Ɲanmiɛn Nin Sran Klolɛ M’ɔ Wla Sran Yakpa’n
‘Ɲanmiɛn a fɛmɛn i wawɛ’n w’a manman e kɛ e sa ɲan, sanngɛ ɔ fa mannin e kɛ ɔ wla e fanngan, e klo i bɔbɔ Ɲanmiɛn nin sran, yɛ e si ngwlɛlɛ.’—2 TIMOTE 1:7.
1, 2. (a) ?Ngue yɛ sran ng’ɔ klo sran’n, ɔ kwla yo ɔ? (b) ?Ngue ti yɛ Zezi i yakpa yolɛ’n ti liɛ ngunmin ɔn?
ABLOKI lɔ nvle nga be flɛ i Ɔstrali’n, bian kun nin i yi be jali be wun uflɛuflɛ. Be ɔli klɔ’n i tiwa lɔ wia afiliɛ lɔ lika’n nun jenvie wuɛlɛ. Kɛ bé wúɛ nzue’n, be kɔ i bo lɔ mmuammua kpa. Be o nzue’n i bo lɔ lele bé fíte ɔ, lableke fuaii dan kpa wie yɛ ɔ o be ɲrun yɛ. Ɔ ɔli bla’n su kɛ ɔ́ kó dí i. Sanngɛ yakpa su’n, yasua’n kpaloli i yi’n ɔli mmua. Kpɔkun i bɔbɔ’n yɛ gla, jue’n dili i ɔ. Kɛ bé yó i sɛ’n, i angbeti’n seli kɛ: “Ee, min ti yɛ ɔ wuli ɔ!”
2 Nanwlɛ, kannzu sran klolɛ’n wla sran yakpa. Afin like nga sran’n kwlá yomɛn i titi’n, ɔ yo i sɔ like’n. Zezi seli kɛ: ‘Sran klolɛ ng’ɔ ti dan trɛ i ngba’n yɛle sran mɔ i janvuɛ ti ɔ fɛ i wun man’n.’ (Zan 15:13) Kɛ Zezi kannin sɔ’n, cɛn kun w’a sinman kpɔkun i bɔbɔ fɛli i wun mannin. Sanngɛ nán sran kunngba ti yɛ ɔ yoli sɔ ɔ, sran’m be kwlaa be ti ɔ. (Matie 20:28) Wie liɛ’n, sran’n sunnzunman kɛ ɔ́ fɛ́ i wun mán. Sanngɛ sa wie ti’n, ɔ jaso yakpa su yo. Nɛ́n i sɔ yɛ Zezi yoli ɔ. Afin i liɛ’n, ɔ si kɛ bé kún i waka’n su. Naan sanngɛ ka naan b’a kun i’n, bé yó i finfin, bé klé i ɲrɛnnɛn, yɛ bé dí i jɔlɛ tɛ. I kpa bɔbɔ’n, ɔ dun mmua kan kleli i sɔnnzɔnfuɛ mun. Ɔ seli kɛ: ‘An nian, e su kɔ Zerizalɛmu, bé wá fá m mɔ n kacili Sran’n mán Ɲanmiɛn ɲrun jranfuɛ dandan mun nin mmla klefuɛ mun. Bé sé kɛ m’an di fɔ naan bé kún min, bé fá min mán be nga be timan Zuifu’n, bé yó n finfin, bé gúa min wun ngɔsrɛ, bé bó min nin ngble, yɛ bé kún min.’—Mark 10:33, 34.
3. ?Ngue yɛ maan Zezi yoli yakpafuɛ dan ɔn?
3 Nanwlɛ, Zezi i yakpa yolɛ sɔ’n ti abonuan. ?Sanngɛ ngue yɛ ɔ wlɛli i yakpa sɔ’n niɔn? ?Nán Ɲanmiɛn m’ɔ lafi i su mɔ i ɲin yi i’n ti ɔ? (Ebre Mun 5:7; 12:2) Sanngɛ kɛ e niɛn i kpa sa’n, sɛ w’a kloman Ɲanmiɛn nin sran’n nn w’a kwla yoman yakpa. (1 Zan 3:16) Sɛ e kusu e klo Ɲanmiɛn nin sran naan e lafi Ɲanmiɛn su naan e ɲin yi i’n, é yó yakpafuɛ kɛ Zezi sa wie. (Efɛzfuɛ Mun 5:2) ?Sanngɛ é yó sɛ naan y’a klo Ɲanmiɛn nin sran? Saan kɛ é sí klolɛ sɔ’n i finwlɛ’n.
