Sɛ Ɲanmiɛn wawɛ’n sie e’n, e wun nga e fa mannin Ɲanmiɛn’n é yíɛ i nuan
“An yo sa nga Nyanmiɛn Wawɛ’n kle amun’n yɛ an su yo-man like nga klɔ sran konvi sɔ i’n kun.”—GAL. 5:16.
1. ?Batɛmu benin yɛ be yoli be pantekɔtu cɛn’n nun ɔn?
KƐ BE fali Ɲanmiɛn wawɛ’n be yoli Zezi i sɔnnzɔnfuɛ’m be batɛmu’n, i sin be kannin aniɛn wafawafa mun. Be yili like nga Ɲanmiɛn wawɛ’n fa mannin be kɛ be yo’n i nglo. (1 Kor. 12:4-10) ?Ta benin yɛ like sɔ mɔ Ɲanmiɛn fa mannin be’n, ɔ nin akoto Piɛli i ijɔlɛ’n be ɲɛnnin i sran’m be su ɔ? “Ɔ yoli be [nun kpanngban] be ya [ɔ wluwluli be wun].” Piɛli wlali be fanngan kɛ be kaci be nzuɛn’n naan be yo be batɛmu kpɛkun be yoli sɔ. Be klɛli i su ndɛ kɛ: “Be bɔ be fɛli i ndɛ’n su’n, be yoli be batɛm. Cɛn sɔ’n nun’n sran bɔ be ju bɔ akpi nsan (3000) kun be ukali be su.” (Yol. 2:22, 36-41) Kɛ nga Zezi fa kannin’n sa’n, be yoli be batɛmu nzue’n nun e Si Ɲanmiɛn nin i Wa’n ɔ nin i wawɛ’n be dunman nun.—Mat. 28:19.
2, 3. (a) Ngbaciɛ ng’ɔ o batɛmu nga be fa Ɲanmiɛn wawɛ’n be yo’n, ɔ nin nga be yo i Ɲanmiɛn wawɛ’n i dunman nun’n be afiɛn’n, an yiyi nun. (b) ?Ngue ti yɛ be nga be kaci Klistfuɛ kpa andɛ’n, ɔ fata kɛ be yo be batɛmu nzue’n nun ɔn?
2 ?Sanngɛ ngbaciɛ o batɛmu nga be fa Ɲanmiɛn wawɛ’n be yo’n, ɔ nin nga be yo i Ɲanmiɛn wawɛ’n i dunman nun’n be afiɛn? Ɛɛn. Be nga be fali Ɲanmiɛn wawɛ’n be yoli be batɛmu’n, be wuli be ekun kɛ Ɲanmiɛn i mma mun sa. (Zan 3:3) Be kpali be sieli be ngunmin naan be di famiɛn yɛ be di Ɲanmiɛn ɲrun jranfuɛ junman’n wie Ɲanmiɛn i Sielɛ m’ɔ o ɲanmiɛn su lɔ’n nun. Be nin Klist b’a kaci sran wunmuan. (1 Kor. 12:13; Gal. 3:27; Ngl. 20:6) Ɔ maan, pantekɔtu nun’n, kpɛkun kɛ pantekɔtu’n sinnin’n Zoova fali sran wie’m be kɛ be ɲan like nga i waan ɔ́ fá mán Klist wie. Batɛmu mɔ be fa Ɲanmiɛn wawɛ’n be yo’n, yɛ ɔ fa yoli i sɔ sran mun ɔn. (Rɔm. 8:15-17) ?Sanngɛ yɛ nzue nun batɛmu nga be yo i Ɲanmiɛn wawɛ’n i dunman nun mɔ be yo i Zoova i nvlefuɛ’m be aɲia dandan’m be bo andɛ’n nin?
