Ɲanmiɛn Sielɛ’n maan e su wa ɲan e ti!

‘Maan ɔ sielɛ blɛ’n ju, maan e mɔ e wo asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’—MAT. 6:10.

1. ?Ndɛ nga Zezi kan kleli sran mun’n, i nun nanndoliɛ’n yɛle benin?

I NUN mɔ Zezi kannin Ɲanmiɛn ndɛ oka’n su lɔ’n, ɔ kleli wafa ng’ɔ fata kɛ sran nin Ɲanmiɛn be koko yalɛ’n. Ɲanmiɛn srɛlɛ sɔ’n yili like ng’ɔ yoli Zezi i nanndoliɛ kpa i jasin fɛ’n bolɛ nun’n, i nglo. I waan i sɔnnzɔnfuɛ’m be srɛ Ɲanmiɛn kɛ: ‘Maan ɔ sielɛ blɛ’n ju, maan e mɔ e wo asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’ (Mat. 6:9-13) Zezi ‘ɔli klɔ dandan nin kanngan’n kwlaa be su, ɔ kannin Ɲanmiɛn ndɛ, ɔ boli Ɲanmiɛn sielɛ jasin fɛ’n kleli be.’ (Lik 8:1) Ɔ seli i sɔnnzɔnfuɛ mun kɛ: ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n.’ (Mat. 6:33) Kɛ e bɔbɔ é súan like yɛ’n, maan e bu wafa nga e kwla fa bo jasin fɛ i akunndan. E kwla bu wafa nga é tɛ́ kosan yɛ’m be su’n i akunndan wie. Yɛle kɛ: ?Ngue ti yɛ Ɲanmiɛn Sielɛ’n i jasin fɛ’n ti cinnjin ɔn? ?Delɛ benin yɛ klɔ sran’m be miɛn i wun ɔn? ?Wafa sɛ yɛ Ɲanmiɛn Sielɛ’n maan sran’m bé ɲán be ti ɔ?

2. ?Ngue ti yɛ Ɲanmiɛn Sielɛ’n jasin fɛ’n yɛ ɔ fata kɛ be kan ɔn?

² Zezi seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Mat. 24:14) Nanwlɛ, jasin fɛ’n m’ɔ fata kɛ be kan’n yɛle Ɲanmiɛn Sielɛ’n i jasin fɛ’n! E asɔnun nga be o mɛn wunmuan’n nun’n, be tra 100.000. Ɲanmiɛn sufuɛ nga be o asɔnun sɔ’m be nun’n, be ti sran kɔe akpinngbin nso kun. Be wla be wun ase be kan kle sran mun kɛ Ɲanmiɛn Sielɛ’n w’a taka. I sɔ liɛ’n ti ndɛ fɛ. Afin, Ɲanmiɛn Sielɛ’n maan be mɔ be o asiɛ’n su wa’n, bé yó Zoova i klun sa kɛ be mɔ be o ɲanmiɛn su lɔ’n be yo’n sa.

3, 4. ?Kɛ be mɔ be o asiɛ’n su wa’n bé yó Ɲanmiɛn klun sa’n, ngue yɛ Ɲanmiɛn yó mán be ɔ?

³ ?Kɛ be mɔ be o asiɛ’n su wa’n bé yó Ɲanmiɛn klun sa’n, ngue yɛ Ɲanmiɛn yó mán be ɔ? Zoova wá ‘núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun.’ (Ngl. 21:4) Klɔ sran nzuɛn’n su tranman lɛ kun. Ɔ maan sran’m be su tɔman tukpacɛ kun naan se kɛ bé wú. I li bɔbɔ be nga be wuli mɔ Ɲanmiɛn i akunndan o be su’n, bé ɲán nguan ekun. Afin Biblu’n kle kɛ ‘sran kpa mun o, sran tɛ mun o, bé cɛ́n.’ (Yol. 24:15) Sran’m be su diman alɛ kun. Tukpacɛ nin awe be su tranman lɛ kun. Nnɛn wlɛ mun bɔbɔ be nin sran mun, ɔ nin be wiengu nnɛn’m bé trán fɔuun. Asiɛ’n káci mɛn klanman.—Jue. 46:10; 72:16; Eza. 11:6-9; 33:24; Lik 23:43.