‘Sran klolɛ’n fin Ɲanmiɛn’
4. ?Ngue ti yɛ e kwla se kɛ sran klolɛ’n fin Zoova ɔ?
4 Zoova yɛ ɔ ti sran klofuɛ’n niɔn, kpɔkun sran klolɛ’n fin i. Akoto Zan seli kɛ: ‘N sran kpa mun, maan e klo e wun, afin sran klolɛ’n fin Ɲanmiɛn. Sran kwlaa ng’ɔ klo sran’n, ɔ ti Ɲanmiɛn wa, yɛ ɔ si Ɲanmiɛn. Sran ng’ɔ kloman sran’n, nn ɔ siman Ɲanmiɛn, afin Ɲanmiɛn’n yɛ ɔ ti sran klofuɛ’n niɔn.’ (1 Zan 4:7, 8) Ɔ maan sran ng’ɔ si Zoova kpa m’ɔ lo i wun mɛn i’n, ɔ kwla fɛ i wun mɛntɛn i. Kɛ ɔ ko yo sɔ’n, ɔ kwla klo sran kɛ Ɲanmiɛn sa wie.—Filipfuɛ Mun 1:9; Zak 4:8; 1 Zan 5:3.
5, 6. ?Ngue yɛ maan Klist i sɔnnzɔnfuɛ’m be kwla kloli Ɲanmiɛn nin sran kɛ Klist liɛ’n sa ɔ?
5 Srɛlɛ kasiɛn nga Zezi nin i sɔnnzɔnfuɛ kpa 11 be srɛli’n nun’n, ɔ kleli kɛ sɛ be si Ɲanmiɛn’n, bé kló Ɲanmiɛn nin sran. Ɔ seli kɛ: ‘N yoli maan be sili wɔ, yɛ n yoli maan bé wá sí wɔ ekun naan klolɛ nga a fa kloli min’n, be si kɛ a klo be sɔ wie, yɛ be si kɛ min nin be y’a yo sran wunmuan.’ (Zan 17:26) Wafa nga Zezi nin i Si’n be kloli be wun’n, ɔ yoli naan i sɔnnzɔnfuɛ’m be nian su. Yɛle kɛ, i ijɔlɛ nin i ayeliɛ’n be nun’n, ɔ yili Ɲanmiɛn i sran wafa ng’ɔ ti’n i nglo. I sɔ’n ti’n, ɔ seli kɛ: ‘Sran ng’ɔ wun min’n, nn w’a wun e Si’n.’—Zan 14:9, 10; 17:8.
6 Ɲanmiɛn wawɛ’n yɛ maan be kwla klo Ɲanmiɛn nin sran kɛ Klist sa ɔ. (Galasifuɛ Mun 5:22) Afuɛ nga be flɛ 33 nun Pantekɔtu nun’n, Ɲanmiɛn fɛli i wawɛ’n mannin Klistfuɛ klikli mun kɛ nga Zezi kan kleli be’n sa. Kɛ ɔ yoli sɔ’n, be wla kpɛnnin ninnge sunman nga Zezi kleli be’n be su. Kpɔkun be wa wunnin Ɲanmiɛn Ndɛ’n i bo kpa trali laa’n. Ɔ maan, be Ɲanmiɛn klolɛ’n takali kpa ekun. (Zan 14:26; 15:26) I sɔ’n ti’n, sɛ kunlɛ bɔbɔ yɛ bé kún be’n, sanngɛ be wun kpɛli be. Be boli jasin fɛ’n i yakpa su.—Sa Nga Be Yoli’n 5:28, 29.
