Nán e kpɔci Klist nin i junman difuɛ kpa’n be le

‘I min’n fɛ́ i ninnge’n kwlaa wlɛ́ i sa nun.’—MATIE 24:45-47.

1, 2. (a) ?Kɛ nga Biblu’n fa kan’n sa’n, wan yɛ ɔ ti e kpɛn’n niɔn? (b) ?Ngue yɛ ɔ kle kɛ Klist sie asɔnun’n niɔn?

CƐN kun Zezi seli i sɔnnzɔnfuɛ’m be kɛ: ‘Nán an yo amun wun kɛ be flɛ amun sran’m be su kpɛn, afin amun su kpɛn’n ti kunngba cɛ, yɛle Klist.’ (Matie 23:10) Zezi seli sɔ naan be wun i wlɛ kɛ nán asiɛ’n su wa sran kun yɛ ɔ́ síe be ɔ. Naan sran kunngba cɛ m’ɔ sie be’n, yɛle i bɔbɔ Zezi Klist mɔ ɲanmiɛn su lɔ yɛ ɔ́ wá kó tran’n. Ɲanmiɛn yɛ ɔ sieli Zezi i kpɛnngbɛn sɔ’n niɔn. Biblu’n waan Zoova ‘cɛnnin Klist yɛ ɔ sie like’n kwlaa yɛ ɔ fɛ i sieli Asɔnun’n su kpɛn. Klistfuɛ’m be kwlaa be ti i wunnɛn.’—Efɛzfuɛ Mun 1:20-23.

² Klist “sie like’n kwlaa” asɔnun’n nun. Ɔ maan, ɔ leman like kun mɔ asɔnun’n yo mɔ i ɲin taman nun ɔn. Wafa nga asɔnun kun ti’n, yɛle kɛ sɛ ɔ ti juejue annzɛ ɔ timan juejue o, sɛ ɔ nanti Klist i mmla’n su annzɛ ɔ nantiman o, sɛ ɔ nin Ɲanmiɛn be afiɛn’n mantan kpa annzɛ ɔ mantanman kpa o, Zezi si i kwlaa kpan. Sa nga Zezi yili i nglo kleli akoto Zan’n, ɔ yi i sɔ liɛ’n i nglo kpa. Kɛ ɔ́ yó sɔ’n, nn Klistfuɛ klikli’m be blɛ’n w’a ju i bue nuan. Zezi klɛli asɔnun nso be fluwa. Ɔ kɛnnin i kpɛ nnun kɛ ɔ si be ayeliɛ kpa’n. Ɔ maan, ɔ jrannin su yoli be mo. Kusu’n, ɔ si be ayeliɛ tɛ’n. Ɔ maan, ɔ tuli be fɔ. (Sa Nglo Yilɛ 2:2, 9, 13, 19; 3:1, 8, 15) Sɛ Zezi sili asɔnun sɔ mun’n, nán Azi Minɛli lɔ asɔnun wie mun ekun, ɔ nin Palɛstini nin Siri, ɔ nin Babilɔni nin Glɛki, ɔ nin Itali nin lika uflɛ nun asɔnun mun yɛ é sé kɛ ɔ siman be ɔ. (Sa Nga Be Yoli’n 1:8) ?Yɛ e blɛ liɛ’n nun li?

Junman difuɛ kpa nanwlɛfuɛ

3. ?Kɛ be se kɛ asɔnun’n ti Klist i wunnɛn naan Klist bɔbɔ ti i ti’n, ngue ti yɛ i sɔ’n nin i fata ɔ?