3 Be yo Klistfuɛ kpa’m be batɛmu nzue’n nun be fa kle kɛ b’a fa be wun b’a man Ɲanmiɛn Zoova mlɔnmlɔn. I kunngba’n wie yɛ be nga bé kɔ́ ɲanmiɛn su’n be yo ɔ. Sanngɛ ɔ ti cinnjin kɛ e blɛ liɛ nga su’n, sran miliɔn kpanngban mɔ be wla o su kɛ bé trán asiɛ’n su wa tititi’n, be yo be batɛmu nzue nun wie. Kannzɛ sran kun kɔ́ ɲanmiɛn su o, annzɛ ɔ́ trán asiɛ’n su o, ɔ fata kɛ ɔ yo naan be yo i batɛmu nzue nun “e Si Nyanmiɛn, nin i Wa’n, ɔ nin i Wawɛ’n be dunman nun” naan Ɲanmiɛn w’a sɔ i nun klanman. Ɔ fata kɛ Klistfuɛ’m be kwlaa nga be ko yo be batɛmu sɔ’n, be yo ‘sa nga Nyanmiɛn Wawɛ’n kle be’n.’ (An kanngan Galasifuɛ Mun 5:16 nun.) ?Amun su yo like nga Ɲanmiɛn wawɛ’n kle amun kɛ amun yo naan amun a kwla yia amun wun Ɲanmiɛn fa manlɛ’n i nuan?
Wafa nga ‘e yo sa nga Nyanmiɛn wawɛ’n kle e’n’
4. ?Kɛ be se kɛ ‘e yo sa nga Ɲanmiɛn wawɛ’n kle e’n’ i bo’n yɛle benin?
4 ‘Sa nga Ɲanmiɛn wawɛ’n kle e’n i yolɛ’n’ i wie yɛle kɛ e yaci Ɲanmiɛn wawɛ’n i nun naan ɔ di junman e nun. Yɛle kɛ e mɛn i atin naan ɔ sie e. Annzɛ kusu yɛle kɛ maan Ɲanmiɛn wawɛ’n kle e atin ninnge kwlaa nga e yo be’n, be nun. Ngbaciɛ ng’ɔ o sran nga Ɲanmiɛn wawɛ’n sie i’n, ɔ nin sran nga klɔ sran nzuɛn’n sie i’n be afiɛn’n, Galasifuɛ Mun ndɛ tre 5 fa e ɲin sie su.—An kanngan Galasifuɛ Mun 5:17, 18 nun.
5. ?Sɛ Ɲanmiɛn wawɛ’n sie e’n, ninnge benin mun yɛ e su yoman ɔn?
5 Sɛ Ɲanmiɛn wawɛ’n sie e’n, i liɛ’n e mian e ɲin naan y’a faman klɔ sran nzuɛn’n su. Klɔ sran nzuɛn sɔ’n yɛle “bla nin bian kunndɛlɛ, sa tɛtɛ yolɛ, wlaka bolɛ, amuɛn sɔlɛ, bae dilɛ, sran kpɔlɛ, ɔ nin utre. Be nyin ci be wiengu, be fa ya, be bo ti-man kun, be bubu be wun nun, be lɛ konvi, be nɔn nzan bo, be yo sa finfin mun.” (Gal. 5:19-21) Sɛ é kwlá sé’n, ɔ ti kɛ ‘Nyanmiɛn Wawɛ’n i fanngan nun e wla e nyoliɛ tɛtɛ’m be ase’ sa. (Rɔm. 8:5, 13) I sɔ’n úka e naan y’a fa e ɲin y’a sie i sa nga Ɲanmiɛn wawɛ’n kle e’n su naan y’a yaci i nun naan w’a sie e. Ɔ maan e su yaciman e wun lɛ naan like nga klɔ sran konvi sɔ i’n ɔ sie e.
6. Like ng’ɔ ti cinnjin kɛ e ɲɛn i naan y’a kwla yo sa nga Ɲanmiɛn wawɛ’n maan sran yo’n, an fa sunnzun ase kun be yiyi nun.
