?Ngue ti yɛ be wu sran kun i uflɛ ɔ?
SRAN kpanngban be bu i kɛ ɔ fata kɛ be wu sran kun ekun naan w’a ɲan anannganman nguan. Sanngɛ Zezi bɔbɔ kannin sa nga ti yɛ be wu sran kun ekun’n i su ndɛ. Maan e nian. Ɔ seli kɛ: “Sran nga b’a wu-mɛn i ekun’n, ɔ su kwlá yo-man mɛn nga Nyanmiɛn sie’n i nunfuɛ mlɔnmlɔn.” (Zan 3:3) Ɔ maan ɔ fata kɛ be wu sran kun ekun naan w’a yo Ɲanmiɛn Sielɛ’n i nunfuɛ. W’a seman kɛ ɔ fata kɛ be wu be ekun naan b’a ɲan anannganman nguan. Sran wie’m be kwla se kɛ: ‘?Sanngɛ like nɲɔn sɔ’n yɛle kɛ, maan be yo Ɲanmiɛn Sielɛ’n i nunfuɛ’n annzɛ be ɲan anannganman nguan’n, nɛ́n i kunngba’n niɔn?’ Cɛcɛ nɛ́n i kunngba’n niɔn. Kɛ be kan “mɛn nga Nyanmiɛn sie’n” i ndɛ’n, maan e wun i bo kpa naan y’a wun like nɲɔn sɔ’m be ngbaciɛ’n.
Famiɛn dilɛ kun nun’n, be nga be sie sran mun’n, be kwla fa be sunnzun awa kun. I sɔ’n ti’n, be kwla flɛ “mɛn nga Nyanmiɛn sie’n” i kɛ “Nyanmiɛn i awa.” Biblu’n kle e kɛ Zezi Klist mɔ be flɛ i ‘klɔ sran’n,’ ɔ ti Ɲanmiɛn Sielɛ’n i su Famiɛn naan ɔ nin sran uflɛ wie mun yɛ bé dí famiɛn ɔn. (Daniɛl 7:1, 13, 14; Matie 26:63, 64) Asa ekun’n, aolia nun like nga akoto Zan wunnin i nun’n, ɔ yili i nglo kɛ be nga be nin Klist bé dí famiɛn’n, ‘be fin nvle-nvle’n kwlaa nun, be aniɛn’n ti wafa-wafa, be fin mɛnmɛn’n kwlaa nun,’ yɛ “bé síe sran mun asiɛ’n su wa.” (Sa Nglo Yilɛ 5:9, 10; 20:6) Ɲanmiɛn Ndɛ’n yi i nglo ekun kɛ be nga bé dí famiɛn sɔ’n mɔ be ti sran 144.000 be flɛ be “bua akpasua kaan.” Yɛ ‘be kpɔli be ti asiɛ’n su.’—Lik 12:32; Sa Nglo Yilɛ 14:1, 3.
?Nin yɛ Ɲanmiɛn Sielɛ’n o ɔ? “Mɛn nga Nyanmiɛn sie’n,” be flɛ i ekun kɛ ‘nyanmiɛn su lɔ famiɛn diwlɛ.’ I sɔ’n kle kɛ ɲanmiɛn su lɔ yɛ Zezi nin be nga bé dí famiɛn’n, bé trán bé dí famiɛn’n niɔn. (Lik 8:10; Matie 13:11, Anuasɛ Fuflɛ) Ɔ maan Ɲanmiɛn Sielɛ’n ti awa kun m’ɔ o ɲanmiɛn su lɔ ɔ. Zezi Klist nin be nga be kpali be klɔ sran’m be nun’n, be yɛ be ti awa sɔ’n i nunfuɛ mun ɔn.
?Yɛ kɛ Zezi se kɛ saan bé wú sran kun ekun naan w’a ‘yo mɛn nga Nyanmiɛn sie’n i nunfuɛ’n’ i bo’n yɛle benin? I bo’n yɛle kɛ ɔ fata kɛ be wu sran kun ekun naan ɔ nin Klist b’a di famiɛn ɲanmiɛn su lɔ. Sɛ e waan é kpɛ́ i kpo’n, é sé kɛ sa nga ti yɛ ɔ fata kɛ be wu sran kun ekun’n, yɛle kɛ i sɔ’n yo maan klɔ sran wie’m bé kó dí famiɛn ɲanmiɛn su lɔ.
Ɔ maan y’a wun i kɛ sran i awuliɛ uflɛ’n ti cinnjin kpa naan Ɲanmiɛn yɛ ɔ siesieli i sɔ ɔ. Y’a wun i ekun kɛ i sɔ yolɛ’n yɛ maan sran wie’m bé kó dí famiɛn ɲanmiɛn su lɔ ɔ. ?Sanngɛ wafa sɛ be kwla wu sran kun ekun ɔn?
[Ndɛ kwle, bue 7]
Sa nga ti yɛ ɔ fata kɛ be wu sran kun ekun’n, yɛle kɛ i sɔ’n yo maan klɔ sran wie’m bé kó dí famiɛn ɲanmiɛn su lɔ.
[Foto, bue 7]
Zezi Klist nin be nga be kpali be klɔ sran’m be nun’n, be yɛ be ti Ɲanmiɛn Sielɛ’n i nunfuɛ mun ɔn.