Acɔliɛ nga é tó’n, nán ɔ to fuan
1. ?Wafa sɛ yɛ 1 Korɛntfuɛ Mun 9:26 kan jasin fɛ’n bolɛ junman’n niɔn?
1 Wafa nga akoto Pɔlu ko di Zoova i junman’n i kpa’n w’a tra laa’n, ɔ yoli i cinnjin kpa. Kɛ i ɲin wo i sɔ liɛ’n su’n yɛ ɔ wo ɔ. Ɔ manman like wie fi atin kɛ ɔ saci i ti nun. I ti’n, ɔ klɛli ndɛ yɛ’n, i waan: “I sɔ’n ti’n, n liɛ’n, n wanndi sanngɛ n wanndi-man ngbɛn, yɛ n to acɔliɛ-ɔ ɔ to fuan-man.” (1 Kor. 9:26) I ndɛ sɔ’n kan e jasin fɛ’n bolɛ junman’n wie. Yɛle kɛ, acɔliɛ mɔ é tó’n yɛle jasin fɛ’n mɔ e mian e ɲin e bo’n. Ɔ fata kɛ e bo i kɛ ɔ nin i fata’n sa naan w’a ba nvlɛ. ?Wafa sɛ yɛ e kwla yo sɔ ɔ?
2. Pɔlu nin i niaan Klistfuɛ’m be kpali blɛ nin lika nga ɔ ti mɔ be bo jasin fɛ’n. ?Wafa sɛ yɛ e kwla sɔnnzɔn be ɔ?
2 E wɔ kan sran’m be o lɛ’n: Pɔlu nin i niaan Klistfuɛ’m be boli jasin fɛ’n kan be si kɛ sran’m be sɔn lɛ’n. (Yol. 5:42; 16:13; 17:17) Ɔ maan, sɛ e jasin fɛ’n bowlɛ nun lɔ’n, e wun i kɛ nnɔsua nun yɛ sran kpanngban be o be awlo’m be nun’n, atrɛkpa’n blɛ sɔ’n nun yɛ ɔ nin i fata kɛ e bo jasin fɛ’n awloawlo’m be nun ɔn. Atrɛkpa’n kusu’n, nglɛmun ndɛ kpa kɛ sran’m bé kɔ́ junman annzɛ nnɔsua flɔlɔ kɛ bé jrá’n, be yia kaka be loto fawlɛ lɔ. Annzɛ kusu y’a sie blɛ nga sran’m be dan lika be kɔ aata diwlɛ’m be nun be ko toto be ninnge mun’n, i nzɔliɛ. Ɔ maan, sɛ blɛ sɔ’m be nun yɛ e ko bo jasin fɛ’n kle be’n, ɔ kwla ba nvlɛ kpa.
3. ?Wafa sɛ yɛ e kwla siesie e wun naan y’a di e jasin fɛ’n bowlɛ nun junman kpa ɔ?
3 E di e lika’n nun junman ngwlɛlɛ su: Acɔliɛ m’ɔ fata kɛ e to i kpa naan w’a to w’a fuanman’n i wie yɛle junman’n i kpa siesielɛ. Yɛle kɛ wie liɛ’n, be fa lika kun be fa man aniaan kpanngban kpa kɛ be bo jasin fɛ’n lɛ. Kɛ ɔ yo sɔ’n kusu’n, be tinngɛlɛ’n timan blɛblɛ, ɔ fa blɛ dan. Kɛ ɔ yo naan be yo sɔ’n, ɔ flunman kɛ be bu be nun akpasuaakpasua kanngan naan b’a fa be wun b’a wlɛ i junman nun kpa. Sɛ e kɔ klɔ’m be su annzɛ nanmue’m be nun’n, ajalɛ kunngba’n yɛ ɔ fata kɛ e fa ɔ.
4. ?Wafa sɛ yɛ e kwla nian jue trafuɛ’m be liɛ’n su naan e junman’n w’a ba nvlɛ ɔ?
4 Zezi seli kɛ i sɔnnzɔnfuɛ’m be ti “sran’m be trafuɛ kɛ jue trafuɛ sa.” (Mar. 1:17) Like nga jue trafuɛ’n i ɲin o su’n yɛle jue tralɛ. Ɔ faman lala’n ɔ yimɛn i nzue’n nun sa ngbɛn. I sɔ’n ti’n, lika nin dɔ nga be ko ɲan jue kaka’n yɛ ɔ nian ɔ ko tra jue’n niɔn. Yɛ kɛ ɔ ju lɔ’n kusu’n, ɔ boman kokowa. Ɔ maan, e kwla se kɛ ngwlɛlɛ yɛ jue trafuɛ’m be fa di be junman’n niɔn. Maan e kusu e nian be liɛ’n su naan e tu e klun e di e junman’n ngwlɛlɛ su.—Ebr. 6:11.