Boasa Ingkon Unduk tu na Marhuaso?

1, 2. (a) Boasa ndang sai mura unduk tu na marhuaso? (b) Sungkunsungkun aha do na laho taulas?

HEA do diparateatehon hamu dakdanak tingki disuru natuatuana mangulahon na so dihalomohon rohana? Boi do tarida sian bohina na so lomo rohana mangulahon i. Dibege do hata ni natuatuana jala diboto do na ingkon oloanna natuatuana i. Alai, ndang olo ibana mangulahon. Songon na dihilala dakdanak on ma na jotjot tahilala.

² Ndang sai mura unduk tu na marhuaso. Hea do dihilala hamu songon on? Ndang holan hita na maol mangulahon i. Di tingkinta on, gumodangan halak ndang olo unduk tu na marhuaso. Alai Bibel mandok, ingkon unduk do hita tu halak na marhuaso. (Poda 24:21) Asa tongtong hita di bagasan holong ni roha ni Debata, ingkon taulahon do na didok Bibel. Alani i, taulas ma sungkunsungkun on: Boasa sipata maol hita unduk tu na marhuaso? Boasa dipangido Jahowa asa unduk hita tu nasida, jala aha do na mangonjar rohanta mangulahon i? Songon dia do bahenonta patuduhon na unduk hita tu na marhuaso?

BOASA MAOL UNDUK TU NA MARHUASO

3, 4. Alani aha do umbahen na mardosa si Adam dohot si Hawa jala boasa on mambahen hita maol unduk tu na marhuaso?

³ Adong dua siala na mambahen hita maol unduk tu na marhuaso. Na parjolo, ala na mardosa do hita. Na paduahon, na marhuaso i pe jolma na mardosa do. Si Adam dohot si Hawa mardosa ala ndang mangoloi Debata. Ala na so unduk do nasida umbahen na mardosa. Alani i, sian mulai tubu pe hita nunga adong roha na so olo unduk.​—1 Musa 2:15-17; 3:1-7; Psalmen 51:7; Rom 5:12.

⁴ Ala jolma na mardosa hita, jotjot do tubu ginjang ni roha di bagasan rohanta. Ingkon marsitutu do hita sian nasa gogonta asa boi tapatuduhon serep ni roha ganup ari. Nang pe naung martaontaon hita gabe Sitindangi Ni Jahowa, olo do maol hita manadingkon angka parange na hurang denggan, songon jogal ni roha dohot ginjang ni roha. Umpamana, marsihohot do si Kora rap dohot saluhut halak Israel laho mangoloi Jahowa. Alai, lomo do rohana patimbotimbo dirina asa marhuaso tu halak Israel jala dielaela ibana ma halak Israel asa mangalo tu si Musa. (4 Musa 12:3; 16:1-3) Taingot ma muse si Usia. Alani ginjang ni rohana, masuk ma ibana tu bagas joro ni Jahowa manutung pelean di langgatan ni Jahowa. Hape, holan angka malim do na boi mangulahon i. (2 Kronika 26:16-21) Ala na so mangoloi gabe diuhum Jahowa ma nasida. Sada sipasingot do on di hita saonari. Alani i, unang ma tapaloas ginjang ni roha mian di bagasan rohanta asa boi hita unduk tu angka halak na marhuaso.

5. Songon dia do halak na marhuaso jotjot ndang denggan mamangke huasona?

⁵ Halak na marhuaso jotjot mangulahon ulaon na mambahen gabe hurang sangap nasida. Nunga taida saleleng on, lomolomo ni nasida do mamangke huasona. Ndang marasi ni roha nasida alai mambahen susa do tu halak na asing. (Jaha Parjamita 8:9.) Umpamana, halak na burju jala na serep marroha do si Saul tingki dipillit Jahowa ibana gabe raja. Alai, dipasombu ibana do pangiburuon dohot ginjang ni roha mian di bagasan rohana; gabe naeng dibunu ibana ma si Daud. (1 Samuel 9:20, 21; 10:20-22; 18:7-11) Di pudian ni ari, si Daud ma ganti ni si Saul gabe raja di Israel. Alai, dipangke ibana do huasona laho mambuat ripe ni si Uria, tentara sian huta Het. Dung i, dibahen ma si Uria di jolo tingki marporang asa hona bunu ibana. (2 Samuel 11:1-17) Ala naung mardosa, jotjot do halak na marhuaso mamangke huasona ndang tu na denggan. Molo ndang mangoloi Jahowa muse halak na marhuaso i, lam jahat ma parniulaon ni nasida. Didok sahalak negarawan Inggris do taringot pigapiga paus Katolik na hea mamarentahon asa pasiaksiak halak na torop, ibana mandok, ”Ndang lam tu dengganna situasi dibahen angka na marhuaso, alai lam tu susana do.” Molo jotjot do saleleng on halak na marhuaso ndang denggan mamangke huasona, taulas ma sungkunsungkun on: Boasa ingkon unduk hita tu halak na marhuaso?

