“Amun wɔ, amun yo maan nvlenvle’m be kwlaa be nunfuɛ’m be kaci min sɔnnzɔnfuɛ”

1-2. (1) ?Kɛ bla wie’m be ɔli Zezi i ndia’n su lɔ’n, ngue ndɛ yɛ anzi kun kan kleli be-ɔ? (2) ?Ndɛ cinnjin benin yɛ Zezi bɔbɔ kan kleli be-ɔ?

AFUƐ 33 nun’n Nizan i le 16 su’n nglɛmun ndɛ kpa’n, bla wie’m be ɔli Zezi i ndia’n su lɔ. Kɛ ɔ́ yó sɔ’n nn be sieli i w’a di cɛn ba nɲɔn. Blɛ sɔ nun’n, be wla boli be wun dan. Bla sɔ’m be waan bé fá ayre fanninfannin bé kpákpá Zezi i saka’n i wun. Sanngɛ kɛ bé jú lɔ’n, nn Zezi nunman ndia’n nun kun. I sɔ’n boli be nuan dan. I sin’n, anzi kun wa seli be kɛ be cɛnnin Zezi. Kpɛkun ɔ seli be ekun kɛ: “Ɔ su dun mmua amun ɲrun Galile klɔ’n su lɔ. Lɔ yɛ amún wún i-ɔ.”—Mat. 28:1-7; Lik. 23:56; 24:10.

² Kɛ bla’m be jasoli ndia’n su lɔ’n, Zezi bɔbɔ wa toli be naan w’a se be kɛ: “Amun wɔ naan amun ko kan kle min niaan mun naan be wɔ Galile. Lɔ yɛ bé wún min-ɔn.” (Mat. 28:10) Kɛ be cɛnnin Zezi’n, like klikli ng’ɔ yoli’n yɛle kɛ ɔ nin i sɔnnzɔnfuɛ’m be yiali. Blɛ sɔ’n nun’n, ɔ mannin be afɔtuɛ cinnjin wie mun.

?WAN MUN YƐ ZEZI SELI BE KƐ BE YO MAAN SRAN’M BE KACI I SƆNNZƆNFUƐ-Ɔ?

3-4. ?Ngue ti yɛ e kwla se kɛ ndɛ ng’ɔ o Matie 28:19, 20 nun’n, ɔ timan Zezi i akoto’m be ngunmin be liɛ-ɔ? (An nian desɛn ng’ɔ o fluwa’n i bui’n su’n.)

³ An kanngan Matie 28:16-20 nun. Kɛ Zezi nin i sɔnnzɔnfuɛ’m bé yó aɲia’n, ɔ kannin junman cinnjin ng’ɔ fata kɛ be di’n, i ndɛ kleli be. Junman kunngba’n yɛ e di i andɛ-ɔ. Zezi seli kɛ: “Amun yo maan nvlenvle’m be kwlaa be nunfuɛ’m be kaci min sɔnnzɔnfuɛ. [...] Like kwlaa nga n seli amun kɛ amun yo’n, amun kle be naan be kusu be nian su be yo wie.”

⁴ Zezi kunndɛ kɛ i sɔnnzɔnfuɛ’m be kwlakwla be bo jasin fɛ’n. Junman sɔ’n timɛn i akoto 11 nga be nin i nantili klanman’n be ngunmin be liɛ. ?Ngue ti yɛ e se sɔ-ɔ? Galile oka’n su lɔ’n, kɛ Zezi seli kɛ be yo maan sran’m be kaci i sɔnnzɔnfuɛ’n, blɛ sɔ nun’n nɛ́n i akoto’m be ngunmin yɛ be o lɛ-ɔ. ?Ngue ti yɛ e kwla se sɔ-ɔ? Maan e wla kpɛn ndɛ nga anzi’n kan kleli bla mun’n, i su. Ɔ seli be kɛ: ‘Amún wún i [Galile] lɔ.’ Ɔ maan e kwla se kɛ, kɛ Zezi kán ndɛ klé i sɔnnzɔnfuɛ mun’n, nn bla sɔ’m be o lɛ wie. Sanngɛ nɛ́n i ngba-ɔ. Kɛ akoto Pɔlu kán Zezi i ndɛ’n, ɔ seli kɛ: “Ɔ yili i wun nglo kleli aniaan ya nnun (500) tra su blɛ kunngba nun.” (1 Kor. 15:6) ?Nin yɛ ɔ yili i wun nglo kleli be sɔ’n niɔn?

