Maan ‘e jran kekle mmusu’m be si Satan ɲrun’ kɛ Zezi sa
‘Nán an lo amun wun man Satan, an jran kekle yɛ ɔ́ wánndi amun.’—ZAK 4:7.
1. ?Ngue yɛ Zezi si kɛ, kɛ ɔ́ bá asiɛ’n su wa’n, bé yó i ɔ? ?Yɛ i bo’n gúa sɛ?
ZEZI KLIST si kɛ Satan tɛ́nndɛn i ɲrun. Afin ndɛ nga Ɲanmiɛn kan kleli wuo’n, ɔ tu i sɔ liɛ’n i ɲin weiin. Sanngɛ ndɛ nga Ɲanmiɛn kɛn i lɛ’n, Satan yɛ ɔ kan kle i ɔ. Ɔ seli i kɛ: ‘Ń fá kpɔlɛ ń wlá a nin bla’n be afiɛn, ń fá wlá ɔ osu’n nin bla’n [Zoova i anuannzɛ i bue ng’ɔ o nglo lɔ’n] i osu liɛ’n be afiɛn. Bla’n i osu’n [Zezi Klist] ɔ́ kpɔ́tɔ ɔ ti’n, yɛ ɔ kusu á kɛ́ i ja sin.’ (Bo Bolɛ 3:14, 15, NW; Sa Nglo Yilɛ 12:9) Zezi i ja sin mɔ bé ká’n, ɔ ti i fɛ bolɛ ngbɛn. Yɛle kɛ, kɛ ɔ bali asiɛ’n su wa mɔ be kleli i ɲrɛnnɛn be kunnin i’n, w’a cɛman kpɛkun Zoova cɛnnin i yɛ ɔ ɲannin ɲrun ɲanmiɛn su lɔ. Sanngɛ Satan liɛ’n, kɛ be ko kpɔtɔ i ti’n, ɔ́ ká nun mlɔnmlɔn.—An kanngan Sa Nga Be Yoli’n 2:31, 32 ɔ nin Ebre Mun 2:14 be nun.
2. ?Ngue ti yɛ Zoova lafili su kɛ Zezi kwlá jrán kekle Satan ɲrun ɔn?
2 Zoova lafi su kɛ Zezi kwlá jrán kekle Satan ɲrun naan ɔ́ dí junman nga ti yɛ ɔ sunmɛnnin i’n. ?Ngue ti yɛ ɔ kwla lafi su sɔ ɔ? Afin ɔ yili Zezi w’a cɛ kpa, ɔ si i. Ɔ maan, ɔ wunnin kɛ Zezi mɔ kɛ ɔ o i wun lɛ’n ‘i sa o junman’n su’n,’ mɔ i yɛ ɔ ti i ‘wa kpɛn mɔ i kpa’n tra like ng’ɔ yili be’n be kwlaa’n,’ ɔ ti aɲinyiɛfuɛ. I kunngba’n, ɔ ti ndɛnmanfuɛ. (Nyanndra Mun 8:22-31; Kolɔsfuɛ Mun 1:15) Ɔ maan, kɛ Zezi bali asiɛ’n su wa’n mɔ Ɲanmiɛn kplinnin su maan Satan kleli i yalɛ lele ɔ kunnin i’n, Ɲanmiɛn si kɛ i Wa kunngba cɛ sɔ’n, ɔ́ jrán kekle lele gúɛ i ti nin i bo.—Zan 3:16.
Zoova sɛsɛ i sufuɛ mun
3. ?Ngue yɛ Satan yo Zoova i sufuɛ mun ɔn?
