Sran kpa m’ɔ si like su nian kpa’n ɔ nin i janunfuɛ’n
“?Wan yɛ ɔ ti sran kpa b’ɔ si like su nian kpa, bɔ i min’n fɛ i sie i minniɛn’m be su kɛ ɔ man be aliɛ cɛn bɔ be sieli’n su nin-ɔn?”—LIK 12:42.
1, 2. ?Kɛ Zezi kán nzɔliɛ nga be kle kɛ e o mɛn’n i bue nuan’n be ndɛ’n, kosan benin yɛ ɔ usali ɔ?
KƐ Zezi kán nzɔliɛ nga be kle kɛ e o mɛn’n i bue nuan’n i ndɛ’n, ɔ usali kosan kun. Ɔ usali kɛ: “?Sran kpa nanwlɛfuɛ b’ɔ si ngwlɛlɛ’n bɔ i min’n fɛ sie i sran’m be su kɛ ɔ man be aliɛ blɛ ng’ɔ ti i nuan su’n i su’n, yɛlɛ wan?” I sin’n, Zezi kannin kɛ junman difuɛ sɔ’n, bé mɛ́n i sasu junman’n m’ɔ di i nanwlɛ su’n ti. Yɛle kɛ i min’n wá fɛ́ i ninnge’n kwlaa wlɛ́ i sa nun.—Matie 24:45-47.
2 Kpata bo tranlɛ cɛn dilɛ ng’ɔ sinnin lɔ’n nun’n, Zezi mannin kosan wafa kunngba’n su. (An kanngan Lik 12:42-44 nun.) I sɔ’n nun’n, ɔ flɛli junman difuɛ sɔ’n kɛ ‘sran b’ɔ si like su nian’n.’ Yɛ ɔ flɛli “sran” nga bé mán be aliɛ’n kɛ ‘i minniɛn mun.’ Sran ng’ɔ nian sua su annzɛ i wiengu junman difuɛ’m be su’n, be flɛ i wie kɛ sran m’ɔ nian like su’n. Sanngɛ sran m’ɔ nian like su sɔ’n, i kusu ti junman difuɛ wie. ?Ɔ maan wan yɛle junman difuɛ’n annzɛ sran m’ɔ si like su nian’n? ?Yɛ wafa sɛ yɛ ɔ ‘man aliɛ blɛ ng’ɔ ti i nuan su’n i su’ ɔ? Ɔ ti cinnjin man e kwlaa kɛ e wun ajalɛ ng’ɔ fa naan w’a fa Ɲanmiɛn ninnge’m be nun aliɛ’n w’a man sran mun’n, i wlɛ.
3. (a) ?‘Junman difuɛ’n’ i su ndɛ nga Zezi kannin’n, wafa sɛ yɛ be nga be tɔn be wun suɛn kɛ be ti Klistfuɛ’n be yiyi nun ɔn? (b) ?Wan yɛle ‘junman difuɛ’n’ annzɛ ‘sran b’ɔ si like su nian’n’? ?Yɛ wan yɛle Zezi ‘i minniɛn mun,’ annzɛ i “sran” mun?
