan udan, na santurpuk nari, na so tininggang ni udan, marsik do. 8 Jadi madoado dua manang tolu huta tu huta na sada naeng minum aek nian, hape ndang sombu. Alai laos so mulak hamu tu ahu, ninna Jahowa. 9 Nunga nian huhonahon tu hamu antingano dohot sirara, jala godangan porlakmuna nunga suda digagat sihapor ro di porlak anggurmuna, hau antajau dohot hau jetunmuna. Alai laos so mulak hamu tu ahu ninna Jahowa. 10 Nunga nian hutongos tu tongatongamuna begu siherut marpangalaho songon uju di Misir, huragehon angka dolidolimuna marhitehite podang, huhut tarboan hodamuna, jala nunga hupaanggohon angir ni parsaroanmuna tu bagasan igungmuna, laos so mulak hamu tu ahu, ninna Jahowa. 11 Nunga tung hupabalik hamu, songon hababalik ni Sodom dohot Gumora, binahen ni Debata, jadi doshon sipusipu na tinait sian api do hamu, hape laos so mulak hamu tu ahu, ninna Jahowa. 12 Dibahen i, songon i do bahenonku tu ho ale Israel! Antong ala huondam bahenonku songon i tu ho, marhobas ma ho manjumpangkon Debatam, ale Israel! 13 Ai ida ma, ibana do Sijadi angka dolok jala sitompa alogo, jala dipabotohon tu jolma manang aha sangkapna; ibana mambahen sibalik hunik gabe haholomon, jala didalani angka buntulbuntul ni tano on: Jahowa, Debata Zebaot goarna.
13-19 NOVEMBER
ARTA NA ARGA NA ADONG DI BIBEL | OBAJA 1–JONA 4
”Marsiajar ma Sian Hasalaan”
(Jona 3:1-3) Dung i ro ma muse hata ni Jahowa tu si Jona paduahalihon, songon on: 2 Borhat ma ho laho tu Ninive huta na bolon i, jala tingtingkon tusi tingting sipaboaonku tu ho. 3 Jadi borhat ma si Jona laho tu Ninive hombar tu hata ni Jahowa. Alai huta na bolon do ianggo Ninive di jolo ni Debata, partoluarian mardalan lambasna.
Ibana Marsiajar sian Hasalaanna
22 Songon dia do si Jona? Dipatuduhon do hamauliateon tu Jahowa? I do. Dung tolu ari tolu borngin, ”diutahon ma si Jona tu pasir”. (Jona 2:11) Boi ma tapingkirhon, ndang ingkon marlange si Jona asa sahat tu darat. Tutu, ingkon luluanna do dalan asa boi mulak tu jabuna. Alai ndang sadia leleng, diuji ma muse las ni roha ni si Jona. Jona 3:1, 2, mandok, ”Ro ma muse hata ni Jahowa tu si Jona paduahalihon, songon on: Borhat ma ho laho tu Ninive huta na bolon i, jala tingtingkon tusi tingting sipaboaonku tu ho.” Songon dia do bahenon ni si Jona?
23 Ndang mabiar be si Jona. Bibel paboahon tu hita, ”Borhat ma si Jona laho tu Ninive hombar tu hata ni Jahowa.” (Jona 3:3) Dioloi si Jona ma hata ni Jahowa. Tarida ma sian on molo ibana marsiajar sian hasalaanna. Hita pe porlu do marsiajar sian si Jona. Sude do hita mardosa jala jotjot sala. (Rom 3:23) Alai, pintor mandele do hita alani hagaleonta? Manang muba do hita jala mangoloi Debata?
Mangalului Arta na Adong di Bibel
(Obaja 10) Ala ni hajungkaton tu anggim si Jakkob, ingkon hungkupan ni haurahon ma ho, jala ingkon siaphononhon ho ro di salelenglelengna.
w07-IN 1/11 13 ¶5
Angka na ringkot sian Buku Obaja, Jona, dohot Mika
10—Songon dia Edom ’disiaphon ro di salelenglelengna’? Songon naung disurirangkon, ndang adong be halak Edom. Bangso on nunga dilengsehon raja Nabonidus sian Babel di parsitongaan ni taon 600an SM. Dung hirahira 400 SM, maringanan ma halak Nabatea di luat ni halak Edom, gabe tading di Judea selatan ma halak Edom, na saonari didok Idumea. Dung dilengsehon halak Rom kota Jerusalem taon 70 M, ndang adong be halak Edom manang didia pe.