3 Zezi seli kɛ “sran ng’ɔ sie mɛn nga’n” yɛle mmusu’m be si Satan. Kpɛkun ɔ seli i sɔnnzɔnfuɛ’m be kɛ bé klé be yalɛ kɛ nga be fa kleli i yalɛ’n sa. (Zan 12:31; 15:20) Like nga ti yɛ mɛn’n mɔ mmusu’m be si Satan yɛ ɔ sie’n i nunfuɛ’m be kpɔ e’n, yɛle kɛ e su Zoova, yɛ e kan sa nga be yo ɔ ɔ ti su’n i ndɛ e kle sran mun. (Matie 24:9; 1 Zan 5:19) Be nga Satan kle be yalɛ kpa’n yɛle Klistfuɛ nga be kpali be sieli be ngunmin be onga mɔ be nin Klist bé dí famiɛn ɲanmiɛn su lɔ’n. Kpɛkun, Zoova i Lalofuɛ kpanngban nga bé trán asiɛ’n m’ɔ́ wá káci mɛn klanman’n su wa’n, i ɲin ci be wie. Ɲanmiɛn Ndɛ’n wla e su nun kpa se kɛ: ‘Mmusu’m be si Satan m’ɔ ti amun kpɔfuɛ’n, ɔ ti kɛ asɔmɔli m’ɔ wlanwlan ɔ kpan kunndɛ nnɛn’n sa.’—1 Piɛr 5:8.
4. ?Ngue yɛ ɔ kle kɛ Ɲanmiɛn i sufuɛ’m be jrannin kekle mmusu’m be si Satan ɲrun e blɛ liɛ’n nun ɔn?
4 Zoova jin i anuannzɛ’n i sin ti’n, e kwla jran Satan ɲrun kekle. Amun bɔbɔ amun nian: afuɛ 100 nga be sinnin lɛ nun’n, nvle nga i siefuɛ’m be kle be sran’m be ɲrɛnnɛn kpa’n, be kunndɛli kɛ bé núnnún Zoova i Lalofuɛ mun. Sanngɛ b’a uka su lele siɛn’n, be su wa ju 7.000.000. Kpɛkun be o asɔnunasɔnun 100.000 tra su nun mɛn’n wunmuan’n nun. Sanngɛ siefuɛ sɔ mɔ be kleli Zoova i nvle nunfuɛ’m be yalɛ’n yɛ be nunnunnin ɔn!
5. ?Wafa sɛ yɛ ndɛ ng’ɔ o Ezai 54:17 nun’n, ɔ kpɛnnin su Zoova i sufuɛ’m be lika ɔ?
5 Laa Ɲanmiɛn seli Izraɛlifuɛ’m be kɛ: ‘Alɛ ninnge kwlaa nga be yi i kɛ be fa kun amun’n, ɔ́ yó ngbɛn. Sɛ sran wie fa amun kɔ jɔlɛ difuɛ wie ja su’n, amun ndɛ’n tɔ́ i su, bé bú i fɔ. Sa nga ń yó mán be nga be ti min sufuɛ mun’n, yɛ ɔ o lɛ ɔ. Like ng’ɔ ti be liɛ m’ɔ ti i nuan su’n, mɔ ń yó mán be’n, yɛ ɔ o lɛ ɔ.’ (Ezai 54:17) Ndɛ sɔ mɔ Zoova kannin’n, i sufuɛ nga be o asiɛ’n wunmuan’n su mɛn ng’ɔ su kɔ i ‘bue nuan’ yɛ nun’n, be wun kɛ ɔ ti nanwlɛ. (2 Timote 3:1-5, 13) Afin e te jran Satan ɲrun kekle. Yɛ kusu alɛ ninnge kwlaa nga ɔ kunndɛ kɛ ɔ́ fá núnnún e’n w’a yo ngbɛn, afin Zoova jin e sin.—Jue Mun 118:6, 7.
6. ?Satan i mɛn sielɛ’n i su ndɛ benin yɛ Ɲanmiɛn nuan ijɔfuɛ Daniɛli kannin ɔn?
