Klistfuɛ’m be yi wafa nga Zoova i dan’n ti’n i nglo
“Amun liɛ’n, amun su ti ye, afin an wun ase, yɛ an ti sa!” —Matie 13:16.
1. ?I nun mɔ Moizi fin Sinai oka’n su lɔ jrá’n, wafa nga kɛ Izraɛlifuɛ’m be wunnin Moizi be yoli’n, ɔ man kosan mennin su?
SƐ IZRAƐLIFUƐ mɔ be yiali Sinai oka’n bo lɔ’n b’a faman be wun b’a mantanman Zoova’n, é sé kɛ b’a baman kpa yolɛ mlɔnmlɔn. Afin, Zoova fɛli i tinmin dan’n deli be Eziptifuɛ’m be sa nun. Kɛ be juli aawlɛ flɛnnɛn’n nun lɔ kusu’n, Zoova mannin be like ng’ɔ ju be’n. Yɛle kɛ, ɔ mannin be aliɛ nin nzue. Kpɔkun kɛ ɔ́ kɔ́ i ɲrun’n, Zoova fanngan nun maan be kwlali Amalɛki alɛ kunfuɛ mun tɛtɛ kpa. (Ezipt Lɔ Tulɛ 14:26-31; 16:2–17:13) Sanngɛ, kɛ nvlefuɛ’m be o be ngblaliɛ’n nun aawlɛ flɛnnɛn’n nun Sinai oka’n i bo lɛ’n, be tili kɛ ɲanmiɛn su kpan kplannankplannan. Be wunnin kɛ ɲanmiɛn kpa sin piapiapia. I sɔ’n ti’n, be usuli kpa sa tututu. I sin’n, kɛ Moizi fuli Sinai oka’n su lɔ’n m’ɔ́ jrá’n, be wunnin kɛ Moizi i ɲrun’n ti ɲanɲanɲan. Sanngɛ, kɛ ɔ yo naan ɔ yo be fɛ’n, be suli siɛn. Yɛle Kɛ: ‘Srɛ kunnin be, i ti b’a kwlá wunngeman Moizi wun lɔ.’ (Ezipt Lɔ Tulɛ 19:10-19; 34:30) ?Zoova m’ɔ yoli Izraɛlifuɛ’m be ye dan sɔ’n, ngue ti yɛ kɛ Moizi i ɲrun’n yoli ɲanɲanɲan’n, srɛ kunnin be mɔ b’a kwlá nianman’n niɔn?
2. ?Ngue ti yɛ atrɛkpa’n, kɛ Izraɛlifuɛ’m be wunnin Moizi i ɲrun’n m’ɔ ti ɲanɲanɲan’n, srɛ kunnin be’n niɔn?
2 Atrɛkpa’n, sa kun mɔ Izraɛlifuɛ’m be yoli i laa nun’n, i ti yɛ srɛ kunnin be’n niɔn. Sa sɔ’n yɛle kɛ, be ɲinfu be yoli sika ɔkwlɛ nannin ba be fa klɔklɔli Zoova. I sɔ’n ti kusu’n, Zoova tuli be fɔ. (Ezipt Lɔ Tulɛ 32:4, 35) ?Sanngɛ fɔ sɔ’n mɔ Zoova fa tuli be’n, ɔ yoli be klun su yɛ be fali su? Cɛcɛ, w’a yoman be nun sunman be klun su. Kɛ Moizi yoli oke’n, ɔ fali sika ɔkwlɛ nannin ba’n i su ndɛ’n, ɔ nin sa wie mun ekun mɔ Izraɛlifuɛ’m be fa klɔklɔli Zoova’n, kpɛnnin be wla. Ɔ seli be kɛ: ‘Amun yoli ɲin kekle. Amun a faman Anannganman amun Ɲanmiɛn’n i nuan ndɛ’n su, amun a lafimɛn i su. Kɛ n si amun lele’n, amun nin a yaciman ɲin kekle yolɛ’n Anannganman su le.’—Mmla’n 9:15-24.
3. ?Blɛ mennin nun yɛ Moizi kɛtɛli i ɲrun’n su ɔ?