Yakpa yolɛ nin Ɲanmiɛn nin sran klolɛ’n, be nglo yilɛ
7. ?Kɛ Pɔlu nin Barnabasi bé dí be ngaliɛ difuɛ junman’n, sa kekle mennin yɛ ɔ tɔli be su ɔ?
7 Akoto Pɔlu seli kɛ: ‘Ɲanmiɛn a fɛmɛn i wawɛ’n w’a manman e kɛ e sa ɲan, sanngɛ ɔ fa mannin e kɛ ɔ wla e fanngan, e klo i bɔbɔ Ɲanmiɛn nin sran, yɛ e si ngwlɛlɛ.’ (2 Timote 1:7) Sa ng’ɔ tɔli Pɔlu bɔbɔ su’n ti yɛ ɔ kan sɔ ɔ. I nun m’ɔ nin Barnabasi bé dí be ngaliɛ difuɛ junman’n, amun nian sa ng’ɔ tɔli be su’n. Be boli jasin fɛ’n klɔ sunman su. Klɔ sɔ’m be nun wie yɛle Antiɔsu nin Ikoni, ɔ nin Listri. Klɔ kwlaa sɔ’m be nun sran wie’m be kacili Klistfuɛ. Sanngɛ wie’m be kpaloli be ndɛ’n, yɛ be kleli be ɲrɛnnɛn. (Sa Nga Be Yoli’n 13:2, 14, 45, 50; 14:1, 5) Listri lɔ liɛ’n, sran’m be bali Pɔlu su kpuu be wa finfinnin i yɔbuɛ. Kɛ mɔ be buli i kɛ w’a wu’n ti’n, be yacili i lɛ ɔli. ‘Sanngɛ Zezi i sɔnnzɔnfuɛ’m be sin yiɛli i naan w’a jao a sɛ i sin klɔ lɔ ekun. Kɛ aliɛ cɛnnin’n, ɔ nin Barnabasi be ɔli Dɛrbu.’—Sa Nga Be Yoli’n 14:6, 19-20.
8. ?Wafa sɛ yɛ Pɔlu nin Barnabasi be yakpa yolɛ’n yi be sran klolɛ dan’n i nglo ɔ?
8 ?Kunlɛ mɔ be waan bé kún Pɔlu’n ti’n, srɛ kunnin i nin Barnabasi, ɔ maan be seli kɛ be diman be junman’n kun? Cɛcɛ, b’a seman sɔ mlɔnmlɔn! Afin be ɔli Dɛrbu, yɛ ‘be ɲannin sran kpanngban lɛ.’ I sin’n, be ‘sali be sin Listri nin Ikoni yɛ Antiɔsu.’ Be yoli sɔ naan bé wlá Klistfuɛ uflɛuflɛ’m be fanngan naan be lafi Ɲanmiɛn su kpa. Pɔlu nin Barnabasi be seli kɛ: ‘Saan é wún ɲrɛnnɛn dan kpa naan y’a kwla ju Ɲanmiɛn mɛn’n nun.’ Nanwlɛ, sɛ b’a kloman Klist i ‘bua mma mun’n,’ nn b’a yoman yakpa sɔ. (Sa Nga Be Yoli’n 14:21-23; Zan 21:15-17) Kɛ be siesieli asɔnun kpɛnngbɛn mun asɔnun nga be takali be uflɛ’n be nun’n, be srɛli ‘Ɲanmiɛn kɛ ɔ jran be sin, be fa be wlali e Min’n mɔ be lafi i su’n, i sa nun.’
9. ?Klolɛ mɔ Pɔlu kloli Efɛzi lɔ asɔnun kpɛnngbɛn mun’n ti’n, ngue yɛ be kusu be yoli ɔ?
