Maan e yo aɲinyiɛfuɛ nin yakpafuɛ kɛ klist sa

“An tra amun anwlɛn, mɛn nga nun wa’n, min yɛ n kwlaa-a.”—ZAN 16:33.

1. ?Wafa sɛ yɛ Zezi i ɲin yili Ɲanmiɛn lele guɛli i ti nin i bo ɔ?

ZEZI KLIST yoli Ɲanmiɛn klun sa’n blɛ kwlaa nun. W’a buman cɛn kun sa le kɛ ɔ́ kpɛ́ i Si m’ɔ o ɲanmiɛn su lɔ’n i atin srɛ. (Zan 4:34; Ebre Mun 7:26) Sanngɛ sa nga be juli i su asiɛ’n su wa’n be ti’n, aɲinyiɛfuɛ yolɛ’n w’a yoman pɔpɔ w’a mɛnmɛn i. Kɛ Zezi boli i jasin bolɛ junman’n bo’n, yɛ i kpɔfuɛ mun mɔ Satan o be nun’n, be boli i lakalɛ nin i sa nianlɛ, ɔ nin i mianmianlɛ nin i wlawlalɛ bo ɔ. Be yoli sɔ naan ɔ yaci seiin nantilɛ. (Matie 4:1-11; Lik 20:20-25) Zezi i kpɔfuɛ sɔ’m be yoli maan ɔ wunnin ɲrɛnnɛn i akunndan’n nin i wunnɛn’n nun kpa. I agualiɛ su’n, be wa kunnin i waka’n su. (Matie 26:37, 38; Lik 22:44; Zan 19:1, 17, 18) Ɔ nin i sɔ ngba’n, kannzɛ ɔ wunnin ɲrɛnnɛn dan kpa’n, sanngɛ “ɔ yoli anyinyiɛfuɛ lele ɔ fa wuli.”—An kanngan Filipfuɛ Mun 2:8 nun.

2, 3. ?Kannzɛ bɔbɔ Zezi wunnin ɲrɛnnɛn’n, ngue yɛ aɲinyiɛ ng’ɔ yili i nglo’n, ɔ kle e ɔ?

² Kɛ mɔ Zezi trannin asiɛ’n su wa’n ti’n, ɔ wunnin aɲinyiɛ’n i ngbɛsungbɛsu uflɛ mun. (Ebre Mun 5:8) Ɔ kwla yo kɛ Zoova i sulɛ nun’n, Zezi leman like fi suɛnmɛn i kun sa. Afin ɔ nin Zoova be tran mantannin kpa lele afuɛ kpanngban kpa. Kpɛkun ninnge’m be yilɛ’n nun’n, ɔ o Ɲanmiɛn wun lɛ i “sa o junman’n su.” (Nyanndra Mun 8:30) Sanngɛ kɛ ɔ kacili klɔ sran mɔ be sɛli i Ɲanmiɛn sulafilɛ’n be niannin’n, m’ɔ kwla jrannin kekle’n, ɔ kleli kɛ ɔ nanti seiin. Zezi m’ɔ ti Ɲanmiɛn i Wa’n, ɔ nin Ɲanmiɛn be afiɛn’n wa mantannin kpa ekun. ?Ngue yɛ i ajalɛ’n kle e ɔ?

³ Kannzɛ fɔ nunman Zezi nun’n, sanngɛ w’a seman kɛ ɔ́ fɛ́ i bɔbɔ i wunmiɛn liɛ’n fá nánti aɲinyiɛ su. Ɔ srɛli Ɲanmiɛn naan ɔ ukɛ i naan w’a nanti aɲinyiɛ su titi. (An kanngan Ebre Mun 5:7 nun.) E kusu sɛ e waan é nánti aɲinyiɛ su titi’n, ɔ fata kɛ e kan e wun ase yɛ e srɛ Ɲanmiɛn titi naan ɔ uka e. I sɔ’n ti’n, akoto Pɔlu mannin Klistfuɛ’m be afɔtuɛ kɛ: “An bu akunndan kunngba nga Krist-Jésus buli’n wie. [...] Ɔ yoli i wun aenvuɛ, ɔ yoli anyinyiɛfuɛ lele ɔ fa wuli.” (Filipfuɛ Mun 2:5-8) Zezi i ajalɛ liɛ’n kle kɛ kannzɛ mɛn’n ti tɛ’n, sanngɛ klɔ sran’m be kwla yo aɲinyiɛfuɛ. Sakpa, Zezi liɛ’n fɔ nunmɛn i nun. ?Sanngɛ e mɔ fɔ o e nun’n nin?