6 Satan i mɛn’n i nunnunlɛ’n w’a mantan koko. I blɛ sɔ nun’n, i mɛn sielɛ’n i wafawafa kwlaa núnnún. Ɲanmiɛn nuan ijɔfuɛ Daniɛli seli kɛ: ‘Famiɛn sɔ’m be blɛ su’n [famiɛn nga be o lɛ andɛ’n], Ɲanmiɛn m’ɔ o nglo lɔ’n ɔ́ síe famiɛn diwlɛ kun [ɲanmiɛn su lɔ] m’ɔ su saciman le, yɛ mɛn uflɛ su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga [be o lɛ andɛ] mun kpɛkun i bɔbɔ ɔ́ ká lɛ tititi.’ (Daniɛl 2:44) Kɛ ndɛ sɔ’n ko kpɛn su’n, i Satan i sielɛ’n nin o, i klɔ sran’m be liɛ’n nin o, be kwlaa bé núnnún. Satan i mɛn’n, i wafawafa ng’ɔ fa siesieli’n, i kwlaa núnnún. Kpɛkun Ɲanmiɛn yɛ ɔ́ síe asiɛ wunmuan’n niɔn, sran fi su tɛnndɛnmɛn i ɲrun.—An kanngan 2 Piɛr 3:7, 13 nun.
7. ?Ngue ti yɛ e si kɛ Zoova i sufuɛ’m be tinuntinun be kwla jran kekle Satan ɲrun ɔn?
7 Ɔ lemɛn i yowlɛ. Saan Zoova sɛ́sɛ́ i anuannzɛ’n, kpɛkun ɔ́ rɛ́ i su tititi. (An kanngan Jue Mun 125:1, 2 nun.) ?Yɛ e li? Biblu’n se kɛ e kusu e kwla jran mmusu’m be si Satan ɲrun kɛ Zezi fa jrannin’n sa. Ndɛ nga Zezi maan akoto Zan klɛli’n i nun’n, ɔ kleli kɛ kannzɛ Satan tánndan e ɲrun sɛ, sanngɛ “sran kpanngban kpa” mɔ be lafi su kɛ bé trán asiɛ’n su wa’n, bé fíte nun. Ɲanmiɛn Ndɛ’n waan be kpan se kɛ: ‘E Ɲanmiɛn m’ɔ ti bia’n su’n, nin Bua Gbanflɛn’n, be ti yɛ e ɲannin e ti ɔ.’ (Sa Nglo Yilɛ 7:9-14) Ɔ kannin ekun kɛ Klistfuɛ nga bé kɔ́ ɲanmiɛn su’n, be kwlali Satan. Kpɛkun, “bua’m be wie” mɔ be ti be janvuɛ’n, be kusu be jrɛn i ɲrun kekle wie. (Zan 10:16; Sa Nglo Yilɛ 12:10, 11) Sanngɛ ɔ fata kɛ e mian e ɲin yɛ e srɛ Ɲanmiɛn tankaan kpa kɛ ‘ɔ de e klunwifuɛ’n i sa nun’ naan y’a kwla jran kekle.—Matie 6:13.
Sran ng’ɔ kle e wafa nga e kwla jran Satan ɲrun klekle’n
8. ?Lakalɛ klikli nga Satan lakali Zezi mɔ Ɲanmiɛn Ndɛ’n kɛnnin i ndɛ’n yɛle benin? ?Yɛ wafa sɛ yɛ Zezi tɛli Satan su ɔ?
8 Satan kunndɛli kɛ ɔ́ yó naan Zezi fɔn Ɲanmiɛn mmla’n. Aawlɛ flɛnnɛn nun lɔ’n, Satan lakali Zezi naan ɔ yo ɲin kekle Ɲanmiɛn su. Sanngɛ, Zezi kleli e ajalɛ kpa, afin ɔ jrannin kekle Satan ɲrun. Zezi kpɛli srɛ nun kɔnguɛ nin wia’n nun cɛn ba 40. Ɔ maan atrɛkpa’n, awe kunnin i dan. Kɛ ɔ yoli sɔ’n, Satan seli i kɛ: ‘Sɛ ɔ waan a ti Ɲanmiɛn Wa sakpa’n, se yɛbuɛ nga mun maan be kaci aliɛ.’ Sanngɛ Zezi w’a kplinman su kɛ ɔ́ fá tinmin mɔ Ɲanmiɛn fa mɛnnin i’n, ɔ́ yó i bɔbɔ i klunklo like. Ɔ maan Zezi tɛli Satan su kɛ: ‘Be klɛli i kɛ: “Nán aliɛ kunngba yɛ ɔ man sran nguan ɔn, sanngɛ ndɛ kwlaa ng’ɔ fin Ɲanmiɛn nuan fite’n, i yɛ ɔ man sran nguan ɔn.”’—Matie 4:1-4; Mmla’n 8:3.
