Mɛn’n i nunnunlɛ’n i su kosan nnan be su tɛlɛ

ZEZI KLIST kannin kɛ ‘mɛn’n i awieliɛ’n ɔ́ [wá] jú.’ Kɛ ɔ́ kán blɛ sɔ’n i ndɛ’n, ɔ seli kɛ: “Blɛ sɔ’n nun’n, nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nian yo-man le yɛ i wunsu su yo-man kun le.”—Matie 24:14, 21.

Ndɛ nga Zezi kɛnnin i mɛn’n i awieliɛ’n su’n, ɔ nin Biblu’n nun ndɛ mma uflɛ wie mun ekun mɔ be kan mɛn’n i awieliɛ’n i ndɛ’n, be kpɛ kosan cinnjin wie’m be ba. É srɛ́ amun kɛ amun tike amun Biblu’n su naan be kanngan kosan sɔ’m be su tɛlɛ’n.

1 ?Like benin yɛ bé núnnún i ɔ?

Biblu’n seman kɛ bé núnnún asiɛ’n nga e o su yɛ’n. Jue tofuɛ’n klɛli i kɛ: “[Ɲanmiɛn] wlali asiɛ’n i bo ase kekleke kpa! Kɛ ɔ o lɛ’n yɛ ɔ wo-ɔ.” (Jue Mun 104:5) Biblu’n seman kusu kɛ i klɔ sran o, i nnɛn o, i waka mun o, be kwlaa bé núnnún sekeseke. (Ezai 45:18) Zezi bɔbɔ kleli weiin kɛ, kɛ bé wá núnnún mɛn’n, sran wie’m bé fín nun fíte. (Matie 24:21, 22) ?Yɛ sɛ ɔ ti sɔ’n, nn ngue yɛ bé núnnún i ɔ?

Klɔ sran’m be sielɛ mɔ be yoman sa fi ye’n yɛ bé núnnún be ɔ. Ɲanmiɛn maan i nuan ijɔfuɛ Daniɛli klɛli i kɛ: “Famiɛn sɔ’m be blɛ su’n, Nyanmiɛn b’ɔ o nglo lɔ’n ɔ́ síe famiɛn diwlɛ kun b’ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkuun i bɔbɔ ɔ́ ká lɛ tititi.”—Daniɛl 2:44.

Alɛ’n nin asiɛ’n i fiɛn yolɛ’n bé wíe. Jue Mun 46:10 yiyi like nga Ɲanmiɛn wá yó’n i nun. Ɔ se kɛ: “Kɛ ɔ fɛ i lele b’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie, w’a bubu ta’m be nun, w’a bubu cua’m be nun, w’a wɔ nyrɛn’m be nun.” Biblu’n kɛn i ekun kɛ Ɲanmiɛn “núnnún be nga be saci asiɛ’n.”—Sa Nglo Yilɛ 11:18.

Sa tɛ’n nin ndɛ kwlɛ bulɛ’n bé wíe. Ɲanmiɛn Ndɛ’n ta e nda kɛ: “Sran kpafuɛ mun, be yɛ bé wá trán mɛn nga nun-ɔn, bé trán be nga be nanti sein’n be mɛn’n nun. Klunwifuɛ’m be liɛ’n, bé trá be mɛn nga nun bé kɔ́. Bé tú gblɛfuɛ’m be bo.”—Nyanndra Mun 2:21, 22.

2 ?Cɛn benin yɛ bé núnnún mɛn’n niɔn?

Ɲanmiɛn Zoova sieli “cɛn” kun mɔ kɛ ɔ ko ju’n, ɔ́ núnnún klunwi’n kpɛkun ɔ́ síe asiɛ wunmuan’n niɔn. (Mark 13:33) Sanngɛ Biblu’n kle e kɛ e kwlá seman cɛn nga sa yɛ bé núnnún mɛn’n niɔn. Zezi seli kɛ: “Cɛn sɔ’n nin i dɔ’n, sran fi si-mɛn i, san min Si kunngba cɛ yɛ ɔ si i-ɔ. M bɔ n ti i Wa’n bɔbɔ n si-mɛn i, yɛ nyanmiɛn su lɔ anz’m be kusu be si-mɛn i.” (Matie 24:36) Sanngɛ wafa nga lika’n yó kwlaa naan Ɲanmiɛn w’a nunnun mɛn’n, Zezi nin i sɔnnzɔnfuɛ’m be boli su. Sɛ ninnge kwlaa nga é wá kán be ndɛ yɛ’n, be kpɛn su blɛ kunngba’n nun asiɛ wunmuan’n su’n, nn mɛn’n i nunnunlɛ’n nunman mmua kun.

