Kɛ é úka sran mun naan b’a kaci Zezi i sɔnnzɔnfuɛ’n, maan ɔ yo e fɛ
“An wɔ ko kle nvlenvle’n kwlaa be like maan be kaci n sɔnnzɔnfuɛ.”—MATIE 28:19.
1-3. (a) ?Kɛ aniaan wie’m be bu sran’m be Biblu’n nun like klelɛ’n i akunndan’n, ɔ yo be sɛ? (b) ?Kosan benin mun yɛ é wá yíyí nun ɔn?
AMLƐNKƐN’M be lɔ’n, e niaan bla kun ko ukali aniaan wie mɔ be yo be asɔnun’n Ɛndifuɛ’m be aniɛn’n nun. Ɔ klɛli i kɛ: “N kleli siɛ kun nin i yi nin i mma mɔ be fin nvle nga be flɛ i Pakistan’n, be Biblu’n nun like i anglo ko ju 3 yɛ. N boman wɛ n seman kɛ e kacili janvuɛ. Ɔ cɛ kaan’n, bé sá be sin be klɔ. Kɛ n bu i sɔ liɛ’n i akunndan’n, min ɲinmuɛn’n jranjran min ɲin su, afin n su wunman be kun. Sanngɛ, nɛ́n i ngunmin ti ɔ. Aklunjuɛ nga kɛ ń úka be naan b’a si Zoova’n n dili’n, ɔ o nun wie.”
2 ?Aklunjuɛ nga kɛ be kle sran kun i Biblu’n nun like be di’n, mɔ e niaan bla sɔ’n dili’n, amun a di wie le? I nun mɔ Zezi nin i sɔnnzɔnfuɛ’m bé klé sran’m be like naan be kusu be yo i sɔnnzɔnfuɛ’n, ɔ yoli be fɛ dan. Zezi kleli i sɔnnzɔnfuɛ 70 be junman’n i dilɛ yɛ ɔ sunmannin be.a Kɛ be ɔli mɔ be sali be sin’n, aklunjuɛ nga be dili’n, be wa kan kleli i. Ɔ maan, ‘Nyanmiɛn wawɛ’n maan Jésus klun jɔli dan kpa’ wie. (Lik 10:17-21) Andɛ kusu’n, sran kpanngban kpa mɔ be uka be wiengu mun naan b’a kaci Zezi i sɔnnzɔnfuɛ’n, be di aklunjuɛ wie. Afin afuɛ nga be flɛ i 2007 nun’n, juejue su jasin fɛ bofuɛ’m be dili junman kpa yɛ be klun jɔli. Kɛ be kan sran nga be kleli be Biblu nun like’n be kwlaa bo nun’n, ɔ ti kɛ anglo kwlaa nun sran miliɔn 6 nin sin yɛ be kleli be Biblu’n nun like ɔ.
3 Sanngɛ jasin bofuɛ wie’m be nin a kwlá kleman sran kun i Biblu’n nun like le. Wie’m be kusu be yoli sɔ, sanngɛ w’a di afuɛ nɲɔn kun. ?Kɛ é mían e ɲin é klé sran’m be like’n, ngue yɛ ɔ kwla kle e yalɛ ɔ? ?Kannzɛ ɔ ti sɔ’n, wafa sɛ yɛ e kwla di junman sɔ’n niɔn? Zezi seli e kɛ ‘e wɔ e ko kle nvlenvle’n kwlaa be like maan be kaci i sɔnnzɔnfuɛ.’ ?Kɛ e wla e wun ase e di junman sɔ’n, mmlusuɛ benin yɛ e ɲɛn i ɔ?—Matie 28:19.
Sa nga be kwla yo naan y’a diman aklunjuɛ kun
4, 5. (a) ?Wafa sɛ yɛ sran sunman be sɔ Ɲanmiɛn ndɛ’n nun lika wie’m be nun ɔn? (b) ?Ngue yɛ ɔ kle jasin bofuɛ’m be yalɛ lika uflɛ wie’m be nun ɔn?