BOASA INGKON UNDUK TU NA MARHUASO?

6, 7. (a) Aha do na taulahon molo holong rohanta tu Jahowa, jala boasa? (b) Songon dia do hita patuduhon unduk na sian roha tu Jahowa?

⁶ Molo unduk hita tu halak na marhuaso, on patuduhon na holong do rohanta tu Jahowa, tu dongan dohot tu dirinta sandiri. Ala tahaholongi Jahowa sian nasa rohanta, taulahon ma sude na mambahen las rohaNa. (Jaha Poda 27:11; Markus 12:29, 30.) Nunga tangkas taboto, dialo do hadaulaton dohot hak ni Jahowa mamarenta saluhutna dung mardosa jolma di porlak Eden. Jala Sibolis ma na diihuthon gumodangan halak saonari. Alai hita, las do rohanta mamillit mangihuthon Jahowa. Molo tajaha di Pangungkapon 4:11, tangkas ma taboto holan Jahowa do na tama marhuaso di liat portibi on. Tapatudu ma sian parngoluonta siganup ari naung tapillit Jahowa gabe Parhuaso di hita.

⁷ Molo unduk hita tu Jahowa, taoloi ma Ibana. Alai, denggan do molo hita mangoloi alani holongta tu Ibana. Olo do sipata maol mangoloi Jahowa. Alai, songon dakdanak na dipaboa di mula ni pasal on, disi ma hita porlu patuduhon unduk na sian roha. Taingot ma, Jesus pe unduk do tu Amana, nang pe sipata maol mangulahon i. Didok Jesus do tu Jahowa, ”Alai unang ma rohangku saut, roham ma!”​—Lukas 22:42.

8. (a) Songon dia do hita patuduhon unduk na sian roha tu Jahowa jala songon dia do pangkilalaan ni Jahowa molo ndang unduk hita tu halak na pinillitna? (b) Aha do na mangonjar rohanta asa rade manangihon poda dohot sipasingot? (Ida ma kotak ”Tangihon ma Hata Sipaingot jala Jangkon Pangajaran”.)

⁸ Saonari, marhite Bibel dohot angka naposoNa ma Jahowa mangkatai tu hita. Alani i, na patuduhon unduk na sian roha tu Jahowa do hita molo unduk tu halak na pinillitNa. Hansit do roha ni Debata molo ndang taoloi poda dohot sipasingot na nilehon ni nasida marhite Bibel. Tingki marungutungut halak Israel tu si Musa, na marungutungut jala na mangalo tu Jahowa do nasida disi.​—4 Musa 14:26, 27.

9. Molo holong do rohanta tu angka dongan, songon dia do bahenonta tu halak na marhuaso? Bahen ma tudosan.

⁹ Na mangkaholongi donganta do muse hita molo unduk hita tu halak na marhuaso. Boasa? Umpamana, molo hita sahalak sian pasukan ni tentara, ingkon sahata saoloan do sude asa boi tongtong mangolu. Jala ingkon unduk do sude tu parenta ni pangulima asa malua sude pasukan i. Molo ndang unduk hita tu parenta na dilehon pangulima jala ndang sahata saoloan be pasukan i, ndang holan hita na susa alai sude tentara i do na mate. Tutu, pasukan tentara ni jolma jotjot do mambahen susa saonari on. Alai ndang songon i tentara ni Jahowa. Di Bibel, marratus hali do Debata didok ”Jahowa Zebaot”. (1 Samuel 1:3) Lapatanna, Jahowa do ulubalang ni mansai torop surusuruan na gogo dohot angka naposoNa di tano on, na dipatudos songon punguan ni tentara. (Psalmen 68:12; Hesekiel 37:1-10) Molo ndang unduk hita tu angka sintua di huria, boi do gabe susa angka dongan na asing. (1 Korint 12:14, 25, 26) Songon sahalak ianakhon, molo ndang unduk ibana tu natuatuana, boi do gabe susa sude na di keluarga i. Alani i, molo masiurupan jala masipasangapan hita tu angka donganta, on patuduhon na tahaholongi do nasida.

10, 11. Patorang ma boasa taronjar rohanta unduk tu halak na marhuaso.