(Obaja 12) Hape nian, ndang jadi martilla pamerengmu di ari ni anggim, di ari hinamagona, jala ndang jadi marlas ni roha ho mida angka anak ni Juda di ari hasisiapnasida i, jala ndang jadi teal pangkulingmu di ari hagogotanna.
jd-IN 112 ¶4-5
Maradophon na Asing Hombar tu na Dihalomohon Debata
4 Tadapot do parsiajaran sian hata na dipaboa Debata tu halak Edom, i ma bangso di jonok ni inganan ni halak Israel, ”Hape nian, ndang jadi martilla pamerengmu di ari ni anggim, di ari hinamagona, jala ndang jadi marlas ni roha ho mida angka anak ni Juda di ari hasisiapnasida i.” (Obaja 12) Nang pe halak Tirus boi didok gabe ’haha’ ni halak Israel laho marbisnis, alai halak Edom do ’hahanasida’ na sasintongna, ala nasida do pinompar ni si Esau, haha ni si Jakkob. Jahowa do muse na mandok molo nasida ’haha’ ni halak Israel. (5 Musa 2:1-4) Alani i, ndang tama molo halak Edom gabe marlas ni roha tingki bangso Israel dilengsehon halak Babel.—Hesekiel 25:12-14.
5 Tangkas ma, ndang lomo roha ni Debata mangida pambahenan ni halak Edom maradophon halak Jahudi, angginasida i. Alani i, tasungkun ma dirinta, ’Songon dia do Debata mangida pambahenanku tu angka dongan saleleng on?’ Na porlu taparrohahon, i ma songon dia pambahenanta tu sahalak donganta molo adong parsoalanta tu ibana. Molo ”marsogo ni roha” do hamu, sai diingot hamu do hasalaan ni donganmuna jala ndang olo hamu laho pasaehon i? (Kolosse 3:13, Bibel siganup ari; Josua 22:9-30; Mateus 5:23, 24) Mangkorhon do i tu pambahenanmuna tu ibana. Gabe ndang diantoi hamu be ibana, gabe mandao do hamu sian ibana, manang mangkatahon angka na so denggan taringot ibana. Songon dia do molo ujungna dipasingot angka sintua ma ibana ala mangulahon hasalaan? (Galatia 6:1) Gabe las do rohamuna alani na diadopi donganta i, songon na diulahon halak Edom? Parange na songon dia do na dihalomohon Debata di tingki sisongon i?
Panjahaion Bibel
(Jona 3:1-10) Dung i ro ma muse hata ni Jahowa tu si Jona paduahalihon, songon on: 2 Borhat ma ho laho tu Ninive huta na bolon i, jala tingtingkon tusi tingting sipaboaonku tu ho. 3 Jadi borhat ma si Jona laho tu Ninive hombar tu hata ni Jahowa. Alai huta na bolon do ianggo Ninive di jolo ni Debata, partoluarian mardalan lambasna. 4 Dung i dipungka si Jona ma mardalan di bagasan huta i parsadarian, jala martingting ma ibana mandok: Opatpulu ari nari na ma, jadi marongrong ma Ninive! 5 Jadi porsea ma angka jolma i isi ni Ninive i di Debata, jala ditingtingkon mandokkon marpuasa sadari, jala marulos hori nasida sian halak na magodang ro di na metmet. 6 Dung i sahat ma hata i tu raja ni Ninive. Jadi hehe ma ibana sian habangsana, jala diosari pangkeanna hian sian dagingna, jala martujungkon hori ibana, jala hundul tu sirabun. 7 Dung i disuru rajai ma martingting paboahon tu bagasan Ninive, songon on do tingting ni rajai dohot donganna angka na sangap: Nang jolma dohot pinahan, tole lombu dohot birubiru, ndang jadi mandai agia aha, ndang jadi manggagat, aek pe ndang jadi inumonna. 8 Ingkon marulos hori jolma, nang pinahan, jala gogoonna be joujou tu Debata; jala ganup jolma ingkon mulak sian dalanna na roa i, dohot sian hatodoson na niula ni tangannasida. 9 Ise umbotosa, anggiat tung marpangulahi jala solsolan ni Debata rohana, jala mulak ibana sian parpiar ni rimasna, asa unang mago hita. 10 Jadi dung diida Debata pambahenannasida, na mulak i nasida sian dalannasida angka na roa i, gabe disolsol Debata ma rohana taringot tu hamagoan na nilumbahonna bahenonna hian tu nasida, gabe ndang saut dibahen.