4 Lika wie’m be nun’n, sran’m be klo e fluwa mun kpa. Asa ekun’n, be klo kɛ e kle be Biblu’n nun like. Aniaan bian kun nin i yi be fin Ɔstrali be ko dili junman nvle nga be flɛ i Zambi’n i nun lɔ kan. Be klɛli i kɛ: “Sran’m be sie be su Ɲanmiɛn ndɛ’n i bo kpa Zambi lɔ. Jasin fɛ’n nga be bo i akpɔ nuan’n, i fɛ liɛ’n be boman su! Sran’m be bɔbɔ be w’a to e, wie liɛ’n periodiki wie mɔ be wunnin be laa’n, be usa be osu.” Koko nga nun’n, aniaan nga be o Zambi lɔ’n be kleli sran 200.000 be Biblu’n nun like. Ɔ ti kɛ jasin bofuɛ kun nin sran kɔe nɲɔn be suannin Biblu’n nun like.
5 Sanngɛ lika uflɛ wie’m be nun’n, kɛ ɔ ko yo naan sran’m b’a sɔ fluwa’m be nun’n, annzɛ jasin bofuɛ’m b’a ɲan sran naan b’a kle i Biblu’n nun like’n, ɔ ti kekle. ?Ngue ti ɔ? Afin kpalɛ sunman jasin bofuɛ’m be toman sran’m be awlo. Yɛ be nga be to be kusu’n, be kwla se kɛ Ɲanmiɛn ndɛ’n loman be. Atrɛkpa’n, kɛ mɔ be nga be tali be’n, be suman Ɲanmiɛn’n ti ɔ. Annzɛ kusu kɛ be wunnin Ɲanmiɛn sulɛ wafa ng’ɔ timan su’n be gblɛ nga be kpɛ’n, Ɲanmiɛn ndɛ’n wa yoli be tɛ. Be nga be tɔn be wun suɛn kɛ be ti asɔnunfuɛ’m be kpɛnngbɛn’n, be yoli maan sran kpanngban be ti afɛfuɛ. Yɛle kɛ b’a bo je kɛ bua mɔ be leman sunianfuɛ’n sa. (Matie 9:36) Ɔ maan sɛ sran sɔ’m be kunndɛman kɛ bé fá be ɲin síe Biblu’n su’n, e wun i sɔ’n i wlɛ.
6. ?Ngue like yɛ ɔ yo maan jasin bofuɛ wie be junman’n i dilɛ’n ti kekle man be ɔ?
6 Like uflɛ kle jasin bofuɛ nga be bo jasin fɛ’n w’a cɛ’n be yalɛ. I sɔ’n ti’n, aklunjuɛ dilɛ kwla yo kekle man be. Laa’n, be dili jasin fɛ bolɛ junman’n juejue su kpa. Sanngɛ siɛn’n, be timan juejue kun, annzɛ kpɛnngbɛn yolɛ’n kle be yalɛ. I sɔ’n ti’n, be kwlá yoman kɛ laa’n sa kun. Wie liɛ kusu’n, e bɔbɔ e akunndan nga e bu’n ti’n e kwlá yoman ninnge wie mun. Wienun ɔn, sran kun kwla se kɛ ɔ siman sran’m be Biblu’n nun like kle. ?Kɛ ɔ yo e sɔ wie ɔ? Kɛ Zoova seli Moizi kɛ ɔ ko kan ndɛ kle Faraɔn’n, wafa nga Moizi i wun yoli i’n, ɔ kwla yo e sɔ wie. Moizi seli kɛ: “Min Min, ń srɛ́ wɔ kpa ti ɔ, n timan sran b’ɔ ti ijɔfuɛ ɔ. N timan sran b’ɔ ijɔ nzra nun titi ɔ.” (Ezipt Lɔ Tulɛ 4:10) Kɛ mɔ sran wie’m be kunndɛman kɛ be fɔn’n ti’n, be se kɛ be kwlá yoman like fi. Srɛ kwla kun e, afin e kwla bu i kɛ e siman like kle ti yɛ maan sran’m be kaciman Zezi i sɔnnzɔnfuɛ ɔ. Kɛ ɔ ko yo naan w’a yoman sɔ’n, e kpɛ i kpo kɛ e kleman sran Biblu’n nun like. ?Sɛ ɔ yo e sɔ’n, é yó i sɛ?