3 Be nga be tɔn be wun suɛn kɛ be ti Klistfuɛ’n, wie liɛ’n be waan be kpɛnngbɛn’m be ndɛ yɛ Zezi kan ɔn. Zezi mɔ i ndɛ’n nun’n, i yɛ ɔ ti junman difuɛ’n i “min’n,” w’a seman kɛ junman difuɛ sɔ’m be sɔnnin naan be o be nga be se be wun kɛ be ti Klistfuɛ’n be asɔnun kwlaa nun. Sanngɛ, ɔ seli weiin kɛ ‘sran b’ɔ si like su nian’n’ annzɛ ‘junman difuɛ’n,’ ɔ́ yó kunngba. Yɛ sran sɔ’n yɛ Zezi fɛ́ i sa nun ninnge kwlaa wlá ɔ. Ɔ maan, kɛ nga zronali nga fa kan’n sa’n, sran kpa m’ɔ si like su nian kpa sɔ’n, ɔ ti ‘bua akpasua kaan’n’ annzɛ Zezi i sɔnnzɔnfuɛ nga be kpali be sieli be ngunmin’n, be nzɔliɛ sran. Liki i fluwa ng’ɔ klɛli i Zezi su’n i nun’n, ndɛ sɔ’n i ɲrun nin i sin’n, ɔ kle kɛ be nga be kpali be sieli be ngunmin’n, be ndɛ yɛ Zezi kan ɔn. (Lik 12:32) Sran akpasua kunngba sɔ’n, yɛ Zezi flɛ i ‘i minniɛn mun,’ annzɛ i “sran” mun’n niɔn. Sanngɛ kɛ ɔ flɛ be sɔ’n, junman nga be tinuntinun be di’n, i su yɛ ɔ fa e ɲin sie ɔ. Ɔ maan, i sɔ’n man kosan kun su. Yɛle kɛ: ?Junman difuɛ sɔ’m be kwlaa be tinuntinun yɛ be man aliɛ Ɲanmiɛn ninnge’m be nun blɛ ng’ɔ ti nuan su’n i su ɔ? Sɛ e fa e ɲin e sie i Ɲanmiɛn Ndɛ’n su kpa’n, é wún kosan sɔ’n i su tɛlɛ klanman.
Laa Zoova i sufuɛ’n
4. ?Wafa sɛ yɛ Zoova kannin laa Izraɛli nvle’n i ndɛ ɔ? ?Yɛ nvle sɔ’n i su like benin yɛ ɔ ti cinnjin kɛ e fa sie e klun ɔn?
4 Zoova seli Izraɛli m’ɔ ti i nvle laa’n kɛ: “Anannganman waan: ‘Amun yɛ amun ti min lalofuɛ mun-ɔn [ɔ kan be ndɛ kɛ sran kpanngban sa]. Amun ti min sufuɛ [ɔ kan be ndɛ kɛ sran kunngba sa], amun yɛ n kpali amun-ɔn.’” (Ezai 43:10) Kɛ Zoova kán be ndɛ kɛ sran kunngba sa’n, Izraɛli nvle nunfuɛ’m be kwlaa be ndɛ yɛ ɔ kan ɔn. Sanngɛ, ɔ ti cinnjin kɛ e sie i nzɔliɛ kɛ saan Ɲanmiɛn ɲrun jranfuɛ mun nin Levifuɛ mun yɛ be fa Ɲanmiɛn i mmla’n kle nvlefuɛ mun ɔn.—2 Be Nyoliɛ 35:3; Malasi 2:7.
5. ?Kɛ nga Zezi fa kannin’n sa’n, like cinnjin kpa benin yɛ ɔ́ wá káci ɔ?
5 ?Izraɛli nvle’n yɛle junman difuɛ nga Zezi kɛnnin i ndɛ’n? Cɛcɛ. Sa nga ti yɛ e si sɔ’n yɛle ndɛ nga Zezi kan kleli i blɛ su Zuifu mun’n. Ɔ seli be kɛ: “Bé wá dé Nyanmiɛn famiɛn dilɛ’n amun sa nun, bé fá mán nvle uflɛ bɔ bé wá yó sa kpa mɛ́n i’n.” (Matie 21:43) I sɔ’n kle weiin kɛ like kun wá káci. Zoova wá táka nvle uflɛ kun. Sanngɛ Ɲanmiɛn mmla ng’ɔ fa mannin klɔ sran mun i su falɛ’n nun’n, junman wafa kunngba nga laa Ɲanmiɛn i “sufuɛ” ng’ɔ o Izraɛli lɔ’n dili’n, i wie yɛ junman difuɛ nga Zezi kɛnnin i ndɛ’n, ɔ di ɔ.