³ Kɛ Zezi cɛnnin m’ɔ́ wá kɔ́ ɲanmiɛn su’n, ɔ seli i sɔnnzɔnfuɛ’m be kɛ: ‘Ɲanmiɛn mannin min atin kɛ n sie ɲanmiɛn su lɔ nin asiɛ’n su ninnge’n kwlaa. An nian, min nin amun e o cɛn kwlaa lele mɛn’n fá wíe.’ (Matie 28:18-20) Zezi i ndɛ sɔ’n kle kɛ, ɔ́ síe i sɔnnzɔnfuɛ mun titi. Akoto Pɔlu kusu klɛli Efɛzfuɛ nin Kolɔsfuɛ’m be fluwa kɛ asɔnun’n ti Klist i “wunnɛn” naan Klist bɔbɔ yɛ ɔ ti i ti’n niɔn. (Efɛzfuɛ Mun 1:22, 23; Kolɔsfuɛ Mun 1:18) Fluwa kun waan sunnzun ase ndɛ sɔ mɔ Pɔlu kannin’n, ɔ kle kɛ “Klistfuɛ mɔ be ti wunnɛn’n i likalika’n, ɔ fata kɛ be nin be Min’n m’ɔ ti wunnɛn’n i ti’n, be bo yo kun. Sanngɛ, be Min’n yɛ ɔ sie be ɔ. Yɛ i likalika’m be di i junman’n.” (The Cambridge Bible for Schools and Colleges). Afuɛ nga be flɛ i 1914 nun’n, Klist yoli Ɲanmiɛn Sielɛ’n i su famiɛn. ?Kɛ ɔ yoli sɔ’n, sran akpasua mennin yɛ ɔ fa yoli i junman difuɛ ɔ?—Daniɛl 7:13, 14.

4. ?Kɛ nga Ɲanmiɛn nuan ijɔfuɛ Malasi fa kannin’n sa’n, kɛ Zoova nin Zezi be wluli Ɲanmiɛn i sua mɔ nán sran yɛ ɔ kplannin’n nun’n, ngue yɛ be wunnin i ɔ?

⁴ Ɲanmiɛn nuan ijɔfuɛ Malasi seli kɛ cɛn wie lele’n, ‘sran nga be sun be flɛ i’n’ mɔ yɛle Zoova’n, ɔ́ bá naan ɔ́ wlú i “sua” mɔ nán sran yɛ ɔ kplannin’n nun. Kɛ ɔ́ bá’n, ɔ nin i ‘nuan ijɔfuɛ m’ɔ́ wá kán aenguɛ ng’ɔ nin sran mun trali’n i ndɛ’n’ yɛ bé bá ɔ. Zoova i nuan ijɔfuɛ sɔ’n yɛle i Wa Klist Zezi mɔ blɛ sɔ nun’n, ɔ sieli i famiɛn uflɛuflɛ’n. Kɛ e niɛn i kpa sa’n, afuɛ nga be flɛ i 1918 nun yɛ ‘cɛn nga bé bó jɔlɛ dilɛ’n bo Ɲanmiɛn bɔbɔ i awlo’n nun’n,’ ɔ juli ɔ.a (Malasi 3:1; 1 Piɛr 4:17) Blɛ sɔ nun’n, be dili be nga be se be wun kɛ be su Ɲanmiɛn’n be jɔlɛ. Be wunnin kɛ asɔnun’m be kle Ɲanmiɛn i su ato ninnge w’a cɛ kpa. Naan alɛ dan klikli ng’ɔ tɔli’n, be dili wie. I sɔ’n ti’n, be yili be ase. Sanngɛ Klistfuɛ nga Ɲanmiɛn fɛli i wawɛ’n mannin be’n be onga’n be liɛ’n, be sali be niannin. Sɛ é kwlá sé’n, be tɔnnin be kɛ sika sa, yɛ be yili be nun fiɛn’n. Ɔ maan kɛ ɔ fɛ i lɛ’n, sɛ ‘bé mán Anannganman i like’n, be nanti i mmla’n su yɛ be mɛn i ɔ.’—Malasi 3:3.

5. ?Kɛ nga Zezi fa kɛnnin i “balɛ’n” i ndɛ’n sa’n, wan yɛ ɔ yoli “junman difuɛ” kpa nanwlɛfuɛ m’ɔ toli i’n niɔn?