¹⁰ Hita do na mandapot laba molo unduk hita tu halak na marhuaso. Jala dipaboa Jahowa do labana molo unduk hita tu nasida. Umpamana, didok Jahowa ingkon diparsangapi ianakhon do natuatuana, asa martua jala leleng mangolu nasida. (5 Musa 5:16; Epesus 6:2, 3) Didok do muse ingkon unduk hita tu angka sintua di huria asa boi tongtong togu partondionta. (Heber 13:7, 17) Jala ingkon unduk do hita tu pamarenta ala mangkorhon na denggan do on di parngoluonta.​—Rom 13:4.

¹¹ Lam taronjar ma rohanta asa unduk tu halak na marhuaso, dung taboto boasa dipangido Jahowa hita unduk tu nasida. Saonari, taulas ma adong tolu bagian songon dia hita patuduhon unduk na sian roha.

UNDUK NA SIAN ROHA DI KELUARGA

12. Aha do huaso na dilehon Jahowa tu tungganedoli di keluarga jala songon dia do ibana mangulahon i?

¹² Sian Jahowa do mula ni sude keluarga. Lomo do roha ni Debata asa taratur jala denggan sude na di bagasan keluarga. (1 Korint 14:33) Dilehon Ibana do huaso tu tungganedoli manang ama, asa gabe ulu ni keluarga. Ingkon unduk do tungganedoli tu Jesus jala maniru ibana na patuduhon holong tu saluhut huria. (Epesus 5:23) Alani i, ingkon martanggung jawab do tungganedoli manarihon keluargana. Ingkon burju, lambok jala marholong ni roha ma ibana. Alai, ingkon ingotonna do, ndang tumimbo huasona sian huaso ni Jahowa.

13. Songon dia do tungganeboru patuduhon huasona di keluarga asa pasonangkon roha ni Jahowa?

¹³ Sahalak tungganeboru manang ina, ingkon boi do mangurupi tungganedolina. Adong do dilehon huaso tu ina. Didok do di Bibel, ”Unang tulakkon poda ni inangmu.” (Poda 1:8) Alai, ndang gabe umtimbo huasona sian tungganedolina. Sahalak tungganeboru na porsea ingkon unduk jala rade mangurupi tungganedolina. Ndang boi tungganeboru mangatur, mangarajai dohot pailahon tungganedolina. Alai, ingkon masiurupan do nasida. Molo ndang sapandapot ibana tu tungganedolina, ingkon denggan do paboaonna pandapotna jala ingkon tongtong unduk ibana. Molo ndang sahaporseaon ibana dohot tungganedolina, olo do adong paraloan na diadopi ibana. Alai, molo tongtong do unduk jala marparange na denggan tungganeboru, boi do taronjar roha ni tungganedolina mananda hasintongan.​—Jaha 1 Petrus 3:1.

14. Songon dia do ianakhon boi mambahen las roha ni Jahowa dohot natuatuana?

¹⁴ Angka ianakhon pe boi do mambahen las roha ni Jahowa molo unduk tu natuatuana. Jala natuatuana pe marlas ni roha ma. (Poda 10:1) Tarlumobi molo nunga mabalu natuatuana i, ringkot situtu do pangoloion dohot pangurupion sian nasida. Molo sude do na di bagasan keluarga mangulahon Hata ni Debata tu nasida, boi ma nasida mangkilala dame dohot las ni roha. Jala parohon sangap ma on tu Debata Jahowa.​—Epesus 3:14, 15.

UNDUK NA SIAN ROHA DI HURIA

15. (a) Songon dia do hita patuduhon na unduk tu huaso ni Jahowa di huria? (b) Paboa ma angka prinsip na mangurupi hita asa unduk tu angka sintua! (Ida ma kotak ”Tangihon Hamu ma Angka na Manguluhon Hamu”.)

¹⁵ Nunga dimiahi Jahowa anakNa gabe Raja manang ulu ni huria Kristen. (Kolosse 1:13) Dung i, dilehon Jesus ma huaso tu ”naposo haposan jala marroha” laho mangaradoti na ringkot tu partondion ni sude naposo ni Debata di tano on. (Mateus 24:45-47) ”Naposo haposan jala marroha”, i do Punguan na Mangaradoti Organisasi Sitindangi Ni Jahowa. Songon angka huria Kristen di abad na parjolo, angka sintua saonari on manjalo tudutudu dohot poda sian Punguan na Mangaradoti Organisasi i sandiri manang marhite sintua kaliling. Na mangoloi Jahowa do molo hita unduk tu angka sintua.​—Jaha 1 Tessalonik 5:12; Heber 13:17.