Kannzɛ fɔ o e nun’n, sanngɛ e kwla yo aɲinyiɛfuɛ

4. ?Kɛ mɔ Ɲanmiɛn mannin e atin kɛ e fa e klunklo ajalɛ’n, ngue yɛ e kwla yo ɔ?

⁴ Kɛ Ɲanmiɛn yili Adam nin Ɛvu’n, ɔ mannin be akunndan yɛ be bɔbɔ be kwla fa be klunklo ajalɛ. E kusu mɔ e ti be afinliɛ nunfuɛ’n, e kwla fa e bɔbɔ e tiaun ajalɛ wie. ?I sɔ’n i bo’n yɛle benin? Yɛle kɛ e bɔbɔ e kwla fa ajalɛ kɛ é yó sa kpa annzɛ sa tɛ. Sɛ e waan é kpɛ́ i kpo’n, yɛle kɛ Ɲanmiɛn waan sɛ e ɲin yí i annzɛ e ɲin su yimɛn i’n, ɔ ti kɛ e bɔbɔ sa. Kɛ m’ɔ ti sɔ’n ti’n, ajalɛ kwlaa nga e fa’n, é ísɛ i bo nzuɛn’n. Ajalɛ nga e fa m’ɔ kan e nzuɛn’n ɔ ti wie nin nguan ndɛ. Kusu ɔ kan be nga be mantan e’n be wie.

5. ?Kekle benin yɛ ɔ o e kwlaa e su ɔ? ?Yɛ wafa sɛ yɛ e kwla jran kekle ɔ?

⁵ Sa tɛ nun mɔ be wuli e’n ti’n, aɲinyiɛfuɛ yolɛ’n ti kekle kpa. Ɲanmiɛn i mmla’n be su nantilɛ titi’n timan pɔpɔ manman e. Pɔlu kplinnin i ɲin naan w’a kwla yo aɲinyiɛfuɛ. Ɔ klɛli i kɛ: “N wun kɛ sa uflɛ o lɛ. Min nzuɛn b’ɔ maan n yo sa tɛ’n, ɔ nin akunndan nga b’ɔ maan n klo kɛ ń yó sa kpa’n, be ti kɛ sran nnyɔn bɔ be si akplowa sa, lele n fa tɛfuɛ’n su, ɔ maan n kaci sa tɛ yofuɛ mlɔnmlɔn.” (Rɔmfuɛ Mun 7:23) Sɛ ngasi nunman lɛ’n, aɲinyiɛ’n timan kekle. ?Sanngɛ sɛ aɲinyiɛ’n nin “be nyin b’ɔ blo ninnge’m be su’n, nin akunndan nga be bu fa gua ninnge nga be wun be’n be su’n,” be yia nun’n nin, é yó i sɛ? E nzuɛn tɛ sɔ’n, ɔ fin fɔ m’ɔ o e nun’n ɔ nin “akunndan nga sran’m be bu’n.” Yɛ i tinmin’n cɛnnin kpa. (1 Zan 2:16; 1 Korɛntfuɛ Mun 2:12) Sɛ e waan é jrán kekle’n, ɔ nin i fataman kɛ e ‘anwlɛn’n yo nnyɔn-nnyɔn.’ Yɛle kɛ e dun mmua sie e awlɛn’n kɛ sa kwlaa ng’ɔ́ jú nun’n, e ɲin yí Zoova. (Jue Mun 78:8) Biblu’n nun sran nga be liɛ yoli ye afin be sieli be awlɛn’n kɛ be ɲin yí Zoova’n, be diman be yalɛ.—Ɛsdras 7:10; Daniɛl 1:8.