⁵ Kɛ Zezi kɛ́n i “balɛ’n nin mɛn’n i awieliɛ’n” i nzɔliɛ’n i ndɛ klé i sɔnnzɔnfuɛ mun’n, ɔ kannin “junman difuɛ” akpasua kun mɔ bé wún i wlɛ weiin i ndɛ wie. Ndɛ sɔ m’ɔ kannin’n, ɔ nin Ɲanmiɛn nuan ijɔfuɛ Malasi i ndɛ’n kɔ likawlɛ sɛsɛsɛ. Zezi seli kɛ: ‘?Sran kpa nanwlɛfuɛ m’ɔ si ngwlɛlɛ’n mɔ i min’n fɛ sie i sran’m be su kɛ ɔ man be aliɛ blɛ ng’ɔ ti i nuan su’n i su’n, yɛle wan? Junman difuɛ nga kɛ i min’n bá’n ɔ di i junman sɔ’n, i liɛ su ti ye! Nanwlɛ, ɔ́ wá fɛ́ i ninnge’n kwlaa wlɛ́ i sa nun.’ (Matie 24:3, 45-47) Afuɛ nga be flɛ i 1918 nun yɛ Klist bali ɔ. Kɛ ɔ́ “bá” wá nían ‘junman difuɛ’n,’ ɔ toli i sɔnnzɔnfuɛ nanwlɛfuɛ akpasua kan kun mɔ Ɲanmiɛn fɛli i wawɛ’n mannin be’n. Ɔ́ tó be ɔ, be su fa Sasafuɛ Tranwlɛ’n nin Biblu’n i akua wie mun mán sran’m be “aliɛ blɛ ng’ɔ ti i nuan su’n i su.” Afuɛ nga be flɛ i 1879 nun’n, yɛ be boli be aliɛ manlɛ sɔ’n i bo ɔ. I sɔ’n ti’n, Zezi fali be yoli i “junman difuɛ.” Kpɔkun afuɛ nga be flɛ i 1919 nun’n, ɔ fɛli i ninnge kwlaa nga be o asiɛ’n su wa’n wlali be sa nun.

Ɔ nian Klist i ninnge nga be o asiɛ’n su wa’n be su

6, 7. (a) ?Wafa sɛ yɛ Zezi kɛnnin i “junman difuɛ” kpa’n i ndɛ ɔ? (b) ?Ngue ti yɛ Zezi se kɛ junman difuɛ’n ti ‘sran kpa m’ɔ si like su nian’ ɔn?

⁶ E wunnin kɛ, kɛ Zezi kɛ́n i balɛ’n i nzɔliɛ’n i ndɛ’n, ɔ kannin “junman difuɛ ” kun m’ɔ́ wá yó i janunfuɛ asiɛ’n su wa’n i ndɛ wie. Sanngɛ “junman difuɛ” sɔ’n, Zezi dun mmua kɛnnin i ndɛ lele. Ndɛ sɔ m’ɔ dun mmua kannin’n, ɔ maan be wun junman mɔ junman difuɛ’n wá dí’n i wlɛ weiin. Zezi seli kɛ: ‘?Wan yɛ ɔ ti sran kpa m’ɔ si like su nian kpa, mɔ i min’n fɛ i sie i minniɛn’m be su kɛ ɔ man be aliɛ cɛn mɔ be sieli’n su’n niɔn? An nian nga m’ɔ́ yó’n yɛ, ɔ́ fɛ́ i ninnge’n kwlaa wlɛ́ i sa nun.’—Lik 12:42, 44.

⁷ Kɛ nga e fa wun i lɛ’n, Zezi waan junman difuɛ’n ti like sunianfuɛ. Kɛ be se kɛ like sunianfuɛ’n, Glɛki aniɛn’n nun i bo’n yɛle “awlo sunianfuɛ, annzɛ sran ninnge’m be sunianfuɛ.” Sran akpasua kun yɛ ɔ ti like sunianfuɛ’n niɔn. Sran sɔ’m be timan kɛ fluwa sifuɛ dandan mɔ Biblu’n nun ndɛ fɛfɛ wie mun yɛ be yiyi nun’n sa. Sanngɛ ‘sran kpa m’ɔ si like su nian’n,’ ɔ man sran’m be aliɛ Ɲanmiɛn ninnge’m be nun “blɛ ng’ɔ ti i nuan su’n i su.” Asa ekun’n, Klist fɛli i asɔnun’n i nun “ninnge’n kwlaa” nga be o asiɛ’n su wa’n wlɛli i sa nun. ?Klist i ninnge’n kwlaa sɔ mun yɛle mennin?

8, 9. ‘?Ninnge’ mennin yɛ like sunianfuɛ’n nian su ɔ?