6 Kɛ Ɲanmiɛn wawɛ’n sie e’n, e yi nzuɛn nga be ti kɛ Ɲanmiɛn liɛ’n sa’n mɔ yɛle “sa nga Nyanmiɛn Wawɛ’n maan sran yo’n” be nglo. (Gal. 5:22, 23) Sanngɛ e wun i wlɛ kɛ ɔ fata kɛ e mian e ɲin naan y’a kwla yo i sɔ liɛ’n. I su sunnzun ase yɛ: Sɛ fie difuɛ kun di fie’n, ɔ ti weiin kɛ ɔ fata kɛ wia’n bo su naan nzue tɔ su. Sɛ w’a yoman sɔ’n, fie’n su yoman ye. E kwla fa Ɲanmiɛn wawɛ’n e sunnzun wia m’ɔ bo’n. Ɔ fata kɛ e ɲan Ɲanmiɛn wawɛ’n naan y’a kwla yi sa nga ɔ yo maan sran yo’n i nglo. ?Sanngɛ sɛ fie difuɛ’n w’a diman junman kpa’n, ngue yɛ ɔ kwla ɲɛn i ɔ? (Nya. 10:4) Nanwlɛ, sɛ é kwlá sé’n, wafa nga e di junman e awlɛn m’ɔ ti kɛ asiɛ sa’n i su’n, yɛ maan é yí sa nga Ɲanmiɛn wawɛ’n maan sran yo’n i nglo kpa, annzɛ e su yimɛn i nglo kpa ɔ. I sɔ’n ti’n, maan e usa e wun kɛ: ‘?E nin Ɲanmiɛn wawɛ’n e di junman naan y’a kwla yi sa ng’ɔ yo maan sran yo’n i nglo?’
7. ?Sɛ e waan é yó sa nga Ɲanmiɛn wawɛ’n maan sran yo’n, ngue ti yɛ Biblu’n nun like suanlɛ’n nin i su akunndan bulɛ’n ti cinnjin ɔn?
7 Sɛ fie difuɛ’n kunndɛ kɛ i fie’n yo ye’n, ɔ fata kɛ ɔ gua su nzue wie. Sɛ e kunndɛ kɛ é yó like nga Ɲanmiɛn wawɛ’n maan sran yo’n, ɔ fata kɛ e ɲan ndɛ nanwlɛ ng’ɔ o Biblu’n nun m’ɔ ti kɛ nzue sa’n. E kwla ɲɛn i Klistfuɛ asɔnun’n nun andɛ. (Eza. 55:1) Atrɛkpa’n amun a kan b’a kle sran kpanngban kɛ Ɲanmiɛn wawɛ’n yɛ maan be klɛli Biblu’n niɔn. (2 Tim. 3:16) Asa ekun’n, sran kpa nanwlɛfuɛ m’ɔ si ngwlɛlɛ’n uka e naan y’a wun Biblu’n nun nanwlɛ m’ɔ ti kɛ nzue kpa m’ɔ mian e sa sa’n, i wlɛ kpa. (Mat. 24:45-47) E wun ndɛ sɔ’n i bo weiin. Yɛle kɛ sɛ e klo kɛ Ɲanmiɛn wawɛ’n sie e’n, ɔ fata kɛ e kanngan Ɲanmiɛn Ndɛ’n nun naan e bu su akunndan. Sɛ e su yo sɔ’n, nn e su sɔnnzɔn Ɲanmiɛn nuan ijɔfuɛ’m be ajalɛ kpa’n. Ndɛ nga be fa man be’n, “be buli [...] i akunndan kpa, be kunndɛli kɛ bé wún i wlɛ weiin kpa.” Ɔ fata kɛ e sie i nzɔliɛ kɛ anzi mun bɔbɔ’n, osu nga be seli kɛ ɔ́ bá’n, ɔ nin Klistfuɛ nga be kpali be sieli be ngunmin’n be akpasua’n i su ndɛ nanwlɛ’n, be kloli kɛ bé wún be wlɛ.—An kanngan 1 Piɛr 1:10-12 nun.
?Wafa sɛ yɛ Ɲanmiɛn wawɛ’n sie e ɔ?
8. ?Ngue ti yɛ ɔ ti cinnjin kpa kɛ e srɛ Zoova kɛ ɔ fɛ i wawɛ’n man e ɔ?