3 Kɛ mɔ srɛ kunnin Izraɛlifuɛ mun’n ti’n, amun nian like nga Moizi yoli’n. Biblu’n waan: ‘Kɛ Moizi nin be wieli ijɔ’n, ɔ fali tannin kɛtɛli i ɲrun. Blɛ m’ɔ́ kɔ́ Anannganman ɲrun lɔ i tannin sua’n nun mɔ bé kó koko yalɛ’n, ɔ tike i ɲrun’n su. Kɛ ɔ fin lɔ ba’n, ɔ wa kan ndɛ nga Ɲanmiɛn kan kleli i’n kle Izraɛlifuɛ mun. Izraɛlifuɛ’m be nian Moizi i ɲrun’n, be wun i kɛ i ɲrun’n ti ɲanɲanɲan. Kpɔkun Moizi kɛtɛ i ɲrun’n su ekun lele saan kɛ ɔ́ kɔ́ Ɲanmiɛn sin bé kó koko yalɛ’n yɛ ɔ tike su ekun ɔn.’ (Ezipt Lɔ Tulɛ 34:33-35) ?Ngue ti yɛ Moizi kɛtɛ i ɲrun’n su’n niɔn? ?Yɛ ngue yɛ sa sɔ’n kwla kle e ɔ? Sɛ e nin Zoova e afiɛn mantan, annzɛ ɔ mantanman kpa’n, kosan sɔ’m be su tɛlɛ’n kwla uka e naan y’a wun i wlɛ.
Be yacili be like kpa sannin be wun
4. ?Moizi i ɲrun’n m’ɔ katali su’n i bo mɔ akoto Pɔlu tuli’n yɛle mennin?
4 Moizi i ɲrun’n m’ɔ katali su’n, akoto Pɔlu kleli kɛ ɔ yi wafa nga Izraɛlifuɛ’m be klun angunndan’n, ɔ nin be awlɛn’n fa ti’n, i nglo. Ɔ seli kɛ: ‘Moizi ɲrun’n yoli ɲanɲanɲan lele ɔ maan Izraɛlifuɛ’m b’a kwlá niɛnmɛn i ɲrun a cɛman. B’a kwlá wunman sa fi wlɛ.’ (2 Korɛntfuɛ Mun 3:7, 14) Nanwlɛ, i sɔ’n ti ɲrɛnnɛn dan! Afin Zoova fali Izraɛlifuɛ mun yoli i nvle nunfuɛ mlɔnmlɔn. Ɔ maan, ɔ kunndɛ kɛ be fa be wun be mɛntɛn i. (Ezipt Lɔ Tulɛ 19:4-6) Sanngɛ, b’a kwlá yoman sɔ. Kɛ Ɲanmiɛn yili i ɲanɲanɲan’n Moizi i ɲrun su’n, b’a kwlá nianman. I sɔ mɔ be yoli’n, ɔ kle kɛ be awlɛn’n nin be angunndan’n kwlaa ɔ timan Zoova liɛ. Be kacili be sin sili i.
5, 6. (a) ?Sa kun mennin yɛ ɔ tɔli afuɛ ya kpɔlɛ klikli’n nun’n m’ɔ nin Moizi blɛ su liɛ’n, be afiɛn’n ti kun ɔn? (b) ?Be nga be sieli be su Zezi nuan bo’n, ɔ nin be nga b’a sieman be su’n, ngbaciɛ mennin yɛ ɔ o be afiɛn ɔn?
5 I lɛ nun’n, e wun kɛ sa sɔ’n, ɔ nin sa kun m’ɔ tɔli Klistfuɛ klikli’m be blɛ su’n, be afiɛn’n ti kun. Sa sɔ’n yɛle kɛ, i nun mɔ Pɔlu káci Klistfuɛ’n, nn be diman aenguɛ laa’n i Mmla’m be su kun. Aenguɛ uflɛ’n mɔ Zezi Klist m’ɔ ti Moizi Danfuɛ’n, ɔ nin sran’m be trali’n, i su yɛ be di ɔ. Zezi i ijɔlɛ’n, ɔ nin i ninnge’m be yolɛ’n nun kusu’n, i yɛ ɔ maan e wun Ɲanmiɛn m’ɔ yi i wun nglo ɲanɲanɲan’n i kpa ɔ. Ɔ maan kɛ Ɲanmiɛn cɛnnin Zezi mɔ Pɔlu kɛ́n i ndɛ’n, ɔ seli kɛ: ‘I yɛ ɔ maan e wun Ɲanmiɛn m’ɔ yi i wun nglo ɲanɲanɲan’n niɔn, ɔ fa Ɲanmiɛn i wafa kwlaa ng’ɔ ti’n.’ (Ebre Mun 1:3) Nanwlɛ, Zuifu’m be ɲannin like kpa kun be blɛ’n su! Afin, Ɲanmiɛn bɔbɔ i Wa’n mɔ i nuan nun ndɛ’n man anannganman nguan’n, yɛ ɔ kannin ndɛ kleli be ɔ. Sanngɛ sa ng’ɔ ti tɛ’n, yɛle kɛ be nun sunman b’a sieman be su jasin fɛ’n nga Zezi boli’n i bo. Ɔ maan kɛ Zezi kán be ndɛ’n, ɔ boli ndɛ kun mɔ Ɲanmiɛn nuan ijɔfuɛ Ezai kannin’n su. Ɔ seli kɛ: ‘Sran sɔ’m b’a tri. B’a bu be su nun waka, b’a muanmuan be ɲin naan be ɲinma w’a wunmɛn i, be su w’a timan, b’a wunmɛn i wlɛ, yɛ b’a saman be sin min wun naan m’an yoman be juejue.’—Matie 13:15; Ezai 6:9, 10.