⁴ Ɲanmiɛn Sielɛ’n yó sran’m be ye dan. I sɔ’n ti’n, mɛn sɔ’n i su ndɛ fɛfɛ nga Biblu’n kan’n yɛ: ‘Yalɛfuɛ mun [yɛle kɛ wun ase kanfuɛ mun] yɛ mɛn’n ɔ́ wá yó be liɛ ɔ. Be wun jɔ́ be kpa fɔuun!’ ?Yɛ sa tɛ yofuɛ’m be li? Ɲanmiɛn Ndɛ’n kle kɛ ‘ɔ ka kaan sa, be su wunman klunwifuɛ’n kun.’ Sanngɛ, ‘be nga be fa be wla gua Anannganman su’n, mɛn’n ɔ́ yó be liɛ.’—Jue. 37:9.

5. ?Ngue sa yɛ ɔ́ wá ɲán mɛn ng’ɔ o yɛ’n niɔn?

⁵ Sanngɛ kwlaa naan i sɔ liɛ’n w’a ju’n, ɔ fata kɛ be dun mmua nunnun mɛn’n nun famiɛn diwlɛ mun nin Ɲanmiɛn sulɛ wafa mun, ɔ nin aata dilɛ’n mɔ be nunfuɛ’m be nuan sɛman be wun’n. I sɔ like’n bɔɔ cɛ yɛ Ɲanmiɛn i awa m’ɔ o ɲanmiɛn su lɔ’n, ɔ́ wá yó ɔ. Ɲanmiɛn nuan ijɔfuɛ Daniɛli seli kɛ: ‘Famiɛn sɔ [mɔ be o lɛ andɛ’n] be blɛ su’n, Ɲanmiɛn m’ɔ o nglo lɔ’n ɔ́ síe famiɛn diwlɛ kun [ɲanmiɛn su lɔ] m’ɔ su saciman le, yɛ mɛn uflɛ su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga [be o lɛ andɛ’n] mun kpɛkun i bɔbɔ ɔ́ ká lɛ tititi.’ (Dan. 2:44) I sin’n, Ɲanmiɛn i famiɛn diwlɛ m’ɔ o ɲanmiɛn su lɔ’n ɔ́ síe sran mɔ bé trán asiɛ’n su’n. ‘Ɲanmiɛn su lɔ nin asiɛ uflɛ’n,’ be nun ‘yɛ be nga be yo sa kpa’n bé trán ɔn.’—2 Piɛ. 3:13.

E mian delɛ wun dan kpa andɛ

6. ?Wafa sɛ yɛ Biblu’n kan mɛn ng’ɔ o yɛ’n i tɛ m’ɔ ti’n i ndɛ ɔ?

⁶ Satan nin Adam ɔ nin Ɛvu be yoli ɲin kekle Ɲanmiɛn su. Be kunndɛli kɛ be bɔbɔ yɛ bé klé sa ng’ɔ ti kpa’n nin ng’ɔ ti tɛ’n niɔn. Kɛ ɔ fin i lɛ’n, klɔ sran’m be wun be ɲrun tɛ kpa. I sin m’ɔ dili afuɛ 1.600 ka naan nzue dan’n w’a tɔ’n, ‘sran’m be klunwi’n kɔ i ɲrun cɛn’n kwlaa. Kɛ aliɛ’n cɛ́n m’ɔ́ sán’n, nn be klun akunndan’n yó tɛ kɔ́ i ɲrun.’ (Bob. 6:5) Kɛ 1.300 sinnin’n, Salomɔn wunnin kɛ lika’n yoli tɛtɛ kpa. Ɔ maan ɔ seli kɛ: ‘N liɛ’n, n se kɛ be nga b’a wu’n, be liɛ su ti ye, afin be liɛ’n flunman tra be nga be ɲin te o su’n. Yɛ sran nga be nin a wunnzɛmɛn i’n, i liɛ’n flunman lele tra be nga be ɲin o su nin be nga b’a wu’n. Afin ɔ nin a wunman sa tɛtɛ nga be yo be ɲanmiɛn’n bo wa yɛ’n be wie.’ (Aku. 4:2, 3) Kɛ ɔ fɛ i blɛ sɔ nun m’ɔ fa ju andɛ’n, ɔ dili afuɛ 3.000. Andɛ’n, sa tɛ yolɛ’n te tru kpokpaa te kɔ.