9. ?Ngue ti yɛ kɛ Satan kúnndɛ fá ninnge nga klɔ sran konvi sɔ be’n, ɔ́ láka e’n, ɔ fata kɛ e jran kekle ɔ?
9 Andɛ’n, Satan fa ninnge nga klɔ sran konvi sɔ be’n fa sua Zoova i sufuɛ’m be aya. Ɔ maan i ti’n, ɔ fata kɛ e ta nda kɛ bian nin bla kunndɛlɛ sukusuku mɔ i yɛ ɔ ti mɛn nga i nunfuɛ’m be nzuɛn’n, é mían e ɲin naan w’a saman e. Ɲanmiɛn Ndɛ’n bɔbɔ se kɛ: ‘?An siman kɛ Ɲanmiɛn su sieman sa tɛtɛ yofuɛ’m be mlɔnmlɔn? Nán an laka amun wun, afin bla annzɛ bian kunndɛfuɛ mun, nin amuin sɔfuɛ mun, nin yasua mɔ be kunndɛ bla be yi bo annzɛ bla mɔ be kunndɛ bian be wun bo’n, nin yasua mɔ be kunndɛ be wiengu yasua’n, i sɔ sran liɛ mun Ɲanmiɛn su sieman be mlɔnmlɔn.’ (1 Korɛntfuɛ Mun 6:9, 10) Kɛ nga e fa wun i lɛ’n, sran nga be yo sa sukusuku mɔ be kunndɛman kɛ bé káci’n, be su tranman Ɲanmiɛn i mɛn uflɛ’n nun wie.
10. ?Lakalɛ benin yɛ Matie 4:5, 6 se kɛ Satan fa lakali Zezi ekun naan ɔ kpɔci Ɲanmiɛn ɔn?
10 Lakalɛ nga Satan lakali Zezi aawlɛ flɛnnɛn nun lɔ’n, Ɲanmiɛn Ndɛ’n kan kun ndɛ se kɛ: ‘Mmusu’m be si Satan fɛ i ɔli Ɲanmiɛn klɔ’n su lɔ, ɔ fɛ i sieli Ɲanmiɛn i sua’n su, ɔ seli i kɛ: “Sɛ ɔ waan a ti Ɲanmiɛn Wa sakpa’n, tu kpɛn asiɛ wun lɔ, afin be klɛli i kɛ: ‘Ɔ́ sé i anzi’m be kɛ be sɔ wɔ nun, kɛ ɔ́ yó naan ɔ ja w’a kplaman yɛbuɛ wie’n ti.’”’ (Matie 4:5, 6) Kɛ nga e fa wun i lɛ’n, Satan lakali Zezi naan ɔ yo ninnge kaklaakla mun fa yi i nglo kɛ ɔ ti Mɛsi. Sanngɛ, sɛ Zezi yo sɔ’n, ɔ nin i fataman. Afin ɔ ti kɛ nn ɔ su tu i wun. Kusu’n, i sɔ’n timan Ɲanmiɛn liɛ’n su. I lɛ nun’n, Zezi kleli ekun kɛ ɔ kpɔciman Ɲanmiɛn. Ɔ fali Ɲanmiɛn Ndɛ’n fa tɛli Satan su. Ɔ seli i kɛ: ‘Be klɛli i kusu kɛ: “Nán kunndɛ ɔ Min Ɲanmiɛn i nuan.”’—Matie 4:7; Mmla’n 6:16.
11. ?Wafa sɛ yɛ Satan kwla laka e ɔ? ?Yɛ i bo’n kwla gua sɛ?