⁸ Junman difuɛ’n i junman m’ɔ di’n i wie yɛle kɛ, ɔ nian ninnge nga Klist i sɔnnzɔnfuɛ’m be fa di be Klistfuɛ junman’n su. Ninnge sɔ’m be wie yɛle Zoova i Lalofuɛ’m be biolo dan ng’ɔ o Amlɛnkɛn’m be lɔ’n, ɔ nin biolo kun nga be o nvlenvle’m be nun’n, ɔ nin Ɲanmiɛn Sielɛ Blɛ Sua nin aɲia dandan’m be yowlɛ sua kwlaa nga be o mɛn’n nun’n. Sanngɛ i junman cinnjin kpa m’ɔ di’n yɛle kɛ, ɔ siesie le mɔcuɛ kwlaa Biblu’n nun like suanlɛ aɲia mun, ɔ nin aɲia dandan mɔ maan sran’m be Ɲanmiɛn sulafilɛ’n kwla taka kpa’n, blɛ ng’ɔ ti i nuan su’n i su. Aɲia sɔ’m be bo’n, wie liɛ be yiyi wafa nga Ɲanmiɛn nuan ijɔfuɛ’m be ndɛ m’ɔ o Biblu’n nun’n kpɛn su’n, be nun. Wie liɛ kusu’n, be kle wafa ng’ɔ fata kɛ cɛn kwlaa e nanti Ɲanmiɛn i mmla’m be su’n.

⁹ Zezi seli kɛ be bo ‘Ɲanmiɛn sielɛ’n i jasin fɛ’n,’ yɛ be kle ‘nvlenvle’n kwlaa be like naan be kaci i sɔnnzɔnfuɛ.’ Junman sɔ m’ɔ lemɛn i wunsu’n, like sunianfuɛ’n nian su wie. Asa ekun’n, ɔ nian like kwlaa nga Zezi m’ɔ ti asɔnun’n i ti’n seli kɛ be fa kle sran mun awieliɛ blɛ nga nun’n su. (Matie 24:14; 28:19, 20; Sa Nglo Yilɛ 12:17) Be jasin fɛ’n bolɛ’n nin be sran like klelɛ’n ba nvlɛ. Afin, “sran kpanngban kpa” mɔ be sɔ jasin fɛ’n nun’n, be fa be wun mantan be nga Ɲanmiɛn kpali be sieli be ngunmin’n be onga’n, yɛ be kaci be janvuɛ. Sran sɔ mɔ sɛ é kwlá sé’n be ti ‘aofuɛ’m be bo ninnge kpakpa’n,’ be ti Klist “i ninnge’n” wie. Yɛ sran kpa nanwlɛfuɛ’n nian be su.—Sa Nglo Yilɛ 7:9; Aze 2:7.

E ɲrun dinfuɛ’m be anuannzɛ’n ti sran kpa nanwlɛfuɛ’n i janunfuɛ

10. ?Klistfuɛ klikli’m be blɛ su’n, wan yɛ ɔ fa ajalɛ naan asɔnun’m be nanti su ɔ? ?Yɛ kɛ asɔnun’m be nantili su’n, i bo’n guali sɛ?

¹⁰ Junman dan kpa mɔ sran kpa nanwlɛfuɛ’n di’n i wie yɛle kɛ junman’n i dilɛ nun’n, ɔ fata kɛ be fa ajalɛ kpanngban. Klistfuɛ klikli’m be blɛ su’n, akoto mun nin Zerizalɛmu lɔ kpɛnngbɛn mun yɛ be dunnin asɔnun’n i ɲrun ɔn. Ɔ maan, ajalɛ nga be fa’n yɛ asɔnunfuɛ’m be kwlaa be nanti su ɔ. (Sa Nga Be Yoli’n 15:1, 2) Ajalɛ sɔ mɔ be fali’n, be klɛli i su fluwa yɛ be fa sunmannin sran wie mun kɛ be fa ko man asɔnun mun. Klistfuɛ’m be kwlaa be klun jɔli su. Be nantili ajalɛ mɔ be ɲrun dinfuɛ’n fali’n su. Ɔ maan alaje nin anuannzɛ trannin be afiɛn.—Sa Nga Be Yoli’n 15:22-31; 16:4, 5; Filipfuɛ Mun 2:2.

11. ?Wan yɛ Klist sin i lika nian asɔnun’n su andɛ ɔ? ?Klistfuɛ sɔ mɔ Ɲanmiɛn fɛli i wawɛ’n mannin be’n, wafa sɛ yɛ ɔ fata kɛ e bu be ɔ?