Maan e siesie e wun naan e awlɛn’n tran su
7. ?Ngue ti yɛ Zezi boli jasin fɛ’n niɔn?
7 Like klikli ng’ɔ fata kɛ e yo’n, yɛle kɛ maan e siesie e wun naan e awlɛn’n tran junman’n su. Zezi seli kɛ: “Ndɛ kwlaa ng’ɔ o sran i anwlɛn nun’n, yɛ ɔ fite i nuan-an.” (Lik 6:45) Like nga ti yɛ Zezi boli jasin fɛ’n yɛle kɛ sran’m be kpa yolɛ’n loli i. Kɛ ɔ wunnin kɛ Zuifu’m be nin Ɲanmiɛn be afiɛn’n w’a ti nun’n, “be yoli i annvɔ.” Ɔ seli i sɔnnzɔnfuɛ’m be kɛ: ‘Fie’n w’a yo ye. An se fie i fuɛ’n maan ɔ fa sran wie mun ekun maan be ko di i junman’n.’—Matie 9:36-38.
8. (a) ?Ngue yɛ ɔ fata kɛ e bu i akunndan ɔn? (b) ?Ngue yɛ ndɛ nga Biblu’n nun like suanfuɛ kun klɛli’n kle e ɔ?
8 Sran kun yɛ ɔ bali titi w’a kleli e Biblu’n nun like ɔ. I sɔ’n ti’n, ye dan nga e ɲɛnnin i’n, e kusu kɛ é úka sran mun naan b’a kaci Zezi i sɔnnzɔnfuɛ’n, maan e bu i sɔ’n i akunndan kpa. Kusu’n, be nga é kó tó be jasin fɛ bowlɛ nun’n, ɔ nin wafa nga ndɛ nga é kó kán klé be’n, ɔ́ yó be ye’n, maan e bu i akunndan wie. Bla kun klɛli be nvle nun lɔ Betɛli’n i fluwa. Ɔ seli kɛ: “Min waan ń sé amun kɛ, kɛ Zoova i Lalofuɛ’m be bali titi min awlo wa be wa kleli min like’n, ɔ yoli min fɛ kpa . Kosan nga n usali be’n be sɔnnin. Ɔ maan n si kɛ w’a yoman be fɛ cɛn wie. Afin i sɔ’n ti maan titi kɛ be ba’n be cɛ min wun wa. Sanngɛ be trali be awlɛn min lika. Yɛ ninnge nga be si i’n, ɔ yoli be fɛ kɛ be fa kle min. Zoova nin Zezi mɔ maan sran sɔ’n be bali min wun wa’n, ń lá be ase.”
9. ?Ngue yɛ Zezi fɛli i ɲin sieli su ɔ? ?Yɛ wafa sɛ yɛ e kwla niɛn i ajalɛ’n su ɔ?
9 E si kɛ Zezi i wun ase ng’ɔ wlali ukali sran mun’n, nán sran kwlaa yɛ ɔ sɔli nun klanman ɔn. (Matie 23:37) Wie’m be suli i su kan. Kpɛkun ninnge ng’ɔ kleli be’n mɔ b’a yoman be fɛ’n ti’n, “b’a sumɛn i su kun.” (Zan 6:66) Sanngɛ Zezi w’a seman kɛ i sɔ’n ti’n i ndɛ ng’ɔ kan’n timan cinnjin. Jasin fɛ’n nga Zezi boli’n, ɔ ti kɛ like lualɛ sa. Kannzɛ ninnge ng’ɔ luali’n, nɛ́n i ngba yɛ ɔ yoli ye’n, sanngɛ Zezi fɛli i ɲin sieli sa kpa ng’ɔ su yo’n su. Ɔ wunnin kɛ fie’n i su ninnge’m b’a blo naan be kpɛlɛ w’a ju. Ɔ maan ɔ yoli i fɛ kpa kɛ ɔ kpɛ fie’n i su ninnge’n wie. (An kanngan Zan 4:35, 36 nun.) ?Kɛ ɔ yo naan e fa e ɲin e sie i asiɛ kee ngunmin su’n, sɛ e fa e ɲin sie fie i lika nga be fa mannin e’n i kpa m’ɔ́ wá yó’n i su’n, ɔ timan kpa? Siɛn’n, maan e nian wafa nga e kwla bu akunndan klanman sɔ’n wie’n.