B’a taka sran kpa nanwlɛfuɛ’n
6. ?Afuɛ nga be flɛ i 33 i Pantekɔtu nun’n, nvle benin yɛ Ɲanmiɛn takali ɔ? ?Yɛ wan mun yɛ be ti nvle sɔ’n i nunfuɛ ɔ?
6 Ɲanmiɛn kpali sran wie mun naan be yo nvle uflɛ. Be flɛ be “Izraɛlfuɛ nga be ti i liɛ sakpa’n.” (Galasifuɛ Mun 6:16; Rɔmfuɛ Mun 2:28, 29; 9:6) Afuɛ nga be flɛ i 33 i Pantekɔtu nun’n, kɛ Ɲanmiɛn fɛli i wawɛ’n mannin sran wie mun’n, yɛ ɔ takali nvle sɔ’n niɔn. Ɔ maan, Klistfuɛ kwlaa nga be kpali be sieli be ngunmin’n, be ti nvle sɔ’n nunfuɛ. Yɛ be yɛle junman difuɛ akpasua nga be Min Zezi Klist fali be kɛ be di i junman’n. Be kwlaa nga be ti nvle sɔ’n nunfuɛ’n, be tinuntinun be mannin be junman kɛ be bo sielɛ blɛ jasin fɛ’n yɛ be yo naan sran’m be kaci Zezi i sɔnnzɔnfuɛ. (Matie 28:19, 20) ?Ɔ maan, be kwlaa be tinuntinun be man Ɲanmiɛn ninnge’m be nun aliɛ blɛ ng’ɔ ti i nuan su’n i su? Maan e nian wafa nga Ɲanmiɛn Ndɛ’n tɛ kosan sɔ’n su’n.
7. ?I klikli nun’n, junman benin yɛ akoto’m be dili ɔ? ?Yɛ junman uflɛ benin yɛ be wa fa ukali su ɔ?
7 Kɛ Zezi kpɛli i sɔnnzɔnfuɛ 12 mun’n, junman cinnjin ng’ɔ fata kɛ be di’n i wie yɛle jasin fɛ’n i bolɛ. (An kanngan Mark 3:13-15 nun.) Be junman sɔ’n, ɔ nin Glɛki nun ndɛ mma nga be flɛ i apostolos be kɔ likawlɛ. Afin ndɛ mma sɔ’n i bo’n yɛle “sunmanlɛ.” Sanngɛ, kɛ lika’n ɔli i ɲrun’n, mɔ bé wá táka Klistfuɛ asɔnun’n, akoto’m be junman’n wa kacili. Yɛle kɛ ‘[sran’m be su nianlɛ] junman’ yɛ be wa dili ɔ.—Sa Nga Be Yoli’n 1:20-26.
8, 9. (a) ?Junman benin yɛ ɔ yoli akoto 12 be cinnjin kpa ɔ? (b) ?Sran uflɛ benin mun yɛ be mannin be junman cinnjin kpa mɔ e Ɲrun dinfuɛ’m be anuannzɛ’n kplinnin su ɔ?
8 ?Junman benin yɛ ɔ yoli akoto 12 be cinnjin kpa ɔ? Kɛ afuɛ 33 i Pantekɔtu’n sinnin’n, sa nga be juli blɛ sɔ’n nun’n, be tɛ kosan sɔ’n su. Angbeti’m be aliɛ cɛcɛlɛ’n su’n, sa kun juli. Ɔ maan akoto 12 be yiali Zezi i sɔnnzɔnfuɛ mun yɛ be seli be kɛ: “Kɛ e yaci Nyanmiɛn ndɛ kanlɛ’n e ko cɛ aliɛ’n, ɔ timɛn i su.” (An kanngan Sa Nga Be Yoli’n 6:1-6 nun.) I sɔ’n ti’n, akoto’m be kpali aniaan wie mun mɔ Ɲanmiɛn ninnge’m be nun be ɲin w’a ti kpa’n, yɛ be ‘fali junman sɔ’n mannin be.’ Ɔ maan, akoto’m be ɲannin be ti ‘kannin [Ɲanmiɛn] ndɛ’n tititi.’ Ajalɛ sɔ’n, Zoova rali su kpa. Afin, “Nyanmiɛn ndɛ’n truli, yɛ Zezi sɔnnzɔnfuɛ’m be trɛli dan kpa Zerizalɛm lɔ.” (Sa Nga Be Yoli’n 6:7) Ɔ maan, junman klikli nga be fa mannin akoto mun’n, yɛle Ɲanmiɛn ninnge’m be nun aliɛ mɔ be fa man sran mun’n.—Sa Nga Be Yoli’n 2:42.