¹¹ Kɛ Klistfuɛ klikli’m be blɛ su’n sa’n, andɛ kpɛnngbɛn akpasua kan be ti e ɲrun dunfuɛ. Ɲanmiɛn fɛli i wawɛ’n mannin be. Asɔnun kpɛnngbɛn nanwlɛfuɛ sɔ’m be o Klist m’ɔ ti asɔnun’n i ti’n, i “sa fama’n nun.” Yɛle kɛ, Klist le tinmin naan be Ɲanmiɛn Sielɛ Blɛ junman’n i dilɛ nun’n, ɔ sie be. (Sa Nglo Yilɛ 1:16, 20) Be flɛ e niaan kun kɛ Albert Schroeder. Ɔ yoli e ɲrun dinfuɛ’m be anuannzɛ’n i nunfuɛ wie lele naan w’a saci. Ɔ seli kɛ: “Jɔlɛ cɛn kwlaa kɛ e yia’n, e dun mmua srɛ Zoova kɛ ɔ fɛ i wawɛ’n kle e i atin. Ndɛ kwlaa nga é dí’n, ɔ nin ajalɛ kwlaa nga é fá’n, e nian nun kpa naan ɔ taka Ɲanmiɛn Ndɛ’n su.”b Ɔ maan, Klistfuɛ kpa nanwlɛfuɛ sɔ mɔ Ɲanmiɛn fɛli i wawɛ’n mannin be’n, e kwla lafi be su. Kɛ e bu be angunndan’n, ɔ fata kɛ e nanti ndɛ nga akoto Pɔlu kɛnnin i yɛ’n su. Ɔ seli kɛ: ‘Maan amun ɲin yi amun kpɛnngbɛn mun, an bu be sran. Be nian amun su titi.’—Ebre Mun 13:17.

Ɔ fata kɛ e ɲin yi sran kpa nanwlɛfuɛ’n

12, 13. ?Biblu’n nun’n, like mennin ti yɛ ɔ fata kɛ e ɲin yi sran kpa nanwlɛfuɛ’n niɔn?

¹² Like cinnjin kpa kun nga ti yɛ ɔ fata kɛ e ɲin yi sran kpa nanwlɛfuɛ’n yɛle kɛ, kɛ e ɲin yi i’n, be Min Zezi Klist yɛ e ɲin yi i ɔ. Pɔlu seli Klistfuɛ mɔ Ɲanmiɛn fɛli i wawɛ’n mannin be’n kɛ: ‘Sran nga kɛ Ɲanmiɛn flɛ́ i’n ɔ ti diewa’n, ɔ kaci Klist i kanga. Ɲanmiɛn toli amun gua kpan.’ (1 Korɛntfuɛ Mun 7:22, 23; Efɛzfuɛ Mun 6:6) Ɔ maan, kɛ e lo e wun man sran kpa nanwlɛfuɛ’n, ɔ nin be nun sran nga be ti e ɲrun dinfuɛ’m be anuannzɛ’n, nn Klist yɛ y’a lo e wun y’a mɛn i ɔ. Afin i yɛ ɔ ti be Min’n niɔn. Nanwlɛ, kɛ e ɲin yi Klist i junman difuɛ’n m’ɔ fɛli i ninnge nga be o asiɛ’n su wa’n wlɛli i sa nun’n, i sɔ’n nun yɛ ɔ kwla ‘fite e nuan kɛ Zezi Klist ti e Min, naan e Si Ɲanmiɛn ɲan ɲrun’ ɔn.—Filipfuɛ Mun 2:11.

¹³ Like kun ekun mɔ i ti yɛ ɔ fata kɛ e ɲin yi sran kpa nanwlɛfuɛ’n yɛle kɛ, Klistfuɛ sɔ mɔ Ɲanmiɛn fɛli i wawɛ’n mannin be’n, Biblu’n kan be ndɛ kɛ be ti Zoova i “sua” naan i nun yɛ i “wawɛ’n” tran ɔn. Ɔ maan, be ti ‘Ɲanmiɛn ngunmin liɛ.’ (1 Korɛntfuɛ Mun 3:16, 17; Efɛzfuɛ Mun 2:19-22) Be akpasua’n yɛ ɔ ti junman difuɛ mɔ Zezi fɛli i ninnge m’ɔ o asiɛ’n su wa’n wlɛli i sa nun ɔn. Ɔ maan, be le atin be yo ninnge wie mun yɛ be di asɔnun’n i nun junman wie mun. I sɔ’n ti’n, ɔ fata kɛ e lo e wun man be naan ajalɛ kwlaa nga be fa’n, e nanti su nán maan e sisi e bo. I li bɔɔ, kɛ be nga be ti “bua’m be wie” mun be yo sɔ’n, be si kɛ be cenjele nun ɔn.—Zan 10:16.