Kɛ é lúa like’n, maan e bu i kpɛlɛ’n i akunndan
10, 11. ?Ngue yɛ e kwla yo naan y’a di aklunjuɛ titi ɔ?
10 Kɛ fie difuɛ kun ɔ́ lúa like’n, ɔ lafi su kɛ sɛ i blɛ’n ju’n ɔ́ kpɛ́ like sɔ’n i su mma. I kunngba’n, ɔ fata kɛ kɛ é bó jasin fɛ’n, e bu sran’m be Biblu’n nun like klelɛ’n i akunndan. ?Yɛ sɛ e bo jasin fɛ’n titi sanngɛ e toman sran kpanngban awlo’m be nun, annzɛ be nga é kó nían be osu’n e toman be’n nin? I sɔ liɛ’n ɔ kwla yo e ya. ?Ɔ fata kɛ i sɔ’n ti’n, e yaci awloawlo’m be nun’n jasin fɛ’n i bolɛ? Cɛcɛ! Afin nán andɛ sa yɛ be boli awloawlo’m be nun jasin fɛ bolɛ’n i bo ɔ. Yɛ lele nin andɛ’n, sran kpanngban be awlo lɔ yɛ e to be yɛ e bo jasin fɛ’n e kle be ɔ.
11 ?Sanngɛ, kɛ ɔ ko yo naan y’a di aklunjuɛ titi’n, e bo jasin fɛ’n i wafa uflɛ ekun ɔn ɔ yoman ye? ?Yɛle kɛ y’a bo jasin fɛ’n akpɔ’m be nuan annzɛ sran’m be junman su lɔ le? ?Sɛ e flɛ sran mun telefɔnu nun’n, annzɛ be nga y’a dun mmua y’a bo jasin fɛ’n y’a kle be’n, sɛ e fa be telefɔnu nimielo naan e flɛ be cɛn uflɛ’n, ɔ yoman ye? Maan e tra e awlɛn e di junman’n titi’n, yɛ e nian sran’m be like yolɛ’n su e bo jasin fɛ’n. Sɛ e yo sɔ’n, é ɲán sran nga be klo Ɲanmiɛn Sielɛ’n i jasin fɛ’n, ɔ maan é dí aklunjuɛ.
?Yɛ sɛ Ɲanmiɛn Ndɛ’n loman sran mun’n nin?
12. ?Sɛ Ɲanmiɛn Ndɛ’n loman sran nga be o e jasin bowlɛ nun’n, ngue yɛ e kwla yo ɔ?
12 ?Yɛ sɛ Ɲanmiɛn Ndɛ’n loman sran mun e jasin fɛ’n bowlɛ lika’n nun’n nin? ?E kwla kaci wafa nga e bo jasin fɛ’n naan Ɲanmiɛn Ndɛ’n w’a lo be? Akoto Pɔlu klɛli fluwa ko mannin Klistfuɛ nga be o Korɛnti lɔ’n. I waan: ‘Sɛ n ju Zuifu’m be nun’n, n yo min wun kɛ be sa. Be bɔ be diman Moiz mmla’n su’n, sɛ n ju be nun’n, n yo min wun kɛ be sa. Kannzɛ n yo sɔ’n, nán kɛ n diman Nyanmiɛn mmla’n su mlɔnmlɔn ti ɔ.’ ?Ngue ti yɛ Pɔlu yoli sɔ ɔ? I waan: “Sran wafa’n kwlaa bɔ n to be’n, kɛ n ko yo naan m’an de be’n, n yo min wun kɛ be sa, yɛ n yo like kwlaa nga n kwlɛ i yo’n.” (1 Korɛntfuɛ Mun 9:20-22) ?Like nga e nin be nga be o e jasin bowlɛ’n nun’n e nuan’n sɛ su’n, e kwla jran su e bo jasin fɛ’n kɛ Pɔlu sa? Sran kpanngban mɔ be suman Ɲanmiɛn’n, be kunndɛ kɛ be awlobo tranlɛ’n yo fɛ tra laa’n. Wie liɛ kusu’n be kunndɛ kɛ bé sí like nga ti yɛ be o asiɛ’n su’n. ?E kwla kunndɛ wafa kun mɔ e kwla kan Ɲanmiɛn Sielɛ’n i ndɛ e kle be naan w’a yo be fɛ ɔ?