6 Zezi i sɔnnzɔnfuɛ’m b’a yoman kɛ Zuifu sɔ’m be sa mlɔnmlɔn. Afin Zezi seli i sɔnnzɔnfuɛ’m be kɛ: “Amun liɛ’n, amun liɛ su ti ye, afin an wun ase, yɛ an ti sa.” (Matie 13:16) Nanwlɛ, Klistfuɛ kpa’m be wun blibli be kɛ bé sí Zoova naan bé sú i. Kpɔkun Zoova i klun sa’n m’ɔ o Biblu’n nun’n, be fɛ i yolɛ’n yo be awlɛn su like. Ɔ maan Klistfuɛ nga be kpali be sieli be ngunmin’n, be fa aenguɛ uflɛ nga Ɲanmiɛn nin sran’m be trali’n i junman’n be yi wafa nga Zoova i dan’n ti’n i nglo. I sɔ kunngba’n yɛ be nga be ti bua’m be wie mun’n, be yo ɔ.—2 Korɛntfuɛ Mun 3:6, 18.
Sa nga ti yɛ jasin fɛ’n te o bui bo’n
7. ?Kɛ sran sunman be kpalo jasin fɛ’n, ngue ti yɛ i sɔ’n boman e nuan ɔn?
7 Kɛ nga e fa wunnin i lɛ’n sa’n, Zezi nin Moizi be tinuntinun be blɛ su’n, Izraɛlifuɛ’m be yacili be like kpa sannin be wun. Andɛ kusu’n, kɛ ɔ ti sɔ wie ɔ. Yɛle kɛ, sran sunman be kpalo jasin fɛ’n nga e bo’n. Sanngɛ i sɔ’n boman e nuan. Pɔlu seli kɛ: ‘Sɛ e jasin fɛ nga e kan’n ɔ te o bui bo’n, nn be nga be su mlin’n be ɲrun yɛ ɔ te o bui bo ɔ. Be liɛ’n, be lafiman su yɛle kɛ mɛn nga i min’n ɔ sacili be angunndan’n.’ (2 Korɛntfuɛ Mun 4:3, 4) Nanwlɛ, Satan miɛn i ɲin naan ɔ́ fá jasin fɛ’n wla bui bo. Kpɔkun ɔ nin i sɔ’n ngba’n, sran sunman be bɔbɔ be kata be ɲrun’n su. Afin be kunndɛman kɛ bé wún sa wlɛ.
8. ?Sɛ é kwlá sé’n, wafa sɛ yɛ sran kpanngban be wunman ase ɔ? ?Yɛ wafa sɛ yɛ e kwla yo naan y’a yoman kɛ be sa ɔ?
