Wie’m bé síe, wie’m bé dí su ye

KƐ Ɔ fɛ i akoto’m be blɛ su lele’n, Ɲanmiɛn kpa Klistfuɛ kpa wie mun asiɛ’n su wa naan be kaci i klun ba. Be ng’ɔ kpa be sɔ’n, b’a sɔnman. Kɛ mɔ Ɲanmiɛn fali be kaci i mma mun’n ti’n, b’a kaci mlɔnmlɔn. Ɔ maan, Ɲanmiɛn Ndɛ’n kan be ndɛ kɛ b’a wu be uflɛ. Like ti mɔ be wu Ɲanmiɛn sufuɛ sɔ’m be uflɛ’n, yɛle kɛ bé yó be sɔ naan b’a kwla ko di famiɛn ɲanmiɛn su lɔ. (2 Timote 2:12) Kɛ ɔ ko yo naan b’a kwla di famiɛn junman’n, kɛ be wu’n, be cɛn be nguan naan be ko tran ɲanmiɛn su lɔ. (Rɔmfuɛ Mun 6:3-5) Lɔ yɛ bé trán yɛ be nin Klist “bé síe sran mun asiɛ’n su wa-a.”—Sa Nglo Yilɛ 5:10; 11:15.

Sanngɛ, Ɲanmiɛn Ndɛ’n se ekun kɛ sran uflɛ mɔ b’a wuman be uflɛ wie’n, bé wá ɲán anannganman nguan. Biblu’n, (i bue nga be klɛli i Ebre nun nin o, i bue nga be klɛli i Glɛki nun nin o) ɔ kle kɛ Ɲanmiɛn waan ɔ́ wá dé sran akpasua nɲɔn. Yɛle kɛ akpasua kaan kun trán ɲanmiɛn su lɔ’n, yɛ sran kpanngban kpa’m be liɛ’n bé trán asiɛ’n su wa. Ndɛ nga akoto Zan klɛli ko mannin i wiengu Klistfuɛ nga be wuli be uflɛ wie’n, maan e nian. Ɔ kannin Zezi i ndɛ kɛ: “Afin i bɔbɔ fɛ i wun yili e ti tɛ naan Nyanmiɛn yaci sa nga e yoli i’n cɛ ye. Nán e [sran akpasua kaan’n] ngunmin e ti tɛ yɛ ɔ yili-ɔ, sran’m be kwlaa [sran kpanngban kpa mun] be liɛ-ɔ.”—1 Zan 2:2.

I kunngba’n, akoto Pɔlu klɛli i kɛ: “Like nga Nyanmiɛn yili be’n [sran kpanngban kpa mun], be kwlaa be wun blibli be, yɛ be minndɛ cɛn nga Nyanmiɛn wá yí i mma’m [sran akpasua kaan’n] be nglo’n.” (Rɔmfuɛ Mun 8:19-21) ?Akoto Zan nin akoto Pɔlu be ndɛ sɔ’n i bo’n yɛle benin? I bo’n yɛle kɛ, be nga be wu be ekun’n, bé káci Ɲanmiɛn i awa m’ɔ o ɲanmiɛn su lɔ’n, i nunfuɛ. ?Yɛ ngue ti ɔ? Bé yó maan sran kpanngban kpa nga bé trán asiɛ’n su wa Ɲanmiɛn i awa’n i bo’n, bé ɲán ye tititi. I sɔ’n ti’n, Zezi kleli i sɔnnzɔnfuɛ’m be kɛ be srɛ Ɲanmiɛn kɛ: ‘Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.’—Matie 6:10.

Biblu’n i bue nga be klɛli i Ebre nun’n kusu’n, ɔ kle kɛ sran akpasua nɲɔn bé wá fíte nun. I wie yɛle ndɛ nga Zoova kan kleli Zezi i nannan Abraamu’n. Maan e fa e ɲin e sie su e nian. Ɔ seli i kɛ: “Ń sín wɔ anunman’m [sran akpasua kaan’n] be nun ń yó asiɛ’n su nvle-nvle’m be kwlaa [sran kpanngban kpa mun] be ye.” (Bo Bolɛ 22:18) Abraamu i “anunman’m” be ti maan nvlenvle’m be kwlaa bé ɲán ye.

?Wan yɛle Abraamu i “anunman” sɔ mun? Be yɛle Zezi Klist nin be nga be wuli be uflɛ’n mɔ Ɲanmiɛn fali be kacili i wa’n. Akoto Pɔlu yiyili nun kɛ: “Sɛ an ti Krist liɛ’n, wuun an ti Abraam anunman.” (Galasifuɛ Mun 3:16, 29) ?Yɛ ye benin yɛ Abraamu i “anunman” sɔ mun maan sran kwlaa nga be o asiɛ’n su wa’n, bé ɲɛ́n i ɔ? Ɲanmiɛn wá bú be sran kpa yɛ bé wá trán asiɛ’n m’ɔ́ wá káci mɛn klanman’n i su tititi. Ɲanmiɛn maan jue tofuɛ Davidi seli kɛ: “Mɛn’n ɔ́ yó sran kpa’m be liɛ. Bé trán nun tititi.”—Jue Mun 37:29; Ezai 45:18; Sa Nglo Yilɛ 21:1-5.

Ɲanmiɛn su lɔ famiɛn dilɛ’n ti sran akpasua wie’m be liɛ. Sanngɛ sran kpanngban yɛ bé dí i su ye’n, asiɛ’n su wa tititi ɔ. Ye nga Ɲanmiɛn i Sielɛ’n wá mán sran mun tititi’n, maan amun bɔbɔ nin amun awlobofuɛ’m be di wie.

[Foto, bue 12]

Sran akpinngbin bé wá dí ye asiɛ’n su tititi. ?Amún trán be nun wie?