20-26 NOVEMBER
ARTA NA ARGA NA ADONG DI BIBEL | MIKA 1-7
”Aha do na Dipangido Jahowa sian Hita?”
(Mika 6:6, 7) Marhitehite aha tarbahen ahu mandapothon Jahowa, marsomba ahu tu Debata na di ginjang? Marhitehite angka pelean situtungon ulaning ahu manjumpangkon ibana marhitehite anak ni lombu, angka na marumur sataon ulaning? 7 Lomo do ulaning roha ni Jahowa mida hambing tunggal marriburibu? Manang mida angka sunge miak marloksaloksa? Lehononku do ulaning anak buhabajungku abul ni pangalaosingki? Parbue ni butuhangku ulaning abul ni dosa ni rohangku?
w08-IN 15/5 6 ¶20
Ingkon Songon Dia do Pambahenanta Maradophon na Asing?
20 Lomo do roha ni Debata molo mardame hita dohot angka dongan. Sada bagian na ringkot do i di ulaon panombaon na sintong. Marisuang do pelean tu Jahowa molo halak na mamelehon i ndang denggan pambahenanna tu donganna. (Mik. 6:6-8) Alani i, dijujui Jesus do angka siseanna asa ”mardame” dohot na asing. (Mat. 5:25, Bibel siganup ari) Didok si Paulus do muse, ”Ia tarrimas hamu, unang ma mardosa! Unang ma sanga mate mata ni ari, so mintop rimasmuna. Unang pasiat hamu sibolis i!” (Eps. 4:26, 27) Molo muruk hita, ingkon hatop ma hita pasaehon parsoalan i asa unang tongtong hita muruk, jala ujungna dipangke Sibolis ma i gabe jorat di hita.—Luk. 17:3, 4.
(Mika 6:8) Nunga dipabotohon ibana tu ho, ale jolma manang aha na denggan, jala manang aha na niluluan ni Jahowa sian ho, nda holan na mangulahon uhum dohot holong ni roha di habasaon, jala marpangalaho haserepon maradophon Debatam.
w12-IN 1/11 22 ¶4-7
”Aha na Niluluan ni Jahowa Sian Ho?”
”Mangulahon uhum.” Taringot hata Heber ”uhum”, adong sada karya referensi mandok, ”marhaitan do on tu hatigoran na dihirim angka halak.” Dipangido Debata do hita asa unang paimbarimbarhon angka halak, hombar tu uhumNa. Molo ndang paimbarimbarhon halak hita, jujur, jala ias rohanta maradophon na asing, on patuduhon na taulahon do uhum i. (3 Musa 19:15; Jesaya 1:17; Heber 13:18) Molo taulahon i, gabe taronjar ma nasida laho mangulahon na sarupa tu hita.—Mateus 7:12.
”Holong ni roha di habasaon.” Ndang holan patuduhon habasaon na dipangido Debata sian hita, alai ingkon tahaholongi do i. Hata Heber ”habasaon” (kheʹsedh) boi do lapatanna gabe ”habasaon mardongan holong” manang ”holong na marsihohot”. Sahalak panulingkit Bibel mandok, ”Hata [kheʹsedh] lapatanna, i ma pardomuan ni holong, asi ni roha, dohot habasaon. Ndang cukup molo holan sada sian i.” Molo tahaholongi do habasaon, tapatudu ma i sian ias ni roha; las ma rohanta mangurupi angka halak. Ujungna, gabe martua do hita ala mangalehon.—Ulaon ni Apostel 20:35.