9 Kɛ Pɔlu o lɛ’n, ɔ klo sran kpɔkun ɔ ti yakpafuɛ dan. I sɔ’n ti’n, Klistfuɛ klikli’m be sunman lika be kloli i kpa wie. Afuɛ nsan ng’ɔ dili i Efɛzi lɔ’n, sran’m be kleli i yalɛ dan. Sanngɛ, kɛ ɔ nin lɔ asɔnun kpɛnngbɛn’m be yiali’n, amun nian like ng’ɔ yoli’n. (Sa Nga Be Yoli’n 20:17-31) Ɔ wlali be fanngan kɛ be nian bua fa nga Ɲanmiɛn fa be sieli be su’n, be su kpa. Kɛ i nuan tɔli’n, ɔ nin be kotoli naan ɔ nin Ɲanmiɛn b’a koko yalɛ. ‘Be kwlaa be ɲinmuɛn guali, be to be sa blɛli i. Sa ng’ɔ bo be wla trɛ i kwlaa’n yɛle kɛ ɔ seli be kɛ be su wunmɛn i kun.’ Nanwlɛ, wafa nga aniaan’m be kloli Pɔlu’n, ɔ yo ɲɛnmɛn! Kɛ Pɔlu nin i janvuɛ m’ɔ nin be tu ajalɛ’n be nin “be tili nun’n,” yɛ be kwla ɔli ɔ. Afin aniaan’m be waan be yaciman be nun.—Sa Nga Be Yoli’n 20:36–21:1.
10. ?Wafa sɛ yɛ andɛ Zoova i Lalofuɛ’m be kle kɛ be ti yakpafuɛ naan be klo be wiengu ɔ?
10 Andɛ kusu’n, akpasua sunianfuɛ nin nvle sunianfuɛ mun, nin asɔnun kpɛnngbɛn mun, nin aniaan sunman be nian Zoova i bua fa’n i lika kpa yakpa su. I sɔ’n ti’n, be niaan’m be klo be wie kpa. Amun nian. Nvle wie mɔ alɛ o be nun’n, annzɛ be tannin e jasin fɛ’n bolɛ’n, akpasua sunianfuɛ nin nvle sunianfuɛ’m be nin be yi’m be sin asɔnun’m be su be nian be niaan’m be lika. Sanngɛ nn be kwla kun be, annzɛ be kwla wla be bisua. Wie liɛ kusu’n, kpɛnngbɛn mun nin be sran’m be kle Zoova i Lalofuɛ’m be ɲrɛnnɛn. Afin, Zoova i Lalofuɛ’m be waan be yiman be niaan mun manman, annzɛ be kleman wafa nga be yo mɔ be ɲan be fluwa mun’n. Wie liɛ ekun kusu’n, jasin fɛ’n bolɛ mɔ be waan be yacimɛn i bolɛ’n, annzɛ be aɲia mɔ be waan be yaciman be yolɛ’n ti’n, Zoova i Lalofuɛ kpanngban be wun be ɲrun. Be kle be yalɛ, yɛ wie liɛ bɔbɔ be kun be. (Sa Nga Be Yoli’n 5:28, 29; Ebre Mun 10:24, 25) Nanwlɛ, wafa nga e niaan yakpafuɛ sɔ’m be lafi Ɲanmiɛn su mɔ be klo Ɲanmiɛn nin sran’n, maan e nian su!—1 Tɛsalonikfuɛ Mun 1:6.
Nán maan e Ɲanmiɛn nin sran klolɛ’n wie
11. ?Wafa sɛ yɛ Satan nin Zoova i sufuɛ’m be kun ɔn? ?Yɛ ngue yɛ ɔ fata kɛ be yo naan b’a kwla jran kekle ɔ?
