Boasa Saksi Jahowa Dang Parsidohot tu Ulaon Politik?
Alani haporseaon na marojahan sian Bibel, dang parsidohot Saksi Jahowa tu ulaon politik. Dang olo hami manogihon jolma asa mamillit partai politik manang calon pejabat, dang olo hami gabe pejabat, jala dang olo hami demon. Porsea do hami adong hatorangan sian Bibel taringot on.
Diihutton hami do sitiruon na nilehon ni Jesus, na so olo gabe pejabat politik. (Johannes 6:15) Diajari ibana do akka siseanna molo nasida “ndang sian portibi on”, na patuduhon molo akka siseanna, dang boi parsidohot tu ulaon politik.—Johannes 17:14, 16; 18:36; Markus 12:13-17.
Marsihohot do hami tu Harajaon ni Debata, songon na dipatorang Jesus tikki mandok, “Laos baritahononhon do barita na uli on na taringot tu Harajaon i di liat portibi on.” (Mateus 24:14) Hami mangkatindakkon Harajaon ni Debata jala paboahon taringot Harajaon i. Alani i, hami dang parsidohot tu ulaon politik bangso na dia pe, dohot ma i di inganannami tading.—2 Korint 5:20; Epesus 6:20.
Ala dang parsidohot tu ulaon politik, on gabe dang mangambati hami makkatai taringot Harajaon ni Debata, dang soal songon dia pandapot ni nasida tu politik. Sian pakkataion dohot parniulaonnami, dipatudu hami do molo hami mangasahon Harajaon ni Debata na lao pasaehon sude sitaonon di portibi on.—Psalmen 56:12.
Dipasiding hami do parbadaan alani politik. On mambahen hami marsada ni roha dohot dongan sahaporseaon di liat portibi on. (Kolosse 3:14; 1 Petrus 2:17) Alai, agama na parsidohot tu ulaon politik, mambahen ruasna dang marsada ni roha.—1 Korint 1:10.
Mangargai pamaretta. Nang pe hami dang parsidohot tu ulaon politik, diargai hami do hak ni pamaretta didia pe hami maringanan. On hombar tu paretta na disurat di Bibel, “Unduk ma ganup di panggomgomi na marsahala.” (Rom 13:1) Dioloi hami do uhum, digarar hami do pajak, jala satolop tu pamaretta na mambahen denggan parngoluon ni masyarakat. Dang dohot hami demon lao manggatti pamaretta, alai diihutton hami do poda ni Bibel asa manangiakkon “angka raja dohot saluhut parhuaso,” tarlumobi tikki nasida mambahen haputusan na makkorhon tu panombaon.—1 Timoteus 2:1, 2.
Diargai hami do muse hak ni na asing lao mambahen haputusan taringot politik. Umpamana, hami dang manggugai pemilihan umum manang mangela-ela na asing asa unang mamillit partai politik.
Di pudian ni ari on pe hami mangulahon songon on? Dang. Akka apostel dohot halak Kristen di abad na parjolo mangulahon na sarupa. Bukku Beyond Good Intentions mandok, “Nang pe diboto nasida ikkon unduk tu pamaretta, alai halak Kristen di abad na parjolo dang parsidohot tu ulaon politik.” Songon i nang bukku On the Road to Civilization na mandok molo halak Kristen di abad na parjolo “ndang olo gabe pejabat politik”.
Ala dang parsidohot hami tu ulaon politik, ganggu do keamanan ni negara? Dang. Hami warga negara na makkalomohon asa dame, jala pamaretta pe dang porlu mabiar tu hami. Parrohahon ma laporan taon 2001 sian National Academy of Sciences of Ukraine. Tikki patorakkon taringot hami na so parsidohot tu ulaon politik, laporan i mandok, “Saonari, torop do halak na so marlomo ni roha tu haputusan ni Saksi Jahowa; i do alana gabe sogo roha ni rezim Nazi dohot Komunis di tikki naung salpu.” Alai, nang pe nasida dihasogohon di Soviet, akka Saksi toktong do “warga negara na mangoloi uhum. Denggan do parange ni nasida jala dang mangkarikkotton diri tikki karejo di ladang manang di pabrik. Sasittongna, nasida dang mangganggu rezim Komunis”. Songon i ma nang saonari, haporseaon dohot ulaon ni Saksi Jahowa” dang mangganggu manang manggutturi bangso na dia pe”, songon na dipaboa di ujung ni laporan i.