”Marpangalaho haserepon maradophon Debatam.” Ingkon ”marpangalaho haserepon” do hita laho mangihuthon poda ni Debata naung disurat di Bibel. Songon dia carana? Ingkon taangkui do hahuranganta, jala taingot ma na mardosa do hita di adopanNa. Alani i, ingkon tangkas do taboto aha na dipangido Debata jala aha na tolap taulahon.
Ndang hea dipangido Debata tu hita lobi sian na boi talehon tu Ibana. Lomo do rohaNa molo marsitutu hita laho manomba Ibana. (Kolosse 3:23) Diantusi ibana do hagaleonta. (Psalmen 103:14) Molo marserep ni roha do hita jala marsitutu mangantusi hahuranganta, boi ma hita marlas ni roha maradophon Ibana. Lului ma cara songon dia asa boi hamu marpangalaho haserepon maradophon Debata. LehononNa ma godang pasupasu tu hamu.—Poda 10:22.
Mangalului Arta na Adong di Bibel
(Mika 2:12) Sai na papunguonku do sandok ho, ale Jakkob! Sai na paluhutonku do pasipasi ni Israel, pasadaonku ma nasida, songon birubiru di bagasan bara, songon sada punguan di tongatonga ni adaran, riburan nasida dibahen torop ni jolma.
w07-IN 1/11 15 ¶6
Angka na Ringkot sian Buku Obaja, Jona, dohot Mika
2:12—Andigan do surirang taringot ’paluhuthon pasipasi ni Israel’ digohi? I parjolo sahali digohi di taon 537 SM, i ma tingki halak Jahudi mulak muse tu luat nasida sian habuangan di Babel. Di tingkinta saonari on, ”Israel ni Debata” do na manggohi surirang on. (Galatia 6:16) Sian taon 1919, nunga dipapungu halak Kristen na miniahan ”songon birubiru di bagasan bara”. Ala dohot do ”punguan bolon” sian ”birubiru na asing” mangihuthon nasida, i ma sian taon 1935, gabe ’riburan ma nasida dibahen torop ni jolma’. (Pangungkapon 7:9; Johannes 10:16) Gabe rap ma nasida marsitutu mangulahon panombaon na sintong.
(Mika 7:7) Alai anggo ahu manatap tu Jahowa do, jala dihalungunhon rohangku do Debata ni hatuaonku, sai tangihonon ni Debatangku do ahu.
w03-IN 15/8 24 ¶20
Aha do na Dipangido Debata sian Hita?
20 Molo tahilala pasupasu sian Debata, gabe taronjar ma rohanta maniru si Mika. Didok ibana, ”Dihalungunhon rohangku do Debata ni hatuaonku.” (Mika 7:7, Bibel siganup ari) Songon dia hata ni si Mika on mangurupi hita marhaposan tu Debata? Molo tapatudu hasabaron jala tongtong marpangkirimon, gabe ndang metmet rohanta ala ndang ro dope ari ni Jahowa i. (Poda 13:12) Tutu, sude do hita maimaima asa salpu portibi na jahat on. Alai, ganup minggu adong marribu halak na mamillit laho mangihuthon hata ni Debata. Ala taboto i, gabe sabar ma hita paimahon ari ni Debata. Sahalak Sitindangi naung leleng di hasintongan mandok, ”Molo huingot muse nunga 55 taon ahu parsidohot di ulaon marbarita, ndang rugi huhilala molo tongtong hupaimaima ari ni Jahowa. Gariada, gabe dao ma ahu sian angka na boi parohon jea.” Songon i do pangkilalaanmuna?
