Sran kpanngban bé fíte nun a kwla fite nun wie

Biblu’n kle kɛ mɛn’n i awieliɛ’n nun’n, “nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nian yo-man le [...]. Sɛ Nyanmiɛn a kpɛ-man cɛn sɔ’n su’n, sran fi su fite-man nun.” (Matie 24:21, 22) Sran kpanngban bé fíte nun. Afin Biblu’n se ekun kɛ: “Mɛn’n nin i nun ninnge kwlaa [...] bé wíe, sanngɛ sran ng’ɔ yo Nyanmiɛn klun sa’n, ɔ́ ká lɛ tititi.”​—1 Zan 2:17.

?Sɛ ɔ waan á “ká lɛ tititi” wie’n, ngue yɛ ɔ fata kɛ a yo ɔ? Nán aliɛ yɛ ɔ fata kɛ a tiɛn i nuan sie ɔ. Biblu’n wla e su nun kɛ e yo like cinnjin kpa kun. I waan: “?Sɛ ninnge sɔ’n kwlaa bé sáci sɔ’n, like onin yɛ sɛ an yo-ɔ ɔ ti su-ɔ? Maan amun nzuɛn’n yo kpa, yɛ an fa amun wun mantan Nyanmiɛn! Kɛ amún mínndɛ kɛ Nyanmiɛn i cɛn’n ju’n, an yo like kwlaa nga an kwla yo’n maan ɔ ju ndɛndɛ.” (2 Piɛr 3:10-12.) “Ninnge sɔ’n” mɔ bé sáci’n, i wie yɛle mɛn nga nun famiɛn diwlɛ mun, ɔ nin be kwlaa nga be kunndɛman kɛ Ɲanmiɛn sie be’n. Nanwlɛ, sɛ e kunndɛ aliɛ nin ninnge kpanngban e sie e sa su’n, i sɔ’n kwlá deman e.

Sɛ e waan é fíte nun’n, ɔ fata kɛ e su Ɲanmiɛn Zoova. Yɛ maan e si like nga sɛ e yo’n i klun jɔ́ e wun’n. (Sofoni 2:3) Andɛ sran sunman be buman sa’m be akunndan naan b’a wun i wlɛ kɛ blɛ nga e o nun yɛ’n, ɔ ti i liɛ ngunmin. Sanngɛ e liɛ’n, maan e minndɛ kɛ “Nyanmiɛn i cɛn’n” ju. Like ng’ɔ fata kɛ a yo naan w’a fite nun’n, Zoova i Lalofuɛ’m be kwla fa Biblu’n be kle wɔ.