8 Ɔ nunman nun kɛ e suan Ɲanmiɛn Ndɛ’n nun like naan e bu su akunndan sa ngbɛn. Ɔ fata kɛ e srɛ Zoova titi naan ɔ uka e yɛ ɔ kle e atin. Zoova kwla “yo sa dan tra like nga e srɛ i kɛ ɔ yo’n i kwlaa, ɔ nin like nga e bu i akunndan’n i kwlaa.” (Efɛ. 3:20; Lik 11:13) Sran kun kwla usa kɛ: “?Sɛ Ɲanmiɛn ‘si like nga n sa miɛn i wun i sin naan m’an se i’n,’ ngue ti yɛ ɔ fata kɛ n srɛ i titi ɔ?” ?Sɛ ɔ usa sɔ’n, amún tɛ́ i su sɛ? (Mat. 6:8) Like nga ti yɛ ɔ fata kɛ e yo sɔ’n, yɛle kɛ, kɛ e srɛ Zoova kɛ ɔ fɛ i wawɛ’n man e’n, e kle kɛ e lafi i su. Maan e fa sunnzun ase kun. Sɛ sran kun se e kɛ e ukɛ i’n, é yó like kwlaa nga e kwla yo’n naan y’a ukɛ i. Like nga ti yɛ maan é yó sɔ’n, yɛle kɛ ɔ seli e kɛ e ukɛ i. I sɔ’n kle kɛ ɔ lafi e su. (An nian Nyanndra Mun 3:27.) I kunngba’n, kɛ e srɛ Zoova kɛ ɔ fɛ i wawɛ’n man e’n, ɔ yo i fɛ yɛ ɔ fa man e.—Nya. 15:8.
9. ?Wafa sɛ yɛ Klistfuɛ aɲia’m be bo tranlɛ’n uka e naan Ɲanmiɛn wawɛ’n w’a sie e ɔ?
9 E kwla wun i wlɛ kpa ekun kɛ like kun ekun m’ɔ kwla yo naan Ɲanmiɛn wawɛ’n w’a sie e’n, yɛle e aɲia mun. Ɔ ti cinnjin kpa kɛ e mian e ɲin naan e tran be bo naan kɛ e ju lɔ’n, e sie e su kpa. I sɔ yolɛ’n úka e naan y’a si “Nyanmiɛn bɔbɔ i akunndan’n.” (1 Kor. 2:10) Asa ekun’n, kɛ e kɔ aɲia’m be bo mɔ e tɛ kosan’m be su’n, e ɲan su mmlusuɛ. Maan e bu aɲia nga e yoli be le mɔcuɛ nnan nga be sinnin yɛ nun’n, be akunndan e nian. ?E mannin e sa su kpɛ nɲɛ naan y’a tɛ kosan’m be su, naan y’a yi e Ɲanmiɛn sulafilɛ’n i nglo? ?E wun i wlɛ kɛ ɔ fata kɛ e bo manndrɛn i sɔ’n nun? Sɛ e wun i sɔ’n i wlɛ’n, maan e fa like nga é wá yó i le mɔcuɛ nga bé bá lɛ’n nun’n, i wun ajalɛ. Zoova wún kɛ e kunndɛ kɛ é fá e wun é wlɛ́ i aɲia’m be nun, kpɛkun ɔ́ fɛ́ i wawɛ’n mán e. Yɛ wawɛ sɔ’n úka e maan mmlusuɛ nga é ɲɛ́n i’n aɲia’m be bo tranlɛ’n nun’n, ɔ́ trátrá su.
10. ?Like nga Ɲanmiɛn wawɛ’n kle e’n i yolɛ’n i wie yɛle kɛ e yia sran’m be kɛ be yo ngue?
10 Like nga Ɲanmiɛn wawɛ’n kle e’n i yolɛ’n, i wie yɛle kɛ e sɔ yialɛ ng’ɔ o Sa Nglo Yilɛ 22:17 nun’n, i nun klanman. I waan: “Nyanmiɛn Wawɛ’n nin atɔnvlɛ’n be se kɛ: ‘Bla!’ Sran ng’ɔ ti sa sɔ’n, maan ɔ se kɛ: ‘Bla!’ Sran nga nzue we kun i’n, maan ɔ bla, maan sran ng’ɔ klo kɛ ɔ́ fá nzue ng’ɔ man nguan’n, ɔ fa, dein su fite-man nun!” Ɲanmiɛn wawɛ’n yo maan atɔnvlɛ’n i akpasua’n nunfuɛ mɔ be kpali be sieli be ngunmin’n, be su yia sran’m be kɛ be wa fa nzue ng’ɔ man nguan’n. ?Sɛ e sɔli yialɛ nga be yiali e kɛ e ‘bla’n’ i nun’n, e kusu y’a ta nda kɛ é sé kɛ “bla!” wie? Nanwlɛ kɛ e kwla di junman sɔ m’ɔ man sran’m be nguan’n wie’n, ɔ ti e cenjele like dan!