13, 14. ?Kɛ é úka sran mun naan b’a kaci Zezi i sɔnnzɔnfuɛ’n, ngue yɛ e kwla yo naan y’a di aklunjuɛ kpa y’a tra laa ɔ?
13 Jasin bofuɛ nga be uka sran mun naan b’a kaci Zezi i sɔnnzɔnfuɛ’n be aklunjuɛ’n uka su. I sɔ jasin bofuɛ’m b’a sɔn. Lika nga i nun sran’m be sɔman Ɲanmiɛn Ndɛ’n nun bɔbɔ’n, be di aklunjuɛ wie. ?Wafa sɛ yɛ be kwla yoli sɔ ɔ? Yɛle kɛ be suannin aniɛn uflɛ. Bian kun nin i yi mɔ be le afuɛ 60 tra su’n, be wunnin kɛ Sinua suklu mma kpanngban kpa be nin be osufuɛ’m be tran be jasin bowlɛ lika’n nun. Bian’n seli kɛ: “I sɔ’n wlali e fanngan maan e suannin Sinua’m be aniɛn’n.” Ɔ seli ekun kɛ: “I sɔ ti’n, ɔ fatali kɛ cɛn kwlakwla e fa blɛ kpanngban e suan aniɛn sɔ’n. Ɔ maan e ɲannin Biblu’n nun like suanfuɛ kaka Sinua aniɛn’n nun.”
14 Kannzɛ e kwlá suanman aniɛn uflɛ’n, sanngɛ e kwla fa fluwa Une bonne nouvelle pour des gens de toutes nations e kle sran nga mɔ e wun be mɔ be kan aniɛn uflɛ’n. Asa ekun’n, e kwla kunndɛ aniɛn nga sran’m be kan’n i nun fluwa e fa man be. Ɔ ti su kɛ, ɔ fata kɛ e mian e ɲin, yɛ e fa blɛ naan e nin sran nga be kan aniɛn uflɛ’n y’a kwla koko yalɛ. Sanngɛ nán e wla fi ndɛ nga Biblu’n kan’n su. I waan: “Sran ng’ɔ di fie dan’n, ɔ nyan like kpanngban.”—2 Korɛntfuɛ Mun 9:6.
Ɔ ti asɔnunfuɛ’m be kwlaa be ndɛ
15, 16. (a) ?Ngue ti yɛ sran ukalɛ naan w’a kaci Zezi i sɔnnzɔnfuɛ’n, ɔ ti asɔnunfuɛ’m be kwlakwla be ndɛ ɔ? (b) ?Junman benin yɛ kpɛnngbɛn’m be di ɔ?
15 Sanngɛ, nán sran kunngba i ɲin ng’ɔ mian di junman’n, i ti yɛ sran kun kaci Zezi i sɔnnzɔnfuɛ ɔ. Sanngɛ junman mɔ asɔnunfuɛ’m be kwlaa be mian be ɲin be di’n ti ɔ. ?Ngue ti yɛ e kwla se sɔ ɔ? Zezi seli kɛ: “Sɛ an klo amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ ɔ.” (Zan 13:35) Yɛ kusu’n, kɛ Biblu’n nun like suanfuɛ’m be ba aɲia’m be bo’n, kpalɛ sunman klolɛ nga aniaan’m be fa klo be wun’n, ɔ yo be klanman. Biblu’n nun like suanfuɛ kun seli kɛ: “Nanwlɛ’n, n klo asɔnun aɲia’m be bo kɔlɛ. Sran’m be sɔ min nun klanman!” Zezi seli kɛ be nga be kaci i sɔnnzɔnfuɛ’n, be awlofuɛ’m be kwla kaci be kpɔfuɛ. (An kanngan Matie 10:35-37 nun.) Sanngɛ, ɔ seli kɛ “niaan o, niɛn o, ba o,” bé ɲán be kpanngban kpa.—Mark 10:30.