11 Satan kwla laka e naan ninnge wafawafa wie’m be nun’n, e tu e wun. Ɔ kwla laka e naan e nian mɛn nunfuɛ’m be wun wlawlalɛ nin be wun siesielɛ’n su. Annzɛ wafa nga be yiyi be ɲin su’n, e nian su wie. ?Sanngɛ sɛ e yo sɔ’n, é kwlá súnnzun kɛ anzi’m bé sásá e naan y’a isaman e aeliɛ tɛ’n i bo nzuɛn’n? Kɛ Davidi nin Bat-Seba be yoli sa tɛ’n, i sin’n, ɔ kpatali Ɲanmiɛn. Sanngɛ i sa tɛ m’ɔ yoli’n, ɔ isɛli i bo nzuɛn’n. (2 Samiɛl 12:9-12) I sɔ’n ti’n, nán e nin mɛn nunfuɛ mun e tra janvuɛ naan e kunndɛ Zoova nuan.—An kanngan Zak 4:4 ɔ nin 1 Zan 2:15-17 be nun.
12. ?Lakalɛ benin yɛ Matie 4:8, 9 kɛn i ndɛ ɔ? ?Yɛ wafa sɛ yɛ Ɲanmiɛn Wa’n tɛli Satan su ɔ?
12 Like nga Satan fa lakali Zezi aawlɛ flɛnnɛn nun lɔ ekun’n, yɛle kɛ ɔ́ yó naan Zezi ɲan kwlalɛ politiki yolɛ’n nun. Ɔ fali mɛn’n i famiɛn diwlɛ’n kwlaa nin i nun ninnge m’ɔ ba be ɲrunɲan’n kleli i. Kpɛkun ɔ seli i kɛ: ‘Sɛ a koto m bo a manman min’n, ń fá ninnge nga kwlaa mán wɔ.’ (Matie 4:8, 9) ?Nán awie tɛtɛ kpa yɛle i sɔ’n? Afin Zoova kunngba cɛ yɛ ɔ fata kɛ be su i ɔ, sanngɛ Satan kunndɛ kɛ be su i bɔbɔ. Yɛ i waan ɔ́ yó naan Zezi fɔn Ɲanmiɛn mmla’n. Anzi mɔ laa ɔ ti kpa’n, ɔ buli sulɛ m’ɔ kunndɛ kɛ be su i’n i akunndan lele ɔ yoli sa tɛ yofuɛ, i aɲinkpli’n ti. Ɔ maan, ɔ kacili mmusu’m be si Satan mɔ sran’m be lakalɛ’n yɛ ɔ ti i junman’n. (Zak 1:14, 15) Sanngɛ Zezi liɛ’n, kɛ ɔ ko yo naan ɔ nin i Si Ɲanmiɛn b’a nanti klanman’n yɛ ɔ yoli i cinnjin ɔn. Ɔ maan, ɔ seli Satan kɛ: ‘Satan, jaso lɛ! Afin be klɛli i kɛ: “Koto ɔ Min Ɲanmiɛn’n i bo, yɛ su i kunngba cɛ.”’ I lɛ nun ekun’n, e wun i weiin kɛ Zezi jrannin kekle Satan ɲrun. Zezi w’a kloman kɛ ɔ́ yó Satan i mɛn’n i nunfuɛ wie, yɛ ɔ su suman klunwifuɛ sɔ’n le!—Matie 4:10; Mmla’n 6:13; 10:20.
‘An jran kekle mmusu’m be si Satan ɲrun, yɛ ɔ́ wánndi amun’
13, 14. (a) ?Kɛ Satan fali mɛn’n i famiɛn diwlɛ’n kwlaa’n kleli Zezi’n, ɔ ti kɛ ngue yɛ Satan kunndɛli kɛ ɔ́ fá mɛ́n i ɔ? (b) ?Wafa sɛ yɛ Satan kunndɛ kɛ ɔ́ sáci e ɔ?