11 Kɛ be fuannin Satan’n, ɔ bali asiɛ’n su wa ya su. Ɲanmiɛn i sufuɛ mɔ be ‘fa Ɲanmiɛn mmla’n nin ndɛ nanwlɛ nga Zezi yili i nglo’n su’n,’ be su yɛ ɔ yi i klunngbɔ’n niɔn. (Sa Nglo Yilɛ 12:9, 17) I sɔ’n ti’n, like kun ng’ɔ yo’n yɛle be yalɛ klelɛ. Sanngɛ ɔ yoman ye. Afin kɛ ɔ yo sɔ bɔbɔ’n, yɛ Ɲanmiɛn i sufuɛ’m be klo be wun kpa ekun ɔn. Kpɔkun Ɲanmiɛn junman mɔ be di’n, be di i kpa tra laa’n. Like kun ekun nga Satan yo’n, yɛle kɛ ɔ sin fɔ m’ɔ o e nun’n i lika naan w’a ɲan e. Sanngɛ wafa nga e fa jran yalɛ klelɛ’n i ɲrun’n, nɛ́n i kunngba’n yɛ e fa jran e nzuɛn tɛ’n i ɲrun ɔn. Afin tɛ’n o e nun. E klun angunndan ‘m’ɔ ti tɛ’n, mɔ be yo i sa fi ɔ ɔ yoman ye’n’ yɛ e nin i e kun ɔn.—Zeremi 17:9; Zak 1:14, 15.
12. ?Wafa sɛ yɛ Satan fa ‘angunndan nga sran’m be bu’n,’ fa tanndan e ɲrun naan e yaci Ɲanmiɛn klolɛ ɔ?
12 Like kun ekun nga Satan fa ɲan sran mun’n, yɛle ‘angunndan nga sran’m be bu’n.’ Be angunndan sɔ’n, ɔ kle kɛ Ɲanmiɛn wawɛ’n sieman be mlɔnmlɔn. (1 Korɛntfuɛ Mun 2:12) Ɔ maan, be kunndɛ kɛ bé ɲán be wun ndɛndɛ, yɛ be fa aɲanbeun kunndɛlɛ’n cici be ti. I sɔ’n yɛ ɔ ti ‘angunndan nga be bu fa gua ninnge nga be wun be’n be su’n’ niɔn. (1 Zan 2:16; 1 Timote 6:9, 10) Sika nin ninnge’m be kunndɛlɛ’n timan tɛ sɔ liɛ. Sanngɛ sran ng’ɔ klo be tra Ɲanmiɛn’n, Satan yɛ ɔ sie i ɔ. Angunndan nga sran’m be bu’n, ɔ “wlawla” be fa yi i sa tɛ nun. Afin klɔ sran mɔ fɔ o i nun’n, i ɲin o i sin. Ɔ́ síe sran’n, sran’n wunman nun. Yɛ i ta’n kanman ase. Sɛ ɔ ti aunmuan’n, nn é sé kɛ ɔ fita asiɛ wunmuan’n su. Nán maan i sɔ angunndan’n, ɔ saci e!—Efɛzfuɛ Mun 2:2, 3; Nyanndra Mun 4:23.
13. ?Sa mennin wie nun yɛ sɛ y’a yoman yakpafuɛ’n, e nzuɛn’n kwla saci ɔ?
13 Sɛ e waan é jrán angunndan nga sran’m be bu’n i ɲrun naan é kpálo i’n, ɔ fata kɛ e yo yakpafuɛ. I wie yɛle kɛ, sɛ e wun like tɛ wie televiziɔn annzɛ ɔrdinatɛli nun’n, saan é yó yakpafuɛ naan y’a nuɛn i. Sɛ kusu e o sriman wie bo’n, saan é yó sɔ wie naan y’a jaso i bo. Sɛ janvuɛ tɛtɛ’m be wlawla e kɛ e yo sa wie naan e sro be’n, é sú be su. I sɔ kunngba’n, sɛ suklu lɔ o, sɛ junman diwlɛ lɔ o, annzɛ e mantanfuɛ mun nin e osufuɛ wie’m be yo e finfin’n naan y’a yoman yakpafuɛ’n, e su kwlá nantiman Ɲanmiɛn i mmla’n su.—1 Korɛntfuɛ Mun 15:33; 1 Zan 5:19.
14. ?Sɛ e wun kɛ angunndan nga sran’m be bu’n w’a sa e’n, ngue yɛ ɔ fata kɛ e yo ɔ?
