“An nian amun wun su”
“Like’n kwlaa be awieliɛ’n w’a mantan. I sɔ’n ti, [...] an nian amun wun su naan amu’an kwla koko yalɛ a kle Nyanmiɛn.”—1 PIƐR 4:7.
1. ?Ngue su yɛ Zezi i like klelɛ’n takali ɔ?
I NUN mɔ Zezi Klist o asiɛ’n su wa’n, i jasin fɛ’n bolɛ’n taka Ɲanmiɛn i Sielɛ’n su. Atin mɔ Zoova le i sie nglo nin asiɛ’n, Siɛlɛ sɔ’n yɛ ɔ́ wá fá yí i nglo ɔ. Kpɛkun i yɛ ɔ́ fá yó i dunman’n i sanwun ɔn. Ɔ maan, Zezi seli i sɔnnzɔnfuɛ mun kɛ be srɛ Ɲanmiɛn kɛ: “Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.” (Matie 4:17; 6:9, 10) Ɔ cɛ kaan sa’n, Sielɛ’n sɔ’n wá núnnún Satan i mɛn’n, yɛ ɔ́ yó maan sran’m bé yó Ɲanmiɛn klun sa asiɛ wunmuan’n su. Kɛ nga Daniɛli dun mmua kannin sa’n, Ɲanmiɛn Sielɛ’n “ɔ́ núnnún famiɛn diwlɛ kun nga mun [nga be o lɛ andɛ’n], kpɛkun i bɔbɔ ɔ́ ká lɛ tititi.”—Daniɛl 2:44.
2. (a) ?Wafa sɛ yɛ Zezi i sɔnnzɔnfuɛ’m bé sí kɛ ɔ su di famiɛn ɔn? (b) ?Ngue yɛ nzɔliɛ like sɔ’n kle i ekun ɔn?
2 Ɲanmiɛn Sielɛ’n i balɛ’n yoli Zezi i sɔnnzɔnfuɛ’m be cinnjin kpa. I ti be usɛli i kɛ: “?Blɛ onin yɛ sa sɔ’m bé yó-ɔ, yɛ nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn? Kle ye.” (Matie 24:3) Kɛ bé síe Klist famiɛn ɲanmiɛn su lɔ’n, asiɛ’n sufuɛ’m be su wunman nun. Ɔ maan, nzɔliɛ like kun yɛ bé fá wún i wlɛ ɔ. Be dun mmua kannin nzɔliɛ like sɔ’n i ngbɛsungbɛsu’n i ndɛ Ɲanmiɛn Ndɛ’n nun. I ti’n, Zezi i sɔnnzɔnfuɛ nga blɛ sɔ nun be ɲin te o su’n, bé wún i wlɛ kɛ i famiɛn dilɛ’n w’a bo i bo ɲanmiɛn su lɔ. Nzɔliɛ like sɔ’n kle kɛ blɛ nga Biblu’n kan kɛ “mɛn’n ɔ́ kɔ́ i bue nuan’n,” i nun yɛ y’a wlu ɔ, naan mɛn tɛ kain nga su wie.—2 Timote 3:1-5, 13; Matie 24:7-14.
Mɛn’n w’a ju i bue nuan maan e nian e wun su
3. ?Ngue ti yɛ ɔ nin i fata kɛ Klistfuɛ’m be nian be wun su ɔ?
3 Akoto Piɛli klɛli kɛ: “Like’n kwlaa be awieliɛ’n w’a mantan. I sɔ’n ti, an bu akunndan, yɛ an nian amun wun su naan amu’an kwla koko yalɛ a kle Nyanmiɛn.” (1 Piɛr 4:7) Ɔ nin i fata kɛ Zezi i sɔnnzɔnfuɛ’m be nian be wun su. Naan be fa be ɲin be sie i mɛn’n nun sa nga be kle kɛ Zezi w’a bo famiɛn dilɛ’n i bo’n, be su. Kpɛkun kɛ mɛn tɛ kain nga i nunnunlɛ mántan koko’n, ɔ nin i fata kɛ be wun su nianlɛ’n sɔ’n yo dan tra laa’n. Zezi seli i sɔnnzɔnfuɛ’m be kɛ: “An tran minndɛ i, afin an si-man cɛn nga awlo kpɛn’n bá [wá núnnún Satan i mɛn’n niɔn].”—Mark 13:35, 36.