9 Blɛ ng’ɔ nin i fata’n nun’n, be mannin aniaan wie’m be junman cinnjin kpa mun. Ɲanmiɛn wawɛ’n m’ɔ sie akoto mun ti’n, be sunmannin Pɔlu nin Barnabasi kɛ ngaliɛ difuɛ sa Antiɔsu asɔnun’n nun lɔ. Kannzɛ bɔbɔ be nunman akoto klikli 12 be nun’n, sanngɛ sran kwlaa sili kɛ be ti akoto. (Sa Nga Be Yoli’n 13:1-3; 14:14; Galasifuɛ Mun 1:19) Kɛ be kacili akoto’n, e Ɲrun dinfuɛ’m be anuannzɛ ng’ɔ o Zerizalɛmu’n wa sili nun, ɔ maan be kplinnin su. (Galasifuɛ Mun 2:7-10) Kɛ ɔ yoli sɔ’n w’a cɛman yɛ Pɔlu boli sran’m be aliɛ manlɛ Ɲanmiɛn ninnge’m be nun’n, i bo ɔ. Ɲanmiɛn maan Pɔlu klɛli i fluwa klikli’n.
10. ?Klistfuɛ klikli’m be blɛ su’n, be nga be kpali be sieli be ngunmin’n, be kwlaa yɛ be siesieli Ɲanmiɛn ninnge’m be nun aliɛ’n niɔn? An yiyi nun.
10 ?Sanngɛ, Klistfuɛ nga be kpali be sieli be ngunmin’n, be kwlaa yɛ be nian jasin fɛ’n bolɛ’n, ɔ nin Ɲanmiɛn ninnge’m be nun aliɛ’n i siesielɛ junman’n be su ɔ? Cɛcɛ. Akoto Pɔlu seli kɛ: “?Be ngba yɛ ɔ sunman be-ɔ? ?Be ngba yɛ be ijɔ i nuan? ?Be ngba yɛ be kle ninnge-ɔ?” (1 Korɛntfuɛ Mun 12:29) Kannzɛ be nga be kpali be sieli be ngunmin’n, be kwlaa be boli jasin fɛ’n, sanngɛ be nun mɔcuɛ yɛ Ɲanmiɛn kpali be kɛ be klɛ Biblu’n nun fluwa 27 nga be klɛli i Glɛki aniɛn nun’n niɔn.
E blɛ liɛ nun Sran kpa nanwlɛfuɛ’n
11. ?‘Ninnge’ benin yɛ be fa wlali junman difuɛ’n i sa nun kɛ ɔ nian su ɔ?
11 Zezi i ndɛ nga be klɛli i Matie 24:45 nun’n, ɔ kle weiin kɛ lele mɔ mɛn’n i awieliɛ’n jú’n, nn sran kpa nanwlɛfuɛ m’ɔ si ngwlɛlɛ’n i akpasua’n te o lɛ. Sa Nglo Yilɛ 12:17 flɛ sran akpasua sɔ’n kɛ bla’n i “osufuɛ nga be kali lɛ’n.” Be fali Klist i ninnge nga be o asiɛ’n su wa’n wlali sran akpasua sɔ’n, i sa nun. ‘Ninnge’ sɔ mɔ be fa wlali sran kpa m’ɔ si like su nian kpa’n i sa nun kɛ ɔ nian su’n, yɛle Famiɛn’n i ninnge nga be o asiɛ’n su wa’n. Ninnge sɔ’m be nun’n, Zoova i sufuɛ nga be o asiɛ’n su wa’n, ɔ nin like kwlaa nga be fa di jasin fɛ’n bolɛ junman’n, be o be nun.