16 Asɔnun’n nun’n, e niaan nga b’a yo kpɛnngbɛn’n be li yɛ be uka be nga be suan Biblu’n nun like’n naan b’a ɔ be ɲrun kpa’n niɔn. ?Wafa sɛ yɛ be yo i sɔ liɛ’n niɔn? Kannzɛ aniaan kpɛnngbɛn wie’m be bɔbɔ be kwlá kleman sran’m be Biblu’n nun like’n, sanngɛ kosan nga be tɛ su aɲia’m be bo lɔ’n, ɔ yo maan sran’m be lafi Ɲanmiɛn su kpa. Kɛ mɔ be ‘ti sran kpa’n’ ti’n, asɔnun’n ɲan ɲrun. Ɔ maan be nga be awlɛn’n ti kpa’n, be ba Ɲanmiɛn i anuannzɛ’n nun.—Nyanndra Mun 16:31.
Nán maan srɛ kun e
17. ?Sɛ ɔ yo e kɛ e siman Biblu’n nun like kle’n, ngue yɛ e kwla yo ɔ?
17 ?Yɛ sɛ ɔ yo e kɛ e siman Biblu’n nun like kle’n nin? Nán maan e wla fi su kɛ Zoova fɛli i wawɛ’n fa suannin Moizi bo, naan ɔ fali Moizi i niaan bian Aarɔn mɛnnin i kɛ ɔ nin i be di junman. (Ezipt Lɔ Tulɛ 4:10-17) Zezi seli kɛ Ɲanmiɛn wawɛ’n ɔ́ súan e jasin fɛ’n bolɛ junman’n i bo. (Sa Nga Be Yoli’n 1:8) Asa ekun’n, be nga bé kó bó jasin fɛ’n, Zezi sunmannin be nɲɔnnɲɔn. (Lik 10:1) Ɔ maan, sɛ e kwlá ɲanman sran naan y’a kle i Biblu’n nun like’n, maan e srɛ Ɲanmiɛn naan ɔ fɛ i wawɛ’n ɔ kle e ngwlɛlɛ. Kpɛkun maan e nin aniaan nga i sa w’a tɔ jasin bolɛ nun kpa’n m’ɔ kwla wla e fanngan’n, e bo jasin fɛ’n naan ɔ uka e. Kɛ e wla kpɛn su kɛ be nga be timan sran dan’n yɛ Zoova fali be’n, ɔ wla e fanngan. “Like nga sran’m be bu i kɛ be kwlá fa yoman like fi’n,” yɛ Zoova fa di junman dan sɔ’n niɔn.—1 Korɛntfuɛ Mun 1:26-29.
18. ?Sɛ ɔ yo e kɛ e kwlá ukaman sran’n naan w’a wɔ i ɲrun’n, ngue yɛ ɔ kwla uka e ɔ?
18 ?Yɛ sɛ ɔ yo kɛ e kwlá ukaman sran nga e kle i Biblu’n nun like’n naan w’a wɔ i ɲrun nin? I lɛ nun’n, maan e si kɛ sran’n i ukalɛ naan w’a yo Zezi i sɔnnzɔnfuɛ’n, ɔ timan kɛ aliɛ tɔnlɛ sa. Afin sɛ aliɛ’n, ɔ́ yó fɛ annzɛ ɔ su yoman fɛ’n, ɔ fin sran ng’ɔ tɔn’n. Sanngɛ sran’m be ukalɛ mɔ maan be kaci Zezi i sɔnzɔnnfuɛ’n, ɔ timan e kunngba e junman. I sɔ nun’n, Zoova yɛ ɔ di junman’n i dan lika ɔ. Afin i yɛ ɔ yo maan sran’n bɛ i sin ɔn. (Zan 6:44) Kpɛkun e bɔbɔ nin e niaan mun’n, e tu e klun yiyi Ɲanmiɛn ndɛ’n nun naan sran’n wɔ i ɲrun. (An kanngan 2 Timote 2:15 nun.) Yɛ sran ng’ɔ suan like’n, ɔ fata kɛ ɔ nian su nanti. (Matie 7:24-27) Sɛ sran’n yaci like suanlɛ’n, ɔ kwla bubu e sa sin. Afin, e liɛ’n, e kunndɛ kɛ ɔ fa ajalɛ kpa. Sanngɛ, e si kɛ e tinuntinun’n, “é wá kán sa nga e yoli be’n klé Nyanmiɛn.”—Rɔmfuɛ Mun 14:12.