8 Sɛ é kwlá sé’n, sran kpanngban be wunman ase. Afin be siman Ɲanmiɛn’n i su ndɛ. Kɛ Biblu’n kán nvle’m be ndɛ’n, ɔ seli kɛ: ‘Be kwlá wunman sa wlɛ. Nguan nga Ɲanmiɛn fa man sran’n, be dunman tɛman nun wie, afin be siman sa fi.’ (Efɛzfuɛ Mun 4:18) Ka naan Pɔlu w’a kaci Klistfuɛ’n, ɔ ti be mɔ be si Mmla’n i kpa’n be nun kun. Ɔ nin i sɔ’n ngba’n, w’a wunman sa wlɛ. Ɔ maan, ɔ kleli Ɲanmiɛn i asɔnun’n i yalɛ. (1 Korɛntfuɛ Mun 15:9) Sanngɛ, Zoova yili ndɛ nanwlɛ’n i nglo kleli i. Kɛ Pɔlu kɛ́n i bɔbɔ i ndɛ’n, ɔ se kɛ: ‘Min mɔ n sa tɛ liɛ’n tra sran’m be kwlaa be liɛ’n, Ɲanmiɛn sili min aunnvuɛ, naan Klist Zezi fɛ i awlɛn m’ɔ trɛ i sran wun’n klé be nga bé wá láfi i su mɔ bé ɲán anannganman nguan’n. Ɔ maan be wún kɛ ɔ trɛ i awlɛn be wun wie.’ (1 Timote 1:16) Nanwlɛ, kɛ Pɔlu sa’n, sran kpanngban be tanndannin Ɲanmiɛn ɲrun laa. Sanngɛ kɛ é sé yɛ’n, be ti Ɲanmiɛn i sufuɛ. I sɔ’n ti yɛ e bo jasin fɛ’n i titi e kle be nga bɔbɔ mɔ be tanndan e ɲrun’n niɔn. Asa ekun’n, Ɲanmiɛn Ndɛ’n mɔ e suɛn i titi mɔ e wun i wlɛ’n, ɔ sasa e. Ɔ maan sa nga be mɔ be wunman sa wlɛ’n be yo mɔ Zoova klun jɔman su’n, e yoman wie.
9, 10. (a) ?Wafa sɛ yɛ Zuifu’m be kleli kɛ be like liɛ nga be si i’n, be jran su cinnjinnjin naan be kaciman ɔn? (b) ?I sɔ kunngba’n yɛ andɛ asɔnunfuɛ kpanngban be yo ɔ? Amun yiyi nun.
9 Sran sunman ekun be liɛ’n, be kwlá wunman Ɲanmiɛn ninnge’m be wlɛ. Afin be kplinman su kɛ be kle be like. Kpɔkun be like liɛ nga be si’n, i su yɛ cinnjinnjin be jran ɔn. Be kaciman. I sɔfuɛ’m be wie yɛle Zuifu mun. Be kpaloli Zezi, ɔ nin like ng’ɔ kle’n. Afin be trali Moizi Mmla’n nun tɔlitɔli kɛ nga ndɛekplɔ’n fa tra waka’n m’ɔ yaciman nun’n sa. Sanngɛ nán be ngba yɛ be yoli sɔ ɔ. Afin, kɛ Zezi wuli mɔ Ɲanmiɛn cɛnnin i’n, ‘Ɲanmiɛn ɲrun jranfuɛ kpanngban kpa be fali ndɛ mɔ Klistfuɛ’m be fa su’n i su wie.’ (Sa Nga Be Yoli’n 6:7) Sanngɛ be kpanngban nga b’a faman ndɛ’n su’n, kɛ Pɔlu kán be ndɛ’n, ɔ seli kɛ: ‘Lele ndɛ’n, kɛ bé kánngan Moizi fluwa’n nun’n, tannin sɔ’n maan be wunman sa wlɛ.’ (2 Korɛntfuɛ Mun 3:15) Atrɛkpa’n, Pɔlu si ndɛ nga laa nun Zezi kan kleli Zuifu kpɛnngbɛn mun’n. Zezi seli be kɛ: ‘An suan Ɲanmiɛn Ndɛ nga be klɛli’n, afin an bu i kɛ i nun yɛ amún ɲán anannganman nguan’n niɔn, yɛ ndɛ sɔ’m be kan min ndɛ.’ (Zan 5:39) Nanwlɛ, Ɲanmiɛn Ndɛ’n m’ɔ be suɛnnin i lele’n ti’n, ɔ nin i fata kɛ Zuifu’m be wun i wlɛ kɛ Zezi yɛ ɔ ti Mɛsi’n niɔn. Sanngɛ, be angunndan’n trannin like uflɛ su. Ɔ maan, abonuan sa bɔbɔ nga Ɲanmiɛn i Wa’n yoli be’n, b’a kwlá buman be nanwlɛ.