4. ?Ngbaciɛ benin yɛ ɔ o Zoova i sufuɛ mun nin be nga Satan sie be’n be afiɛn ɔn? (Kuku’n o nun.)
4 Satan sie sran’m be sunman lika. Ɔ maan, sran’m be faman be ɲin sieman mɛn nun sa’m be su naan se kɛ bé wún be wlɛ. Be wunmɛn i wlɛ kɛ Klist w’a bo i famiɛn dilɛ’n bo. Sanngɛ Klist i sɔnnzɔnfuɛ kpa’m be liɛ’n, be nian be wun su, ɔ maan sa nga be juli afuɛ ya kpɔlɛ ng’ɔ sinnin lɛ nun’n, be wun be wlɛ weiin. Kɛ ɔ fɛ i afuɛ nga be flɛ i 1925 nun’n, Zoova i Lalofuɛ’m be sieli i nzɔliɛ kɛ alɛ dan klikli’n, ɔ nin i sin sa’m be kle weiin kɛ Klist i famiɛn dilɛ’n boli i bo afuɛ nga be flɛ i 1914 nun. I ti’n, Satan i mɛn tɛ kain nga i awieliɛ’n w’a bo i bo. Kannzɛ bɔbɔ sa nzɔliɛ siefuɛ sunman be siman lika’n i kacilɛ’n i bo’n, sanngɛ be wun i wlɛ kɛ ngbaciɛ dan kpa o blɛ mɔ be nin a diman alɛ klikli’n, ɔ nin andɛ blɛ liɛ’n, be afiɛn.—An nian kuku nga be flɛ i “Mɛn’n sanngannin” i nun.
5. ?Ngue ti yɛ ɔ ti cinnjin kɛ e nian e wun su titi ɔ?
5 I afuɛ ko ju ya kun yɛ, sa kekle nga e wunnin be asiɛ wunmuan’n su’n, be kle kɛ y’a ju mɛn’n i bue nuan. Blɛ ng’ɔ ka naan Zoova w’a se Klist kɛ ɔ nin i anzi’m be ko nunnun Satan’n i mɛn’n, w’a sɔnman kun. (Sa Nglo Yilɛ 19:11-21) Be se Klistfuɛ kpa’m be kɛ be tran minndɛ. I sɔ’n ti’n, ɔ ti cinnjin kɛ e yo i sɔ lele naan b’a nunnun mɛn nga. (Matie 24:42) Ɔ fata kɛ e nian e wun su, naan atin nga Klist kle e’n e fa su e di junman trele kun asiɛ wunmuan’n su.
Asiɛ’n wunmuan’n su junman kun
6, 7. ?Mɛn’n i awieliɛ blɛ nun’n, wafa sɛ yɛ jasin fɛ’n bolɛ junman’n bali nvlɛ ɔ?
6 Be dun mmua kannin kɛ junman nga Zoova i sufuɛ’m bé dí’n, ɔ o nzɔliɛ nga ɔ kle kɛ y’a ju mɛn’n tɛ nga i bue nuan’n nun wie. Kɛ Zezi kán sa fanunfanun nga bé jú mɛn’n i awieliɛ blɛ’n nun’n be ndɛ’n, ɔ fali asiɛ wunmuan’n su junman sɔ’n wlali nun. Ndɛ cinnjin ng’ɔ kannin’n yɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.”—Matie 24:14.
7 Junman sɔ’n mɔ Zezi kɛnnin i ndɛ’n, maan e bu i nun ninnge wie’m be akunndan e nian. Kɛ mɛn’n jú i bue nuan afuɛ nga be flɛ i 1914 nun’n, jasin fɛ’n bofuɛ’m b’a sɔnman. Sanngɛ siɛn’n, Zoova i Lalofuɛ’m be nuan w’a uka su lele b’a ju sran kɔe 7.000.000. Be bo jasin fɛ’n asiɛ wunmuan’n su. Be asɔnun’m be ti 100.000 tra su. Afuɛ nga be flɛ i 2008 nun, sran nga be ukali Zoova i Lalofuɛ’m be su be ɔli E Wla Kpɛnlɛ Cɛn’n i bo’n, be ti sran 10.000.000. Sran nga be bali sɔ’n be tra afuɛ sin liɛ’n sran kɔe miliɔn kun.