6, 7. Wafa nga e bɔbɔ e like suanlɛ’n kwla uka e naan y’a fa ajalɛ kpa’n, an kɛn i ndɛ.

⁶ Wafa nga e kwla sie e awlɛn’n yɛle kɛ e suan Biblu’n nin i akua’m be nun like kpa. Maan ɔ yo kɛ sa nga e su wa kɛn i ndɛ yɛ’n, e bɔbɔ yɛ e su yo like sɔ’n sa. Kɔnguɛ w’a ju, e su suan e bɔbɔ e Biblu’n nun like. E srɛ Zoova kɛ ɔ fɛ i wawɛ’n man e naan e nanti like nga e suɛn i Ndɛ’n nun’n su. Kusu’n, e sunnzunnin kɛ sɛ i lika cɛn’n, kɔnguɛ é nían flimu kun televiziɔn nun. Kannzɛ bɔbɔ e si kɛ be yo sa sukusuku nin nzaje sa mun flimu sɔ’n nun’n, sanngɛ e tili i kɛ flimu sɔ’n ti kpa.

⁷ E bu Pɔlu i afɔtuɛ ng’ɔ o Efɛzfuɛ Mun 5:3 nun’n, i su akunndan. I waan: “An ti Nyanmiɛn i sran, i sɔ’n ti’n, nán maan be ti bla nin bian kunndɛlɛ, nin sa tɛtɛ yolɛ, nin be nyin b’ɔ yi-man like’n be ndɛ fi amun nuan nun.” Kusu e ɲin kpɛn Pɔlu i afɔtuɛ ng’ɔ o Filipfuɛ Mun 4:8 nun’n, i su. (An kanngan nun.) Kɛ é bú afɔtuɛ sɔ m’ɔ fin Ɲanmiɛn’n, be su akunndan’n, e usa e wun kɛ: ‘?Sɛ min ɲinfu n fa min awlɛn nin min akunndan n sie i sɔ ninnge’m be su’n, n su fa Zezi i ɲin m’ɔ yili Ɲanmiɛn like kwlaa nun’n, i ajalɛ’n su?’ ?Ngue yɛ é yó ɔ? ?E ɲin kpa afɔtuɛ sɔ’m be su naan é nían flimu sɔ’n sakpa?

8. ?Ngue ti yɛ ɔ fataman kɛ e fa e nzuɛn’n nin Ɲanmiɛn sulɛ’n su mmla’n, e fa kan ngowa ɔ?

⁸ E ɲin nga e mian naan y’a fa Zoova i mmla’m be su’n, nán e kɛn i ase. Wie liɛ’n, e kwla bu i kɛ y’a tin naan janvuɛ tɛ tralɛ mɔ i wie yɛle be ɲin su yiyilɛ ninnge mɔ nzaje sa nin sa sukusuku o nun’n, e kwla jran be ɲrun kekle. Ɔ fata kɛ e sasa e bɔbɔ nin e mma mun Satan i akunndan tɛ’n i lika. Sran fi sa kunndɛman kɛ be guɛ i aliɛ’n nun are naan ɔ kun i. ?I kunngba’n, ɔ fataman kɛ e sasa e wun kpa Satan “b’ɔ kpɛ e gblɛ’n” i lika naan w’a saciman e?—Efɛzfuɛ Mun 6:11.

9. ?Ngue ti yɛ ɔ fata kɛ e fa ajalɛ kɛ e ɲin yí Zoova cɛn kwlaa ɔ?

⁹ E kwla se kɛ cɛn kwlaa’n, ninnge wie’m be nun’n, ɔ fata kɛ e fa ajalɛ sɛ é yó Zoova klun sa annzɛ e su yoman o. Sɛ e waan é ɲán nguan’n, ɔ fata kɛ e ɲin yi Ɲanmiɛn naan e nanti i mmla’m be su. Sɛ e yo aɲinyiɛfuɛ kɛ Klist sa ‘lele e fa wu’ bɔbɔ’n, i sɔ’n kle kɛ fiɛn nunman e Ɲanmiɛn sulafilɛ’n nun. E Ɲanmiɛn sulafilɛ kpa’n ti’n, Zoova wá mán e sasu. Zezi tali nda kɛ: “Sran ng’ɔ trɛ i anwlɛn lele ju i awieliɛ’n, ɔ́ fíte nun.” (Matie 24:13) Nanwlɛ, sɛ e waan é yó sɔ’n, ɔ fata kɛ e suan yakpa yolɛ kɛ nga Zezi fa yoli’n sa.—Jue Mun 31:25.