10 Sa kunngba’n yɛ andɛ asɔnunfuɛ kpanngban be yo ɔ. Kɛ afuɛ ya kpɔlɛ klikli’n nun Zuifu mun sa’n, ‘be klo Ɲanmiɛn dan, sanngɛ klolɛ sɔ’n mɔ be fa klo i’n, be siman su ngwlɛlɛ.’ (Rɔmfuɛ Mun 10:2) Wie’m be suan Biblu’n, sanngɛ be lafiman su. Be kplinman su kɛ Klistfuɛ akpasua kun mɔ Ɲanmiɛn fɛli i wawɛ’n mannin be’n, mɔ be ti sran kpa nanwlɛfuɛ m’ɔ si ngwlɛlɛ’n, be lika yɛ Zoova sin mɔ kle i sufuɛ’m be like’n niɔn. (Matie 24:45) Sanngɛ e liɛ’n, e si kɛ Zoova kle i sufuɛ’m be like naan Ɲanmiɛn Ndɛ’n i silɛ’n ɔ́ yó dan kɔ́ i ɲrun tititi. (Nyanndra Mun 4:18) Kɛ mɔ e lo e wun man Zoova mɔ kle e like’n ti’n, ɔ yra e su. Yɛle kɛ e wun i klun sa’n i wlɛ.
11. ?Wafa sɛ yɛ like nga sran’m be kloman kɛ bé bú i angunndan’n, ɔ kwla yo maan be wunman sa wlɛ ɔ?
11 Sa nga ti yɛ sran wie mun ekun be wunmɛn i wlɛ’n yɛle kɛ, sa nga be kloman kɛ be bu i angunndan’n, be bumɛn i angunndan. Biblu’n seli kɛ Zezi i balɛ’n i ndɛ mɔ Ɲanmiɛn i sufuɛ’m be kan’n ti’n, sran wie’m bé wá srí be. Kɛ akoto Piɛli kán be nga Nowe blɛ su Ɲanmiɛn fali nzue dan’n nunnunnin be’n be ndɛ’n, ɔ seli kɛ: ‘Sa kun o lɛ mɔ be kloman kɛ be bu i angunndan.’ (2 Piɛr 3:3-6) I sɔ kunngba’n, sran kpanngban nga be tɔn be wun suɛn kɛ be ti Klistfuɛ’n, be si kɛ Zoova si aunnvuɛ, naan ɔ ti aklunyefuɛ kpɔkun ɔ yaci sa cɛ. Sanngɛ, be bumɛn i kɛ sran ng’ɔ yo sa tɛ’n, Zoova semɛn i kɛ w’a yoman like fi naan saan ɔ́ tú i fɔ. (Ezipt Lɔ Tulɛ 34:6, 7) Klistfuɛ kpa’m be liɛ’n, be mian be ɲin be wun ndɛ nga Biblu’n kɛn i sakpa’n i wlɛ.
12. ?Wafa yɛ sran’m be bɔbɔ be nzuɛn’n ti’n, be kwlá wunman sa wlɛ ɔ?
12 Asɔnunfuɛ kpanngban be bɔbɔ be nzuɛn’n ti’n, be kwlá wunman sa wlɛ. Zezi seli i blɛ su Ɲanmiɛn sulɛ wafa ng’ɔ ti tɛ’n be su kpɛnngbɛn’m be kɛ: ‘Amun nzuɛn’n i falɛ’n nun an yi Ɲanmiɛn ndɛ’n blo.’ (Matie 15:6) Kɛ Zuifu’m be fin lomuɛn Babilɔni bali’n, be tuli be klun be takali Ɲanmiɛn i sulɛ kpafuɛ’n i ekun. Sanngɛ kɛ ɔ́ kɔ́ i ɲrun’n, Ɲanmiɛn ɲrun jranfuɛ’m be tuli be wun kpɔkun be yoli be wun kpakpa. Cɛn nga be di be man Zoova’n, be ɲin kpali be su. Yɛle kɛ, kɛ m’ɔ fata kɛ be di’n, i ti yɛ be di ɔ. Aɲinyiɛ nunman nun. (Malasi 1:6-8) Zezi blɛ su kusu’n, mmla klefuɛ nin Farizifuɛ’m be fali be nzuɛn kpanngban’n sanngannin Moizi Mmla’n nun. Zezi kannin sran sɔ’m be gblɛ mɔ be ti’n i ndɛ. Afin be yo maan sran’m be wunman Mmla’n i kpa m’ɔ ti’n i wlɛ. (Matie 23:23, 24) Klistfuɛ kpa mun, sran’m be nzuɛn’n mɔ be fa kaci Ɲanmiɛn mmla’n, nán amun kplin su naan i sɔ’n ti’n, amun Ɲanmiɛn sulɛ’n bo nzue.
