Penciptaan Manang Evolusi?—Bagian 1: Boasa Porsea tu Debata?

Penciptaan manang evolusi?

Porsea do ho Debata na manoppa saluhutna? Molo porsea, denggan do i jala dang holan sahalakmu na songon i. Alana godang do akka na poso (dohot akka halak naung dewasa) na porsea tu penciptaan. Alai adong do tong na mandok molo hangoluanta dohot alam semesta on gabe adong alani evolusi, dang alani Debata.

Diboto ho do? Godang halak na porsea tu penciptaan manang evolusi biasana holan asal porsea do. Alai, tikki disukkun boasa porsea nasida, dang diboto alusna.

• Piga-piga halak gabe porsea tu penciptaan ala diajarhon di gareja.

• Godang halak gabe porsea tu evolusi ala diajarhon di sikkola.

Jaha ma seri artikel on asa lam pos roham tu penciptaan, jala asa boi ho paboahon haporseaonmu tu halak na asing. Alai na parjolo, pikkirhon ma sukkun-sukkun on:

Boasa porsea au tu Debata?

Boasa penting sukkun-sukkun on? Alana dijujui Bibel do ho asa dipakke ho kemampuanmu lao marpikkir. (Rom 12:⁠1) Artina, haporseaonmu tu Debata dang holan alani

• perasaan (Menuruttu, pasti adong do huaso na untimbo)

• pengaruh ni halak na asing (Porsea tu Debata do akka halak na di daerahku)

• tekanan sian halak na asing (Ikkon porsea do au tu Debata. Alana molo dang porsea au, gabe muruk do annon natua-tuaku)

Sebalikna, ikkon ho sandiri do na mambuktihon boasa porsea ho tu Debata, jala ikkon masuk akkal do alasanna.

Jadi, aha ma na mambahen ho porsea na adong Debata? Lembar kegiatan “Mengapa Aku Percaya kepada Allah?” boi mangurupi ho asa lam porsea tu Debata. Asing ni i, parrohahon ma songon dia akka na poso mangalusi sukkun-sukkun i.

“Aha na dipatorang gurukku taringot cara kerja tubuhta mambahen au lam porsea na tutu do adong Debata. Ganup anggota tubuh adong be do tugasna. Jala biasana, dang tasadari cara kerja ni akka anggota tubuh i. Luar biasa do tubuhta on!”​—Si Teresa.

“Tikki huida akka gedung na timbo, kapal pesiar, manang mobil, gabe sukkun-sukkun do rohakku, ‘Ise do na mambahen on?’ Songon mobil ma, pasti halak na malo do na mambahen i. Alana, godang do bagian ni mobil i na gelleng, alai boi do denggan sude berfungsi. Haru mobil adong do na mambahen, apalagi ma tubuhta.”​—Si Richard.

“Dang mura mamparsiajari bagian na unggelleng sian alam semesta on. Ikkon halak na malo hian do na boi mamparsiajari i, jala olo do sappe marratus taon mamparsiajari i. Jadi, dang masuk akkal molo adong sasahalak na marpikkir dang adong na manoppa sude na adong di alam semesta on!”​—Si Karen.

“Lam godang huparsiajari taringot sains, gabe dang masuk akkal huhilala teori evolusi i. Misalna, sai hupikkiri do boasa boi taratur sude na adong di alam semesta on, jala hupikkiri do muse boasa unik jolma i. Alana, lomo do rohatta naeng mamboto ise do hita sasittongna, boasa gabe adong hita, jala aha do tujuan ni ngolutta. Tikki mangalusi sukkun-sukkun taringot jolma, dipakke teori evolusi do istilah na adong hubunganna tu binatang. Alai sebenarna, dang boi teori evolusi patorakkon boasa unik jolma i. Menuruttu, ummura do porsea tu penciptaan sian apala tu teori evolusi.”​—Si Anthony.

Patorakkon taringot haporseaokku

Boha molo adong dongan sakalasmu na mangejek ho ala porsea ho tu na so boi diida ho? Boha molo didok nasida, nungnga “dibuktihon” sains teori evolusi do na sittong?

Ikkon pos do roham tu aha na dihaporseai ho. Unang ma mabiar jala unang maila. (Rom 1:​16) Dukkon i, ingot ma:

1. Godang dope halak na porsea tu Debata, dang holan sahalakmu. Termasuk ma on akka halak na malo. Misalna, godang do ilmuwan na porsea na tutu do adong Debata.

2. Molo adong halak na mandok dang porsea nasida tu Debata, olo do ra ala dang takkas diboto nasida taringot Debata. Dang boi dipatorang nasida alasan ni nasida dang porsea tu Debata. Gariada gabe disukkun nasida do, “Molo tutu do adong Debata, boasa ma dipasombu hita susa?” Gabe muba do topik na dihatai. Mulana taringot ilmu pengetahuan, alai saonari gabe taringot perasaan.

3. Rikkot do jolma marale-ale tu Debata. (Mateus 5:⁠3) Nungnga disuanton hian di roha ni jolma, na rikkot do nasida marale-ale tu Debata. Jadi molo adong sasahalak na so porsea na adong Debata, ibana do na seharusna patorakkon alasanna boasa dang porsea ibana na adong Debata.​—Rom 1:​18-​20.

4. Masuk akkal do molo porsea tu Debata. Sesuai do on tu hatorangan na mandok, dang mungkin toppu adong hangoluan on. Alana, dang adong bukti na boi mendukung teori na mandok molo hangoluan i toppu adong sian benda mati.

Jadi, aha ma na boi didokkon ho molo adong na manukkun alasanmu porsea tu Debata? Pikkirhon ma piga-piga situasi on.

Molo adong na mandok: “Holan halak na oto do na porsea tu Debata.”

Boi do dialusi ho: “Holan ala mangihutton hata ni halak do ho umbahen na didok ho songon i? Molo au, dang olo au mangihutton hata ni halak. Alana hea do hujaha taringot sada survei na dibahen tu 1.600 profesor sian piga-piga universitas na terkenal. Ternyata adong sapartolu sian nasida na porsea tu Debata.a Menurutmu, boi do tadok akka profesor i halak na oto ala porsea nasida tu Debata?”

Molo adong na mandok: “Molo tutu do adong Debata, boasa ma massai godang hasusaan di portibi on?”

Boi do dialusi ho: “Mungkin maksudmu, boasa ma hira na so parduli Debata tu hasusaanta. Songon i do maksudmu? [Pasombu ma ibana mangalusi.] Boi do hupaboa alus ni sukkun-sukkun i tu ho. Alai asa boi taboto alusna, ikkon talului do i di Bibel. Olo do ho molo tabahas i?”

Artikel berikutna sian seri artikel on lao mambahas boasa dang boi teori evolusi mangalusi akka sukkun-sukkun taringot hangoluanta on.