7. ?Ngue ti yɛ e mian delɛ m’ɔ fin Ɲanmiɛn Sielɛ’n i wun dan andɛ ɔ?

⁷ Nanwlɛ, nán andɛ sa yɛ sran’m be yo sa tɛ asiɛ’n su wa ɔ. Sanngɛ siɛn’n, delɛ m’ɔ fin Ɲanmiɛn Sielɛ’n e miɛn i wun dan kpa tra laa’n. Afuɛ 100 nga be sinnin koko nga nun’n, lika’n i tɛ m’ɔ wa yoli’n be kanman. Sanngɛ ɔ nin i sɔ ngba’n, ɔ te yo tɛ te kɔ i ɲrun. Mɛn’n nun anuannzɛ kun m’ɔ fɛ i ɲin sie sa nga be ju mɛn’n nun’n be su’n, i ndɛ ng’ɔ kan’n yɛ: “Sran nga alɛ’n kunnin be afuɛ nga be flɛ i 1901 lele afuɛ nga be flɛ i 2000 nun’n, be sɔnnin tra be nga be wuli alɛ’n kwlaa nga sran’m be dili be Klistfuɛ klikli’m be blɛ su lele afuɛ nga be flɛ i 1899 nun’n, kpɛ nsan.” (Worldwatch Institute) Kɛ ɔ fɛ i afuɛ nga be flɛ i 1914 nun’n, sran nga alɛ’n kunnin be’n be tra akpinngbin 100! Fluwa kun nun’n, be klɛli i kɛ sran kɔe akpinngbin 60 be wuli alɛ dan nɲɔn su’n nun. Nvle wie’m be le alɛ ninnge nga be flɛ be bɔmbu nikleɛli’n. Ɔ maan, sran’m be kwla kun asiɛ’n sufuɛ kpanngban kpa. Asa kusu’n, sran’m be ɔli be ɲrun siansi’n ɔ nin ayre yolɛ’n nun. Sanngɛ afuɛ nuan kwlaa’n, awe’n ti’n, ba kanngan kɔe akpinngbin nnun be wu.—An nian fluwa ?Ngue like yɛ Biblu’n kle i sakpasakpa ɔ? i ndɛ tre 9 nun.

8. ?Ngue yɛ afuɛ akpi tra su nga sran’m be fa sieli be wun’n, ɔ kle weiin ɔn?

⁸ Sran’m b’a kwlá nunnunman sa tɛ’n. Ninnge kɛ fɔundi nun tranlɛ nin aɲanbeun, ɔ nin aunkpinndiɛ mɔ sran’m be kunndɛ be’n, mɛn’n nun politiki nin aata dilɛ anuannzɛ mun’n, ɔ nin Ɲanmiɛn sulɛ wafa’m b’a kwlá manman be ninnge sɔ mun. I li bɔbɔ anuannzɛ sɔ mun yɛ be uka ɲrɛnnɛn nga sran’m be wun i’n, i su ɔ. Nanwlɛ, afuɛ akpi tra su nga sran’m be fa sieli be wun’n, ɔ kle kɛ ndɛ yɛ’n ti nanwlɛ. I waan: ‘Sran’n i nguan’n nunmɛn i sa nun. Ajalɛ ng’ɔ tu’n, ɔ finmɛn i.’ (Zer. 10:23) Nanwlɛ, ‘sran kun sie i wiengu kun kpɛkun ɔ kle i ɲrɛnnɛn.’ (Aku. 8:9) I kpa bɔbɔ’n, ‘like nga Ɲanmiɛn yili be’n, be kwlaa be oto, yɛ be wun ɲrɛnnɛn kɛ bla mɔ w’a tran awuliɛ’n sa.’—Rɔm. 8:22.

9. ?Wafa sɛ yɛ Klistfuɛ kpa’m be si kɛ ‘kɛ mɛn’n ɔ́ kɔ́ i bue nuan’n,’ lika’n ɔ́ yó ɔ?