Wafa nga lika’n w’a sanngan’n, ɔ nin a yoman sɔ le. Zezi i sɔnnzɔnfuɛ’m be usɛli i mɛn’n i awieliɛ’n su kosan. Kɛ ɔ tɛ́ su’n, ɔ seli kɛ: “Nvle kun wá jáo nvle kun wun, yɛ famiɛn kun wá jáo i wiengu famiɛn kun wun. Lika wie’m be nun asiɛ’n ɔ́ wá kéje, yɛ awe wá kpɛ́n, i kwlaa sɔ’n ti nyrɛnnɛn’n i bue nuan kaan sa.” (Mark 13:8) Akoto Pɔlu klɛli i kɛ: “Sran’m bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, bé sáci Nyanmiɛn wun, be nyin su yi-man be si nin be nin mun, be su si-man ye, be nyin su yi-man Nyanmiɛn, be su klo-man sran, be yo be sa-a be su yaci cɛ-man, bé dí abla, be su si-man be wun su nian, bé yó wlɛ, bé kpɔ́ sran kpa mun, bé yí be janvuɛ mun mán, bé yó like-ɔ be su bu-mɛn i akunndan, bé dí tutre, bé kló mɛn dilɛ’n trá Nyanmiɛn.”—2 Timote 3:1-5.

Be su bo jasin fɛ’n aniɛn kpanngban nun asiɛ wunmuan’n su. Zezi seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.”—Matie 24:14.

3 ?Kɛ be ko nunnun mɛn’n, ngue yɛ ɔ́ bɛ́ i sin ɔn?

Biblu’n seman kɛ be kwlaa nga be ti sran kpa’n, bé kó trán ɲanmiɛn su lɔ tititi. Sanngɛ, Zezi kleli kɛ like nga Ɲanmiɛn buli i akunndan laa kɛ ɔ́ yó mán klɔ sran mun’n, ɔ́ kpɛ́n su. Zezi seli kɛ: “Be nga be ti wɛtɛɛfuɛ’n, be liɛ su ti ye, afin mɛn’n ɔ́ wá yó be liɛ!” (Matie 5:5; 6:9, 10) Be nga kusu mɔ kɛ bé wú’n, nn be nin a nunnunman mɛn’n, Biblu’n waan cɛn wie lele’n, bé cɛ́n be. (Zɔb 14:14, 15; Zan 5:28, 29)

Zezi trán ɲanmiɛn su lɔ dí Ɲanmiɛn Sielɛ’n i su Famiɛn. Ɲanmiɛn nuan ijɔfuɛ Daniɛli klɛli i kɛ: “Aolia nun’n, n tɛ o lɛ n tɛ nian. Kpɛkuun n wunnin like kun b’ɔ fa klɔ sran [Zezi mɔ be cɛnnin i’n]. Ɔ fin nyanmiɛn ble’n nun su jra. Ɔ ɔli bian oke’n [Ɲanmiɛn Zoova] i wun lɔ, naan b’a fɛ i b’a wunnge lɔ. Be fali kwlalɛ’n be mɛnnin [Zezi], be mɛnmɛnnin i, yɛ be fali famiɛn diwlɛ’n be wlɛli i sa nun. Nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n, be suli i. I kwlalɛ sɔ’n ɔ́ trán lɛ tititi, i blɛ’n su sin-man le, yɛ i sielɛ’n su nunnun-man le.”—Daniɛl 7:13, 14; Lik 1:31, 32; Zan 3:13-16.

Be nga Ɲanmiɛn wá síe be’n, be su tɔman tukpacɛ kun, like fi su wlaman be ɲin nglonglo kun yɛ be su wuman kun. Ɲanmiɛn nuan ijɔfuɛ Ezai klɛli i kɛ: “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. Be su kplan-man sua be yaci man-man sran wie kɛ ɔ tran nun. Be su ta-man waka be yaci man-man sran uflɛ kɛ ɔ di i su mma.” (Ezai 65:21-23) Akoto Zan klɛli blɛ sɔ’n i su ndɛ seli kɛ: “Siɛn’n Nyanmiɛn i tranwlɛ’n wo sran’m be afiɛn! Ɔ nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:3, 4.

4 ?Ngue yɛ ɔ fata kɛ amun yo naan kɛ mɛn’n wíe’n, amun a fite nun ɔn?