12, 13. ?Wafa sɛ yɛ Klistfuɛ kun si kɛ b’a flɛ i kɛ ɔ ko tran ɲanmiɛn su lɔ ɔ?
12 ?Wafa sɛ yɛ Klistfuɛ kun si kɛ ɔ́ kɔ́ ɲanmiɛn su naan ɔ o Izraɛlifuɛ nga be ti Ɲanmiɛn liɛ sakpa’n be onga’n be nun wie ɔ? Kosan sɔ’n i su tɛlɛ’n, ɔ o ndɛ nga akoto Pɔlu kan kleli be nga bé wá kɔ́ ɲanmiɛn su kɛ i sa’n, i nun. Ɔ seli be kɛ: “Be kwlaa nga be fa atin nga Nyanmiɛn wawɛ’n kle be su’n, be ti Nyanmiɛn wa. Afin Nyanmiɛn i wawɛ’n b’ɔ fa mannin amun’n, i liɛ’n, ɔ fa-man amun kaci-man kanga, yɛ ɔ wla-man amun srɛ, sanngɛ ɔ fa amun kaci kɛ Nyanmiɛn klun ba sa. I sɔ’n ti’n, e kwla kpan flɛ Nyanmiɛn kɛ: ‘Baba!’ Nyanmiɛn wawɛ’n kle ye weiin kpa e anwlɛn’n nun kɛ e ti Nyanmiɛn i wa sakpa. E ti i wa, ɔ maan like ng’ɔ se kɛ ɔ́ fá mɛ́n i sran mun’n, é nyán wie, yɛ kusu like ng’ɔ se kɛ ɔ́ fá mán Krist’n, bé bó e dunman nun wie, sanngɛ saan nyrɛnnɛn kunngba ng’ɔ wunnin i’n, é wún wie naan e nin i y’a nyan nyrun.”—Rɔmfuɛ Mun 8:14-17.
13 Kɛ nga e fa wun i lɛ’n, sran sɔ mun’n, Ɲanmiɛn fɛli i wawɛ’n mannin be, ɔ maan ɔ “flɛli” be annzɛ ɔ “yiali” be kɛ be ko tran ɲanmiɛn su lɔ. (Ebre Mun 3:1) Ɲanmiɛn bɔbɔ yɛ ɔ flɛ be, be tinuntinun ɔn. Be nga be flɛ be’n kusu’n, be sɔ nun klanman, yɛ srɛ kunman be kɛ be kaci Ɲanmiɛn i mma mun. (An kanngan 1 Zan 2:20, 21 nun.) Ɔ maan, nán be bɔbɔ yɛ be fɛ i sɔ ajalɛ’n niɔn. Sanngɛ Zoova yɛ ɔ sie be nzɔliɛ annzɛ ɔ fɛ i wawɛ’n man be ɔ.—2 Korɛntfuɛ Mun 1:21, 22; 1 Piɛr 1:3, 4.
Wafa ng’ɔ fata kɛ e bu flɛlɛ sɔ’n
14. ?Wafa sɛ yɛ be nga be kpali be sieli be ngunmin’n, be bɔbɔ be bu i sɔ liɛ’n niɔn?