5. ?Ngue ti yɛ e kwla se kɛ aɲia nga Zezi nin i sɔnnzɔnfuɛ’m be yoli mɔ Matie ndɛ tre 28 kɛn i ndɛ’n, i ndɛ wie yɛ Pɔlu kan-ɔn?

⁵ E kwla se kɛ aɲia nga Zezi nin i sɔnnzɔnfuɛ’m be yoli mɔ Matie ndɛ tre 28 kɛn i ndɛ’n, i ndɛ yɛ Pɔlu kan-ɔn. ?Ngue ti yɛ e kwla se sɔ-ɔ? Like klikli’n, yɛle kɛ Zezi i sɔnnzɔnfuɛ’m be nun kpanngban kpa be fin Galile. Ɔ maan sɛ Zezi waan ɔ nin sran kaka sɔ’m bé yó aɲia’n, sɛ be kɔ Galile oka’n su lɔ’n, ɔ ti kpa tra kɛ be wɔ sran kun i sua’n nun Zerizalɛmun lɔ. Like nɲɔn su’n yɛle kɛ, kɛ be cɛnnin Zezi’n, ɔ nin i akoto 11 mun be yoli aɲia sran kun i sua’n nun Zerizalɛmun lɔ. Sɛ ɔ ti kɛ Zezi kunndɛ kɛ i akoto’m be ngunmin yɛ be bo jasin fɛ’n naan be yo maan sran’m be kaci i sɔnnzɔnfuɛ’n, nn w’a semɛn i akoto mun nin bla wie mun ɔ nin sran wie mun ekun be kɛ be nin i be yia Galile oka’n su lɔ.—Liki 24:33, 36.

6. (1) ?Ngue ti yɛ e kwla se kɛ ndɛ nga Zezi kannin m’ɔ o Matie 28:20 nun’n, ɔ ti e liɛ wie andɛ-ɔ? (2) ?Ngue yɛ ɔ kle kɛ sran’m be di ndɛ sɔ’n su-ɔ?

⁶ Maan e fa e ɲin e sie i like’n i nsan su m’ɔ ti cinnjin kpa’n i su. Kɛ Zezi gúɛ i ndɛ’n i bo’n, ɔ seli kɛ: “E nin amun e o nun cɛn kwlaa lele mɛn’n fá wíe!” (Mat. 28:20) Ndɛ sɔ’n kle kɛ junman nga Zezi seli i sɔnnzɔnfuɛ’m be kɛ be di’n, ɔ timan Klisifuɛ klikli’m be ngunmin be liɛ. Andɛ’n, sran sunman be di junman sɔ’n. Maan e bu i akunndan kan e nian. Afuɛ nuan kwlaa’n, be yo sran kɔe 300.000 be batɛmun naan be kaci Zezi i sɔnnzɔnfuɛ. Nanwlɛ, i sɔ’n yo ɲɛnmɛn dan.

7. (1) ?Ngue yɛ é wá kɛ́n i ndɛ siɛn’n niɔn? (2) ?Ngue ti-ɔ?

⁷ Be nga be suan Biblu’n nun like’n, be nun sunman be kɔ be ɲrun kpɛkun be yo be batɛmun. Sanngɛ wie’m be liɛ’n, i sɔ yolɛ’n ti kekle man be. Be klo like suanlɛ sanngɛ be kɔman be ɲrun. E si kɛ amun kunndɛ kɛ amún úka be nga amun kle be Biblu’n nun like naan be nanti like nga be suan’n su naan be kaci Zezi i sɔnnzɔnfuɛ. Like suanlɛ nga nun’n, é wá wún wafa nga e kwla uka be naan b’a klo Zoova naan b’a wɔ be ɲrun i sulɛ nun’n. ?Ngue ti yɛ ɔ fata kɛ e fa e ɲin e sie i i sɔ liɛ’n su-ɔ? Afin sɛ ɔ fata kɛ e kle sran kun i like titi annzɛ e yaci i like klelɛ’n, é wá fɛ́ i sɔ’n i wun ajalɛ.