Panjahaion Bibel
(Mika 4:1-10) Jadi masa ma sogot di ujung ni angka ari: Ojak ma dolok ni joro ni Jahowa di punsu ni angka dolok, jala huminsat sian angka robean, jadi marrongoman ma tu ibana angka bangso. 2 Jadi mardalan ma torop bangso parbegu, angka dohononnasida ma: Beta hita nangkok tu dolok ni Jahowa, dohot tu joro ni Debata ni si Jakkob, asa diajarhon tu hita angka dalanna, jala mardalan hita di angka lapangna. Ai marharoroan sian Sion do patik i, jala hata ni Jahowa sian Jerusalem. 3 Jadi manguhum ma ibana di tongatonga ni torop angka bangso jala toruanna angka bangso bolon sahat ro di na dao; jadi patopahononnasida ma podangnasida bahen gigi, jala hujurnasida bahen sasabi. Ndang be sintahon ni bangso dompak bangso podang, jala ndang be guruhononnasida ruhut ni hamusuon. 4 Hundul be ma nasida di toru ni hau anggurna dohot di toru ni hau arana, jala ndang adong panonggoti, ai pamangan ni Jahowa Zebaot do na mandok i. 5 Ai saluhut angka bangso mardalani marhitehite goar ni debatana be, alai anggo hita mardalan marhitehite goar ni Jahowa Debatanta ro di saleleng ni lelengna. 6 Di ari na sasada i, ninna Jahowa, papungupunguonku ma jolma na mengkat, jala jolma na binolongkon paluhutonku muse ro di jolma na hupasipal na jolo. 7 Jala patindangonku jolma na mengkat i bahen pasipasi, jala jolma na dao binolongkon bahen bangso na gogo, jala Jahowa rajanasida di dolok Sion olat ni nuaeng ro di salelenglelengna. 8 Ianggo ho ale Migdal Eder, robean ni boru hian, ro do hamuliaonmu sogot tu ho; ro do huhut tu ho panggomgomion parjolo harajaon ni boru Jerusalem. 9 Ia nuaeng, boasa tung mangangguhi ho? Tung na so adong be raja di tongatongamu? Manang tung naung mago do panuturim, umbahen marsahit rian ho, songon boruboru na maniop siraraisan. 10 Paodon ma, jala lujukkon ale boru Sion, songon boruboru na naing mangintubu! Ai ingkon ruar ho anggo nuaeng sian huta i jala maringan di ladang, jala ingkon sahat ho tu Babel; disi ma ho paluaonna, disi ma tobuson ni Jahowa ho sian tangan ni musum.
27 NOVEMBER–3 DESEMBER
ARTA NA ARGA NA ADONG DI BIBEL | NAHUM 1–HABAKUK 3
”Tongtong ma Jaga jala Ringgas”
(Habakuk 2:1-4) Di atas panatapanku do ahu jongjong, jala tindang ahu tu partanobatoan, jala manatapnatap ahu marnida manang aha sidohononna tu ahu, jala manang aha alusna taringot tu alualungku. 2 Jadi ninna Jahowa mangalusi ahu: Surathon ma pangungkapon i, jala uhirhon tu angka batu panuratan, asa tangkas tarjaha nang pamolus. 3 Ai taringot tu tingki sogot dope pangungkapon i, jala hapogan mareahi ujung, jala ndang margabus. Tung sura pe lumemba, sai paimaima ma i, ai sai na ro do sogot ndang tagamon tartading. 4 Ida ma na teal do ibana, ndang tigor rohana di bagasan; alai anggo halak partigor i mangolu do binahen ni parsihohotna marhaporseaon.
w07-IN 15/11 10 ¶3-5
Angka na Ringkot sian Buku Nahum, Habakuk, dohot Sepania
2:1. Songon si Habakuk, ingkon tongtong do hita jaga jala ringgas di partondion. Jala ingkon rade do hita pahombarhon rohanta tu poda manang sipasingot na dilehon tu hita.
2:3; 3:16. Huhut tapaima ari ni Jahowa, tongtong ma hita ringgas.
2:4. Asa boi malua di ari panguhuman sian Jahowa na naeng ro, ingkon tongtong ma hita marsihohot.—Heb. 10:36-38.
Mangalului Arta na Adong di Bibel
(Nahum 1:8) Alai marhitehite aek na sumar sun siap inganannasida dibahen ibana, jala haholomon mangalotongi angka musuna.