11, 12. ?Wafa sɛ yɛ Ɲanmiɛn wawɛ’n i sa o jasin fɛ’n i bolɛ junman’n nun ɔn?
11 Andɛ’n, Ɲanmiɛn wawɛ’n yɛ ɔ kle be nga be di i sɔ junman cinnjin liɛ’n, be atin ɔn. Klistfuɛ klikli’m be blɛ su’n, wafa nga Ɲanmiɛn wawɛ’n yoli maan ngaliɛ difuɛ’m be kwla boli jasin fɛ’n nvle uflɛ’m be nun’n, e kɛnngɛn i su ndɛ. “Nyanmiɛn Wawɛ’n seli [akoto Pɔlu nin i wiengu’m] be kɛ nán maan be kan Nyanmiɛn ndɛ Azi mɛn’n nun.” Kusu w’a kplinman su kɛ be wɔ Bitini. Like nga ti yɛ Ɲanmiɛn wawɛ’n waan nán be wɔ i sɔ lika’m be nun’n, e simɛn i weiin sa. Sanngɛ ɔ ti weiin kɛ Ɲanmiɛn wawɛ’n fali Pɔlu ɔli abloki m’ɔ ti jasin bowlɛ dan’n i nun lɔ. Aolia nun’n, ɔ wunnin Maseduani bian kun. Bian sɔ’n srɛli i kɛ ɔ ko uka be.—Yol. 16:6-10.
12 Andɛ’n, Zoova i wawɛ’n tinngɛ jasin fɛ nga be bo i mɛn wunmuan’n nun’n. Zoova faman aolia nun like fa kleman sran’m be atin. Sanngɛ ɔ kle be nga Ɲanmiɛn wawɛ’n o be su’n be atin. Kpɛkun Ɲanmiɛn wawɛ’n su aniaan’m be bo kɛ be yo like kwlaa nga be kwlɛ i yo jasin fɛ’n i bolɛ’n nin like klelɛ’n nun. Atrɛkpa’n, amun di junman cinnjin sɔ’n wie. ?Amun kwla yo naan amun a di aklunjuɛ kpa ekun junman fɛfɛ sɔ’n i dilɛ’n nun?
13. ?Wafa sɛ yɛ e kwla fa atin nga Ɲanmiɛn wawɛ’n kle e’n su ɔ? An fa sa kun yiyi nun.
13 Sɛ e nanti ndɛ nga be fa kle Ɲanmiɛn i sran’m be su’n, Ɲanmiɛn wawɛ’n kwla sie e. Maan e nian talua kaan kun m’ɔ suan Mihoko m’ɔ fin Zapɔn’n, i ndɛ’n. Kɛ ɔ yoli atin bofuɛ uflɛuflɛ’n, ɔ yoli i kɛ ɔ siman sran’m be osu nian sa. Ɔ buli i kɛ ɔ siman wafa ng’ɔ kwla kan ndɛ naan ndɛ sɔ’n w’a lo awlofuɛ’n. I sɔ blɛ’n nun’n, be kleli wafa nga e kwla nian sran’m be osu kpe kan’n i wun ajalɛ Ɲanmiɛn Sielɛ Blɛ junman fluwa’n nun. I sin be wa yili fluwa kun. Be flɛ i Une vie pleinement satisfaisante : Comment ? Fluwa sɔ’n yoli be nga be bo jasin fɛ’n Zapɔnfuɛ’m be aniɛn’n nun’n, be ye kpa. Mihoko niannin ajalɛ ng’ɔ kle wafa ng’ɔ fata kɛ be fa fluwa’n be di junman’n su. I li wafa ng’ɔ fata kɛ be ko nian sran’m be osu’n yɛ ɔ fɛli i ɲin sieli su kpa ɔ. Be nga wie liɛ’n laa be su kwlá kplinman su kɛ ɔ kle be Biblu’n nun like’n, w’a cɛman yɛ ɔ boli be like klɛlɛ bo ɔ. I waan: “Be nga n kle be Biblu’n nun like’n be sɔnnin kpa. Blɛ kun nun’n be juli lele 12. Ɔ maan n se wie’m be kɛ be minndɛ kan ka naan e nin be y’a suan like!” Nanwlɛ kɛ e yo like nga Ɲanmiɛn wawɛ’n kle e’n, mɔ e fa atin nga Zoova fa kle i sufuɛ mun’n su’n, e kwla ɲan like kpanngban.