MAAN E UKA BE NGA E KLE BE BIBLU’N NUN LIKE’N NAAN BE KLO ZOOVA

8. ?Ngue ti yɛ ɔ ju wie’n, Biblu’n nun like suanfuɛ’m be ukalɛ’n ti kekle-ɔ?

⁸ Zoova kunndɛ kɛ sran’m be su i klolɛ su. I sɔ’n ti’n, e kunndɛ kɛ é úka be nga e kle be Biblu’n nun like’n naan be wun i wlɛ kɛ be ndɛ lo Zoova naan ɔ klo be tinuntinun. E kunndɛ kɛ é úka be naan be wun i wlɛ kɛ Zoova ti ‘aika’m be si, yɛ ɔ ti angboti bla’m be sin jranfuɛ.’ (Jue. 68:6) Kɛ be nga e kle be Biblu’n nun like’n be wun i wlɛ kɛ Zoova klo be’n, be kusu be klo i wie. Sran wie’m be liɛ’n, kɛ mɔ be si w’a kleman be kɛ ɔ klo be’n ti’n, kɛ be se be kɛ Zoova ti be Si naan ɔ klo be’n, be wunmɛn i sɔ liɛ’n i wlɛ. (2 Tim. 3:1, 3) I sɔ’n ti’n, kɛ é klé be like’n maan e fa be ɲin e sie i Zoova i nzuɛn’n su. Kpɛkun maan e uka be naan be wun i wlɛ kɛ Zoova kunndɛ kɛ ɔ́ úka be naan be ɲan nguan m’ɔ leman awieliɛ’n. ?Ngue like yɛ e kwla yo i ekun-ɔn?

9-10. (1) ?Fluwa benin mun yɛ e fa kle sran’m be Biblu’n nun like-ɔ? (2) ?Ngue ti yɛ fluwa sɔ mun yɛ e fa kle be like-ɔ?

⁹ Maan e fa fluwa “?Ngue like yɛ Biblu’n kle i sakpasakpa ɔ?” ɔ nin “Maan e yo sa nga e yo ɔ e si kɛ Ɲanmiɛn klo e’n” e kle sran’m be Biblu’n nun like. Be yili fluwa sɔ mun naan e fa uka sran mun naan be wun Ɲanmiɛn Ndɛ’n i wlɛ kpa. I wie yɛle kɛ Fluwa Biblu’n kle i ndɛ tre kun’n tɛ kosan cinnjin nga’m be su: ?E ndɛ lo Ɲanmiɛn annzɛ ɔ siman e aunnvuɛ? ?Kɛ be bu e lufle’n, i sɔ’n yo Ɲanmiɛn i sɛ? ?A kwla fa ɔ wun mantan Zoova? ?Yɛ fluwa Ɲanmiɛn klo e’n nin? Fluwa sɔ’n kwla uka be nga be suan Biblu’n nun like’n naan b’a nanti like nga be suan’n su. Asa ekun’n, ɔ kwla uka be naan be nin Zoova be afiɛn w’a mantan kpa. Kannzɛ e fali fluwa sɔ mun e kleli sran’m be Biblu’n nun like laa’n, sanngɛ ɔ fata kɛ e siesie e wun kpa ka naan e nin sran uflɛ y’a suan be nun like. Asa ekun’n, maan e bu wafa nga e kwla uka like suanfuɛ mun’n i akunndan.

¹⁰ Wienun-ɔn, sran nga e kle i Biblu’n nun like’n kunndɛ kɛ ɔ́ sí ndɛ kun nun. Sanngɛ ndɛ sɔ’n wo fluwa kun m’ɔ nunman fluwa nga e fa kle sran’m be like’n i nun. ?Sɛ ɔ ti sɔ’n é yó i sɛ? E kwla se i kɛ i ngunmin kanngan fluwa sɔ’n nun. Kpɛkun maan e nin i e suan like fluwa nga e fa suan like titi’n i nun.