Nán e kpɔci be le

14. ?Kɛ nga Ezai fa kannin’n sa’n, wafa sɛ yɛ be nga be ti bua’m be wie’m be su sran kpa nanwlɛfuɛ’n su ɔ? ?Yɛ wafa sɛ yɛ be ‘junman’n i su mmlusuɛ’n’ yo sran kpa nanwlɛfuɛ’n i liɛ ɔ?

¹⁴ Be nga be ti bua’m be wie’m be lo be wun man Klistfuɛ nga Ɲanmiɛn fɛli i wawɛ’n mannin be mɔ be ti ‘Izraɛlifuɛ nga be ti i liɛ sakpa’n.’ Ezai dun mmua kɛnnin i sɔ liɛ’n i ndɛ. Ɔ seli kɛ: ‘Anannganman wan yoo: “Eziptifuɛ’m be junman’n i su mmlusuɛ, yɛ Etiopifuɛ’m be ninnge nga be ɲannin be’n be su mmlusuɛ’n, ɔ nin Sebafuɛ mɔ be ti sran jajraajra’n be kusu be ninnge’m be su mmlusuɛ’n, i kwlaa sɔ’n ɔ́ sín amun ja su, yɛ i kwlaa sɔ’n ɔ́ yó amun liɛ. Sran sɔ’m bé sú amun su, bé cí be, bé kóto amun bo, yɛ ndɛ nga bé kán kle amun’n, ɔ́ yó kɛ srɛlɛ mɔ be srɛ’n sa. Bé sé kɛ: ‘Amun kunngba cɛ amun wun lɔ yɛ Ɲanmiɛn’n o ɔ. Uflɛ fi nunmɛn i sin.’”’ (Ezai 45:14) Kɛ nga Ezai fa kɛnnin i lɛ sa’n, sɛ é kwlá sé’n, be nga be ti bua’m be wie mun’n, be su sran kpa nanwlɛfuɛ’n i akpasua’n, ɔ nin i nunfuɛ mɔ be ti e ɲrun dinfuɛ’m be anuannzɛ’n be su. Yɛle kɛ, be nanti atin nga be kle be’n i su. Be ‘junman’n i su mmlusuɛ’n,’ ɔ yo sran kpa nanwlɛfuɛ’n i liɛ. Yɛle kɛ, kɛ bé bó jasin fɛ’n mɔ Klist fa mannin be’n, bua’m be wie’m be klunklo be fa be sa nun ninnge suan be bo yɛ be uka be.—Sa Nga Be Yoli’n 1:8; Sa Nglo Yilɛ 12:17.

15. ?Kɛ nga Ezai 61:5, 6 fa kannin’n sa’n, wafa sɛ yɛ be nga be ti bua’m be wie’m be nin Izraɛlifuɛ nga be ti Ɲanmiɛn liɛ sakpa’n, bé nánti ɔ?

¹⁵ Be mɔ be ti bua’m be wie’m be su Zoova. Sran kpa nanwlɛfuɛ’n i akpasua’n, ɔ nin be nunfuɛ mɔ be ti e ɲrun dinfuɛ’m be anuannzɛ’n yɛ ɔ sie be ɔ. I sɔ’n ti’n, ɔ yo be fɛ dan. Be si kɛ Klistfuɛ sɔ mɔ Ɲanmiɛn fɛli i wawɛ’n mannin be’n, be ti ‘Izraɛlifuɛ nga be ti i liɛ sakpa’n.’ (Galasifuɛ Mun 6:16) Be si kɛ be liɛ’n, be ti kɛ “aofuɛ mun” sa. Ɔ maan, be fa be wun mantan Izraɛlifuɛ nga be ti Ɲanmiɛn liɛ sakpa mɔ be liɛ’n be ti ‘Zoova i ɲrun jranfuɛ mun’ nin ‘Ɲanmiɛn i junman difuɛ mun’n.’ (Ezai 61:5, 6) Kpɔkun sɛ é kwlá sé’n, be yo be ‘kacɛ tutufuɛ’ nin be ‘viɲi tafuɛ’ aklunjuɛ su. Be bo Ɲanmiɛn Sielɛ Blɛ jasin fɛ’n i juejue su, yɛ be kle nvlenvle’m be kwlaa be like maan be kaci Zezi i sɔnnzɔnfuɛ. Asa ekun’n, kɛ sran kpa nanwlɛfuɛ’n i akpasua’n nían be nga be ba uflɛuflɛ’m be lika’n, be tu be klun be uka be.