⁹ E blɛ liɛ’n i su ndɛ nga Biblu’n kan’n yɛ: ‘Cɛn wie lele’n, kɛ mɛn’n ɔ́ kɔ́ i bue nuan’n, lika’n ɔ́ yó kekle.’ Kɛ mɛn’n kɔ́ i bue nuan mɔ sran’m bé síe be wun’n, wafa nga lika’n ɔ́ yó’n, Ɲanmiɛn nuan ijɔfuɛ’n kɛnnin i ndɛ. Kpɛkun ɔ seli kɛ: ‘Sran nga be klun yo wi mɔ be ti gblɛfuɛ’n, be sa tɛ nga be yo’n i tɛ’n ɔ́ trá laa liɛ’n.’ (An kanngan 2 Timote 3:1-5, 13 nun.) Klistfuɛ’m be si kɛ, kɛ lika’n ɔ́ yó sɔ ɔ. Afin, Satan “Klunwifuɛ’n sie mɛn wunmuan’n.” (1 Zan 5:19) Sanngɛ nga m’ɔ ti ndɛ fɛ’n yɛle kɛ, ɔ cɛ kaan sa’n, Ɲanmiɛn wá dé be nga be klo i’n. Ɔ́ dé be mɛn ng’ɔ o yɛ’n m’ɔ yo tɛ kɔ i ɲrun ndɛndɛ’n i nun.

Sran kunngba cɛ m’ɔ́ dé e’n

10. ?Ngue ti yɛ Zoova kunngba cɛ yɛ ɔ́ dé e ɔ?

¹⁰ Kɛ é bó jasin fɛ’n é klé sran mun’n, maan e kle be weiin kɛ Zoova kunngba cɛ yɛ ɔ́ dé e ɔ. I kunngba cɛ yɛ ɔ le tinmin naan w’a de i sufuɛ mun sa tɛ kwlaa nun ɔn. Yɛ ɔ kunndɛ kɛ ɔ́ yó sɔ kusu. (Yol. 4:24, 31; Ngl. 4:11) E kwla lafi su kpa kɛ Zoova dé i nvle nunfuɛ mun tititi, kpɛkun ɔ́ yó like ng’ɔ seli kɛ ɔ́ yó’n tititi. Afin ɔ tali nda kɛ: ‘Sa nga n guguli kɛ ń yó’n, saan ɔ́ kpɛ́n su.’ Kpɛkun ndɛ m’ɔ fin i nuan fite’n ‘sɛ ɔ ti sran’n, nn é sé kɛ ɔ sɛmɛn i sin i wun lɔ sa ngbɛn, saan ɔ́ yó i klun sa.’—An kanngan Ezai 14:24, 25 nin Eza 55:10, 11 be nun.

11, 12. ?Ngue yɛ Zoova i sufuɛ’m be kwla lafi su kɛ ɔ́ yó mán be ɔ?

¹¹ Zoova i sufuɛ’m be kwla lafi su kɛ, kɛ ɔ́ núnnún klunwifuɛ mun’n, ɔ́ dé be. I nun mɔ Ɲanmiɛn sunmɛnnin i nuan ijɔfuɛ Zeremi kɛ ɔ ko kan ndɛ yakpa su kle sa tɛtɛ yofuɛ mun’n, Ɲanmiɛn seli kɛ: ‘Nán yo srongble sran fi ɲrun.’ ?Ngue ti ɔ? ‘Afin n jin ɔ sin, ń dé wɔ.’ (Zer. 1:8) I kunngba’n, ka naan Zoova w’a nunnun Sodɔmu nin Gomɔru klɔ mun’n, ɔ sunmannin anzi nɲɔn kɛ be ko fa Lɔtu nin i awlofuɛ mun lika sɔ’n nun fite. ‘Yɛ Anannganman yoli maan sufru fin nglo lɔ jue guali Sodɔmu klɔ’n nin Gomɔru klɔ’n be su.’—Bob. 19:15, 24, 25.