14 ?Kɛ be nga be flɛli be’n, bé mínndɛ naan b’a wɔ ɲanmiɛn su lɔ’n, wafa sɛ yɛ ɔ nin i fata kɛ be bɔbɔ be bu i sɔ liɛ’n niɔn? Be si weiin kɛ kannzɛ be flɛlɛ sɔ’n ti like dan’n, sanngɛ yialɛ ngbɛn yɛ b’a yia be ɔ. Naan ɔ fata kɛ be nanti seiin lele be fa wu naan b’a kwla ɲan flɛlɛ sɔ’n i nuan like. Ɔ maan, be kan be wun ase be kan ndɛ kunngba nga Pɔlu kɛnnin i yɛ’n wie. Ɔ seli kɛ: “Aniaan mun, m bu-man min wun kɛ m’an wie i ngba nyan, sanngɛ sa kun nga n jin su kɛ ń yó’n yɛlɛ kɛ maan n wla fi like ng’ɔ o min sin’n naan ń tínndin maan n sa to like ng’ɔ o min nyrun lɔ’n. Ɔ maan m mian min nyin naan ń jú juwlɛ nga be sieli’n nun naan ń nyán like nga Nyanmiɛn flɛ e kɛ é nyɛ́n i nyanmiɛn su lɔ’n sran wunmuan bɔ e nin Krist-Jésus y’a yo’n ti.” (Filipfuɛ Mun 3:13, 14) Ɔ fata kɛ be nga be kpali be sieli be ngunmin’n be onga’n, be mian be ɲin naan be ‘bu flɛlɛ nga Nyanmiɛn flɛli be’n, i akunndan naan be yo sa ng’ɔ ti i nuan su’n. Nán be tu be wun mlɔnmlɔn, be yo wɛtɛɛfuɛ.’ Kɛ bé yó sɔ’n ‘be mian be nyin di junman kpa [akluntitiɛ nin usulɛ nun].’—Efɛzfuɛ Mun 4:1, 2; Filipfuɛ Mun 2:12; 1 Tɛsalonikfuɛ Mun 2:12.
15. ?Wafa sɛ yɛ ɔ nin i fata kɛ Klistfuɛ nga’m be bu Klistfuɛ ng’ɔ di E Wla Kpɛnlɛ Cɛn’n i bo nzɔliɛ ninnge mun’n niɔn? ?Yɛ wafa sɛ yɛ be nga be kpali be sieli be ngunmin’n, be bɔbɔ be bu be wun ɔn?
15 ?Sanngɛ wafa sɛ yɛ ɔ nin i fata kɛ Klistfuɛ nga’m be bu sran ng’ɔ se kɛ Ɲanmiɛn fɛ i wawɛ’n mɛnnin m’ɔ di E Wla Kpɛnlɛ Cɛn’n i bo nzɔliɛ ninnge mun’n niɔn? Ɔ nin i fataman kɛ Klistfuɛ’m be ijɔ be konviabo. Afin, i sɔ’n ti sran sɔ’n nin Zoova be nɲɔn’n be afiɛn ndɛ. (Rɔmfuɛ Mun 14:12) I kpa’n Klistfuɛ nga Ɲanmiɛn fɛli i wawɛ’n mɛnnin i sakpa’n, ɔ su seman kɛ be yo i ninnge liɛ ngunmin. Kusu ɔ bumɛn i kɛ, kɛ mɔ Ɲanmiɛn kpɛli i sieli i ngunmin’n ti’n, kannzɛ bɔbɔ “sran kpanngban kpa” mun be nunfuɛ kun w’a tin Ɲanmiɛn ninnge’m be nun sɛ’n, i akunndan’n liɛ’n trɛ i liɛ’n. (Sa Nglo Yilɛ 7:9) Asa kusu’n, ɔ seman kɛ i Ɲanmiɛn wawɛ’n ng’ɔ o i su’n, ɔ tra ng’ɔ o “bua’m be wie” mun be nunfuɛ’m be su’n. (Zan 10:16) Yɛ ɔ fataman kɛ, ɔ lafi su kɛ bé yó i ninnge liɛ ngunmin. Annzɛ kɛ m’ɔ di E Wla Kpɛnlɛ Cɛn’n i bo nzɔliɛ ninnge mun’n, nn i yɛ ɔ́ síe asɔnun kpɛnngbɛn mun ɔn.