Yakpa yolɛ’n nun’n Zezi kleli ajalɛ kpafuɛ’n

10. ?Kekle benin yɛ ɔ kwla tin e su ɔ? ?Yɛ ngue yɛ ɔ fata kɛ e yo ɔ?

¹⁰ Mɛn nga i nun aeliɛ tɛ’n w’a sin w’a yia e yɛ’n, kɛ mɔ e o nun’n ti’n, ɔ fata kɛ e yo yakpa naan w’a saman e. Be kwla mian Klistfuɛ’m be kɛ be fa be wun wlɛ i sa tɛ yolɛ’n annzɛ Ɲanmiɛn sulɛ ng’ɔ timan su’n annzɛ kusu be nannan’m be aeliɛ’n nun. Wie liɛ kusu’n sika ndɛ’n kwla tin be su. I sɔ’n kwla yo maan e yaci Zoova i atin seiin’m be su nantilɛ. Klistfuɛ sunman be awlofuɛ’m be kle be ɲrɛnnɛn. Nvle wie’m be nun’n, suklu’m be nun be jran su kpa be kle ba’m be kɛ ndo yɛ ɔ kacili sran ɔn. Yɛ be nga be waan Ɲanmiɛn nunman lɛ’n, be su sɔn kpa siɛn’n. I sɔ sa kekle’m be ɲrun’n, e kwlá tranman lɛ sa ngbɛn. Ɔ fata kɛ e fa ajalɛ naan y’a kwla jran kekle y’a sasa e wun. Zezi i ajalɛ’n kle e wafa nga e kwla jran kekle’n.

11. ?Wafa sɛ yɛ Zezi i yakpa yolɛ ajalɛ’n i su akunndan bulɛ’n kwla man e fanngan kpa ɔ?

¹¹ Zezi seli i sɔnnzɔnfuɛ’m be kɛ: “Amún wá wún amun ɲin su kpa. Sanngɛ an tra amun anwlɛn, mɛn nga nun wa’n, min yɛ n kwlaa-a.” (Zan 16:33) Zezi w’a lomɛn i wun w’a manman mɛn tɛ nga le. W’a kplinman su le kɛ mɛn tɛ nga, ɔ yo naan ɔ jrɛn i jasin fɛ’n i bolɛ’n, annzɛ ɔ kɛn i Ɲanmiɛn’n sulɛ’n nin i nzuɛn kpa’n be ase. Maan e yo kɛ i sa wie. Cɛn kun mɔ Zezi srɛ́ Ɲanmiɛn’n, ɔ kɛnnin i sɔnnzɔnfuɛ’m be ndɛ kɛ: “Be ti-man mɛn nunfuɛ kɛ n kusu n ti-man mɛn nunfuɛ’n sa.” (Zan 17:16) Sɛ e suan Klist i yakpa yolɛ ajalɛ’n i su like naan e bu su akunndan’n, ɔ́ mán e fanngan nga ɔ nin i fata’n naan y’a yoman mɛn’n nunfuɛ.

Maan e sɔnnzɔn Zezi i yakpa yolɛ’n

12-14. An kan sunnzun ase wie mɔ be nun’n Zezi yoli yakpafuɛ’n be ndɛ.