8. ?Kannzɛ bɔɔ be tanndan e jasin fɛ’n bolɛ’n i ɲrun’n, sanngɛ ngue ti yɛ ɔ ba nvlɛ ɔ?
8 Nanwlɛ, be su bo Ɲanmiɛn Sielɛ Blɛ’n i jasin fɛ’n dan mɛn wunmuan’n nun, ka naan mɛn’n i awieliɛ’n w’a ju! Sanngɛ nn Satan yɛ ɔ ti “mɛn nga i min’n” niɔn. (2 Korɛntfuɛ Mun 4:4) I Politiki o, i Ɲanmiɛn sulɛ wafa o, i aata dilɛ o, i mɛn’n nun ninnge kɛ televiziɔn nin aladio mɔ be fa bo ndolo’n mun o, Satan i sa o be su. ?Ɔ maan, ngue ti yɛ jasin fɛ’n bolɛ junman sɔ’n ba nvlɛ sɔ ɔ? Zoova suɛn i bo ti ɔ. I sɔ’n ti’n, kannzɛ bɔbɔ Satan kunndɛ kɛ ɔ́ jrán Ɲanmiɛn Sielɛ jasin fɛ’n bolɛ junman’n, sanngɛ junman sɔ’n te kɔ i ɲrun.
9. ?Ngue ti yɛ be kwla se kɛ sɛ e yo kpa Ɲanmiɛn ninnge’m be nun’n, ɔ ti abonuan ɔn?
9 Wafa nga jasin fɛ’n bolɛ junman’n yo kpa’n, mɔ Zoova i nvle’n nunfuɛ’m be trɛ’n, mɔ be yo kpa Ɲanmiɛn ninnge’m be nun’n, be kwla se kɛ ɔ ti abonuan. Sɛ Ɲanmiɛn suanman i nvle’n i bo’n, naan ɔ klemɛn i atin’n yɛ ɔ sɛsɛmɛn i’n, jasin fɛ’n bolɛ junman’n su kwlá yoman ye. (An kanngan Matie 19:26 nun.) E kwla lafi su kɛ, kɛ mɔ Ɲanmiɛn wawɛ’n o sran nga be nian be wun su’n, mɔ be tu be klun be su i’n be su’n ti’n, jasin fɛ’n bolɛ junman sɔ’n, i bo’n gúa kpa. “I sin yɛ mɛn i awieliɛ’n ɔ́ jú-ɔ.” Blɛ sɔ’n su mantan koko kpa.
“Afɛ dan’n”
10. ?Wafa sɛ yɛ Zezi kan afɛ dan’n i ndɛ ɔ?
10 Blɛ nga be flɛ i “afɛ dan’n” i nun yɛ bé núnnún mɛn tɛ kain nga ɔ. (Sa Nglo Yilɛ 7:14) Biblu’n w’a kleman e blɛ nga afɛ dan’n dí’n. Sanngɛ Zezi seli kɛ: “Afin blɛ sɔ’n nun’n, nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nin a yo-man le yɛ i wunsu su yo-man kun le.” (Matie 24:21) Alɛ dan’n i nɲɔn su nun’n, sran nga be wuli’n, be kwla ju sran kɔe akpinngbin 60. Kɛ e bu ɲrɛnnɛn kɛ ngalɛ sa’n i akunndan’n, afɛ dan’n ng’ɔ́ bɛ́ ɲrun lɔ’n, ɔ́ yó sro kpa. Kɛ afɛ dan’n ko jran cinnjin kpa’n yɛ Armagedɔn alɛ’n bá ɔ. Blɛ sɔ’n nun yɛ Zoova yáci i anzi’m be nun naan be nunnun Satan i mɛn’n mlɔnmlɔnmlɔn be guɛguɛ i bo ɔ.—Sa Nglo Yilɛ 16:14, 16.
11, 12. ?Sa benin yɛ ɔ́ klé kɛ afɛ dan’n w’a bo i bo ɔ?