14 Nanwlɛ, ɔ ti cinnjin kpa kɛ e mian e ɲin naan e Ɲanmiɛn nin e niaan’m be klolɛ’n w’a tra ndin kpa! Maan e fa blɛ e niannian e nzuɛn’n nin ninnge nga e awlɛn o su kɛ é yó be’n, sɛ angunndan nga sran’m be bu’n w’a saman e o. Sɛ e wun kɛ w’a sa e kaan sa bɔbɔ’n, maan e fa wlɛ i srɛlɛ’n nun. Maan e srɛ Zoova kɛ ɔ uka e naan e tu i bo mlɔnmlɔn. I sɔ srɛlɛ mɔ be tu be klun be srɛ’n, Zoova fɛ i su sie i bo. (Jue Mun 51:19) Asa ekun’n, Ɲanmiɛn wawɛ’n i tinmin liɛ’n tra angunndan nga sran’m be bu’n lele.—1 Zan 4:4.
Maan e jran sa nga be tɔ e su’n be ɲrun yakpa su
15, 16. ?Wafa sɛ yɛ sran klolɛ kɛ Klist liɛ sa’n, ɔ yo maan e jran kekle sa’m be ɲrun ɔn? An fa sa kun yiyi nun.
15 Fɔ nin kpɛnngbɛn yolɛ’n ti’n, Zoova i sufuɛ’m be tɔ tukpaciɛ, be yo cɛcɛwafuɛ, annzɛ be angunndan’n sanngan. Annzɛ sa uflɛ ɲan be. (Rɔmfuɛ Mun 8:22) Sanngɛ sɛ e klo Ɲanmiɛn nin sran’n, é kwlá jrán sa sɔ’m be ɲrun kekle. Amun e fa e niaan bla kun i ndɛ e nian. Be flɛ i kɛ Namangolwa, yɛ ɔ ti bubuwafuɛ. Ɔ fin sran ble mɛn’n nun nvle nga be flɛ i Zambi’n. I si nin i nin be ti Zoova i Lalofuɛ. Kɛ ɔ ɲannin afuɛ nɲɔn’n, yɛ ɔ bubuli ɔ. I waan: “Wafa nga n ti’n ti’n, ɲannzuɛn kun min. Afin n bu i kɛ sɛ sran’m be wun min’n, bé kpítí. Sanngɛ min niaan nga e nin be e su Zoova’n, be ukali min kpa. Ɔ maan, ɲannzuɛn w’a kunman min kun. I sin’n, be yoli min batɛmu.”
16 Namangolwa le i bia. Sanngɛ sɛ ɔ ju lika wie naan ɔ kwlá fɛmɛn i bia’n, kannzɛ lika’n ti fiɛn sɛ’n, ɔ lemɛn i yowlɛ, ɔ kpɛ i bo ase. Afuɛ kwlaa nun’n, ɔ fa nglo nɲɔn annzɛ nɲɔn tra su yo cɛn kunngun atin bofuɛ. Cɛn kun mɔ Namangolwa bó jasin fɛ’n klé sran kun’n, sran’n le sunlɛ. ?Ngue ti ɔ? Kɛ ɔ wunnin wafa nga e niaan bla’n fa ti’n mɔ sanngɛ ɔ lafi Ɲanmiɛn su, kpɔkun i awlɛn sɔ’n, ɔ wluwluli i wun dan. Zoova kusu yrali Namangolwa su dan. Afin sran ng’ɔ kle be Biblu’n nun like’n, be nun sran nnun be yoli be batɛmu. Kpɔkun, be sieli kun asɔnun kpɛnngbɛn. I waan: “Ɔ ju cɛn wie’n, min ja’n yra min sa fiaan. Sanngɛ, n tran ɔn, n tranman.” Asiɛ wunmuan’n su’n, e niaan sunman be ti kɛ aniaan bla sɔ’n sa. Sanngɛ awlɛn mɔ be le i be fa bo jasin fɛ’n Ɲanmiɛn nin sran mɔ be klo i’n ti’n, ɔ ti abonuan. Zoova kusu’n, be ndɛ lo i kpa!—Aze 2:7.
17, 18. ?Ngue ti yɛ kɛ tukpaciɛ nin sa kekle uflɛ be o sran wie’m be su’n, be kwla tra be awlɛn ɔn? An fa e lika liɛ’n nun wa sa wie’m be yiyi nun.