13 Kɛ Satan fali mɛn’n i famiɛn diwlɛ’n kwlaa’n kleli Zezi’n, kwlalɛ nga sran fi nin a ɲɛnmɛn asiɛ’n su le’n, yɛ Satan kunndɛli kɛ ɔ́ fá mɛ́n i ɔ. Satan bu i kɛ sɛ Zezi wun ninnge sɔ mun’n, Zezi konvi sɔ́ famiɛn dilɛ naan ɔ́ bú i kɛ sɛ ɔ sɔ nun’n, ɔ́ káci asiɛ’n su politikifuɛ’m be ti’n. Andɛ’n, Satan manman e famiɛn diwlɛ. Sanngɛ, ninnge nga e ɲinma wun be’n, ɔ nin ndɛ nga e tie be’n, ɔ nin nga e bu su akunndan’n yɛ Satan kunndɛ kɛ ɔ́ fá sáci e ɔ.
14 Satan yɛ ɔ sie mɛn ng’ɔ o yɛ’n niɔn. Ɔ maan, sɛ like nga be nian o, sɛ nga be tie o, annzɛ nga be kanngan nun o, i yɛ ɔ nian su ɔ. Ɔ maan, sɛ be yo nzaje sa nin sa sukusuku ninnge sɔ’m be nun’n, ɔ boman e nuan. Mɛn’n nun aata difuɛ’m be blɔ ninnge nga be yi be’n naan e konvi sɔ ninnge kpanngban nga y’a mianman be wun’n. Kɛ e wun ninnge sɔ mun’n, annzɛ e ti be su ndɛ nga be kan be’n, annzɛ e bu be su akunndan’n, kpɛkun e konvi kwla sɔ be. I sɔ yɛ Satan yo i titi naan y’a klo aɲanbeun ninnge mun ɔn. Sanngɛ, kɛ e kplinman su kɛ é nían ninnge nga be timan Ɲanmiɛn liɛ su’n, annzɛ é tíe be’n annzɛ é kánngan be nun’n, ɔ ti kɛ e su se Satan kɛ: “Satan, jaso lɛ” sa. Kɛ e yo sɔ’n, e nian Zezi i ajalɛ liɛ’n su. Yɛle kɛ, kɛ é kpálo Satan i mɛn’n i nun ninnge tɛtɛ mun’n, e yo i yasua su. Sɛ kusu e yi nglo weiin kɛ e ti Zoova i Lalofuɛ’n yɛ e nanti Klist i ajalɛ’n su e junman su lɔ o, annzɛ suklu lɔ o, annzɛ e mantanfuɛ’m be afiɛn o, i sɔ’n klé kɛ e timan mɛn nga i nunfuɛ wie.—An kanngan Mark 8:38 nun.
15. ?Ngue ti yɛ ɔ fata kɛ e ɲin tran Satan su titi naan y’a jrɛn i ɲrun kekle ɔ?
15 I kpɛ nsan su mɔ Satan kunndɛli kɛ Zezi nin Ɲanmiɛn be afiɛn’n saci mɔ w’a yoman ye’n, “mmusu’m be si Satan yacili i nun.” (Matie 4: 11) Sanngɛ, nán kɛ Satan kunndɛli kɛ ɔ́ yáci Zezi i lakalɛ ti ɔ. Afin ndɛ nga Ɲanmiɛn Ndɛ’n kan’n yɛ: ‘Kɛ mmusu’m be si Satan lɛkɛlɛkɛ i wafa’n kwlaa [aawlɛ flɛnnɛn nun lɔ’n] mɔ w’a ɲɛnmɛn i’n, ɔ nin i be tili nun lele san blɛ uflɛ ekun.’ (Lik 4:13) Sɛ e jran kekle Satan ɲrun’n, maan e la Zoova i ase. Sanngɛ, maan e yo naan Ɲanmiɛn uka e titi. Afin sɛ Satan ba ekun’n, nán kɛ san fii blɛ ng’ɔ ti e liɛ’n su’n i nun yɛ ɔ́ bá ɔ. Sanngɛ, blɛ nga e lafimɛn i su’n, i nun yɛ ɔ́ bá ɔ. Ɔ maan, ɔ fata kɛ e ɲin trɛn i su titi. Kpɛkun, kannzɛ ɔ́ klé e yalɛ sɛ, maan e nian nun e su Zoova titi.
16. ?Wunmiɛn dan benin yɛ Zoova man e ɔ? ?Yɛ ngue ti yɛ ɔ fata kɛ e srɛ i naan ɔ fa man e ɔ?