11 Ɲanmiɛn nuan ijɔfuɛ’m be ndɛ ng’ɔ o Biblu’n nun’n w’a kleman cɛn trele kun sa nga ɲrɛnnɛn dan’n bó i bo ɔ. Sanngɛ, ɔ kannin abonuan sa ng’ɔ ti afɛ dan’n i bo bolɛ’n i nzɔliɛ’n, i ndɛ kle e. Abonuan sa sɔ’n yɛle kɛ asiɛ’n su famiɛn’m bé núnnún Ɲanmiɛn sulɛ wafa ng’ɔ timan su’n. Sa Nglo Yilɛ ndɛ tre 17 nin 18 nun’n, be fali Ɲanmiɛn sulɛ wafa ng’ɔ timan su’n be sunnzunnin tekle bla kun m’ɔ nin asiɛ’n su famiɛn’m be la’n. Sa Nglo Yilɛ 17:16 kle kɛ ɔ ka kaan sa’n, famiɛn sɔ’m “bé kpɔ́ tekle bla’n, bé dé i wun ninnge’n, bé kpɛ́ i wun, bé dí i nnɛn, yɛ bé yrɛ́ i sin nun mlɔnmlɔn.”
12 Kɛ blɛ sɔ’n ko ju’n, Ɲanmiɛn sé “be [asiɛ’n su famiɛn mun] kɛ be yo i bɔbɔ Nyanmiɛn i klun sa” naan be nunnun Ɲanmiɛn sulɛ wafa ng’ɔ timan su’n. (Sa Nglo Yilɛ 17:17) Ɔ maan, be kwla se kɛ Ɲanmiɛn yɛ ɔ nunnun be ɔ. I yɛ ɔ di Ɲanmiɛn sulɛ wafa ng’ɔ timan su’n i jɔlɛ ɔ. Afin, ɔ kleli sran’m be ninnge nga be nin Ɲanmiɛn i klun sa’n be kɔman likawlɛ’n lele. Kpɛkun ɔ kleli i sufuɛ’m be yalɛ kpa. Asiɛ’n sufuɛ’m be lafiman su kɛ be kwla nunnun Ɲanmiɛn sulɛ wafa ng’ɔ timan su’n. Sanngɛ Zoova i sufuɛ kpa’m be liɛ’n, be lafi su sɔ. Yɛ mɛn’n i awieliɛ blɛ nga nun’n, b’a kɛn i sɔ ndɛ liɛ’n b’a kle sran mun pɛ.
13. ?Ngue yɛ ɔ kle kɛ Ɲanmiɛn sulɛ wafa nga ɔ timan su’n i nunnunlɛ’n yó ndɛndɛ kpa ɔ?
13 Kɛ sran’m bé wún kɛ b’a nunnun Ɲanmiɛn sulɛ wafa nga ɔ timan su’n, be wla bó be wun kpa. Biblu’n se kɛ, kɛ ‘asiɛ’n su famiɛn’m’ be nun wie’m bé wún kɛ b’a nunnun i’n, bé sé kɛ: ‘?Eee, nzu nyrɛnnɛn sa yɛlɛ nga? ?Nzu nyrɛnnɛn sa yɛlɛ nga? [...] dɔ kunngba su w’a nyan sa nga ɔ yoli’n i nuan akatua!’ (Sa Nglo Yilɛ 18:9, 10, 16, 19) Kɛ Biblu’n se kɛ ‘dɔ kunngba su’n,’ i sɔ’n kle kɛ i nunnunlɛ’n yó ndɛndɛ kpa.
14. ?Kɛ Zoova i kpɔfuɛ’m bé kpɛ́ be ɲin i sufuɛ’m be su’n, ngue yɛ ɔ́ yó ɔ?
