“Nyanmiɛn wawɛ’n kunndɛ [...] Nyanmiɛn bɔbɔ i akunndan’n”
“Nyanmiɛn Wawɛ’n kunndɛ sa’n kwlaa bo’n ti’n, ɔ si Nyanmiɛn bɔbɔ i akunndan’n.”—1 KOR. 2:10.
1. ?Junman nga Ɲanmiɛn wawɛ’n di mɔ Pɔlu kɛnnin i ndɛ 1 Korɛntfuɛ Mun 2:10 nun’n yɛle benin? ?Yɛ ndɛ sɔ’n i su kosan benin yɛ e kwla usa ɔ?
JUNMAN dan nga Zoova i wawɛ’n di’n ti’n, nanwlɛ ɔ nin ase lalɛ fata! Ɲanmiɛn Ndɛ’n nun’n, be waan Ɲanmiɛn wawɛ’n ti ukafuɛ, naan ɔ ti like mɔ be fa man sran, naan ɔ di lalo naan sɛ ɔ ti sran’n, nn é sé kɛ ɔ srɛ Ɲanmiɛn man e. (Zan 14:16; Yol. 2:38; Rɔm. 8:16, 26, 27) Akoto Pɔlu kannin junman cinnjin kun ekun mɔ Ɲanmiɛn wawɛ’n di’n, i ndɛ. Ɔ seli kɛ: “Nyanmiɛn Wawɛ’n kunndɛ sa’n kwlaa bo’n ti’n, ɔ si Nyanmiɛn bɔbɔ i akunndan’n.” (1 Kor. 2:10) I sɔ’n kle kɛ Zoova fɛ i wawɛ’n tinngɛ sran mun naan b’a wun i bɔbɔ i akunndan’n i wlɛ. ?Sɛ ɔ ti kɛ Ɲanmiɛn wawɛ’n ukaman e’n, nn dɔ nga su’n, ngue cɛ yɛ e kwla si i like nga Zoova waan ɔ́ yó’n su ɔ? (An kanngan 1 Korɛntfuɛ Mun 2:9-12 nun.) Sanngɛ i sɔ’n yo maan e usa e wun kosan wie mun. Yɛle kɛ: ?Wafa sɛ yɛ ‘Nyanmiɛn wawɛ’n kunndɛ Nyanmiɛn bɔbɔ i akunndan’n’ niɔn? ?Klistfuɛ klikli’m be blɛ su’n, wan sin yɛ Zoova sinnin naan w’a yi i akunndan sɔ’n i nglo ɔ? ?E blɛ liɛ nga nun’n, wafa sɛ Ɲanmiɛn wawɛ’n kunndɛ akunndan sɔ’m be bo naan w’a wun be wlɛ ɔ? ?Andɛ’n, wan ja nun yɛ ɔ sin yɛ ɔ yo i sɔ like’n niɔn?
2. ?Like nɲɔn benin yɛ Ɲanmiɛn wawɛ’n yó mán sran mun ɔn?
2 Zezi kannin like nɲɔn mɔ Ɲanmiɛn wawɛ’n yo’n i ndɛ. Kɛ ɔ ka kaan ɔ́ wú’n, ɔ seli i sɔnnzɔnfuɛ’m be kɛ: “Sran [“Ukafuɛ,” NW] ng’ɔ́ wá úka amun’n yɛlɛ e Si i Wawɛ’n b’ɔ́ wá súnmɛn i n dunman nun’n, i yɛ ɔ́ wá klé sa’n kwlaa-a, yɛ i yɛ ɔ́ kpɛ́n amun wla ndɛ nga n kan kleli amun’n i kwlaa su-ɔ.” (Zan 14:26) I sɔ’n kle kɛ Ɲanmiɛn wawɛ’n wá klé sran’m be like, kpɛkun ɔ́ yó maan bé wlá kpɛ́n ndɛ wie’m be su. I like klefuɛ junman ng’ɔ́ dí’n, yɛle kɛ ɔ́ úka Klistfuɛ mun naan ninnge nga b’a wunman be wlɛ laa’n, be wun be wlɛ siɛn’n. Yɛ kɛ be se kɛ ɔ́ kpɛ́n be wla’n, yɛle kɛ ɔ́ úka be naan be wla kpɛn ndɛ nga be yiyili nun kleli be’n be su naan b’a nanti su kɛ ɔ nin i fata’n sa.
Klistfuɛ klikli’m be blɛ su’n
3. ?Zezi i ndɛ benin yɛ ɔ kle klɛ bé wá yí “Nyanmiɛn bɔbɔ i akunndan’n” i nglo blɛblɛblɛ ɔ?