16 Kɛ ɔ ko yo naan y’a kwla jran kekle mmusu’m be si Satan ɲrun’n, ɔ fata kɛ e srɛ Ɲanmiɛn naan ɔ man e wunmiɛn nga i dan tra wunmiɛn’m be kwlakwla’n mɔ yɛle i wawɛ’n. Sɛ e srɛ i kusu ɔ, ɔ́ fá mán e. Ɔ maan ninnge nga e bɔbɔ e ngunmin e kwlá yoman’n, é kwlá yó be. Zezi seli i sɔnnzɔnfuɛ’m be kɛ Ɲanmiɛn yomɛn i wawɛ’n i su awɛn. I waan: ‘Sɛ amun mɔ [fɔ o amun nun ti’n] an ti sran tɛ’n, an fa like kpa cɛ amun mma mun’n, nn e Si m’ɔ o Ɲanmiɛn su lɔ’n kusu, ɔ́ fɛ́ i wawɛ’n mán be nga be srɛ i’n kpɛ blu.’ (Lik 11:13) I sɔ’n ti’n, maan e srɛ Ɲanmiɛn titi naan ɔ fɛ i wawɛ’n man e. Sɛ Ɲanmiɛn i wawɛ’n suan e bo’n, san kɛ é kwlá jrán kekle Satan ɲrun. Like nga e kwla fa uka Ɲanmiɛn srɛlɛ’n su ekun’n, yɛle Ɲanmiɛn i alɛ ninnge’m be kwlaa be wlalɛ. Afin be yɛ bé yó naan ‘y’a kwla jran mmusu’m be si Satan m’ɔ kpɛ e gblɛ’n i ɲrun ɔn.’—Efɛzfuɛ Mun 6:11-18.
17. ?Aklunjuɛ benin yɛ Zezi wá dí mɔ i ti’n, ɔ kwla jrannin Satan ɲrun kekle ɔ?
17 Like kun ekun ukali Zezi naan w’a kwla jran Satan ɲrun kekle. Like sɔ’n kwla uka e wie. Biblu’n waan: ‘Kɛ [Zezi] bu i klun m’ɔ́ wá jɔ́’n i akunndan’n, ɔ kplinnin su maan be kunnin i waka’n su, w’a bumɛn i ɲin ase gualɛ’n i like fi, kɛ é sé yɛ’n w’a ko tran Ɲanmiɛn i bia’n i fama su.’ (Ebre Mun 12:2) Sɛ e jin Zoova sin kɛ i yɛ ɔ sie nglo’n nin asiɛ’n, yɛ sɛ e bo i dunman fɛ’n naan e ɲin tran anannganman nguan’n su titi’n, e klun kwla jɔ sɔ wie. Kɛ Satan nin i ninnge ng’ɔ yoli be’n be kwlaa be ko wie nunnun’n, mɔ ‘mɛn’n ko yo yalɛfuɛ [wun ase kanfuɛ] mun be liɛ’n mɔ be wun ko jɔ be kpa fɔuun,’ aklunjuɛ nga é wá dí’n, maan e bu i sin kan e nian. (Jue Mun 37:11) I sɔ’n ti’n, maan e jran Satan ɲrun kekle titi kɛ Zezi sa.—An kanngan Zak 4:7, 8 nun.
?Amún tɛ́ su sɛ?
• ?Ngue yɛ ɔ kle kɛ Zoova sɛsɛ i nvle nunfuɛ mun ɔn?
• ?Satan i ɲrun kekle jranlɛ’n nun’n, ajalɛ kpa benin yɛ Zezi kleli e ɔ?
• ?Wafa sɛ yɛ e kwla jran Satan ɲrun kekle ɔ?
[Foto, bue 30]
Sɛ e nin mɛn nunfuɛ mun e tra janvuɛ’n, é káci Ɲanmiɛn i kpɔfuɛ.
[Foto, bue 32]
Kɛ Satan fali famiɛn diwlɛ’m be kwlaa mannin Zezi’n, w’a sɔman nun.