Ɔ ti kɛ e ‘wun Ɲanmiɛn mɔ be kwlá wunmɛn i’n sa’
13. ?Wafa nɲɔn nga Moizi wunnin wafa nga Ɲanmiɛn i dan’n ti’n yɛle mennin?
13 I nun mɔ Moizi o oka’n su lɔ’n, ɔ kunndɛli kɛ Ɲanmiɛn yi i wun nglo kle i. Sanngɛ Zoova i kɔminsin ɲanɲanɲan’n yɛ ɔ wunnin i ɔ. Asa ekun’n, kɛ Moizi kɔ́ Ɲanmiɛn i tannin sua’n nun lɔ’n, ɔ kataman i ɲrun’n su. Nanwlɛ, Moizi lafili Ɲanmiɛn su kpa, kpɔkun ɔ kunndɛ kɛ ɔ yo i klun sa’n. I sɔ’n ti kusu’n, Zoova fɛli i ɲanɲanɲan’n i bue kan kleli i aolia nun. I sɔ mɔ Moizi wunnin i ti’n, ɔ ti kɛ nn w’a wun Ɲanmiɛn bɔbɔ sa. Biblu’n kan Moizi ndɛ kɛ: ‘Ɲanmiɛn su m’ɔ lafi’n ti’n, ɔ trɛ i awlɛn, ɔ ti kɛ w’a wun Ɲanmiɛn mɔ be wunmɛn i’n sa.’ (Ebre Mun 11:27; Ezipt Lɔ Tulɛ 34:5-7) Ɔ maan, nán Moizi i ɲrun’n m’ɔ yoli ɲanɲanɲan’n i nun ngunmin yɛ ɔ yili wafa nga Ɲanmiɛn i dan’n ti’n i nglo ɔ. Sanngɛ Moizi miɛnnin i ɲin ukali Izraɛlifuɛ mun naan be si Zoova naan be su i. I lɛ nun’n, ɔ yili wafa nga Ɲanmiɛn i dan’n ti’n i nglo wie.
14. ?Ngue ti yɛ Zezi kwla wunnin wafa nga Ɲanmiɛn i dan’n ti’n niɔn? ?Yɛ ngue yɛ ɔ fa yoli i awlɛn su like ɔ?
14 I nun mɔ Zezi o ɲanmiɛn su lɔ’n, ɔ wunnin Ɲanmiɛn i ɲanɲanɲan’n. Ɔ wunnin i sɔ titi lele ka naan b’a bo nglo lɔ’n, ɔ nin asiɛ’n su wa ninnge’n kwlaa. (Nyanndra Mun 8:22, 30) Blɛ kpanngban sɔ’n nun’n, Zoova nin Zezi be trannin klolɛ su. Zezi yɛ ɔ ti Ɲanmiɛn Zoova i Wa kpɛn’n mɔ i kpa’n tra like ng’ɔ boli be’n, be kwlaa. Kpɔkun Ɲanmiɛn i klun jɔli i wun dan. Zezi kusu’n, ɔ kloli Ɲanmiɛn m’ɔ mɛnnin i nguan’n. (Zan 14:31; 17:24) Nanwlɛ, klolɛ’n i kpafuɛ’n trannin Siɛ’n ɔ nin i Wa’n be afiɛn. Zezi yoli kɛ Moizi sa. Yɛle kɛ, ɔ fɛli i ninnge klelɛ’n m’ɔ yi wafa nga Zoova i dan’n ti’n i nglo’n, yoli i awlɛn su like.
15. ?Ɔ yo sɛ yɛ maan Klistfuɛ’m be kwla wun wafa nga Ɲanmiɛn i dan’n ti’n niɔn?