(Nahum 2:7) Dipatalak nasida nian angka bahal ni angka batang aek, jadi malala ma bagas bolon ni rajai.
w07-IN 15/11 9 ¶2
Angka na Ringkot sian Buku Nahum, Habakuk, dohot Sepania
2:7—Aha do lapatan ni ”angka bahal ni angka batang aek” na dipatalak? Angka bahal on, i ma angka lubang na adong di tembok Ninive alani Sunge Tigris. Di taon 632 SM, tingki ro tentara ni Babel dohot Media, ndang biar roha ni halak Ninive. Dihilala nasida, tarlinggomi do nasida alani tembok i. Jala dihilala nasida ndang adong manang ise pe na boi masuk tu kota i. Alai, ro ma udan habahaba, ujungna gabe banjir ma Sunge Tigris. Sejarawan Diodorus mandok, alani banjir on, ”gabe lonong ma pigapiga luat di kota i jala marumpak ma pigapiga sian tembok ni kota i”. Alani i, gabe bungka ma angka bahal ni angka batang aek. Dos songon naung disurirangkon, pintor ditaluhon ma Ninive songon durame na mahiang na hona tutung.—Nahum 1:8-10.
(Habakuk 3:17-19) Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara. 18 Alai anggo ahu, marolopolop ma ahu di bagasan Jahowa, jala mariaia ahu mida Debata ni hatuaonku. 19 Jahowa, Tuhan i do hagogoonku, jala dibahen ibana do pathu tudoshon ursa tini, jala toguonna do ahu dumege angka dolokdolokku. I ma di pande ende mardongan parhinaloan.
w07-IN 15/11 10 ¶10
Angka na Ringkot sian Buku Nahum, Habakuk, dohot Sepania
3:17-19. Nang pe hita mangadopi hasusaan andorang so ro manang tingki ro Armagedon, pos ma rohanta lehononNa do ’gogo’ tu hita, huhut marlas ni roha hita manomba Ibana.
Panjahaion Bibel
(Habakuk 2:15–3:6) Marjea ma manang ise na painum donganna, mangusehon parpiar ni rimasmu, huhut pamabukkon ibana naeng marnida parsaemaraonna. 16 Ho pe ingkon hamahaphononmu ma haurahon gumodang sian hasangapon. Minum ma dohot ho, jala pasalang ma ho, tu ho ma sumuang marliat panginuman sian tangan siamun ni Jahowa jala utauta haleaon ali ni hasangaponmu. 17 Ai hadoboon binahenmu tu Libanon lingkup tu ho dohot hasisiap binahen ni binatang na nilelena, ala sapata ni mudar tu jolma dohot hadoboon tu tano i dohot tu huta ro di pangisina i sudena. 18 Tung aha ma guna ni ganaganaan na niuhir ni pandena? Ganaganaan na tinuang pe ro di guru pargapgap, umbahen tung marhaposan pande i tu jadijadianna sandiri, laho mambahen ganaganaan angka na mangungu. 19 Marjea ma manang ise na mandok tu hau: Ngot ma ho! Hehe ma ho, ale batu na mangungu! Tung tarbahen ibana ma mangajari? Ida ma, na nilampis do ibana dohot sere dohot perak, apus pe hosa, so adong di bagasan ibana. 20 Alai di bagasan joro habadiaonna do anggo Jahowa: Ingkon hohom ma maradophon ibana sandok tano on.
3 On ma tangiang ni panurirang Habakuk, marlogu andung. 2 Ale Jahowa, nunga hubege baritam, gabe mabiar ahu. Ale Jahowa, sai ulahi ma pangolu ulaonmu di parsitongaan ni angka taon, di parsitongaan ni angka taon ma i tutu pabotohon! Sai marningot ma ho di asi ni roha, nang di bagasan rimas. 3 Na ro sian Teman do Debata, jala na sun badia i sian dolok Elaparan Sela. Hamuliaonna mangkuphupi angka langit, jala gok pujipujianna do tano on. 4 Ia sondangna songon tiur ni mata ni ari do, pansar sian tanganna do angka sondangna, parhitean ni hagogoonna. 5 Di jolona mardalan begu siherut, jala mangihut tu ibana do begu na rahat. 6 Jongjong do ibana manatap manonggor tu tano on gabe marserak angka bangso parbegu, gabe marigat angka dolok sian na robi, jala marongrong angka dolokdolok sian mulana sahali. Angka lapang sian na galia ibana nampunasa.