PASAL 8

Malua sian Raja na Jahat

JESUS DOHOT KELUARGANA LARI TU MESIR
SI JOSEP MAMBOAN KELUARGANA PINDA TU NASARET

Didungoi si Josep ma si Maria laho paboahon na laho masa tu nasida. Ai ro do suru-suruan ni Jahowa tu nipina, mandok, “Hehe ma ho, boan ma dakdanak i rap dohot inana jala lari ma hamu tu Mesir. Disi ma hamu tading sahat tu na ro muse hatangku. Alana, luluan ni si Herodes do dakdanak i laho bunuonna.”—Mateus 2:13.

Pintor laho ma si Josep, si Maria, dohot anakna i di tingki borngin. Tuani ma pintor laho nasida. Ai ndang sadia leleng, diboto si Herodes ma naung dioto-otoi angka datu i ibana. Didok si Herodes hian do tu angka datu i asa ro muse nasida tu ibana, hape ndang ro be nasida. Tarrimas ma si Herodes. Ala naeng bunuonna do Jesus, diparentahon ibana ma asa dibunu sude dakdanak baoa na tading di humaliang ni Betlehem, na marumur dua taon tu toru. Ai nunga diboto si Herodes umur ni poso-poso i sian angka datu i.

Sahalak tentara mambuat sahalak dakdanak sian abingan ni inana

Mansai jorbut do na masa di tingki i! Ndang taboto manang na sadia godang dakdanak i dibunu. Alai tangis jala mangandungi do angka ina ni dakdanak i. Alani i, saut ma surirang na pinaboa ni si Jeremia.—Jeremia 31:15.

Di tingki i ma si Josep dohot keluargana pinda tu Mesir. Dung piga-piga leleng, ro ma muse suru-suruan ni Jahowa tu nipi ni si Josep mandok, “Hehe ma ho, boan ma dakdanak i rap dohot inana tu Israel, ai nunga mate be angka na marsangkap laho mambunu dakdanak i.” (Mateus 2:20) Didok roha ni si Josep, nunga boi be nasida mulak tu huta ni nasida. Marhite i gabe saut ma muse surirang na asing na mandok, sian Mesir do Anak ni Debata dijou.—Hosea 11:1.

Ra, didok roha ni si Josep di Judea nama nasida tading, i ma huta na jonok tu Betlehem. Disi hian do nasida maringanan andorang so lari tu Mesir. Alai diboto ibana ma si Arkilaus anak ni si Herodes do na mamarenta Judea jala jahat do ibana. Marhite nipi, nunga dipasingot suru-suruan ni Debata ibana taringot tusi. Gabe laho ma muse si Josep dohot keluargana tu sabola selatan. Tading ma nasida di huta Nasaret di luat Galilea, dao sian Jerusalem. Magodang di huta i ma Jesus, jala gabe saut ma surirang na mandok, “Goaron ma ibana halak Nasaret.”—Mateus 2:23.