15 Kɛ Moizi nin Zezi be sa’n, andɛ Ɲanmiɛn i Lalofuɛ nga be o asiɛ’n su’n, be wun blibli be kɛ bé wún wafa nga Zoova i dan’n ti’n. I sɔ’n ti’n, be kpaloman jasin fɛ’n. Akoto Pɔlu seli kɛ: ‘Sɛ sran kun i ɲin kaci e Min’n i wun’n ɔ yo i klun sa’n, ɔ yi tannin sɔ’n.’ (2 Korɛntfuɛ Mun 3:16) Kɛ mɔ e kunndɛ kɛ é yó Ɲanmiɛn klun sa’n ti’n, e suan i Ndɛ’n. Ɔ maan, kɛ Ɲanmiɛn i Wa Zezi Klist m’ɔ ti Famiɛn’n, i ɲrun’n yili Zoova i ɲanɲanɲan’n i nglo’n, ɔ yo e fɛ. Kpɔkun e yo sa ng’ɔ yo’n wie. Kɛ Moizi nin Zezi be sa’n, e le junman kun e di. Yɛle kɛ, wafa nga Ɲanmiɛn ti ɲanɲanɲan’n, e kɛn i ndɛ kle e wiengu mun.
16. ?Ngue ti yɛ ndɛ nanwlɛ’n mɔ e si i’n, ɔ ti e su yralɛ like ɔ?
16 Zezi seli kɛ: ‘N Si, kwla o, yɛle kɛ a fa ninnge nga mun fiali ngwlɛlɛfuɛ nin be mɔ be si sa’n be wun, sanngɛ a yi be nglo kleli be mɔ be ti kɛ ba kanngan mun sa’n.’ (Matie 11:25) Nanwlɛ, be nga be ti aenvuɛfuɛ mɔ be kunndɛ Zoova sakpa’n, ɔ yo maan be wun i klun sa’n i wlɛ. Kpɔkun be si i sran’n i wafa ng’ɔ ti’n. (1 Korɛntfuɛ Mun 1:26-28) E bɔbɔ e kpa yolɛ’n ti’n, e fa e wun mantan Zoova naan ɔ nian e su naan ɔ kle e like. Nanwlɛ, like kpa kwlaa nga mɔ maan e kwla fa e wun mantan Zoova’n, nán maan e tranlɛ naan be san e wun. Kpɔkun ninnge kpanngban nga Zoova fa man e mɔ maan e si i kpa tra laa’n, maan e klun jɔ be su.
17. ?Wafa sɛ yɛ e kwla si Zoova i wafa m’ɔ ti’n, i kpa ɔ?
17 Pɔlu seli Klistfuɛ nga Ɲanmiɛn fɛli i wawɛ’n mannin be’n be kɛ: ‘E kwlaa nga Ɲanmiɛn w’a yi e ɲrun tannin ng’ɔ kata e ɲrun’n, e wun wafa nga e Min’n i dan’n ti’n i kwlaa kɛ niannun nun sa. É káci kɛ i wafa nga e fa wun i’n sa tititi lelele é fɛ́ i kpa.’ (2 Korɛntfuɛ Mun 3:18) Maan e yo be nga bé kɔ́ ɲanmiɛn su lɔ’n, annzɛ be nga bé ká asiɛ’n su wa’n nin o, sɛ e si Zoova kpa’n, yɛle kɛ sɛ e si i sran’n i wafa’n kɛ nga Biblu’n fa kan’n sa’n, é fɛ́ i kpa. Asa ekun’n, sɛ e klun jɔ Zezi Klist i nzuɛn’n, ɔ nin ninnge ng’ɔ kleli’n be’n be su’n, é sunnzun i. Ɔ maan, é yí wafa nga Zoova i dan’n ti’n i nglo kpa. Nanwlɛ, kɛ e fa like nga e yo’n e yi wafa nga Ɲanmiɛn i dan’n ti’n i nglo’n, mɔ e si kɛ i sɔ yolɛ’n mɛnmɛn i’n, i sɔ’n yo e fɛ dan!
?Amun wla te kpɛn su?
• ?Kɛ Ɲanmiɛn i ɲanɲanɲan’n fiteli Moizi i ɲrun’n su’n, ngue ti yɛ srɛ kunnin Izraɛlifuɛ mun mɔ b’a kwlá nianman ɔn?
• ?Klistfuɛ klikli’m be blɛ su’n, wafa sɛ yɛ jasin fɛ’n trannin “bui bo” ɔ? ?Yɛ e blɛ liɛ’n nun’n nin?
• ?Wafa sɛ yɛ e kwla yi wafa nga Ɲanmiɛn i dan’n ti’n i nglo ɔ?