14 E wun i wlɛ kɛ, kɛ asiɛ’n su famiɛn’m be ko nunnun Ɲanmiɛn sulɛ wafa ng’ɔ timan su’n ko wie’n, bé kpɛ́ be ɲin Zoova i sufuɛ mɔ be bo i jɔlɛ dilɛ’n i jɔ’n, be su. (Ezekiɛl 38:14-16) Kɛ bé fá alɛ bé wlá Zoova i sufuɛ nanwlɛfuɛ m’ɔ tali nda kɛ ɔ́ sásá be’n be sin’n, be nin Zoova bɔbɔ yɛ bé kún ɔn. Ɔ se kɛ: “Min ya dan bɔ n fali’n ti’n, n tali nda. [...] Yɛ bé wá sí jrɛiin kɛ min yɛ n ti Anannganman nin-ɔn.” (An kanngan Ezekiɛl 38:18-23 nun.) Ɲanmiɛn kɛnnin i Ndɛ nun kɛ sran kwlaa “ng’ɔ kan amun’n [i sufuɛ nanwlɛfuɛ mun’n], wuun w’a fɛ i sa w’a wɔ [i] nyin su.” (Zakari 2:12) Ɔ maan, kɛ Zoova i kpɔfuɛ’m bé kpɛ́ be ɲin i sufuɛ’m be su’n, ɔ́ wá tɛ́ be su. I sɔ liɛ’n yó maan afɛ dan’n ɔ́ jrán cinnjin kpɛkun Zoova fá Armagedɔn alɛ’n gúɛ i bo. Klist mán anzi’m be atin kpɛkun bé núnnún Satan i mɛn’n.
?Ngue yɛ ɔ fata kɛ e yo ɔ?
15. ?Kɛ e si kɛ mɛn tɛ nga i awieliɛ’n w’a mantan koko’n ti’n, ngue yɛ ɔ fata kɛ e yo ɔ?
15 ?Kɛ mɔ e si kɛ mɛn tɛ nga i awieliɛ’n w’a mantan koko’n, ngue yɛ ɔ fata kɛ e yo ɔ? Akoto Piɛli klɛli i kɛ: “?Sɛ ninnge sɔ’n kwlaa bé sáci sɔ’n, like onin yɛ sɛ an yo-ɔ ɔ ti su-ɔ? Maan amun nzuɛn’n yo kpa, yɛ an fa amun wun mantan Nyanmiɛn!” (2 Piɛr 3:11) Ndɛ sɔ’n fa e ɲin sie su kɛ ɔ fata kɛ e nian e wun su kpa, naan e mian e ɲin naan e aeliɛ’n nin Ɲanmiɛn i mmla’m be wɔ likawlɛ. Asa ekun’n, maan klolɛ mɔ e klo Zoova’n ti’n, e mɛn dilɛ nun’n e yo like nga ɔ kle kɛ e fa e wun mɛntɛn i’n. Like sɔ mɔ e yo’n, i wie yɛle kɛ, ka naan b’a nunnun mɛn’n, ɔ fata kɛ e tu e klun e bo Ɲanmiɛn Sielɛ’n i jasin fɛ’n kpa. Piɛli klɛli ekun kɛ: “Like’n kwlaa be awieliɛ’n w’a mantan. [...] An nian amun wun su naan amu’an kwla koko yalɛ a kle Nyanmiɛn.” (1 Piɛr 4:7) Sɛ e srɛ Zoova titi kɛ ɔ fɛ i wawɛ’n nin i asɔnun’n kle e atin’n, i liɛ’n e nin i e afiɛn’n mántan kpa yɛ é yí i nglo kɛ e klo i dan.
16. ?Ngue ti yɛ ɔ fata kɛ e fa afɔtuɛ nga Ɲanmiɛn man e’n su kpa ɔ?
16 Blɛ kekle nga nun’n, ɔ ti cinnjin kɛ e fa Ɲanmiɛn Ndɛ’n i nun afɔtuɛ nga su: “I sɔ’n ti’n, an nian amun nantilɛ bɔ an fa nanti’n i su kpa. Nán an yo kɛ sran b’ɔ wun-man sa wlɛ’n sa, sanngɛ an yo ngwlɛlɛfuɛ. Kɛ amu’an nyan amun ti’n, nán an tran lɛ ngbɛn, an yo like ng’ɔ yo sa ye’n, afin blɛ nga e o nun yɛ’n ti tɛ.” (Efɛzfuɛ Mun 5:15, 16) Klunwi nga w’a tru andɛ yɛ’n, awlanmannun’n, be nin a wunmɛn i wunsu le. Kɛ ɔ ko yo naan sran’m b’a yoman Zoova i klun sa naan b’a sie be ɲin nɲɔnnɲɔn’n, Satan kpɛli ninnge sunman be ba. E mɔ e ti Ɲanmiɛn i sufuɛ mun e si sɔ. Yɛ e kunndɛman kɛ é mán like wie fi i atin naan ɔ saci e Ɲanmiɛn sulɛ’n. Asa ekun’n, e si sa nga ɔ ka kaan’n ɔ́ wá jú’n. Kpɛkun, e lafi Zoova su yɛ e lafi like nga ɔ́ wá yó’n su.—An kanngan 1 Zan 2:15-17 nun.