17 Wie liɛ’n, tukpaciɛ m’ɔ o sran wie’m be su cɔcɔcɔ’n ti’n, be sa sin bubu be annzɛ be wla bo be wun dan. Asɔnun kpɛnngbɛn kun seli kɛ: “Asɔnun’n i fluwa nun ndɛ suanlɛ nga n kɔ i bo’n nun lɔ’n, aniaan bla kun le diabɛti yɛ i wi’n yo i ya. Kun ekun le tukpaciɛ nga be flɛ i kansɛli’n, be nun nɲɔn be le tukpaciɛ nga be flɛ i ngbaciɛ’n i wafa kun (arthrite). Kun ekun le tukpaciɛ wie mɔ kɛ ɔ o sran’n su’n, ɔ saci i mmoja’n mlɔnmlɔn (lupus) kpɔkun i kunngba’n, ɔ le tukpaciɛ mɔ kɛ ɔ o sran’n i wun’n, i kpɔlɛkpɔlɛ’m be yo i ya, yɛ ɔ lafiman’n (fibromyalgie). Ɔ ju cɛn wie’n, aniaan bla sɔ’m be sa sin bubu be. Sanngɛ be kpɛman aɲia’m be nun cɛn. Cɛn nga b’a baman’n, nn tukpaciɛ’n w’a tin be su dan annzɛ nn b’a la be dɔɔtrɔ. Be kwlaa be bo jasin fɛ’n titi. Kɛ n wun be sa’n, min wla kpɛn ndɛ nga akoto Pɔlu kannin’n su. Ɔ seli kɛ: ‘Kɛ m bu i kɛ n leman wunmiɛn’n, i li bɔ yɛ n ɲan wunmiɛn ɔn.’ Nanwlɛ, aniaan sɔ’m be Ɲanmiɛn nin sran klolɛ nin be yakpa yolɛ’n yo min ɲɛnmɛn dan. Ɔ ti kɛ nn sa bɔbɔ m’ɔ o be su’n ti’n, be angunndan’n ti sɛsɛ. Kpɔkun like ng’ɔ ti cinnjin’n yɛ be ɲin o su ɔ.”—2 Korɛntfuɛ Mun 12:10.
18 Sɛ amun ti tukpacifuɛ o, bubuwafuɛ o, annzɛ sa uflɛ wie o amun su’n, amun nin Ɲanmiɛn “be koko yalɛ.” An srɛ i kɛ ɔ uka amun naan amun tra amun awlɛn. (1 Tɛsalonikfuɛ Mun 5:14, 17) Sɛ cɛn kunngun amun sa sin bubu amun’n, nán amun angunndan tran like ng’ɔ kpɔtɔ sran awlɛn’n su. An bu Ɲanmiɛn ninnge’m be su angunndan. Yɛ like nga e ɲin o su kɛ Ɲanmiɛn Sielɛ blɛ’n ti’n é ɲɛ́n i’n, maan amun ɲin tran su kpa titi. Aniaan bla kun seli kɛ: “Min liɛ’n, kɛ n kɔ jasin fɛ’n bolɛ’n, ɔ ti kɛ m’an ɔ dɔɔtrɔ sa.” Nanwlɛ, jasin fɛ’n bolɛ’n yo maan e angunndan’n tranman like ng’ɔ bo sran wla’n su.
Ɲanmiɛn klolɛ’n ti’n, sa tɛ yofuɛ’m be sa be sin Zoova wun
19, 20. (a) ?Ngue yɛ ɔ kwla wla be nga be yoli sa tɛ’n be yakpa naan b’a sa be sin Zoova wun ɔn? (b) ?Ngue yɛ like suanlɛ ng’ɔ́ bá lɔ’n wá yíyí nun ɔn?