16. Boasa boi dohonon tondi parbadia do na mangurupi tingki dipillit angka sintua?

¹⁶ Jolma na mardosa do angka sintua dohot parhobas. Songon hita na marhahurangan, nasida pe adong do hahuranganna. Alai, ”silehonlehon tu angka jolma,” do nasida laho mangurupi asa togu partondion ni angka na di huria. (Epesus 4:8) Boi dohonon, tondi parbadia do na mangurupi tingki mamillit angka sintua. (Ulaon ni Apostel 20:28) Boasa? Alana ingkon parjolo do nasida mangihuthon Bibel, naung sinihathon ni Debata marhite tondi parbadia. (1 Timoteus 3:1-7, 12; Titus 1:5-9) Dung i, martangiang do angka sintua mangido pangurupion ni tondi parbadia tingki mamillit donganta baoa na laho gabe sintua manang parhobas.

17. Di tingki andigan do sahalak borua ingkon mamangke tujungtujung di huria?

¹⁷ Sipata, ndang adong sintua manang parhobas na manguluhon ulaon di huria songon manguluhon parpunguan laho marbarita na uli. Molo songon i na masa, angka dongan baoa naung tardidi pe boi do manguluhon. Alai, molo ndang adong, angka dongan borua na togu partondionna pe boi do mangulahon. Alai, ingkon dihungkupi [martujung] do simajujungna.a (1 Korint 11:3-10) Ndang gabe patoruhon sangapna molo diulahon songon i. Alai, dalan na denggan do i di ibana laho patuduhon unduk na sian roha tu huaso naung ditontuhon Debata di keluarga nang di huria.

UNDUK TU HUASO NI PAMARENTA

18, 19. (a) Patorang ma prinsip na dipaboa di Rom 13:1-7. (b) Songon dia do hita patuduhon unduk na sian roha tu pamarenta?

¹⁸ Marsitutu do halak Kristen mangihuthon prinsip ni Bibel di Rom 13:1-7. (Jaha.) Hata ”panggomgomi” na didok di ayat i, i ma pamarenta na marhuaso di portibi on. Saleleng diloas Jahowa dope nasida marhuaso, ringkot do ulaon ni nasida di hita laho paradehon jasa na tahaporluhon jala asa taratur sude. Na patuduhon unduk na sian roha do hita tu pamarenta molo taihuthon uhum na binahen ni nasida. Songon manggarar pajak, ndang margabus tingki mangisi formulir na sian pamarenta jala mangihuthon uhum na masa di hita, keluarga, bisnis nang artanta. Alai, ndang unduk hita tu nasida molo diorai mangulahon hata ni Debata. Ingkon songon angka apostel di abad na parjolo ma hita na mandok, ”Ingkon oloan do iba di Debata asa di jolma.”​—Ulaon ni Apostel 5:28, 29; ida ma kotak ”Tu Huaso ni Ise do Ahu Ingkon Unduk?”.

¹⁹ Tapatuduhon ma muse unduk na sian roha tu nasida marhite parangenta. Olo do sipata adong urusanta tu pamarenta. Hea do apostel Paulus mangkatai tu Raja Herodes Agripa dohot tu Gubernur Festus. Nang pe diboto si Paulus adong dosa na balga na diulahon nasida, alai tongtong do dipasangap si Paulus nasida. (Ulaon ni Apostel 26:2, 25) Tatiru ma si Paulus, sangap ma hita tingki mangkatai tu pejabat nang tu polisi. Ingkon dipasangap ianakhon ni halak Kristen do guru dohot sude na karejo di parsingkolaanna. Ndang holan na marlomo ni roha tu Sitindangi Ni Jahowa na ingkon taparsangapi, alai dohot do na so marlomo ni roha. Ingkon boi do idaon ni halak na tapasangap nasida.​—Jaha Rom 12:17, 18; 1 Petrus 3:15.

20, 21. Aha do labana molo tongtong tapatuduhon unduk na sian roha?

²⁰ Sai tongtong ma rade hita patuduhon unduk na sian roha. Songon na disurat apostel Petrus, ”Marhapantunon ma hamu tu sasude.” (1 Petrus 2:17) Molo tapatuduhon do unduk na sian roha tu jolma, boi do gabe las rohana mangida hita. Alana saonari, godang jolma na so olo be patuduhon unduk na sian roha. Molo tapatuduhon unduk na sian roha, na mangihuthon hata ni Jesus do hita, ”Naeng songon i ma marsinondang palitomuna na denggan i, asa dipuji nasida Amamuna na di banua ginjang i.”​—Mateus 5:16.

²¹ Nang pe godang hajahaton di portibi on, boi do idaon ni halak parlambok roha hasintongan. Alani i, molo tapatuduhon do unduk na sian roha di keluarga, di huria dohot tu halak di humaliangta, boi ma mangonjar roha ni halak laho mananda hasintongan. Taingot ma, nang pe ndang olo nasida manjangkon hasintongan, las do roha ni Jahowa molo unduk hita tu dongan jolma jala boi ma tongtong hita di bagasan holong ni rohaNa. Adong dope upa na umbalga sian i?