16-18. (a) ?Klistfuɛ nga be kpali be sieli be ngunmin’n, be kwlaa yɛ be yiyi Ɲanmiɛn Ndɛ’n nun ninnge uflɛ’m be nglo ɔ? An fa sunnzun ase be yiyi nun. (b) ?Ngue ti yɛ ɔ timan cinnjin kɛ e Ɲrun dinfuɛ’m be anuannzɛ’n, ɔ ko fua be nga be kpali be sieli be ngunmin’n be kwlaa ka naan b’a di be junman’n niɔn?
16 ?Klistfuɛ nga be kpali be sieli be ngunmin’n, be kwlaa be dun mmua ti be wun aniɛn ka naan b’a yiyi Ɲanmiɛn Ndɛ’n nun ninnge uflɛ’m be nglo? Cɛcɛ. Kannzɛ sran kpa nanwlɛfuɛ’n i akpasua’n yɛ ɔ ta Ɲanmiɛn i awlobofuɛ mun Ɲanmiɛn ninnge’m be nun’n, sanngɛ be kwlaa nga be o akpasua sɔ’n nun’n, be diman junman kunngba’n. (An kanngan 1 Korɛntfuɛ Mun 12:14-18 nun.) Kɛ nga e fa wunnin i klikli nun sa’n, Klistfuɛ klikli’m be blɛ su’n, be kwlaa be boli jasin fɛ’n m’ɔ ti junman cinnjin’n. Sanngɛ be nun nga be fali be kɛ be klɛ Biblu’n, ɔ nin be nga be fali be kɛ be nian asɔnun’n su’n, b’a sɔnman.
17 Maan e fa sunnzun ase kun e yiyi i sɔ’n nun: Wie liɛ’n, Ɲanmiɛn Ndɛ’n se kɛ “asɔnunfuɛ” mun be yia sran wie’m be wun be tu be fɔ. (Matie 18:17) Sanngɛ kɛ e niɛn i kpa’n, asɔnun kpɛnngbɛn mun yɛ be di i sɔ junman’n niɔn. Afin, be yɛ be dun mmua asɔnunfuɛ’m be ɲrun ɔn. Asɔnun kpɛnngbɛn’m be nuan su toman aniaan kwlaa nga be o asɔnun’n nun naan be nuan sɛ be wun kwlaa naan b’a fa ajalɛ kun. Ɲanmiɛn ɲrun’n, junman nga be fa mannin be’n, yɛ be di ɔ. Yɛ asɔnunfuɛ’m be kwlaa be ti yɛ be di junman sɔ’n niɔn.
18 I kunngba’n, be nga be kpali be sieli be ngunmin’n, be nun sran kaan sa yɛ be ti sran kpa nanwlɛfuɛ’n i akpasua’n i janunfuɛ ɔ. Be yɛ be flɛ be kɛ Zoova i Lalofuɛ’m be Ɲrun dinfuɛ’m be anuannzɛ’n niɔn. Aniaan sɔ mɔ Ɲanmiɛn fɛli i wawɛ’n mannin be’n, be nian Ɲanmiɛn junman dilɛ’n nin Ɲanmiɛn ninnge’m be nun aliɛ fa manlɛ junman’n su. Kɛ nga be fali yoli i Klistfuɛ klikli’m be blɛ su sa’n, e Ɲrun dinfuɛ’m be anuannzɛ’n sinsinman be nga be kpali be sieli be ngunmin’n, be kwlaa be su ka naan w’a fa ajalɛ mun. (An kanngan Sa Nga Be Yoli’n 16:4, 5 nun.) Sanngɛ dɔ nga su’n, Klistfuɛ nga be kpali be sieli be ngunmin’n, be kwlaa be tu be klun be di jasin fɛ’n bolɛ junman m’ɔ ti kɛ awie kpɛlɛ sa’n. Kɛ mɔ “sran kpa nanwlɛfuɛ m’ɔ si ngwlɛlɛ’n” ti sran akpasua kun’n ti’n, sɛ é kwlá sé’n be ti wunnɛn kunngba. Sanngɛ be tinuntinun’n, be junman’n ti fanunfanun.—1 Korɛntfuɛ Mun 12:19-26.
