Aha do Sebenarna na Manottuhon Masa Depanmuna?
Godang do halak na porsea, molo masa depan ni nasida dipengaruhi kekuatan na so boi diida. I do alana, godang do diulahon nasida akka kebiasaan na dirippu nasida boi mangalehon keberuntungan tu nasida manang mambahen ngolu ni nasida lam denggan.
NA DIHAPORSEAI GODANG HALAK
RAMALAN BINTANG: Adong do akka halak na porsea, molo masa depan ni nasida ditottuhon sesuai tu posisi ni bintang di tikki tubu nasida. Jadi, asa diboto nasida songon dia masa depan ni nasida jala asa unang terjadi akka na so denggan tu nasida dijaha nasida ma akka ramalan bintang.
MANUKKUN TU HALAK NA MALO: Adong do akka halak na porsea, molo lao nasida manukkun tu halak na malo gabe boi ma diboto nasida akka aha na lao masa tu nasida. Jala diboto nasida ma aha na ikkon diulahon asa unang masa akka na so denggan tu nasida. Didok roha ni nasida, molo dung diboto nasida i, gabe boi ma dihindari nasida akka na so denggan na lao masa tu nasida. Gabe diboto nasida ma aha jalan keluarna lao mangatasi akka masalah ni nasida jala gabe boi ma marhasil ngolu ni nasida.
PASANGAPPON AKKA OPPUNGNA NAUNG MATE: Adong dope akka halak na porsea, ikkon dipasangap nasida do akka oppung ni nasida naung mate asa boi nasida dijaga jala dipasu-pasu. Si Vana na tinggal di Vietnam mandok, “Najolo, porsea do au molo hulehon akka na mambahen las roha ni akka oppukku naung mate, gabe denggan do ngolukku jala denggan ma masa depanku dohot akka ianakkonku.”
REINKARNASI: Godang do halak na porsea molo mate sasahalak, lao dilahirkan kembali do muse ibana jala mulak-ulak do i terjadi. Porsea do muse nasida, molo aha na masa tu nasida saonari tergantung tu pangalaho ni nasida na sebelumna do.
Nang pe godang halak dang porsea tu akka sisongon i, alai tong dope dilului nasida taringot masa depan ni nasida melalui mangida garis tangan, ramalan bintang, kartu tarot, dohot akka na asing. Jala didok roha ni nasida, olo do ra tutu do na didok akka ramalan i.
TUTU DO GABE DENGGAN NGOLU NI NASIDA?
Tutu do gabe denggan ngolu ni sasahalak jala gabe terjamin masa depanna molo porsea tu akka na sisongon i?
Pikkirhon ma pengalaman ni si Hào na tinggal di Vietnam. Najolo, porsea do ibana tu ramalan bintang dohot tu feng shui. Jala disomba ibana do muse akka oppungna najolo naung mate. Alai tutu do gabe sukses ngoluna? Didok si Hào, “Gabe bangkrut do au jala godang utangku. Gabe sursar do keluargakku jala gabe depresi do au.”
Songon i do tong si Qiuming na sian Taiwan. Najolo porsea do ibana tu ramalan bintang, reinkarnasi, nasib, feng shui, jala disomba ibana do akka oppungna naung mate. Dung denggan dipikkiri ibana didok ma, “Gabe huboto ma, molo ajaran dohot kebiasaan sisongon i, dang masuk akkal jala gabe mambahen bingung. Alana, jotjot do akka ramalan bintang i dang tutu terjadi. Songon i do tong taringot reinkarnasi. Molo dang huingot songon dia ngolukku sebelumna, songon dia ma au boi padenggatton ngolukku saonari?”
“Gabe huboto ma, molo ajaran dohot kebiasaan sisongon i, dang masuk akkal jala gabe mambahen bingung.”—SI QIUMING, TAIWAN
Songon si Hào, si Qiuming, dohot akka halak na asing, disadari nasida do dang nasib, ramalan bintang, manomba akka oppungta naung mate dohot reinkarnasi na manottuhon masa depanta. Molo songon i, aha do na boi manottuhon masa depanta?
Godang do halak na marpikkir, molo timbo sikkolana jala godang hepengna, boi do bahagia masa depanna. Alai tutu do i na boi mambahen denggan masa depan ni nasida?
a Piga-piga goar ni halak na dipaboa di majalah on nungnga diganti.
b Hata on, dipaboa do di Bibel di Galatia 6:7. Istilah sisongon on jotjot do didok halak, molo dibahen ho na so denggan tu sasahalak, songon i do na lao dapotmu.