Maan e lafi Ɲanmiɛn wawɛ’n su
14, 15. (a) ?Wafa sɛ yɛ klɔ sran mɔ fɔ o be nun’n, be kwla yo be wun nga be fa mannin Ɲanmiɛn’n i nuan su sa ɔ? (b) ?Wafa sɛ yɛ e kwla ɲan janvuɛ kpafuɛ mun ɔn?
14 Ɲanmiɛn sieli e kɛ e di i junman’n, ɔ maan ɔ fata kɛ e di. (Rɔm. 10:14) Ɔ kwla yo e kɛ e simɛn i sɔ junman liɛ’n i di kpa sa. Sanngɛ kɛ nga Ɲanmiɛn fa yo be nga be kpali be sieli be ngunmin’n sa’n, Ɲanmiɛn bɔbɔ yɛ maan e kwla di i junman’n niɔn. (An kanngan 2 Korɛntfuɛ Mun 3:5 nun.) Sɛ e mian e ɲin e yo like kwlaa nga e kwlɛ i yo naan e lafi Ɲanmiɛn wawɛ’n su’n, e kwla yo e wun nga e fa mannin Ɲanmiɛn’n i nuan su like.
15 Ɔ ti su kɛ fɔ m’ɔ o e nun’n ti’n, e wun nga e fa mannin Ɲanmiɛn Zoova mɔ fɔ nunmɛn i nun’n, i nuan su sa yolɛ’n timan pɔpɔ. Like kun mɔ maan ɔ kwla yo kekle’n yɛle kɛ sran wie mɔ laa e nin be e sannin nun’n, kɛ mɔ y’a kaci e nzuɛn’n ti’n, be kwla ‘kpɛ e nzowa.’ (1 Piɛ. 4:4) Sanngɛ nán e wla fi su kɛ e wa trali janvuɛ uflɛ mun kusu. Naan e janvuɛ sɔ’m be nun cinnjin kpafuɛ mun yɛle Zoova nin Zezi Klist. (An kanngan Zak 2:21-23 nun.) Ɔ ti cinnjin kpa wie kɛ e si aniaan nga be o e asɔnun’n nun mɔ be ti e “niaan Kristfuɛ” nga be o mɛn wunmuan’n nun’n, be nunfuɛ’n. (1 Piɛ. 2:17; Nya. 17:17) Zoova fɛ́ i wawɛ’n úka e naan y’a ɲan janvuɛ mɔ bé ɲán ta kpa e su ɔ.
16. ?Ngue ti yɛ ‘sɛ e lɛ-man wunmiɛn o, e klun [kwla] jɔ’ kɛ Pɔlu sa ɔ?
16 Kannzɛ bɔbɔ e le janvuɛ asɔnun’n nun naan be uka e’n, sanngɛ sa nga be tɔ e su cɛn kwlakwla’n be ɲrun jranlɛ’n kwla yo kekle man e. Wie liɛ’n, sa ng’ɔ fata kɛ e jran be ɲrun’n, be kwla tin e su mlɔnmlɔn. Ɔ maan ɔ yo e kɛ e wunman e wun kpɔciwlɛ sa. I sɔ blɛ’n nun bɔbɔ yɛ ɔ fata kɛ e kpɛ e ɲin Zoova i wun naan e srɛ i kɛ ɔ fɛ i wawɛ’n man e ɔ. Akoto Pɔlu klɛli i kɛ: “Kɛ m bu i kɛ n lɛ-man wunmiɛn’n, i li bɔ yɛ n nyan wunmiɛn nin-ɔn.” (An kanngan 2 Korɛntfuɛ Mun 4:7-10 ɔ nin 12:10 nun.) Pɔlu si kɛ kannzɛ fanngan wie sran kun nun sɛ’n, sanngɛ Ɲanmiɛn wawɛ’n kwla wlɛ i fanngan. Ɔ maan kan kwlaa ng’ɔ yo e kɛ e su kpɔnzɔ lɛ naan ɔ fata kɛ be uka e’n, Ɲanmiɛn wawɛ’n kwla wla e fanngan. Pɔlu klɛli i kɛ ‘sɛ ɔ le-man wunmiɛn o, i klun jɔ.’ Blɛ ng’ɔ leman wunmiɛn’n yɛ ɔ wun kɛ Ɲanmiɛn wawɛ’n di junman i nun ɔn. Ɔ kwla yo amun sɔ wie!—Rɔm. 15:13.