16. ?Ngue ti yɛ be nga be ti bua’m be wie’m be klunklo be uka sran kpa nanwlɛfuɛ m’ɔ si ngwlɛlɛ’n niɔn?

¹⁶ Be nga be ti bua’m be wie’m be si kɛ junman nga sran kpa nanwlɛfuɛ’n tu i klun di’n, be ɲan su mmlusuɛ dan. Afin, sɛ ɔ timan sran kpa nanwlɛfuɛ m’ɔ si ngwlɛlɛ’n ti’n, nn be su wunman Biblu’n nun ndɛ nanwlɛ mɔ be ti cinnjin’n, be wlɛ mlɔnmlɔn. Annzɛ kusu nn bé wún be wlɛ i buebue. Ndɛ nanwlɛ sɔ mɔ be yiyi nun’n, i wie yɛle Zoova i nglo nin asiɛ’n be sielɛ’n nin i dunman fɛ bolɛ’n, ɔ nin Ɲanmiɛn Sielɛ Blɛ’n, ɔ nin Ɲanmiɛn su lɔ uflɛ nin asiɛ uflɛ’n, ɔ nin nguan’n nin like ng’ɔ o wie’n i sin’n, ɔ nin Zoova nin i Wa’n, ɔ nin Ɲanmiɛn wawɛ’n be su ndɛ nanwlɛ’n. I kwlaa ngalɛ’n, be nga be ti bua’m be wie’m be si su ye dan. Ɔ maan, be klunklo be uka Klist i “niaan” mɔ be o asiɛ’n su wa awieliɛ blɛ nga nun’n.—Matie 25:40.

17. ?Ngue yɛ e ɲrun dinfuɛ’m be anuannzɛ’n wun kɛ ɔ ti cinnjin m’ɔ yo ɔ? ?Ndɛ mennin yɛ like suanlɛ ng’ɔ́ bá lɛ’n wá yíyí nun ɔn?

¹⁷ Klistfuɛ nga Ɲanmiɛn kpali be sieli be ngunmin’n, be nunman asɔnun kwlaa nun naan b’a nian Klist i ninnge’m be su. Afin b’a sɔnman. I sɔ’n ti’n, e ɲrun dinfuɛ’m be anuannzɛ’n sie be nga be ti bua’m be wie mun’n, be nun wie mun e biolo’m be su. Yɛ ɔ sie wie mun ekun nvle sunianfuɛ, ɔ nin akpasua sunianfuɛ nin asɔnun kpɛnngbɛn. ?Ɲanmiɛn i bua fa’n i sunianfuɛ sɔ mɔ Klist sie be’n, wafa sɛ yɛ e nin be e nanti ɔ? ?E kle kɛ e kpɔci be annzɛ e kpɔciman be? I sɔ ndɛ yɛ like suanlɛ ng’ɔ́ bá lɛ’n wá yíyí nun ɔn.

[Ja ngua lɛ ndɛ mun]

?Wafa sɛ yɛ amún tɛ́ su ɔ?

• ?Wan yɛ ɔ ti e kpɛn’n niɔn? ?Yɛ ngue yɛ ɔ kle kɛ ɔ si wafa nga asɔnun’m be ti’n niɔn?

• ?Kɛ Zoova nin Zezi be wluli Ɲanmiɛn i ‘sua’n’ nun’n, sran kpa mennin yɛ be toli i junman’n su ɔ? ?Yɛ ninnge mennin yɛ be fa wlɛli i sa nun ɔn?

• ?Biblu’n nun’n, ninnge mennin ti yɛ e su kpɔciman sran kpa nanwlɛfuɛ’n le ɔ?

[Foto, bue 25]

‘Like sunianfuɛ’n’ nian ‘ninnge’ nga anuannzɛ’n le be’n, ɔ nin e aɲia mun, ɔ nin jasin fɛ’n bolɛ’n, be su.

[Foto, bue 26]

Be nga be ti bua’m be wie’m be bo jasin fɛ’n i juejue su be uka sran kpa nanwlɛfuɛ’n.