19, 20. ?Akunndan benin yɛ sran kpanngban kpa’m be bu i “sran kpa nanwlɛfuɛ m’ɔ si ngwlɛlɛ’n” nin i janunfuɛ’n be su ɔ?
19 ?Wafa sɛ yɛ ndɛ nga y’a kɛn i nglo lɛ’n, ɔ kan sran kpanngban kpa nga be uka su titi mɔ be lafi su kɛ bé trán asiɛ’n su wa’n niɔn? Be o Famiɛn’n i ninnge’m be nun wie. Ɔ maan ajalɛ nga e Ɲrun dinfuɛ’m be anuannzɛ’n m’ɔ ti “sran kpa nanwlɛfuɛ m’ɔ si ngwlɛlɛ’n” i janunfuɛ’n fa’n, be nian be su be nanti aklunjuɛ’n nun. Ɲanmiɛn ninnge’m be nun aliɛ nga e Ɲrun dinfuɛ’m be anuannzɛ’n maan be yi’n, be nga be ti sran kpanngban kpa’m be nunfuɛ’n, be klun jɔ su. Ɔ ti su kɛ be nga be ti sran kpanngban kpa’m be nunfuɛ’n, be ɲin yi sran kpa nanwlɛ’n i akpasua’n. Sanngɛ maan be nian be wun naan b’a suman be nun wie fi. Klistfuɛ nga Ɲanmiɛn fɛli i wawɛ’n mɛnnin i sakpa’n, ɔ kplinman su kɛ aniaan’m be su i.—Sa Nga Be Yoli’n 10:25, 26; 14:14, 15.
20 Maan e yo e min’n i “sran” mun, yɛle kɛ be nga be kpali be sieli be ngunmin’n be onga’n be nunfuɛ, annzɛ e yo sran kpanngban kpa’m be nunfuɛ, maan e kwlaa e mian e ɲin naan e nin sran kpa m’ɔ si like su nian kpa’n nin i janunfuɛ mɔ yɛle e Ɲrun dinfuɛ’m be anuannzɛ’n’n, e di junman kpa. Maan e kwlaa e tinutinun e “tran minndɛ” naan e nin anuannzɛ sɔ’n e nanti klanman lele e ju mɛn’n i awieliɛ.—Matie 24:13, 42.
?Amun wla kwla kpɛn su?
• ?Wan yɛle “sran kpa nanwlɛfuɛ m’ɔ si ngwlɛlɛ’n”? ?Yɛ wan mun yɛ be ti e min’n i sran mun ɔn?
• ?Wafa sɛ yɛ Klistfuɛ kun si kɛ b’a flɛ i kɛ ɔ ko tran ɲanmiɛn su lɔ ɔ?
• ?Wan yɛ Ɲanmiɛn ninnge’m be nun aliɛ’n i siesielɛ’n o i sa nun ɔn?
• ?Wafa sɛ yɛ ɔ nin i fata kɛ Klistfuɛ nga be kpɛli i sieli i ngunmin’n, ɔ bu i bɔbɔ wun ɔn?
[Foto, bue 28]
Andɛ’n, e Ɲrun dinfuɛ’m be anuannzɛ’n yɛ ɔ ti sran kpa nanwlɛfuɛ m’ɔ si ngwlɛlɛ’n i akpasua’n i janunfuɛ ɔ. Klistfuɛ klikli’m be blɛ su’n, kɛ ɔ ti sɔ wie ɔ.