17. ?Kɛ é mían e ɲin naan y’a ju e juwlɛ’n, wafa sɛ yɛ Ɲanmiɛn wawɛ’n kwla uka e ɔ?
17 Ɔ fata kɛ e ɲan Ɲanmiɛn wawɛ’n naan y’a kwla yo e wun nga e fa mɛnnin i’n, i nuan su like. Maan ɔ yo e kɛ e ti mmeli kun mɔ aunmuan yɛ ɔ su i bo’n, i su kpɛn’n sa. E klo kɛ é sú Zoova tititi. I sɔ’n nun’n, Ɲanmiɛn wawɛ’n ti kɛ aunmuan mɔ e kunndɛ kɛ ɔ su e bo naan y’a ju e juwlɛ klanman’n sa. E kunndɛman kɛ akunndan tɛ ng’ɔ o Satan i mɛn’n nun’n, ɔ fa e wɔ wa wɔ wa. (1 Kor. 2:12) Ɔ fata kɛ e wun aunmuan kpa ng’ɔ kwla su e bo’n naan ɔ su e bo. Aunmuan kpa sɔ’n, yɛle Ɲanmiɛn wawɛ’n. Ɲanmiɛn wawɛ’n sín Ɲanmiɛn Ndɛ’n ɔ nin Ɲanmiɛn i anuannzɛ’n mɔ i wawɛ’n sie i’n be lika, ɔ́ sú e bo atin kpafuɛ’n su.
18. ?Nda benin yɛ amun a tɛ i dɔ nga sɔ ɔ? ?Yɛ ngue ti ɔ?
18 Sɛ amun nin Zoova i Lalofuɛ mun amun suan Biblu’n nun like, naan amun nin be san nun aklunjuɛ’n nun, naan sanngɛ amun nin a faman amun wun nin a manman Ɲanmiɛn naan b’a yo amun batɛmu’n, amun usa amun wun kɛ: ‘?Ngue ti yɛ n sisi n bo yɛ?’ Sɛ amun wun junman nga Ɲanmiɛn wawɛ’n di i Zoova i klun sa yolɛ’n nun andɛ’n i wlɛ naan like ng’ɔ yo’n, ɔ yo amun fɛ’n, maan amun fa ajalɛ nga amun suɛnnin i kɛ be ti kpa’n, be su. Zoova rá amun su dan kpa. Ɔ́ tú i klun fɛ́ i wawɛ’n mán amun. Sɛ be yoli amun batɛmu w’a di afuɛ nɲɔn kun’n, nn amun a wun junman nga Ɲanmiɛn wawɛ’n di’n le. Amun a wun wafa nga Ɲanmiɛn kwla fɛ i wawɛ’n wla amun fanngan’n. Ɔ kwla yo sɔ amun ɲrun lɔ tititi. I sɔ’n ti’n, amun ta nda kɛ amún yó like nga Ɲanmiɛn wawɛ’n kle amun’n titi.
?Amun wla kwla kpɛn su?
• ?Kɛ be se kɛ ‘e yo sa nga Ɲanmiɛn wawɛ’n kle e’n’ i bo’n yɛle benin?
• ?Ngue yɛ ɔ kwla uka e naan y’a ‘yo sa nga Ɲanmiɛn wawɛ’n kle e’n’ titi ɔ?
• ?Wafa sɛ yɛ e kwla yo e wun nga e fa mannin Ɲanmiɛn’n i nuan su like ɔ?
[Foto, bue 17]
Ɔ fata kɛ e mian e ɲin naan y’a di e awlɛn’n m’ɔ ti kɛ asiɛ sa’n, i su junman.
[Foto mun, bue 18, 19]
?Ɲanmiɛn wawɛ’n sie amun?