¹² Zoova kwla de sran nga be yo i klun sa’n asiɛ wunmuan’n su’n wie. Kɛ Zoova fali nzue dan’n nunnunnin laa mɛn tɛ kun’n, ɔ ‘deli Nowe m’ɔ bo sa nga be yo ɔ ɔ ti su’n i ndolo’n, yɛ ɔ deli sran nso ekun.’ (2 Piɛ. 2:5) Kɛ Zoova wá núnnún mɛn tɛ nga’n, ɔ́ dé sran seiin mun. Ɲanmiɛn Ndɛ’n se kɛ: ‘Mɛn’n nun wɛtɛɛfuɛ mun, amun mantan Anannganman. Amun yo nanwlɛfuɛ, amun kan amun wun ase be man Ɲanmiɛn’n. Amun kan amun wun ase be mɛn i, i liɛ’n, nja, sɛ i ya cɛn’n ju ɔ, amún ɲán amun ti o.’ (Sof. 2:3) Kɛ be ko nunnun sa tɛtɛ yofuɛ mun ko wie’n, ‘sran kpafuɛ mun yɛ bé wá trán mɛn nga nun ɔn. Klunwifuɛ’m be liɛ’n, bé trá be mɛn nga nun bé kɔ́.’—Nya. 2:21, 22.

13. ?Wafa sɛ yɛ Zoova wá dé i sufuɛ mɔ be wuli’n niɔn?

¹³ Sanngɛ, tukpacɛ nin yalɛ klelɛ’n, ɔ nin sa wie mun ekun be ti’n, Ɲanmiɛn sufuɛ kpanngban be wuli. (Mat. 24:9) ?Wafa sɛ yɛ bé dé be kwlaa sɔ mun ɔn? Kɛ nga y’a dun mmua y’a kan’n sa’n, ‘sran kpa mun’n, bé cɛ́n.’ (Yol. 24:15) E si kɛ ɔ leman like kun sa m’ɔ kwla yo naan Zoova w’a demɛn i sufuɛ mun ɔn. Nanwlɛ, i sɔ’n cici e wla dan!

Famiɛn diwlɛ kpa kun

14. ?Ngue ti yɛ e lafi su kɛ Ɲanmiɛn i famiɛn diwlɛ’n ti kpa ɔ?

¹⁴ Kɛ é bó jasin fɛ’n é klé sran mun’n, e kwla yiyi nun kɛ Zoova i famiɛn diwlɛ m’ɔ o ɲanmiɛn su lɔ’n, ɔ ti kpa. Ɔ ti sɔ afin, sran klolɛ nin sa nuan su yolɛ sɛsɛsɛ mɔ Ɲanmiɛn yi be nglo’n, be wun i sɔ famiɛn diwlɛ sɔ’n nun wie. (Mml. 32:4; 1 Zan 4:8) Zezi Klist mɔ i yɛ ɔ kwla sie asiɛ’n klanman’n, yɛ Ɲanmiɛn sieli i famiɛn ɔn. Asa ekun’n, Zoova kpali sran 144.000 asiɛ’n su wa kɛ be ɔ ɲanmiɛn su lɔ, naan be nin Klist be sie asiɛ’n.—Ngl. 14:1-5.

15. An fa Ɲanmiɛn Sielɛ’n sunnzun klɔ sran’m be liɛ’n.

¹⁵ Nanwlɛ, ngbaciɛ dan wá trán Zezi nin sran 144.000 be sran sielɛ’n ɔ nin klɔ sran’m be liɛ’n be afiɛn! Mɛn’n siefuɛ’m be yoli wlɛ, kpɛkun be sran’m be kunnin alɛ. Ɔ maan, be nun akpinngbin tra su be wuli. I sɔ’n ti yɛ Ɲanmiɛn Ndɛ’n se e kɛ nán e fa e wla gua klɔ sran su’n niɔn. Afin ‘be de be wiengu ɔ ɔ yoman ye!’ (Jue. 146:3) Sanngɛ Klist i liɛ’n, ɔ́ fá akunndan kpa ɔ́ síe sran mun. Zezi seli kɛ: ‘Amun kwlaa mɔ an sua trɔ mɔ amun a fɛ’n, an bla min sin, ń síke amun, yɛ amún ló wunmiɛn. An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min awlɛn’n ti flɔlɔ. Yɛ amun wla wá gúa ase. Afin n kɔmin su waka’n i sualɛ yo fɛ, yɛ n trɔ’n yoman nɔnnin.’—Mat. 11:28-30.