19 Sran kpanngban be nin Ɲanmiɛn be afiɛn’n w’a kpɔnzɔ. Wie’m be yoli sa tɛ dan. Yɛ kɛ be ko yo naan b’a fa be wun b’a mantan Zoova kpa ekun’n, be lemɛn i sɔ awlɛn. Sanngɛ sɛ be kaci be nzuɛn’n naan be yo naan be klo Zoova kɛ laa’n sa ekun’n, bé kwlá ɲɛ́n i sɔ awlɛn’n. Maan e fa Malio m’ɔ tran Amlɛnkɛn’m be lɔ’n, i su ndɛ e nian.a Kɛ Malio tuli asɔnun’n nun’n, nzan nin drɔgi nɔnlɛ yɛ ɔ kacili i junman ɔn. Ɔ yoli sɔ lele afuɛ 20. I sin’n, ɔ dili bisua. Malio seli kɛ: “Kɛ n o bisua lɔ’n, n tran n buli angunndan lele. Kpɔkun, n w’a boli Biblu’n nun kannganlɛ bo ekun. Blɛblɛblɛ, n wunnin kɛ nanwlɛ Zoova i sran wafa ng’ɔ ti’n, ɔ yo ɲɛnmɛn. Afin ɔ yaci sran’n i wun sa cɛ i. N srɛli Zoova kpɛ sunman kɛ ɔ yaci min wun sa cɛ min. Kɛ n fin bisua lɔ fiteli’n, e nin n janvuɛ laa mun e buli nun. N ɔli aɲia’m be bo, yɛ be sɔli min nun ekun. Kɛ be se kɛ like nga sran kun lua’n yɛ ɔ ti’n, n wunnin i sɔ liɛ’n weiin. Sanngɛ ɔ nin i sɔ’n ngba’n, min wla o like klanman kun su kɛ ń ɲɛ́n i. Ɔ maan, Zoova m’ɔ sili min aunnvuɛ m’ɔ yacili min wun sa cɛli min’n, ń lɛ́ i ase lele.”—Jue Mun 103:9-13; 130:3, 4; Galasifuɛ Mun 6:7, 8.
20 Be nga be su ndɛ’n ti kɛ Malio liɛ’n sa’n, saan bé mían be ɲin naan be nin Zoova be afiɛn’n w’a mantan kpa ekun. Sanngɛ sɛ be suan Biblu’n nun like naan be bu su angunndan naan be srɛ Ɲanmiɛn’n, yɛ bé kló Ɲanmiɛn kɛ laa’n sa ɔ. I sɔ liɛ’n, bé ɲán wunmiɛn bé yó yakpafuɛ. Like nga e ɲin o su kɛ Ɲanmiɛn Sielɛ Blɛ’n ti’n é ɲɛ́n i’n, ɔ cicili Malio i wla wie. Nanwlɛ, sɛ e klo Ɲanmiɛn nin sran’n, naan e lafi Ɲanmiɛn su naan e ɲin yi i’n, like nga e wla o su kɛ é ɲɛ́n i’n, ɔ́ wlá e fanngan kpa naan y’a nanti klanman. Like sɔ mɔ e wla o su kɛ é ɲɛ́n i’n, m’ɔ ti e like nanndoliɛ’n, yɛ like suanlɛ ng’ɔ́ bá lɔ’n wá yíyí nun ɔn.
[Ja ngua lɛ ndɛ’n]
a Be kacili i dunman’n.
?Amun kwla tɛ su?
• Wafa nga Ɲanmiɛn nin sran klolɛ’n ti Zezi yoli yakpafuɛ dan’n, amun yiyi nun.
• ?Wafa sɛ yɛ klolɛ nga be klo be niaan mun’n ti’n, Pɔlu nin Barnabasi be yoli yakpafuɛ dan ɔn?
• ?Ngue yɛ Satan fa saci e Ɲanmiɛn nin sran klolɛ’n niɔn?
• ?Sɛ e klo Zoova’n, sa mennin yɛ é kwlá jrán be ɲrun yakpa su ɔ?
[Foto, bue 21]
Pɔlu i sran klolɛ’n ti’n, w’a yacimɛn i junman’n dilɛ.
[Foto, bue 23]
Saan é yó yakpafuɛ naan y’a nanti Zoova i mmla’m be su.
[Foto, bue 23]
Namangolwa Sututu.