11. (1) ?Blɛ benin nun yɛ ɔ fata kɛ e nin sran nga e kle i Biblu’n nun like’n e bo Ɲanmiɛn srɛlɛ bo-ɔ? (2) ?Wafa sɛ yɛ e kwla kle like suanfuɛ’n kɛ i sɔ yolɛ’n ti cinnjin-ɔn?

¹¹ Kwlaa naan y’a kle sran kun i Biblu’n like’n maan e nin i e srɛ Ɲanmiɛn. Kpɛ sunman’n, kɛ e nin sran nga e kle i Biblu’n nun like’n e srɛ Ɲanmiɛn ka naan y’a bo like suanlɛ bo’n, kpɛkun e guɛ i bo nin Ɲanmiɛn srɛlɛ’n, i sɔ’n ti kpa. Sɛ e yo i sɔ’n ndɛ nun kusu’n ɔ timan tɛ. Afin i sɔ’n kwla uka like suanfuɛ’n naan w’a wun i wlɛ kɛ Ɲanmiɛn wawɛ’n yɛ ɔ kwla uka e naan y’a wun Ɲanmiɛn Ndɛ’n i wlɛ kpa-ɔ. Aniaan wie’m be yiyili like nga ti yɛ ɔ ti cinnjin kɛ e srɛ Ɲanmiɛn ka naan y’a suan like’n, i nun kleli be nga be kle be Biblu’n nun like’n. Blɛ sɔ’n nun’n, be kanngan Zaki 1:5 nun. Ndɛ mma sɔ’n se kɛ: “Sɛ amun nun wie wunman sa wlɛ’n, maan ɔ srɛ Ɲanmiɛn titi kɛ ɔ mɛn i ngwlɛlɛ.” I sin’n be usa sran nga be kle i like’n kɛ: “?Sɛ e waan é wún sa wlɛ’n, ngue yɛ ɔ fata kɛ e yo-ɔ?” Kɛ ɔ ko yo sɔ’n like suanfuɛ’n wun i wlɛ kɛ ɔ fata kɛ e srɛ Ɲanmiɛn.

12. ?Wafa sɛ yɛ e kwla fa ndɛ ng’ɔ o Jue Mun 139:2-4 nun’n e uka Biblu’n nun like suanfuɛ kun naan w’a srɛ Ɲanmiɛn kpa-ɔ?

¹² Maan e kle like suanfuɛ’m be Ɲanmiɛn srɛlɛ. Maan e yiyi nun e kle be kɛ Zoova kunndɛ kɛ ɔ́ tíe be srɛlɛ’n. Asa ekun’n, maan e se be kɛ, kɛ be ngunmin bé srɛ́ Ɲanmiɛn’n, be kwla kan be klun ndɛ nga be kwlá kan kleman sran’n, be kle Ɲanmiɛn. Afin Zoova si e su sa mun tra e bɔbɔ. (An kanngan Jue Mun 139:2-4 nun.) Wie liɛ’n, e kwla wla like suanfuɛ’n i fanngan kɛ ɔ srɛ Ɲanmiɛn kɛ ɔ ukɛ i naan ɔ yaci akunndan tɛtɛ’m be bulɛ annzɛ ɔ wlɛ i ayeliɛ tɛtɛ’m be ase. Wienun-ɔn, sran nga e kle i Biblu’n nun like’n ɔ klo cɛn dilɛ. Ɔ si kɛ i sɔ yolɛ’n timan kpa sanngɛ ɔ klo cɛn dilɛ nun ninnge nga sran’m be yo’n, be nun wie mun. I lɛ nun’n, maan e se i kɛ ɔ kan wafa nga i wun yo i’n i ndɛ trele kle Zoova. Kpɛkun ɔ srɛ i kɛ ɔ ukɛ i naan ɔ klo ninnge nga Zoova klo be’n be ngunmin.—Jue. 97:10.

13. (1) ?Ngue ti yɛ ɔ fata kɛ e yia like suanfuɛ mun e aɲia’m be bo ndɛ nun-ɔn? (2) ?Wafa sɛ yɛ e kwla uka Biblu’n nun like suanfuɛ mun naan b’a wun be wun fɛ asɔnun’n nun-ɔn?

¹³ Maan e yia like suanfuɛ mun e aɲia’m be bo ndɛ nun. Afin like nga Biblu’n nun like suanfuɛ kun wun i aɲia’m be bo lɔ’n annzɛ ndɛ ng’ɔ ti i lɔ’n, ɔ kwla yo maan ɔ kɔ i ɲrun Ɲanmiɛn sulɛ’n nun. I lɛ nun’n, e kwla bo video ?Ngue yɛ be yo i Ɲanmiɛn Sielɛ Sua’n nun lɔ ɔ? e kle i annzɛ e kwla yiɛ i kɛ ɔ bla aɲia’m be bo. Sɛ e le i wun alaje’n, maan e ukɛ i naan ɔ kwla tran aɲia’m be bo. Kɛ é kó klé sran’n i like’n, maan e nin aniaan fanunfanun e wɔ. Sɛ e yo sɔ’n, ɔ́ sí aniaan nga be o asɔnun’n nun’n. Ɔ maan sɛ ɔ ba aɲia’m be bo’n, i ɲrun su yomɛn i koun.

MAAN E UKA BIBLU’N NUN LIKE SUANFUƐ MUN NAAN BE WƆ BE ƝRUN ƝANMIƐN SULƐ’N NUN

14. ?Ngue yɛ ɔ kwla uka Biblu’n nun like suanfuɛ kun naan w’a ɔ i ɲrun Ɲanmiɛn sulɛ’n nun-ɔn?

¹⁴ E kunndɛ kɛ é úka be nga e kle be Biblu’n nun like’n naan be wɔ be ɲrun Ɲanmiɛn sulɛ’n nun. (Efɛ. 4:13) Kɛ sran kun fa ajalɛ kɛ ɔ́ súan Biblu’n nun like’n, atrɛkpa’n like suanlɛ’n i su ye ng’ɔ kwla ɲɛn i’n, i akunndan yɛ ɔ bu-ɔ. Sanngɛ kɛ ɔ́ súan like m’ɔ́ kló Zoova’n, ɔ bu wafa nga i bɔbɔ kwla uka sran uflɛ annzɛ be nga be o asɔnun’n nun’n, i akunndan. (Mat. 22:37-39) Sɛ ɔ nin i fata’n, maan e kan kle be nga e kle be Biblu’n nun like’n kɛ be kwla man be sa ti like fa suan Ɲanmiɛn i junman’n, i bo.

15. ?Sɛ ndɛ tɔ sran nga e kle i like’n ɔ nin asɔnun’n nunfuɛ kun be afiɛn’n, wafa sɛ yɛ e kwla ukɛ i naan w’a siesie-ɔ?

¹⁵ Kɛ sa tɔ sran nga e kle i Biblu’n nun like’n i su’n maan e ukɛ i naan ɔ si wafa ng’ɔ kwla wun sa sɔ’n i trawlɛ’n. Wienun-ɔn, sran kun mɔ e kle i Biblu’n nun like’n ɔ ti jasin bofuɛ kun mɔ be nin-a yomɛn i batɛmun-ɔn. Kpɛkun ɔ wa se e kɛ asɔnun’n nunfuɛ kun w’a wɔ i safle. I lɛ nun’n, nán e ka lɛ e bu ndɛ’n. Sanngɛ maan e fɛ i ɲin e sie i like ng’ɔ kwla yo mɔ Biblu’n kɛn i ndɛ’n i su. Asa ekun’n, e kwla se i kɛ ɔ yaci sa sɔ’n ɔ cɛ. Sɛ ɔ kwlá yoman sɔ’n, e kwla se i kɛ ɔ ko wun sran sɔ’n i wun naan be siesie ndɛ’n amanniɛn su. (An nian Matie 18:15 nun.) I lɛ nun’n, e kwla ukɛ i naan w’a wun ndɛ ng’ɔ fata kɛ ɔ kan’n. Asa ekun’n, e kwla kle i wafa ng’ɔ kwla fa JW Library^® ɔ nin Zoova i Lalofuɛ’m be like kunndɛlɛ fluwa yɛ jw.org^® kunndɛ sa ng’ɔ o i su’n, i su ndɛ wie mun’n. Sɛ ndɛ tɔ sran nga e kle i Biblu’n nun like mɔ be nin-a yomɛn i batɛmun’n nin asɔnun’n nunfuɛ kun be afiɛn naan ɔ miɛn i ɲin siesie’n, kɛ bé wá yó i batɛmun’n ɔ nin aniaan’m be trán klanman.

16. ?Ngue ti yɛ kɛ é kɔ́ sran’m be like klelɛ’n ɔ fata kɛ e nin aniaan fanunfanun e wɔ-ɔ?

¹⁶ Kɛ é kɔ́ sran’m be like klelɛ’n maan e nin aniaan fanunfanun annzɛ akpasua sunianfuɛ’n e wɔ. ?Ngue ti-ɔ? Sɛ e yo sɔ’n, aniaan’m bé úka sran nga e kle i like’n ninnge wie’m be yolɛ’n nun. Wienun-ɔn, sran nga e kle i like’n ɔ kunndɛ kɛ ɔ́ yáci siklɛti nɔnlɛ. Sanngɛ w’a yo i lele ɔ yoman ye. Sɛ ɔ ti sɔ’n, kɛ é kɔ́ sran’n i like klelɛ’n maan e se aniaan kun m’ɔ jrannin sa sɔ’n i ɲrun kekle wie laa’n kɛ ɔ ko sunman e. Aniaan sɔ’n kwla man sran’n i afɔtuɛ wie mun naan w’a yaci siklɛti nɔnlɛ’n. Sɛ é nían naan aniaan nga e nin i ɔli’n ɔ si sran’m be like kle kpa’n, e kwla se i kɛ ɔ kle sran’n i like cɛn sɔ’n nun. I kwlaa sɔ’n kle kɛ sɛ é kɔ́ sran’m be like klelɛ naan e nin aniaan mun yɛ e kɔ’n, sran nga e kle i like’n, ɔ́ ɲán su ye. Afin like nga e kunndɛ’n yɛle kɛ e waan é úka sran mun naan be wɔ be ɲrun Ɲanmiɛn sulɛ’n nun.

?BLƐ BENIN NUN YƐ Ɔ FATA KƐ E YACI BIBLU’N NUN LIKE SUANFUƐ NGA BE KƆMAN BE ƝRUN’N BE LIKE KLELƐ-Ɔ?

17-18. ?Sɛ e waan é yáci sran kun i Biblu’n nun like klelɛ’n, ngue yɛ ɔ fata kɛ e bu i akunndan-ɔn?

¹⁷ Sɛ e kle sran kun i like naan ɔ kɔmɛn i ɲrun’n, e kwla usa e wun kɛ: ?Yɛ sɛ n yaci i like klelɛ nin? Kwlaa naan y’a fa ajalɛ kɛ é yáci i like klelɛ’n, maan e bu like nga sran’n kwla yo’n i akunndan. Sran wie’m be liɛ’n, kɛ be kle be Biblu’n nun like’n be kɔ be ɲrun ndɛndɛ. Sanngɛ wie’m be liɛ’n ɔ timan sɔ. I sɔ’n ti’n, e kwla usa e wun kɛ: ?Ngue yɛ ɔ kle kɛ sran nga n kle i like’n, ɔ kɔ i ɲrun-ɔn? ?Ɔ nanti like ng’ɔ suan’n su? (Mat. 28:20) Sran wie’m be fa blɛ kaka be suan like ka naan b’a kaci Zezi i sɔnnzɔnfuɛ. Kannzɛ ɔ ti sɔ bɔbɔ’n, sanngɛ ɔ fata kɛ be sie i nzɔliɛ kɛ ɔ miɛn i ɲin kaci i nzuɛn’n blɛblɛblɛ.

¹⁸ ?Sɛ e kle sran kun i Biblu’n nun like cɛ kpa naan ɔ kɔmɛn i ɲrun’n, é yó i sɛ? Maan e fa e ɲin e sie i sa kun su naan y’a wun like nga é yó’n i wlɛ. Biblu’n nun like suanfuɛ kun w’a wie fluwa Biblu’n kle annzɛ Ɲanmiɛn klo e’n be nun like suan sanngɛ ɔ nin-a tranman aɲia annzɛ e wla kpɛnlɛ aɲia wie fi bo le. Kpɛkun blɛ wie nun’n, sa ngbɛn wie ti’n ɔ suanman like. Sɛ sran nga amun kle i like’n yo sɔ’n, ɔ fata kɛ amun nin i be koko i sɔ’n su yalɛ kpa.b

19. (1) ?Kosan benin yɛ e kwla fa usa sran kun m’ɔ suan like sanngɛ ɔ kɔmɛn i ɲrun’n niɔn? (2) ?Ngue yɛ ɔ fata kɛ e bu i akunndan-ɔn?

¹⁹ E kwla usa like suanfuɛ’n kɛ: ‘?Ngue like yɛ ɔ tanndan ɔ ɲrun mɔ i ti yɛ a kwlá faman ajalɛ kɛ á káci Zoova i Lalofuɛ-ɔ?’ Atrɛkpa’n, like suanfuɛ’n kwla tɛ e su kɛ: ‘N klo Biblu’n nun like suanlɛ’n kpa. Sanngɛ n su kwlá kaciman Zoova i Lalofuɛ le.’ Sɛ ɔ se e sɔ’n kusu nn nán andɛ sa yɛ e kle i like’n, maan e nian sɛ é klé i like titi-o, annzɛ é yáci i like klelɛ-o. Wie liɛ’n, ɔ kwla kan sa nga ti yɛ ɔ kɔmɛn i ɲrun’n i ndɛ kle e. Atrɛkpa’n, ɔ kwla se e kɛ ɔ su kwlá boman jasin fɛ’n awloawlo’m be nun. Sɛ like suanfuɛ’n kan sa nga ti yɛ ɔ kɔmɛn i ɲrun’n i ndɛ kle e’n, é kwlá úkɛ i kpa.

20. ?Wafa sɛ yɛ Sa Nga Be Yoli’n 13:48 kwla uka e naan y’a wun be ng’ɔ fata kɛ e kle be Biblu’n nun like titi’n, be wlɛ-ɔ?

²⁰ Biblu’n nun like suanfuɛ wie’m be ti kɛ Ezekiɛli blɛ su Izraɛlifuɛ wie mun sa. Kɛ Zoova kán be ndɛ klé Ezekiɛli’n, ɔ seli kɛ: “A ti be nyrun kɛ jue tofuɛ mɔ i wun yo fɛ mɔ i aniɛn yo fɛ m’ɔ si jue to kpa’n sa. Be ti ɔ ndɛ mun, sanngɛ be faman be su.” (Eze. 33:32) Kɛ ɔ ko yo naan y’a se sran kun kɛ e su klemɛn i Biblu’n nun like kun’n, ɔ kwla yo kekle e sa nun. Sanngɛ nán e wla fi su kɛ “blɛ ng’ɔ ka’n w’a sɔnman.” (1 Kor. 7:29) Ɔ maan ɔ fata kɛ e yaci sran ng’ɔ kɔmɛn i ɲrun’n i like klelɛ. Yɛ maan e fɛ i sɔ blɛ’n e kunndɛ “be kwlaa nga be nin nguan m’ɔ leman awieliɛ’n fata’n.”—An kanngan Sa Nga Be Yoli’n 13:48 nun.

21. (1) ?Afuɛ 2020 nun Biblu’n nun ndɛ mma’n yɛle benin? (2) ?Ngue yɛ ɔ́ wá úka e naan y’a yo-ɔ?

²¹ Afuɛ 2020 nun Biblu’n nun ndɛ mma’n taka ndɛ nga Zezi kan kleli i sɔnnzɔnfuɛ mun i nun mɔ bé yó aɲia Galile oka’n su lɔ’n, i su. Ɔ seli be kɛ: ‘Amun wɔ, amun yo maan be kaci min sɔnnzɔnfuɛ. Amun yo be batɛmun.’ (Mat. 28:19) Biblu’n nun ndɛ mma’n sɔ’n wá fá e ɲin síe i sran’m be like klelɛ junman nga e di naan sran’m be kaci Zezi i sɔnnzɔnfuɛ’n, i su.