Boasa Bibel Dilinggomi

Saonari, adong do Bibel di hita jala boi tajaha. Molo tapillit terjemahan ni Bibel na denggan, pos ma rohanta isina hombar tu terjemahan aslina.a Nang pe Bibel disurat di bahan na mura sega, mangadopi paraloan, jala pigapiga halak marsangkap manguba isina, boasa Bibel boi adong sahat tu saonari? Boasa Bibel sumurung sian buku na asing?

Songon si Paulus, pigapiga halak na marsiajar Bibel satolop do mandok, ”Ai nasa Surat i, sinihathon ni Debata do.” (2 Timoteus 3:16) Porsea do nasida, Bibel Hata ni Debata jala dilinggomi sahat tu saonari. Songon si Faizal na dipaboa di artikel na parjolo, porsea do ibana Bibel sian Debata ala nunga diparsiajari ibana. Songgot do rohana dung marsiajar Bibel. Diboto ibana ma, aha na diulahon godangan halak na mangangku Kristen, ndang adong di Bibel. Saonari, las do rohana mamboto sian Bibel taringot sangkap ni Debata tu tano on.

Didok si Faizal ma, ”Porsea do ahu Bibel silehonlehon sian Debata. Debata marhuaso manompa saluhutna, Ibana pe marhuaso do mangalehon jala mangalinggomi Bibel sahat tu saonari. Molo tadok ndang asli be Bibel i, sarupa ma i songon na mansoadahon huaso ni Debata.”​—Jesaya 40:8.