?Wafa sɛ yɛ e kwla uka Biblu’n nun like suanfuɛ mun naan b’a yo be batɛmun-ɔn?: I bue klikli’n

1. ?Ngue ndɛ yɛ 2 Korɛntifuɛ Mun 3:1-3 kan m’ɔ kle kɛ, kɛ sran kun mɔ e kle i like’n yo i batɛmun’n, i sɔ’n ti e cenjele like-ɔ? (An nian foto ng’ɔ o fluwa’n i bui’n su’n.)

?KƐ ANIAAN kun m’ɔ o amun asɔnun’n nun’n, ɔ kle sran kun i Biblu’n nun like mɔ be yo i batɛmun’n, wafa sɛ yɛ amun wun yo amun-ɔn? E si kɛ i sɔ’n yo amun fɛ dan. (Mat. 28:19) ?Yɛ sɛ amun yɛ amun kle sran sɔ’n i Biblu’n nun like’n nin? E si kɛ aklunjuɛ nga amún dí’n, ɔ́ yó dan. (1 Tes. 2:19, 20) Be nga be yo be batɛmun uflɛuflɛ’n be ti kɛ ‘fluwa wie mɔ be kan sran wun ndɛ kpa nun’n’ sa. Be nga sɛ é kwlá sé’n, Biblu’n nun like suanfuɛ sɔ’m be kan be ndɛ kpa’n, yɛle aniaan nga be kleli be like’n, ɔ nin asɔnun nunfuɛ mun.—An kanngan 2 Korɛntifuɛ Mun 3:1-3 nun.

2. (1) ?Kosan cinnjin benin yɛ ɔ fata kɛ e bu su akunndan-ɔn? (2) ?Ngue ti-ɔ? (3) ?Blɛ benin nun yɛ e kwla se kɛ e kle sran kun i Biblu’n nun like-ɔ? (An nian ndɛ ng’ɔ o ja ngua lɔ’n nun.)

² E sieli i nzɔliɛ kɛ afuɛ nnan nga be sinnin lɛ’n nun’n, anglo kwlaa nun’n e kle sran kɔe 10.000.000 be Biblu’n nun like.b Yɛ afuɛ nuan kwlaa nun’n, be yo sran kɔe 280.000 be batɛmun. ?Wafa sɛ yɛ e kwla uka sran miliɔn kaka kpa ekun naan b’a yo be batɛmun-ɔn? Zoova te man sran’m be atin nin blɛ naan b’a kaci i Lalofuɛ. I sɔ’n ti’n, ɔ fata kɛ e uka be naan be wɔ be ɲrun ndɛndɛ naan b’a kwla yo be batɛmun. Afin blɛ ng’ɔ ka’n w’a sɔnman kun.—1 Kor. 7:29a; 1 Piɛ. 4:7.

3. ?Ngue yɛ é wá kɛ́n i ndɛ like suanlɛ nga nun-ɔn?

³ Sran’m be like klelɛ naan be kaci Zezi i sɔnnzɔnfuɛ ti cinnjin dan. I sɔ’n ti’n, e Anuannzɛ’n i ɲrun dinfuɛ’m be usali Betɛli fanunfanun mun like nga e kwlakwla e kwla yo naan be nga e kle be Biblu’n nun like’n b’a wɔ be ɲrun’n. Ɔ maan like suanlɛ nga nin i sin liɛ’n nun’n, é wá kán ajalɛ nga atin bofuɛ mun nin ngaliɛ difuɛ mun nin akpasua sunianfuɛ’m be kle e i sɔ yolɛ nun’n, i ndɛ.c (Nya. 11:14; 15:22) Aniaan sɔ’m be kannin like nga sran ng’ɔ kle like’n, ɔ nin like suanfuɛ’n be kwla yo naan Biblu’n nun like suanlɛ’n w’a wɔ i ɲrun’n, i ndɛ. Like suanlɛ nga nun’n, é wá kán like nnun m’ɔ fata kɛ Biblu’n nun like suanfuɛ kun yo naan w’a wɔ i ɲrun naan b’a kwla yo i batɛmun’n be ndɛ.

MAAN E KLE BE LIKE LEMƆCUƐ KWLAA NUN

4. ?Kɛ e kle sran’m be Biblu’n nun like be anuan nun lɛ’n, ngue yɛ e sie i nzɔliɛ-ɔ?

⁴ Aniaan kpanngban be kle sran’m be Biblu’n nun like be anuan nun lɛ. I bo bolɛ nun’n, i sɔ’n kwla yo maan sran’m be konvi sɔ Biblu’n nun like suanlɛ’n. Sanngɛ blɛ sɔ’n nun’n e nin sran mun e kwlá kokoman yalɛ cɛman yɛ e kwlá yomɛn i sɔ lemɔcuɛ kwlaa nun. I sɔ’n ti’n, aniaan wie’m be fa sran’n i nimielo’n, kpɛkun be flɛ i annzɛ be klɛ i fluwa be kan Biblu’n nun ndɛ be kle i. Be kwla yo i sɔ cɛ kpa. I sɔ yolɛ’n ti kpa sɔ, sanngɛ sɛ Biblu’n nun like suanfuɛ kun faman blɛ yɛ ɔ miɛnmɛn i ɲin suanman Biblu’n nun like’n, ɔ su kwlá kɔmɛn i ɲrun naan b’a yo i batɛmun.

5. ?Ndɛ benin yɛ Zezi kannin m’ɔ o Liki 14:27-33 nun mɔ e kwla fa uka be nga e kle be Biblu’n nun like’n niɔn?

⁵ Cɛn kun’n, Zezi kannin like ng’ɔ fata kɛ sran kun yo naan w’a kaci i sɔnnzɔnfuɛ’n i ndɛ. Ɔ kannin sran kun mɔ i waan ɔ́ kplán sua fleiin kun’n, ɔ nin famiɛn kun m’ɔ su kɔ alɛ kunlɛ’n be ndɛ. Zezi seli kɛ ɔ fata kɛ sran nga i waan ɔ́ kplán sua’n ɔ ‘tran ase bu i sika’n i akunndan’ nian sɛ ɔ́ jú i sua’n i kplanlɛ-o. Famiɛn’n kusu ɔ fata kɛ “ɔ dun mmua tran ase usa ngwlɛlɛ afɛ” naan ɔ nian sɛ ɔ kwla kun alɛ sɔ’n nin-o. (An kanngan Liki 14:27-33 nun.) I wafa kunngba’n, Zezi si kɛ sɛ sran kun waan ɔ́ káci i sɔnnzɔnfuɛ’n, ɔ fata kɛ ɔ tran bu like ng’ɔ fata kɛ ɔ yo’n i sin kpa. I sɔ’n ti’n, ɔ fata kɛ e wla be nga e kle be Biblu’n nun like’n be fanngan naan be nin e suan like lemɔcuɛ kwlaa nun. ?Wafa sɛ yɛ e kwla yo sɔ-ɔ?

6. ?Ngue yɛ e kwla yo naan sran nga e kle i like’n w’a wɔ i ɲrun-ɔn?

⁶ Sɛ i bo bolɛ nun’n an kle sran kun i like i anuan nun lɛ’n, maan amun yo naan like suanlɛ sɔ’n cɛ tra titi liɛ’n. Sɛ laa’n amun nin sran’n be koko Biblu’n nun ndɛ mma kun i su yalɛ’n, maan ɔ yo nɲɔn siɛn’n. Sɛ amun yo sɔ naan like suanfuɛ’n ɔ kanman ndɛ’n, amun usɛ i sɛ lika kun o lɛ mɔ amun kwla tran ase be suan like-o. Sɛ Biblu’n nun like suanlɛ’n ti sran sɔ’n i cinnjin annzɛ ɔ timɛn i cinnjin’n, wafa ng’ɔ́ tɛ́ amun su’n, ɔ́ yí i sɔ liɛ’n i nglo. Asa ekun’n, kɛ ɔ ko yo naan like suanfuɛ’n w’a wɔ i ɲrun ndɛndɛ’n, amun kwla usɛ i sɛ lemɔcuɛ kun nun’n, amun kwla kle i like kpɛ nɲɔn-o. Sanngɛ sran’m be like klelɛ kpɛ kun annzɛ kpɛ nɲɔn lemɔcuɛ kun nun’n, i ngunmin kwlá yoman naan sran’n w’a wɔ i ɲrun.

MAAN E SIESIE E WUN KA NAAN Y’A WƆ SRAN KUN I LIKE KLELƐ

7. ?Ka naan like klefuɛ kun w’a wɔ sran kun i Biblu’n nun like klelɛ’n, wafa sɛ yɛ ɔ kwla siesie i wun-ɔn?

⁷ E mɔ e ti like klefuɛ’n, ɔ fata kɛ e siesie e wun kpa ka naan y’a wɔ sran kun i like klelɛ. I bo bolɛ nun’n, maan e kanngan like nga é wá fá sran’n i ɲin síe su’n, nin Biblu’n nun ndɛ mma’m be nun. Kpɛkun maan ndɛ cinnjin’m be ka e klun. I sin’n, e fa e ɲin e sie i like nga é wá klé sran’n, i flɛlɛ’n, nin ndɛ ce mun, nin kosan’m be su. Asa ekun’n, e fa e ɲin e sie i Biblu’n nun ndɛ mma nga be klɛli be wun lɛ kɛ “an kanngan nun’n,” nin foto annzɛ desɛn mun, nin video nga be kwla uka e naan y’a yiyi ndɛ’n nun kpa’n, be su wie. Kpɛkun e bu like suanfuɛ’n i akunndan wie. I liɛ’n, é sí wafa nga e kwla yiyi ndɛ nun naan w’a wun i wlɛ ndɛndɛ naan w’a nanti su’n.—Nee. 8:8; Nya. 15:28a.

8. ?Ngue like yɛ Kolɔsufuɛ Mun 1:9, 10 kle e srɛlɛ m’ɔ fata kɛ e srɛ e man like suanfuɛ mun’n i su-ɔ?

⁸ Kɛ é síesíe e wun’n, maan e srɛ Zoova man like suanfuɛ’n naan e kan ninnge nga i sa mian be wun’n be ndɛ. Kpɛkun e srɛ Zoova kɛ ɔ uka e naan y’a kwla yiyi Biblu’n ndɛ’m be nun kpa naan w’a kan sran’n i awlɛn’n. (An kanngan Kolɔsufuɛ Mun 1:9, 10. nun.) Maan e bu like nga i wlɛ wunlɛ annzɛ i su falɛ kwla yo kekle man like suanfuɛ’n i akunndan. Nán e wla fi su kɛ like ng’ɔ ti cinnjin’n, yɛle kɛ e uka sran mun naan be wɔ be ɲrun lele naan be yo be batɛmun.

9. ?Wafa sɛ yɛ e kwla uka like suanfuɛ’n naan w’a siesie i wun-ɔn? An yiyi nun.

⁹ E lafi su kɛ sɛ Biblu’n nun like suanfuɛ kun suan like titi’n, ɔ́ sí like nga Zoova nin Zezi be yoli’n i su ye. Ɔ maan ɔ́ kúnndɛ kɛ ɔ́ sí be su ndɛ kpanngban ekun. (Mat. 5:3, 6) Kɛ ɔ ko yo naan like suanfuɛ’n w’a ɲan like nga e kle i’n i su ye’n, ɔ fata kɛ ɔ fɛ i ɲin sie i like ng’ɔ suan’n su kpa. I sɔ yolɛ’n nun’n, maan e yiyi nun e kle i kɛ ɔ ti cinnjin kɛ ɔ dun mmua siesie i wun ka naan w’a suan like. Yɛle kɛ ɔ kwla kanngan like ng’ɔ́ wá súan’n nun yɛ ɔ bu wafa ng’ɔ kwla nanti su’n i akunndan. ?I lɛ nun’n, wafa sɛ yɛ e kwla uka Biblu’n nun like suanfuɛ’n naan w’a siesie i wun-ɔn? Cɛn kun’n, maan e nin i e siesie e wun likawlɛ naan ɔ wun wafa nga be siesie be wun’n.d Maan e kle i wafa ng’ɔ kwla wun kosan’m be su tɛlɛ’n, nin wafa ng’ɔ kwla jaja ndɛ cinnjin mun annzɛ ndɛ ɲanman nga be kwla ukɛ i naan i wla w’a fiman kosan’m be su tɛlɛ’n su’n, be bo. Kpɛkun e wlɛ i fanngan naan ɔ tɛ kosan’m be su kɛ ng’ɔ fa ijɔ titi’n sa. I liɛ’n sɛ ɔ wun like ng’ɔ suan’n i wlɛ-o annzɛ ɔ wunmɛn i wlɛ-o é wún i wlɛ. Sanngɛ like uflɛ o lɛ m’ɔ fata kɛ e wla like suanfuɛ’n i fanngan kɛ ɔ yo-ɔ.

MAAN E WLA LIKE SUANFUƐ’M BE FANNGAN KƐ BE SRƐ ZOOVA CƐN KWLAA

10. (1) ?Ngue ti yɛ ɔ ti cinnjin kɛ e kanngan Biblu’n nun cɛn kwlakwla-ɔ? (2) ?Ngue yɛ Biblu’n nun like suanfuɛ kun kwla yo naan w’a ɲɛn i Biblu’n nun kannganlɛ’n i su ye-ɔ?

¹⁰ Kannzɛ lemɔcuɛ kwlaa nun’n e kle Biblu’n nun like suanfuɛ kun i like’n, sanngɛ ɔ fata kɛ i ngunmin yo ninnge wie mun cɛn kwlakwla. I wie yɛle kɛ maan ɔ nin Zoova be koko yalɛ. Ɔ ti cinnjin kɛ ɔ tie Zoova i ndɛ’n, sanngɛ ɔ fata kɛ ɔ kɛn i klun ndɛ kle i wie. Sɛ i waan ɔ́ tíe Ɲanmiɛn i nuan ndɛ’n ɔ fata kɛ ɔ kanngan Biblu’n nun cɛn kwlakwla. (Zoz. 1:8; Jue. 1:1-3) Maan e kle i wafa ng’ɔ kwla fa “Programme de lecture de la Bible” m’ɔ o jw.org su’n, ɔ di junman’n.e Sanngɛ sɛ e kunndɛ kɛ ɔ ɲan Biblu’n nun kannganlɛ sɔ’n i su ye’n, maan e wlɛ i fanngan kɛ ɔ bu Biblu’n i bue ng’ɔ kanngannin nun’n, ɔ nin like ng’ɔ kle i Zoova su’n, i su akunndan. Kpɛkun ɔ bu wafa ng’ɔ kwla nanti su’n i akunndan wie.—Yol. 17:11; Zak. 1:25.

11. (1) ?Wafa sɛ yɛ e kwla uka like suanfuɛ kun naan i ngunmin w’a srɛ Ɲanmiɛn-ɔn? (2) ?Ngue ti yɛ ɔ fata kɛ ɔ srɛ Zoova kpɛ sunman-ɔn?

¹¹ Maan amun wla be nga amun kle be Biblu’n nun like’n be fanngan naan be srɛ Zoova cɛn kwlakwla. Ka naan amun a kle be like’n, annzɛ kɛ amun ko wie be like kle’n, amun srɛ Zoova. Kɛ amún srɛ́’n, amun bo like suanfuɛ’m be dunman. Sɛ be fa be su be sie i amun srɛlɛ’m be bo’n, bé sí wafa ng’ɔ fata kɛ be srɛ Zoova Zezi dunman nun’n. (Mat. 6:9; Zan 15:16) Maan amun bu wafa nga Biblu’n nun kannganlɛ cɛn kwlakwla’n (mɔ yɛle Zoova i nuan ndɛ’n i tielɛ’n) nin Ɲanmiɛn srɛlɛ’n (mɔ yɛle e klun ndɛ mɔ e kan kle Zoova’n) bé wá úka like suanfuɛ’n naan w’a fɛ i wun w’a mantan Ɲanmiɛn’n, i akunndan kan be nian. (Zak. 4:8) Sɛ Biblu’n nun like suanfuɛ kun yo ninnge sɔ mun cɛn kwlakwla’n, i sɔ’n úkɛ i naan w’a fɛ i wun w’a man Ɲanmiɛn naan b’a yo i batɛmun. ?Ngue ekun yɛ ɔ kwla ukɛ i-ɔ?

MAAN E UKA LIKE SUANFUƐ’N NAAN Ɔ NIN ZOOVA BE AFIƐN MANTAN KPA

12. ?Wafa sɛ yɛ e kwla uka Biblu’n nun like suanfuɛ kun naan w’a fɛ i wun w’a mantan Zoova-ɔ?

¹² E kunndɛ kɛ Biblu’n nun like suanfuɛ’n si Zoova i su ndɛ kpanngban. Sanngɛ e kunndɛ kɛ like ng’ɔ suan’n ɔ kɛn i awlɛn’n naan ɔ nanti su wie. Zezi kleli sran’m be like kpanngban yɛ like nga be sili i’n yoli be fɛ. Sanngɛ like nga ti yɛ sran’m be suli i su’n, yɛle kɛ like ng’ɔ kleli be’n kannin be awlɛn’n. (Lik. 24:15, 27, 32) Ɔ fata kɛ amun uka be nga amun kle be like’n naan be wun i wlɛ kɛ Zoova ti sran jrɛiin kun naan be kwla fa be wun be mɛntɛn i. Asa ekun’n, maan be wun i wlɛ kɛ Zoova ti be Si, nin be Ɲanmiɛn nin be Janvuɛ. (Jue. 25:4, 5) Kɛ amún klé sran’m be Biblu’n nun like’n, maan amun fa be ɲin be sie i Ɲanmiɛn i nzuɛn’n su. (Tul. 34:5, 6; 1 Piɛ. 5:6, 7) Yalɛ kwlaa nga amún kókó nun’n, amun fa be ɲin be sie i Zoova i sran wafa ng’ɔ ti’n su. Amun uka like suanfuɛ’n naan ɔ klo Zoova i nzuɛn’n. I wie yɛle i sran klolɛ’n, nin i aklunye’n, ɔ nin i aunnvuɛ silɛ’n. Zezi seli kɛ “mmla’m be nun dan’n ɔ nin be nun klikli’n” yɛle ‘Zoova m’ɔ ti e Ɲanmiɛn’n i klolɛ’n.’ (Mat. 22:37, 38) I sɔ’n ti’n, maan e uka be nga e kle be like’n naan be klo Zoova tankaan kpa.

13. Amun kan wafa nga e kwla uka like suanfuɛ kun naan w’a klo Zoova i nzuɛn’n, i ndɛ.

¹³ Kɛ amun nin be nga amun kle be Biblu’n nun like’n bé kókó yalɛ’n, amun kan like nga ti yɛ amun klo Zoova’n i ndɛ kle be. I sɔ’n kwla uka be naan b’a wun i wlɛ kɛ ɔ fata kɛ be bɔbɔ nin Ɲanmiɛn be afiɛn mantan kpa. (Jue. 73:28) I wie yɛle kɛ sɛ an kanngannin ndɛ wie nun e fluwa’m be nun annzɛ Biblu’n nun naan ɔ yi Zoova i sran klolɛ’n, nin i ngwlɛlɛ’n, nin i sa nuan su sɛsɛ yolɛ’n, ɔ nin i tinmin’n be nglo naan i sɔ’n kannin amun awlɛn’n, an kwla bo su be kle like suanfuɛ mun. Kpɛkun an se i kɛ like nga ti yɛ amun klo amun Si m’ɔ o ɲanmiɛn su lɔ’n, be nun kun yɛle ngalɛ’n. Sanngɛ like uflɛ o lɛ m’ɔ fata kɛ like suanfuɛ kwlakwla yo naan b’a yo i batɛmun-ɔn.

MAAN E WLA LIKE SUANFUƐ’N I FANNGAN KƐ Ɔ TRAN AƝIA’M BE BO

14. ?Ngue ndɛ yɛ Ebre Mun 10:24, 25 kɛn i aɲia’m be bo kɔlɛ’n su m’ɔ kwla uka like suanfuɛ kun naan w’a wɔ i ɲrun-ɔn?

¹⁴ E kwlakwla e kunndɛ kɛ be nga e kle be like’n be wɔ be ɲrun naan be yo be batɛmun. Like cinnjin nga e kwla yo fa uka be’n, yɛle kɛ e wla be fanngan kɛ be tran aɲia’m be bo. Aniaan nga be si sran’m be like kle kpa’n, be sieli i nzɔliɛ kɛ like suanfuɛ nga be bo aɲia’m be bo kɔlɛ bo ndɛ nun’n, be kɔ be ɲrun ndɛndɛ. (Jue. 111:1) Ɔ maan aniaan wie’m be se be nga be kle be like’n be kɛ sɛ be waan bé wún Biblu’n nun ndɛ’n i wlɛ kpa’n, ɔ fata kɛ be wɔ aɲia’m be bo. I lɛ nun’n, an kanngan Ebre Mun 10:24, 25 nun be kle like suanfuɛ’n. (An kanngan nun) I sin’n, an kan mmlusuɛ nga sɛ ɔ kɔ aɲia’m be bo’n ɔ́ ɲɛ́n i’n, i ndɛ kle i. Kpɛkun an bo video nga be flɛ i kɛ ?Ngue yɛ be yo i Ɲanmiɛn Sielɛ Sua’n nun lɔ ɔ? f kle i. Asa ekun’n, amun uka like suanfuɛ’n naan ɔ tran lemɔcuɛ afiɛn nun aɲia’n i bo titi naan i sɔ’n kɛ i nun.

15. ?Ngue yɛ e kwla yo naan like suanfuɛ kun w’a tran aɲia’m be bo titi-ɔ?

¹⁵ ?Sɛ amun kle sran kun i Biblu’n nun like naan ɔ kɔman aɲia’m be bo annzɛ ɔ kpɛ aɲia’m be bo kɔlɛ nun cɛn’n, ngue yɛ amun kwla yo-ɔ? Sɛ amun suannin like kun aɲia kun bo’n, maan amun kɛn i ndɛ kle i aklunjuɛ su. Ɔ ju wie’n, i sɔ yolɛ’n ti kpa tra be yalɛ ngbɛn’n. Maan e fa Sasafuɛ Tranwlɛ’n nin Klisifuɛ mun nin be junman’n Aɲia fluwa nga e suan be nun like’n e mɛn i. Maan e bo like nga é wá yó i aɲia’n i bo lɔ cɛn uflɛ’n i su kan e kle i. Kpɛkun e usɛ i aɲia’n i bue nga kɛ ɔ niɛn i sa’n ɔ́ wá yó i fɛ kpa’n. Sɛ like suanfuɛ’n kɔ aɲia’m be bo’n, like ng’ɔ́ wá wún i’n, ɔ nin ndɛ ng’ɔ́ wá tí be’n, atrɛkpa’n ɔ nin-a wunman be annzɛ ɔ nin-a timan wie asɔnun uflɛ nun le. (1 Kor. 14:24, 25) Asa ekun’n, aɲia’m be bo’n ɔ nin aniaan mɔ be kle ajalɛ kpa’n bé sán nun yɛ i sɔ’n úkɛ i naan w’a wɔ i ɲrun naan b’a yo i Batɛmun.

16. (1) ?Ngue yɛ ɔ kwla uka Biblu’n nun like suanfuɛ kun naan b’a yo i batɛmun-ɔn? (2) ?Ngue yɛ é wá kɛ́n i ndɛ like suanlɛ nga i sin liɛ’n nun-ɔn?

¹⁶ ?Wafa sɛ yɛ e kwla uka like suanfuɛ mun naan b’a yo be batɛmun-ɔn? Maan e wla be nga e kle be Biblu’n nun like’n be fanngan kɛ be siesie be wun ka naan y’a ba be like klelɛ. I liɛ’n bé wún i wlɛ kɛ like suanlɛ’n ti cinnjin kpa. Asa ekun’n, e wla be fanngan kɛ be srɛ Zoova cɛn kwlakwla naan be nin i be afiɛn mantan kpa. Yɛ e wla be fanngan naan be tran asɔnun aɲia’m be bo. (An nian kuku nga be flɛ i kɛ “?Ngue yɛ ɔ fata kɛ like suanfuɛ kun yo naan w’a wɔ i ɲrun-ɔn?” m’ɔ o fluwa’n i bue 12 su’n i nun.) Like suanlɛ nga i sin liɛ’n nun’n, é wá kán like nnun ekun mɔ like klefuɛ’m be kwla yo naan b’a uka like suanfuɛ mun’n be ndɛ.