Ɔ ka kaan mɛn’n ɔ́ jú i bue nuan!

16. ?Wafa sɛ yɛ mɛn m’ɔ su kɔ i bue nuan’n ɔ́ wíe ɔ?

¹⁶ Kɛ ɔ fɛ i afuɛ nga be flɛ i 1914 nun’n, mɛn ng’ɔ o yɛ’n ɔ su kɔ i bue nuan, yɛle kɛ y’a ju “i awieliɛ.” (Mat. 24:3) Ɔ ka kaan’n, Zezi maan blɛ mɔ ‘ɲrɛnnɛn’n ɔ́ yó dan’n,’ ɔ́ jú. (An kanngan Matie 24:21 nun.) Ɲrɛnnɛn sɔ mɔ be nin a wunmɛn i wunsu le’n, ɔ́ yó maan Satan i mɛn’n i wunmuan’n ɔ su tranman lɛ kun. ?Sanngɛ wafa sɛ yɛ ɲrɛnnɛn dan’n ɔ́ bó i bo ɔ? ?Yɛ wafa sɛ yɛ ɔ́ wíe ɔ?

17. ?Ngue ndɛ yɛ Biblu’n kɛn i ɲrɛnnɛn dan’n i bo bolɛ’n su ɔ?

¹⁷ Ɲrɛnnɛn dan’n ɔ́ bó i bo kpɛ kunngba. Nanwlɛ, ‘kɛ sran’m bé sé kɛ: “Y’a ɲan e ti, y’a di alaje’n,”’ kpɛkun “e Min’n i balɛ cɛn’n” yɛle kɛ Zoova i cɛn’n ɔ́ tɔ́ be su. (An kanngan 1 Tɛsalonikfuɛ Mun 5:2, 3 nun.) Ɔ maan, kɛ nvlenvle’m bé bú i kɛ be su wa wun sa kekleekle nga be o be su’n be nun wie’m be trawlɛ’n, yɛ ɲrɛnnɛn dan’n bó i bo ɔ. “Babilɔni klɔ dan’n,” mɔ yɛle Ɲanmiɛn sulɛ wafa ng’ɔ timan su’n be kwlaa’n, i nunnunlɛ’n ɔ́ fú sran’m be nun. Famiɛn mun nin sran uflɛ’m bé wún fɔ mɔ Ɲanmiɛn buli Babilɔni klɔ dan’n i nuan su sa m’ɔ́ tɔ́ i su’n. Yɛ i sɔ’n bó be nuan.—Ngl. 17:1-6, 18; 18:9, 10, 15, 16, 19.

18. ?Kɛ Satan fá alɛ wlá Zoova i sufuɛ’m be sin’n, ngue yɛ Zoova yó ɔ?

¹⁸ Kɛ lika’n ɔ́ jrán kekle kpa’n, ‘bé wá wún like wie wia’n nin anglo’n, ɔ nin nzraama’m be su,’ yɛ ‘nzɔliɛ’n ng’ɔ kle kɛ i mɔ ɔ kacili Sran’n ɔ su ba’n, ɔ́ fíte ɲanmiɛn su lɔ.’ I sin’n, é kwlá ‘jáo jrán,’ afin ‘kɛ ɔ́ yó sɔ’n, nn e su wa ɲan e ti.’ (Lik 21:25-28; Mat. 24:29, 30) Satan mɔ yɛle Gɔgu’n, ɔ́ fá alɛ wlá Ɲanmiɛn i nvle nunfuɛ’m be sin. Sanngɛ, be nga be fa alɛ wla Ɲanmiɛn i sufuɛ nanwlɛfuɛ’m be sin’n, be su ndɛ nga Zoova kan’n yɛ: ‘Sran ng’ɔ kan amun’n, nn w’a fɛ i sa w’a wɔ min ɲin su.’ (Zkr. 2:12) Ɔ maan, Satan su kwlá nunnunman Ɲanmiɛn i sufuɛ mun. ?Ngue ti yɛ ɔ́ yó sɔ ɔ? Ɔ́ yó sɔ afin e Min Zoova mɔ like fi nunmɛn i sin’n, ɔ́ dé i sufuɛ mun ndɛndɛ.—Eze. 38:9, 18.