?Mmlusuɛ benin yɛ é ɲɛ́n i ɔ?
19-21. (a) ?Kɛ e kle sran’m be Biblu’n nun like’n, mmlusuɛ benin yɛ e ɲɛn i ɔ? (b) ?Wafa sɛ yɛ Zoova bu jasin bofuɛ’m be kwlaa ɔ?
19 Kɛ e kle sran’m be Biblu’n nun like’n, ɔ uka e maan e dun mmua fa e ɲin sie i Ɲanmiɛn Sielɛ’n su. Kusu’n, ɔ yo maan ndɛ nanwlɛ ng’ɔ o Ɲanmiɛn Ndɛ’n nun’n, e jran su cinnjin kpa. ?Wafa sɛ? E niaan kun m’ɔ suan Baraki’n ti atin bofuɛ. Ɔ yiyili nun seli kɛ: “Sɛ a kle sran’m be Biblu’n nun like’n, saan ɔ bɔbɔ á súan Ɲanmiɛn Ndɛ’n kpa. N wunnin kɛ ɔ fata kɛ like nga n suan’n, n lafi su kpa kwlaa naan m’an kwla yiyi nun kpa m’an kle sran uflɛ.”
20 ?Sɛ e nin a ɲanman sran naan y’a kle i Biblu’n nun like’n nn e Ɲanmiɛn junman nga e di’n, ɔ ti ngbɛn? Cɛcɛ, ɔ timan sɔ mlɔnmlɔn! E ɲin nga e mian naan y’a manman Zoova’n, ɔ bu i like kpa. Be nga be bo jasin fɛ’n, be kwlaa ‘be nin Nyanmiɛn yɛ be di junman’n niɔn.’ Sanngɛ sɛ e ɲan sran naan e kle i Biblu’n nun like’n, aklunjuɛ nga e di’n, ɔ uka su. Afin sɛ é kwlá sé’n, waka nga e tali’n, e wun kɛ Ɲanmiɛn yɛ maan ɔ yo kpa ɔ. (1 Korɛntfuɛ Mun 3:6, 9) Atin bofuɛ kun m’ɔ suan Ami’n waan: “Nanwlɛ, kɛ a wun kɛ sran kun mɔ a kle i Biblu’n nun like’n, ɔ su kɔ i ɲrun’n, Zoova i asenna’n, ɔ wieman ɔ nuan nun. Afin sran sɔ mɔ a ukɛ i maan ɔ si Zoova naan cɛn wie lele’n, ɔ ɲan anannganman nguan’n, Zoova dunman nun ti yɛ a kwla yo i sɔ liɛ’n niɔn.”
21 Sɛ e mian e ɲin naan e ɲan sran e kle i Biblu’n nun like’n, e ɲin su kpaman Ɲanmiɛn i junman dilɛ’n su. Kpɛkun mɛn uflɛ mɔ e lafi su kɛ é trán nun’n, é láfi su kpa ekun. Zoova fanngan nun’n, é kwlá úka be nga be fa e ndɛ’n su’n naan b’a fite nun. (An kanngan 1 Timote 4:16 nun.) Ɔ maan, aklunjuɛ nga é dí’n, be su kanman!
[Ja ngua lɛ ndɛ’n]
a Fluwa nga lalafuɛ nun’n be klɛli Ɲanmiɛn ndɛ su’n, be nun wie’m be waan be ti 70 yɛ wie’m be waan be ti 72.
?Amun wla kwla kpɛn su?
• ?Ngue ti yɛ Biblu’n nun like klelɛ’n kwla yo kekle man e nun wie mun ɔn?
• ?Sɛ e jasin bowlɛ’n nun’n, Ɲanmiɛn ndɛ’n loman sran wie mun’n, ngue yɛ e kwla yo ɔ?
• ?Kɛ e ɲan sran e kle i Biblu’n nun like’n, mmlusuɛ benin yɛ e ɲɛn i ɔ?