¹² Zezi i jasin fɛ’n bolɛ junman dilɛ’n nun’n, ɔ yoli yakpa dan. Kwlalɛ nga i m’ɔ ti Ɲanmiɛn i Wa’n ɔ le i’n, ɔ jrannin su. Ɔ maan yakpa su ɔ “wluli Nyanmiɛn i sua’n nun naan w’a fuan be kwlaa nga be yo like atɛ lɔ’n, nin be nga be to like’n, yɛ ɔ su sika mma kacifuɛ’m be tabli’n nin be nga be yo okunmomo atɛ’n be bia’m be bo guali.” (Matie 21:12) Kɔnguɛ kasiɛn ka naan b’a kun i’n, kɛ sonja’m be bɛli i tralɛ’n, yakpa su ɔ fɛli i wun kleli naan w’a sɛsɛ i sɔnnzɔnfuɛ mun. Ɔ seli kɛ: “Sɛ min yɛ an kunndɛ min’n, an yaci be nga’m be nun maan be wɔ.” (Zan 18:8) I sin’n, ɔ seli Piɛli kɛ ɔ fɛ i tokofi’n wlɛ i bua’n nun. I sɔ’n nun’n, Zezi kleli kɛ nán sran’m be alɛ ninnge’m be su yɛ ɔ lafi ɔ. Sanngɛ Zoova su yɛ ɔ lafi ɔ.—Zan 18:11.

¹³ Zezi yiyili i blɛ su ato like klefuɛ nin be like klelɛ’n be bo yakpa su. Ɔ seli be kɛ: ‘Amun mmla klefuɛ mun nin Farizifuɛ mun amun ti dunman klofuɛ mun’n, an yako! Yɛlɛ kɛ an man-man sran’m be atin kɛ be fa be wun man Nyanmiɛn kɛ ɔ sie be. An yaci mmla ng’ɔ ti cinnjin’n, nin nanwlɛ dilɛ’n, nin aunnvuɛ silɛ’n, ɔ nin sa kpa yolɛ’n. An wunnzin klowa nin talie’m be sin’n, sanngɛ like nga an nyɛnnin i wue kekle su amun konvi kpli’n ti’n yɛ ɔ o nun-ɔn.’ (Matie 23:13, 23, 25) Ɔ fatali kɛ Zezi i sɔnnzɔnfuɛ’m be yo yakpa kɛ i sa. Afin Ɲanmiɛn sulɛ ng’ɔ timan su’n, i kpɛnngbɛn’m bé wá klé be ɲrɛnnɛn yɛ bé kún be nun wie mun.—Matie 23:34; 24:9.

¹⁴ Mmusu’m be bɔbɔ’n, Zezi jrannin be ɲrun yakpa su. Cɛn kun’n, ɔ nin bian kun mɔ mmusu’m b’a saci i tɛ kpa mɔ i ti sran fi kwlá faman jrɔkɔ cimɛn i’n, be yiali. Sanngɛ srɛ w’a kunman Zezi, ɔ fuannin mmusu sɔ mɔ be o bian’n i su’n. (Mark 5:1-13) Andɛ’n, Ɲanmiɛn w’a manman Klistfuɛ’m be tinmin naan be yo i sɔ abonuan sa’n wie. Sanngɛ e jasin fɛ’n bolɛ’n nin e like klelɛ nun’n, ɔ fata kɛ e nin Satan m’ɔ ‘saci be nga be lafiman Nyanmiɛn su be akunndan’n,’ e kun. (2 Korɛntfuɛ Mun 4:4) Kɛ Zezi liɛ’n sa’n, like nga e fa kun alɛ’n “be fin-man sran, be fin Nyanmiɛn, be ti kekleke, ɔ maan be kwla bu awa ngblingbli mun.” (2 Korɛntfuɛ Mun 10:4) Sɛ e fa alɛ ninnge nga Ɲanmiɛn fa mannin e sɔ’n e di junman’n, é sí wafa nga Zezi dili junman’n, kpɛkun é yó kɛ i sa.

15. ?Zezi i yakpa yolɛ’n takali ngue su?