19. ?Ngue ti yɛ e kwla lafi su kɛ Ɲanmiɛn i alɛ kunfuɛ’m bé núnnún Satan i mɛn tɛ’n niɔn?

¹⁹ Sa nga Zoova wá yó nvlenvle mun’n ti’n, ‘bé wá sí jrɛiin kɛ ɔ fa ti’n.’ (Eze. 36:23) Aolia nun sran mɔ be ti Zoova i alɛ kunfuɛ’n, bé sú Zezi Klist su. Be yɛ Zoova wá súnman be kɛ be ko nunnun Satan i mɛn’n i bue ng’ɔ́ ká’n niɔn. (Ngl. 19:11-19) Kɔnguɛ kun nun’n, anzi kunngba cɛ ‘kunnin sran akpiakpi ya sran akpiakpi ablaɔcuɛ nin nnun,’ mɔ be kloman Ɲanmiɛn’n. Kɛ e wla kpɛn i sɔ liɛ’n su’n, e lafi su kɛ, kɛ ɲrɛnnɛn dan’n ɔ́ jrán kekle kpa Armagedɔn alɛ nun’n, ɲanmiɛn su lɔ alɛ kunfuɛ’m bé núnnún Satan i mɛn’n i ninnge kasiɛn’n kwlaa ndɛndɛ. (2 Fam. 19:35; Ngl. 16:14, 16) Bé tó Satan nin i mmusu mun yí i kunman dan mɔ be simɛn i bo’n nun. I sin’n, bé wá núnnún be kusu wie.—Ngl. 20:1-3.

20. ?Ngue yɛ Zoova wá fá Ɲanmiɛn Sielɛ’n yó ɔ?

²⁰ Klunwifuɛ’m be su tranman ɲanmiɛn su lɔ nin asiɛ’n su wa kun. Sran seiin mun yɛ bé trán asiɛ’n su tititi ɔ. I blɛ sɔ nun’n, Zoova yí i nglo weiin kɛ i yɛ ɔ ti Defuɛ Dan’n niɔn. (Jue. 145:20) Like nga Zoova fá klé kɛ i yɛ ɔ le atin sie nglo’n nin asiɛ’n, yɛle Ɲanmiɛn Sielɛ’n. Like kunngba’n yɛ ɔ́ fá yó i dunman’n i sanwun, kpɛkun yɛ ɔ́ yó ninnge ɲɛnmɛn ng’ɔ seli kɛ ɔ́ yó be asiɛ’n su wa’n niɔn. Kɛ é bó jasin fɛ’n mɔ é úka “sran kpa” mun naan be wun i wlɛ kɛ e su wa ɲan e ti’n, maan Ɲanmiɛn ra e su naan e di aklunjuɛ!—Mat. 10:11.

?Amun wla kwla kpɛn su?

• ?Wafa sɛ yɛ Zezi kleli kɛ Ɲanmiɛn Sielɛ’n ti cinnjin kpa ɔ?

• ?Ngue ti yɛ e mian delɛ wun tra laa’n niɔn?

• ?Sa benin mun yɛ e si kɛ bé jú ɲrɛnnɛn dan’n nun ɔn?

• ?Wafa sɛ yɛ Zoova kle kɛ i yɛ ɔ ti Defuɛ Dan’n niɔn?

[Foto, bue 16, 17]

Ɲanmiɛn Ndɛ’n kannin e blɛ liɛ nun mɛn wunmuan’n nun jasin fɛ’n bolɛ mɔ be nin a wunmɛn i wunsu le’n i ndɛ.

[Foto, bue 18]

Kɛ nga Zoova deli Nowe nin i awlofuɛ mun sa’n, ɔ kwla de e wie.

[Foto, bue 20]

Zoova wá ‘núnnún e ɲinmuɛn’n kwlaa, wie’n su tranman lɛ kun.’—Ngl. 21:4.