PARSIAJARAN 2

Cara Mangkata-hatai

Lukas 6:45a

NA INGKON DIULAHON: Mangkata-hatai ma songon na somal. Unang ma songon na dibahen-bahen, asa diboto angka halak na holong do rohamuna tu nasida jala ringkot do barita i.

CARA MANGULAHON:

Tangiangkon ma jala denggan parade. Martangiang ma asa diingot hamu aha do na laho dipasahat, jala unang sai holsoan mamingkiri boha caramuna pasahathon i. Tangkas ma paboa hatorangan i. Unang ma holan manjahahon naung diparade hian. Jala unang ma dihafal.

Asa boi denggan dijahahon hamu angka ayat manang hatorangan sian sijahaonta, ingkon diparsiajari hamu do aha na tinuju ni hatorangan i. Molo pengalaman ni sasahalak do na laho dijahahon, jahahon ma i songon somalna halak mangkatai.
Sian ias ni roha ma mangkatai. Ingkon diingot hamu do boasa ringkot barita i tu donganmuna mangkatai. Molo diulahon hamu songon i, tarida ma sian gerakmuna dohot bohimuna, na holong do rohamuna tu nasida.

Tongtong ma pantun tingki pasahathon barita i. Taingot ma, ringkot do barita i. Alani i, denggan ma pasahat jala tangkas.
Ida ma donganmuna mangkatai. Ida ma nasida. Tarlumobi tingki marjamita hamu, unang ma holan mangida sambing sude angka na ro. Alai, ida ma sada-sada.