?Cɛn benin yɛ mɛn’n núnnún-ɔn?

MƐN’N I NUNNUNLƐ’N I SU NDƐ NƝƆN MƆ ZEZI KANNIN’N:

“Maan amun ɲin tran su, afin amun siman cɛn’n nin dɔ’n.”—MATIE 25:13.

“Maan amun ɲin tran su, yɛ amun tran minndɛ titi. Afin amun siman blɛ nga Ɲanmiɛn sieli’n.”—MARKI 13:33.

Ndɛ sɔ’m be kle kɛ asiɛ’n su wa’n sran fi siman cɛn nga mɛn’n núnnún’n. Sanngɛ Ɲanmiɛn liɛ’n ɔ si ‘cɛn’n nin dɔ’n’ nga ɔ́ wá núnnún mɛn’n. (Matie 24:36) ?I sɔ’n kle kɛ e kwlá siman blɛ nga i nun yɛ mɛn’n núnnún’n? Nɛ́n i sɔ-ɔ. Zezi boboli sa wie mɔ bé wá klé kɛ mɛn’n su wa wie’n kleli i sɔnnzɔnfuɛ mun.

SA NGA BÉ WÁ JÚ’N

Zezi boboli sa wie mɔ bé wá klé kɛ ‘mɛn’n i awieliɛ blɛ’n w’a ju’n.’ Ɔ seli kɛ: “Nvle kun wá jáso nvle kun wun. Yɛ famiɛn kun wá jáso famiɛn uflɛ wun. Asa kusu’n, awe’n wá kpɛ́n, yɛ asiɛ’n wá kéje. Kɛ amún tí i kɛ w’a keje lika nga sa nun’n, amún tí i ekun-ɔn, w’a keje lika uflɛ.” (Matie 24:3, 7) Asa’n, ɔ seli kɛ “tukpacɛ m’ɔ sa ndɛndɛ’n, ɔ́ wá trú.” (Liki 21:11) ?E wunman sa sɔ mun andɛ?

Andɛ’n, alɛ’n nin awe’n nin asiɛ m’ɔ keje’n ɔ nin tukpacɛ m’ɔ sa ndɛndɛ’n, be kle sran’m be yalɛ. Sa wie’m be kle sɔ weiin. Afuɛ 2004 nun’n, asiɛ’n kejeli jenvie nga be flɛ i kɛ Osean Ɛndiɛn’n i bo lɔ. I sɔ’n ti’n, nzue’n dili lika’n. Ɔ maan sran kɔe 225.000 be wuli. Asa’n, afuɛ nuan kunngba nun’n, tukpacɛ tɛ nga be flɛ i kɛ koronavirisi’n ɔ kunnin sran miliɔn 2 tra su. Zezi seli kɛ sɛ e wun sa sɔ mun’n, maan e si kɛ mɛn’n i awieliɛ’n w’a mantan koko.

“MƐN’N I AWIELIƐ BLƐ’N”

Biblu’n kannin “mɛn’n i awieliɛ blɛ’n” i ndɛ. (2 Piɛli 3:3, 4) Kɛ nga 2 Timote 3:1-5 fa kan’n sa’n, mɛn i awieliɛ blɛ’n nun’n sran’m be nzuɛn’n yó tɛ kpa. (Nian kuku nga be flɛ i kɛ “Like nga sran’m bé wá yó i mɛn’n i awieliɛ blɛ’n nun’n” i nun.) E sie i nzɔliɛ kɛ andɛ’n sran’m be bu be bɔbɔ be wun akunndan, be di be nuan, be yo wlɛ, yɛ be kloman sran. I kwlaa sɔ’n kle kɛ e o mɛn i awieliɛ blɛ’n nun sakpa.

?Sanngɛ mɛn’n i awieliɛ blɛ sɔ’n ɔ́ cɛ́? Biblu’n waan blɛ sɔ’n “w’a sɔnman.” Kɛ blɛ sɔ’n ko wie’n, Ɲanmiɛn núnnún “be nga be saci asiɛ’n.”—Sa Nglo Yilɛ 11:15-18; 12:12.

Ɔ KA KAN’N É WLÚ MƐN UFLƐ’N NUN

Ɲanmiɛn w’a dun mmua w’a sie cɛn nin dɔ nga ɔ́ wá núnnún mɛn nga’n. (Matie 24:36) Sanngɛ like ng’ɔ yo e fɛ’n yɛle kɛ “ɔ kunndɛman kɛ sran kun sa nunnun.” (2 Piɛli 3:9) I sɔ’n ti’n, ɔ man e blɛ naan e suɛn i su like naan e yo i klun sa. Afin ɔ kunndɛ kɛ e fite nun naan e tran asiɛ m’ɔ́ wá káci lika klanman’n i su.

Ɲanmiɛn fali ajalɛ kun naan sran’m b’a si like ng’ɔ fata kɛ be yo naan b’a tran mɛn uflɛ’n nun wie’n. Zezi kannin ajalɛ sɔ’n i ndɛ. Ɔ seli kɛ bé wá kán Ɲanmiɛn i Famiɛn dilɛ’n i jasin fɛ’n “mɛn’n wunmuan’n nun.” (Matie 24:14) Afuɛ 2019 nun’n, mɛn wunmuan’n nun’n Zoova i Lalofuɛ’m be fali dɔ miliaa nɲɔn tra su be boli jasin fɛ’n yɛ be kleli sran’m be Biblu’n nun like. Zezi seli kɛ, kɛ bé wá bó jasin fɛ’n mɛn wunmuan’n nun’n, i sin yɛ mɛn’n wíe-ɔ.

Ɔ ka kan’n, Ɲanmiɛn wá núnnún awa mun. Sanngɛ a kwla fite nun. Sɛ a fite nun’n á trán mɛn uflɛ nga Ɲanmiɛn waan ɔ́ fá mán e’n i nun wie. Ndɛ ng’ɔ́ bá lɛ’n nun’n, é wá kán like nga a kwla yo naan w’a tran mɛn sɔ’n nun wie’n i ndɛ.