¹⁵ Zezi i yakpa yolɛ’n w’a takaman i bɔbɔ i wunmiɛn’n su. Sanngɛ ɔ takali i Ɲanmiɛn sulafilɛ’n su. Maan e kusu e liɛ’n yo sɔ wie. (Mark 4:40) ?Wafa sɛ yɛ e Ɲanmiɛn sulafilɛ’n kwla taka kpa ɔ? I sɔ’n nun’n, Zezi i ajalɛ’n kwla uka e ekun. Ɔ sili Ɲanmiɛn Ndɛ’n kpa yɛ ɔ fɛli i wla’n kwlaa guali su. Ɲanmiɛn Ndɛ’n m’ɔ ti kɛ Ɲanmiɛn wawɛ’n i tokofi sa’n, Zezi fa dili junman kpa kɛ alɛ ninnge wie sa. Blɛ kwlaa nun kɛ ɔ́ klé like’n, ɔ boli Ɲanmiɛn Ndɛ’n su fa kleli kɛ i ndɛ’n ti nanwlɛ. Blɛ sunman nun’n, ka naan w’a kan ndɛ’n, ɔ dun mmua se kɛ “be klɛli i kɛ.” I bo’n yɛle kɛ be klɛli i Ɲanmiɛn Ndɛ’n nun kɛ.a

16. ?Wafa sɛ yɛ e kwla yo naan y’a lafi Ɲanmiɛn su kpa ɔ?

¹⁶ Sɛ e waan e Ɲanmiɛn sulafilɛ’n taka kpa naan y’a kwla jran sa nga be tɔ e su’n be ɲrun’n, ɔ fata kɛ e kanngan Biblu’n nun yɛ e suan nun like cɛn kwlaa. Ɔ fata kɛ e wɔ Klistfuɛ aɲia’m be bo, yɛ e fa ndɛ nanwlɛ’n sie i e awlɛn’n nun. I sɔ ninnge’m be su yɛ e Ɲanmiɛn sulafilɛ’n taka ɔ. (Rɔmfuɛ Mun 10:17) Asa kusu’n, ɔ fata kɛ e bu ninnge nga e suan be’n, be su akunndan kpa naan be ka e awlɛn’n nun. Saan sɛ e Ɲanmiɛn sulafilɛ’n i ɲin fite e nzuɛn’n nun’n, yɛ é kwlá fá ajalɛ juejue su ɔ. (Zak 2:26) Ɔ fata wie kɛ e srɛ Ɲanmiɛn naan ɔ fɛ i wawɛ’n man e. Afin, Ɲanmiɛn sulafilɛ’n ti sa nga Ɲanmiɛn wawɛ’n maan sran yo’n i wafa’n kun.—Galasifuɛ Mun 5:22.

17, 18. ?Wafa sɛ yɛ aniaan bla talua kun yoli yakpafuɛ suklu lɔ ɔ?

¹⁷ Aniaan bla kaan kun mɔ be flɛ i Kiti’n, ɔ wunnin i kɛ Ɲanmiɛn sulafilɛ kpa’n maan be yo yakpa. I kaan nun’n, ɔ si kɛ ɔ fataman kɛ ‘nyannzuɛn kun i Jasin fɛ’n bolɛ nun’ suklu lɔ. Ɔ maan, ɔ kunndɛli kɛ ɔ́ bó jasin fɛ’n klé i wiengu suklu ba mun. (Rɔmfuɛ Mun 1:16) Afuɛ kwlaa’n, ɔ fa ajalɛ kɛ ɔ́ míɛn i ɲin bó jasin fɛ’n klé i wiengu. Sanngɛ ɔ ɲɛnmɛn i wun wunmiɛn. Kɛ ɔ dili afuɛ nɲɔn kun’n, ɔ ɔli suklu uflɛ nun. Ɔ maan, ɔ seli i wun kɛ: “Afuɛ’n liɛ’n, ḿ mían min ɲin naan jasin fɛ’n nga m’an kwlá bomɛn i laa’n, ḿ bó.” Kiti srɛli Ɲanmiɛn naan ɔ yo yakpafuɛ, ɔ yo sran diin yɛ ɔ yo naan ɔ ɲan jasin fɛ’n i bolɛ’n i wun atin.