3 Ndɛ nanwlɛ nga Zezi kan kleli i sɔnnzɔnfuɛ mun’n, be nun sunman be nin a timɛn i le. Ɔ nin i sɔ ngba’n, ng’ɔ nin i fata kɛ be kle be ekun’n, ɔ te sɔn. Zezi seli i akoto mun kɛ: “Ndɛ kpanngban kpa o n klun bɔ n waan ń kán klé amun-ɔn, sanngɛ amun ti nian kwlá sɔn-mɛn i bo kɛ é sé yɛ’n. Kɛ Nyanmiɛn Wawɛ’n b’ɔ ti Nanwlɛfuɛ’n ko ba’n, ɔ́ klé amun sa ng’ɔ ti nanwlɛ’n i kwlaa.” (Zan 16:12, 13) Ndɛ nga Zezi kɛnnin i lɛ’n kle kɛ Ɲanmiɛn wawɛ’n yíyí Ɲanmiɛn ndɛ’n mɔ i bo’n ti kploun kpa’n be nun klé be blɛblɛblɛ.
4. ?Afuɛ nga be flɛ i 33 i Pantekɔtu nun’n, wafa sɛ yɛ Ɲanmiɛn wawɛ’n kleli sran’m be like yɛ ɔ yoli maan be wla kpɛnnin ninnge’m be su ɔ?
4 Afuɛ nga be flɛ i 33 i Pantekɔtu nun’n, “Nyanmiɛn Wawɛ’n b’ɔ ti Nanwlɛfuɛ’n,” ɔ jrali Klistfuɛ ko ju 120 mɔ be yiali Zerizalɛmu lɔ’n be su. Sran kwlaa wunnin i wlɛ kɛ Ɲanmiɛn wawɛ’n yili i wun nglo. (Yol. 1:4, 5, 15; 2:1-4) Zezi i sɔnnzɔnfuɛ’m be kannin “Nyanmiɛn i abonuan sa b’ɔ yoli’n,” i ndɛ aniɛn fanunfanun nun. (Yol. 2: 5-11) Blɛ sɔ’n nun’n, like kun o lɛ m’ɔ fata kɛ be yi i nglo ɔ. Ɲanmiɛn nuan ijɔfuɛ Zoɛli dun mmua kannin kɛ Ɲanmiɛn wá fɛ́ i wawɛ’n mán sran mun. (Zoɛ. 3:1-5) Be nga be o lɛ cɛn sɔ’n nun’n, like nga be wunnin i’n, ɔ trali nga be sunnzunnin’n. Akoto Piɛli yɛ ɔ fɛli i nun ta yiyili sa ng’ɔ juli lɛ’n i nun ɔn. (An kanngan Sa Nga Be Yoli’n 2:14-18 nun.) Ɔ maan, Ɲanmiɛn wawɛ’n yoli kɛ like klefuɛ sa. Ɔ yoli maan Piɛli wunnin i wlɛ kɛ sa ng’ɔ juli Zezi i sɔnnzɔnfuɛ’m be su’n, ɔ ti Ɲanmiɛn nuan ndɛ sɔ mɔ be klɛli i laa kpa’n, i su kpɛnlɛ. Asa kusu’n, Ɲanmiɛn wawɛ’n yoli maan be wla kpɛnnin ninnge’m be su. Afin Piɛli w’a boman Zoɛli i ndɛ’n su ngunmin. Ɔ boli Jue’m be fluwa i nun ndɛ nɲɔn mɔ Davidi klɛli’n, be su. (Jue. 16:8-11; 110:1; Yol. 2:25-28, 34, 35) Be kwlaa nga be yiali lɛ’n, like nga be wunnin i, ɔ nin ndɛ nga be tili’n, be fin Ɲanmiɛn bɔbɔ.
5, 6. (a) ?Kɛ afuɛ nga be flɛ i 33 i Pantekɔtu’n sinnin’n, aenguɛ uflɛ’n i su ndɛ cinnjin benin yɛ ɔ fatali kɛ be yiyi nun ɔn? (b) ?Wan mun yɛ be mannin kosan sɔ’n su ɔ? ?Yɛ ajalɛ benin yɛ be fali ɔ?
5 Ninnge kpanngban wie’m be o lɛ m’ɔ fata kɛ be yiyi be bo kpa kle Klistfuɛ klikli mun ɔn. Ninnge sɔ’n i wie yɛle aenguɛ uflɛ mɔ kɛ ɔ fin Pantekɔtu cɛn sɔ’n nun’n, be boli i su dilɛ bo’n. ?Zuifu ɔ nin be nga be kacili Zuifu’n, be ngunmin yɛ aenguɛ sɔ’n wɔ be ɔ? ?Annzɛ aenguɛ sɔ’n wɔ be nga be timan Zuifu’n be wie? ?Yɛ Ɲanmiɛn kwla fɛ i wawɛ’n man be wie? (Yol. 10:45) ?Ɔ fata kɛ be wla yasua nga be timan Zuifu’n be klɛn naan be fa Moizi Mmla’n su? (Yol. 15:1, 5) Kosan sɔ’m be ti cinnjin kpa liɛ su. Zoova i wawɛ’n yɛ ɔ kwla yo naan b’a wun ndɛ sɔ mɔ be bo ti kploun kpa’n be wlɛ ɔ. ?Sanngɛ wan yɛ Ɲanmiɛn wawɛ’n wá yíyí ndɛ sɔ’m be nun klé i ɔ?
6 Aniaan’m be fali ndɛ sɔ’m be ɔli be nga i sɔ blɛ nun’n, be nian Ɲanmiɛn junman’n su’n, be ja su. Kