?Sran kun bɔbɔ yɛ maan be wu i uflɛ ɔ?
?WAN yɛ maan be wu sran kun i uflɛ ɔ? Zezi waan: ‘Saan bé wú amun ekun.’ (Zan 3:7) Kɛ Pastɛli wie’m bé wláwlá sran’m be kɛ be yo Klistfuɛ mɔ be wuli be ekun’n, Zezi i ndɛ sɔ’n su yɛ be jran ɔn. I sɔ Pastɛli’m be fa ndɛ sɔ’n be yo kɛ mmla wie sa. Ɔ ti kɛ be su se sran’m be kɛ “be wu be ekun” kekle nun sa. Ɔ maan be kle sran’m be kɛ sran kun bɔbɔ yɛ ɔ fɛ i tiaun ajalɛ kɛ ɔ́ fá Zezi ndɛ’n su naan ɔ́ yó like ng’ɔ nin i fata naan be wu i uflɛ ɔ. Sɛ e nian be ndɛ sɔ’n su’n, ɔ ti kɛ nn sran kun bɔbɔ yɛ ɔ fa ajalɛ kɛ be wu i uflɛ annzɛ nán be wu i uflɛ ɔ. ?Sanngɛ i sɔ ndɛ yɛ Zezi kan kleli Nikodɛmu ɔ?
Kɛ e kanngan ndɛ nga Zezi kannin’n nun kpa’n, e wun kɛ Zezi w’a kleman kɛ sran kun bɔbɔ yɛ ɔ fa ajalɛ kɛ be wu i uflɛ annzɛ nán be wu i uflɛ ɔ. ?Ngue ti yɛ e se sɔ ɔ? Glɛki nun ndɛ mma nga be kacili i kɛ “bé wú amun ekun’n,” be kwla kaci i ekun kɛ “ɔ fata kɛ amun awuliɛ’n fin nglo lɔ.”a I kacilɛ uflɛ sɔ’n kle kɛ awuliɛ uflɛ’n fin “Ɲanmiɛn” annzɛ “e Si.” (Zan 19:11; Zak 1:17) Nanwlɛ, awuliɛ uflɛ’n fin Ɲanmiɛn sakpa.—1 Zan 3:9.
Kɛ be se kɛ sran i awuliɛ’n ‘fin nglo lɔ’n,’ sɛ e bu i sɔ’n i sin’n, sa nga ti yɛ sran kun sa kwlá yoman naan b’a wu i uflɛ’n, i wlɛ wunlɛ su yoman ya. Wafa nga be fa wuli e bɔbɔ’n, maan e bu i akunndan e nian. ?E bɔbɔ yɛ e fali ajalɛ kɛ be wu e ɔ? Cɛcɛ! E si yɛ ɔ wuli e ɔ. I kunngba’n, saan Ɲanmiɛn m’ɔ ti e Si m’ɔ o ɲanmiɛn su lɔ’n, yɛ maan be kwla wu e uflɛ ɔ. (Zan 1:13) I sɔ’n ti akoto Piɛli seli kɛ: ‘E Min Jésus-Krist i Si Nyanmiɛn i kwla o! I aunnvuɛ silɛ dan’n ti, ɔ wuli ye ekun.’—1 Piɛr 1:3.
?Kɛ Zezi seli kɛ “saan bé wú amun ekun’n” i bo’n yɛle benin?
Sran wie’m be kwla se kɛ ‘sɛ ɔ ti su kɛ sran kun sa kwlá faman i tiaun ajalɛ kɛ be wu i ekun’n, ngue ti yɛ Zezi seli kɛ: “Saan bé wú amun ekun’n” niɔn?’ Sɛ be usa sɔ’n ɔ ti su. Afin sɛ Zezi i ndɛ’n kle kɛ ɔ fata kɛ be wu e ekun kekle nun’n, nn ɔ su se e kɛ e yo like kun mɔ e bɔbɔ e kwlá yoman ɔn. I sɔ’n kusu nin i fataman. ?Yɛ sɛ ɔ ti sɔ’n, i ndɛ ng’ɔ kɛnnin i kɛ “saan bé wú amun ekun’n,” i bo’n yɛle benin?
Kɛ e fa e ɲin e sie i wafa nga be kannin ndɛ sɔ’n i Glɛki aniɛn’n nun’n i su kpa’n, e wun kɛ ndɛ kanlɛ yɛ Zezi kannin ɔn. Nán kɛ i waan e yo like kun kekle nun ti ɔ. Maan e fa sunnzun ase nga e yiyi ndɛ sɔ’n nun: Klɔ kun su’n suklu’m be sɔnnin. Be nun kun ti ɔnvuɛ’m be liɛ. Le kun’n, gbanflɛn kaan kun m’ɔ timan ɔnvuɛ’n, ɔ se suklu’n i sunianfuɛ’n kɛ: “N kunndɛ kɛ ń klɛ́ n dunman ɔ suklu’n nun.” Suklu sunianfuɛ’n se i kɛ “saan sɛ a ti ɔnvuɛ’n yɛ a kwla klɛ ɔ dunman ɔn.” Ɔ ti weiin kɛ nán kɛ suklu sunianfuɛ’n su se i kɛ ɔ yo ɔnvuɛ kekle nun ɔn. W’a seman suklu ba’n kɛ “kaci ɔnvuɛ!” Sanngɛ like ng’ɔ fata kɛ be yo naan b’a kwla klɛ be dunman suklu sɔ’n nun’n, yɛ suklu sunianfuɛ’n su kan kle i ɔ. I kunngba’n, kɛ Zezi seli kɛ “saan bé wú amun ekun’n,” like ng’ɔ fata kɛ be yo naan b’a ‘yo mɛn nga Ɲanmiɛn sie’n i nunfuɛ’n’ i ndɛ yɛ ɔ su kan ɔn.
Ɲanmiɛn Sielɛ nga be kɛnnin i ndɛ lɛ’n, ɔ nin awuliɛ uflɛ’n ndɛ’n i ngbɛsu kun be kɔ likawlɛ. ?Yɛle kɛ ngue ti yɛ be wu sran kun i uflɛ ɔ? Sɛ e wun kosan sɔ’n i su tɛlɛ’n i wlɛ’n, i sɔ’n úka e naan kɛ be se kɛ be wu sran kun ekun’n, y’a wun i bo kpa.
[Ja ngua lɛ ndɛ’n]
a Be kacili Zan 3:3 kɛ ngalɛ’n sa Biblu’n kpanngban nun. Biblu’n kun nun’n, be kacili i kɛ: “Sɛ sran kun i awuliɛ’n finman nglo lɔ’n, ɔ kwlá yoman mɛn nga Ɲanmiɛn sie’n i nunfuɛ.”—A Literal Translation of the Bible.
[Foto, bue 6]
?Wafa sɛ yɛ e bɔbɔ e awuliɛ’n ɔ nin awuliɛ uflɛ’n be fa be wun ɔn?