17. Be nga bé ɲán be ti Armagedɔn alɛ nun’n, kɛ bé wá wún sran cɛnlɛ’n, wafa nga be wun fá yó be’n, amun yiyi nun.
17 Kasiɛ nga Ɲanmiɛn boli i kɛ ɔ́ cɛ́n be nga be wuli’n, ɔ́ wá kpɛ́n su. Afin “sran kpa mun o, sran tɛ mun o, bé cɛ́n.” (Sa Nga Be Yoli’n 24:15) Maan e sie wafa nga be tin ndɛ sɔ’n su’n i nzɔliɛ kpa: “Bé cɛ́n”! E lafi ndɛ sɔ’n su kpa afin Zoova yɛ ɔ kannin ɔn. Ezai 26:19 se kɛ: “Amun fuɛ nga be wuli’n bé sá be sin wa ekun. [...] Amun nga amun o ndutre’n nun’n, amun tinnge, maan amun klun jɔ, yɛ amun bo sro. [...] Yɛ asiɛ’n ɔ maan be nga be wuli’m bé sá be sin wa ekun.” I nun mɔ Ɲanmiɛn i nvle’n sɛli i sin i klɔ’n su lɔ’n, ndɛ sɔ’n dun mmua kpɛnnin su kun. I sɔ’n ti maan e lafi su kɛ ɔ́ kpɛ́n su kpa mɛn uflɛ’n nun. Kɛ sran’m bé wá cɛ́n’n mɔ be nin be awlɛn su sran’m bé trán likawlɛ’n, ɔ́ wá yó aklunjuɛ dan! Nanwlɛ Satan i mɛn’n i awieliɛ’n w’a mantan koko, yɛ Ɲanmiɛn i mɛn uflɛ’n w’a mantan koko kpa kusu. Ɔ maan, ɔ ti cinnjin kɛ e nian e wun su titi!
?Amun wla kwla kpɛn su?
• ?Ngue su yɛ Zezi i like klelɛ’n takali ɔ?
• ?Andɛ’n, Ɲanmiɛn Sielɛ Blɛ’n i jasin fɛ’n bolɛ’n w’a trɛ lele w’a ju nin?
• ?Ngue ti yɛ ɔ ti cinnjin kɛ e nian e wun su ɔ?
• ?Sa Nga Be Yoli’n 24:15 i nun ndɛ benin yɛ ɔ wla amun fanngan ɔn?
[Kuku/Foto, bue 16]
MƐN’N SANNGANNIN
Afuɛ 2007 nun’n, Alan Greenspan klɛli fluwa kun. (The Age of Turbulence: Adventures in a New World) Bian sɔ’n yoli amlɛnkɛn’m be nvle wunmuan’n i nun banki’m be su plezidan afuɛ lele ko ju 20. Ɔ kleli kɛ ka naan y’a ju afuɛ 1914 nun’n, ɔ nin blɛ ng’ɔ́ bá afuɛ sɔ’n i sin’n ngbaciɛ o be afiɛn. Ndɛ ng’ɔ kannin yɛ:
“Ka naan y’a ju 1914 nun’n, ndɛ kwlaa nga sran’m be kannin’n, kle kɛ blɛ sɔ’n nun’n, aɲinyiɛ o sran’m be nzuɛn’n nun. Yɛ be mɛn dilɛ nun’n, be bu be wiengu sran. Ɔ ti kɛ nn like kwlaa nga sran’m be yo’n, ɔ yo ye. Blɛ kunngba sɔ nun’n, sran nga be fa be kɔ nvle uflɛ nun be ko wla be kanga nun’n, b’a yomɛn i sɔ kun. Sran’m be finfin yolɛ’n nin be sa kekleekle yolɛ’n wa kannin ase. [...] Mannzin’m be yilɛ nun’n, sran’m be wa ɔli be ɲrun. Be yoli alie ja nin telefɔnu mun. Sran’m be ɲannin kolan be sua’m be nun, be yili sriman ɔ nin loto, yɛ sua nun ninnge tɛkɛtɛkɛ kpanngban’m be liɛ’n, be diman be yalɛ. Sran’m be wun are yolɛ’n, ɔ nin aliɛ kpakpa mɔ be di’n, ɔ nin nzue kpa mɔ sran kwlaa ɲɛn i nɔn ti’n, sran’m be cɛ be tra laa’n. [...] Sran kwlaa bu i kɛ, kɛ lika’n wá ká kɛ ngalɛ’n sa tititi.”
Sanngɛ [...] “Alɛ dan nɲɔn su’n kunnin sran kpanngban trali klikli’n. Kannzɛ bɔbɔ ɔ ti sɔ’n, sanngɛ kliklifuɛ’n sacili sran’m be aeliɛ’n. Ɔ maan b’a buman be wiengu sran kun. Alɛ klikli’n i tɛ kpa ng’ɔ yoli’n yɛle kɛ ɔ sacili sran’m be like nga be sunnzunnin kɛ bé yó’n. Sa kun m’ɔ te o n klun’n yɛle kɛ ka naan b’a di alɛ klikli’n, sran’m be bu i kɛ ninnge’m bé yó kpa kɔ́ i ɲrun titi. Andɛ’n, wafa nga e fa wun ninnge mun’n, ɔ nin lalafuɛ nun liɛ’n timan kun. Afin wafa nga e fa wun ninnge mun andɛ’n, yɛ ɔ ti nanwlɛ ɔ. ?Sa nga alɛ dan klikli’n fa yili i sran’m be su’n, i kunngba’n yɛ klunwi yolɛ’n, ɔ nin lika mɔ w’a lo dan’n, ɔ nin sran’m be nvle mɔ be klo i dan tratra su’n, bé wá fá yí andɛ mɛn liɛ’n su ɔ? Nga liɛ’n sɛ e di i nanwlɛ’n, ɔ́ mían e sa.”
Greenspan i ɲin kpɛnnin blɛ m’ɔ te kɔ suklu’n su. Ndɛ kun mɔ sika ndɛ nun fluwa sifuɛ kun mɔ be flɛ i Benjamin Anderson ɔ kannin’n, i wla w’a fiman su. I waan: “Andɛ’n, be nga be ti sran oke’n, mɔ be wla kwla kpɛn wafa nga lika’n fa ti’n ka naan alɛ dan klikli’n w’a tɔ’n i su’n, kɛ be bu blɛ sɔ’n i akunndan’n, be ɲin kɛ i sin. Afin blɛ sɔ nun’n, be klun titiman be. Kɛ ɔ fɛ i lɛ’n, lika’n nin a yoman sɔ kun le.”—Economics and the Public Welfare.
Gerald Meyer klɛli fluwa kun. Fluwa sɔ’n nun’n, ɔ kannin ndɛ kunngba’n. I waan: “Sran’m be waan sa nga be ju klɔ sran’m be su’n be ‘kaci like kwlakwla.’ Alɛ dan klikli’n liɛ’n, [1914-1918] ɔ yoli sɔ sakpa. Alɛ sɔ’n kacili ninnge kwlaa. Nán nvle’m be afiɛn awɛ’n, ɔ nin awa mun, ɔ nin wafa nga nvle wie’m be wa kacili’n, be ngunmin yɛ be kacili ɔ. Sanngɛ kɛ ɔ fɛ i lɛ’n, wafa nga klɔ sran’m be fa wun mɛn’n ɔ nin wafa nga be bɔbɔ be fa bu be wun’n, ɔ kacili wie. Ɔ wa kpɛli mɛn dilɛ uflɛ i ba. Mɛn dilɛ sɔ’n ɔ nin laa liɛ’n mɔ alaje o nun’n be timan kun.”—A World Undone.
[Foto, bue 18]
Armagedɔn nun’n, Zoova yáci i anzi’m be nun.