Ɲanmiɛn wá síesíe ninnge nga klɔ sran’m be sacili be’n be ye, yɛ ɔ́ núnnún sa tɛ kwlaa nga ɔ o asiɛ’n su’n. Akoto Piɛli dili i nanwlɛ kɛ, kɛ be nga be tran mɛn’n i awieliɛ blɛ’n nun’n bé tí i sɔ liɛ’n, bé fá yó srilɛ. (2 Piɛr 3:3, 4) Sanngɛ Piɛli wla e su nun kɛ kannzɛ ɔ ti sɔ’n, ɔ fata kɛ e fa ajalɛ nga e su wa kɛn i ndɛ yɛ’n su.

Maan e fa laa sa mun e fa tu e wun fɔ. Piɛli klɛli i kɛ: “Laa mɛn liɛ’n, Nyanmiɛn a yaci-mɛn i lɛ, ɔ maan nzue’n tɔli ɔ yili dan kpa naan w’a kun sran tɛtɛ nga be o mɛn nun’n be kwlaa. Sanngɛ ɔ deli Noe b’ɔ bo sa nga be yo-ɔ ɔ ti su’n i ndolo’n, yɛ ɔ deli sran nso ekun.” (2 Piɛr 2:5) Piɛli kannin be nga be fɛ i sɔ ndɛ’n fa yo srilɛ’n be ndɛ kɛ: “Sa kun o lɛ bɔ be klo-man kɛ bé bú i akunndan. Sa sɔ’n yɛlɛ kɛ lalafuɛ nun kɛ Nyanmiɛn kannin ndɛ kun’n, kpɛkuun asiɛ’n nin nyanmiɛn su lɔ’n be trannin lɛ. Asiɛ’n fin nzue’n nun yɛ ɔ fiteli-ɔ, ɔ o nzue i afiɛn. Yɛ nzue kunngba’n kusu, kɛ ɔ yi katali asiɛ’n su’n, ɔ nunnunnin laa mɛn liɛ’n. Nyanmiɛn kunngba’n yɛ ɔ seli ekun kɛ maan be sie nyanmiɛn su lɔ’n nin asiɛa nga be o lɛ ndɛ’n, be lɛ maan sin di be. Bé síe be lɛ lele fá jú cɛn nga bé bú sran nga be sro-man Nyanmiɛn’n be fɔ bɔ bé sáci be’n.”—2 Piɛr 3:5-7.

Maan e nanti Ɲanmiɛn i mmla’m be su. Piɛli klɛli i kɛ be nga be kunndɛ kɛ bé fíte nun’n, maan ‘be nzuɛn’n yo kpa, yɛ be fa be wun mantan Nyanmiɛn!’ (2 Piɛr 3:11) Maan e sie i nzɔliɛ kɛ Piɛli kan tin su kɛ maan ‘be nzuɛn’n yo kpa,’ yɛ maan ‘be fa be wun mantan Nyanmiɛn.’ I ti’n, ɔ nunman nun kɛ sran kun tran lɛ ngbɛn se kɛ n lafi Ɲanmiɛn su. Annzɛ kusu ɔ minndɛ lele kpɛkun kasiɛn su’n, ɔ́ míɛn i ɲin naan ɔ nin Ɲanmiɛn be afiɛn w’a sɛ naan w’a kwla fite nun.

?Nzuɛn benin yɛ Ɲanmiɛn klun jɔ su ɔ? Amun kwla nian Biblu’n nun be nian naan sɛ ndɛ ng’ɔ o nun nin akunndan nga amun bu i ndɛ sɔ’n su’n, be ti kun o. I lɛ nun’n, sɛ amun man Zoova i Lalofuɛ’m be atin kɛ be uka amun’n, ɔ́ yó be fɛ dan. Biblu’n nun ndɛ nga be jran su be tɛ kosan’m be su’n, amun se be naan be kle amun, amun Biblu’n liɛ’n nun. Sɛ amun yo i sɔ’n, ɔ́ úka amun naan amun a kwla jran kekle sa nga bé bá e ɲrun lɔ’n be ɲrun. Kpɛkun srɛ su kunman amun ninnge nga be bo sin yia e mɔ i ti yɛ srɛ kwla kun e andɛ’n, be wun.

[Ja ngua lɛ ndɛ’n]

[Ndɛ kwle, bue 7]

Be su nunnunman asiɛ’n bɔbɔ ba’n, sanngɛ be nga be saci i’n yɛ bé núnnún be ɔ.