¹⁸ Le kunngba nga be boli suklu’n i bo’n, be seli suklu ba’m be kɛ be kan be bɔbɔ be wun ndɛ. Be nun sunman be kannin be Ɲanmiɛn sulɛ wafa’n i ndɛ. Yɛ be kan guali su kɛ be faman be wun wlɛmɛn i be Ɲanmiɛn sulɛ sɔ’n nun kpa. Kiti wunnin i wlɛ kɛ jasin fɛ’n bolɛ’n i wun atin ng’ɔ kunndɛ mɔ i ti yɛ ɔ srɛli Ɲanmiɛn’n yɛle ngalɛ’n. Kɛ ijɔlɛ’n toli i’n, yakpa su ɔ seli kɛ: “N ti Zoova i Lalofuɛ, like nga n jran su min nzuɛn’n nin min Ɲanmiɛn sulɛ’n nun’n, yɛle Biblu’n.” Kɛ ɔ́ kɛ́n i ndɛ’n kɔ́’n, wie’m be yoli be ɲrun’n kɛ i Ɲanmiɛn sulafilɛ liɛ’n timan kpa sa. Sanngɛ wie’m be sieli be su i nuan bo yɛ i sin’n be usɛli i kosan. Like klefuɛ’n bɔbɔ seli kɛ, kɛ be se kɛ sran kun kɛn i Ɲanmiɛn sulafilɛ’n i ndɛ kpa’n, yɛle Kiti liɛ’n. Zezi i yakpa yolɛ ajalɛ mɔ Kiti niannin su’n, ɔ yoli Kiti fɛ kpa.

Maan e yi Klistfuɛ’m be Ɲanmiɛn sulafilɛ’n nin be yakpa yolɛ’n i nglo

19. (a) ?Kɛ be se kɛ sran kun lafi Ɲanmiɛn su kpa’n, i bo’n yɛle benin? (b) ?Ngue yɛ e kwla yo naan Zoova i klun w’a jɔ ɔ?

¹⁹ Akoto’m be wunnin i wlɛ kɛ ɔ fata kɛ be yakpa yolɛ’n taka be Ɲanmiɛn sulafilɛ’n su. Ɔ maan be srɛli Zezi kɛ: “Man e anwlɛn maan e lafi Nyanmiɛn su kpa.” (An kanngan Lik 17:5, 6 nun.) Kɛ be se kɛ sran kun lafi Ɲanmiɛn su’n, nɛ́n i yɛle kɛ ɔ si kɛ Ɲanmiɛn o lɛ’n. Ɔ tra ngalɛ’n. Yɛle kɛ sran sɔ’n nin Zoova be afiɛn’n mantan kpa. Kɛ nga bakan kun nin i si be sran nɲɔn’n be afiɛn mantan kpa’n sa. Ɲanmiɛn maan Salomɔn klɛli i kɛ: “Min wa, sɛ a yo ngwlɛlɛfuɛ’n yɛ n kusu n klun jɔ́-ɔ. Sɛ a di nanwlɛ’n, n klun jɔ́ kpa!” (Nyanndra Mun 23:15, 16) I kunngba’n, e ɲin mɔ e mian naan y’a nanti Zoova i mmla’m be su’n, ɔ jɔ i klun. Kpɛkun i sɔ’n maan e yakpa yolɛ’n uka su. I ti’n, maan e fa Zezi i ajalɛ’n su titi. Yakpa su e yo sa ng’ɔ ti kpa’n!

[Ja ngua lɛ ndɛ’n]

?Amun kwla yiyi nun?

• ?Ngue yɛ ɔ kwla uka e naan kannzɛ fɔ o e nun’n, y’a yo aɲinyiɛfuɛ titi ɔ?

• ?Ngue su yɛ Ɲanmiɛn sulafilɛ kpa’n taka ɔ? ?Yɛ wafa sɛ yɛ i sɔ’n kwla uka e naan y’a yo yakpa ɔ?

• ?Sɛ e ti aɲinyiɛfuɛ naan e yi Klistfuɛ nzuɛn kɛ yakpa yolɛ sa’n i nglo’n, ngue yɛ é ɲɛ́n i ɔ?

[Foto, bue 16]

?E su sie e awlɛn’n naan y’a kwla jran sa tɛ’m be ɲrun kekle?

[Foto, bue 18]

E yakpa yolɛ’n kwla taka e Ɲanmiɛn sulafilɛ’n su kɛ Zezi sa.