BIBLU’N I SU KOSAN’M BE SU TƐLƐ

?Mmusu’m be si Satan’n fin i liɛ nin?

Ɲanmiɛn w’a yiman mmusu’m be si’n. Sanngɛ, ɔ yili anzi kun, yɛ i sin’n i bɔbɔ kacili mmusu’m be si ɔ. Be flɛ i ekun kɛ Satan. Biblu’n kleli weiin kɛ laa’n, anzi sɔ’n ti nanwlɛfuɛ yɛ ɔ timan tɛ. Ɔ maan i bo bolɛ nun’n, mmusu sɔ’n ti Ɲanmiɛn i anzi kpa’m be nun kun.​—An kanngan Ezekiɛl 28:15 nun.

?Wafa sɛ yɛ anzi kpa kun kwla kaci mmusu ɔ?

Anzi ng’ɔ kacili mmusu’m be si’n, ɔ jasoli Ɲanmiɛn wun. Kpɛkun, ɔ yoli maan Adam nin i yi mɔ be ti sran klikli’n, be suli i su. Ɔ maan i bɔbɔ yɛ ɔ kacili Satan ɔn. I bo’n yɛle “ɲrun tanndanfuɛ’n.”​—An kanngan Bo Bolɛ 3:1-5 nin Sa Nglo Yilɛ 12:9 nun.

Anzi nin klɔ sran nga Ɲanmiɛn yili be’n, sɛ be nun kun waan ɔ́ fá ajalɛ tɛ annzɛ ajalɛ kpa’n, ɔ ti kɛ i bɔbɔ sa. Anzi ng’ɔ kacili mmusu’m be si Satan’n i liɛ’n, ɔ kunndɛli kɛ be su i. Aɲrunɲan ninnge’m be yoli i cinnjin trali kɛ ɔ yo naan Ɲanmiɛn i klun jɔ i wun’n.​—An kanngan Matie 4:8, 9 nin Zak 1:13, 14 nun.

?Ngue yɛ Satan yo naan klɔ sran’m b’a su i su titi ɔ? ?Ɔ fata kɛ e sro i? Biblu’n tɛ kosan sɔ’m be su kpa man e.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 10 nun. Zoova i Lalofuɛ mun yɛ be yili ɔ.

[Foto, bue 32]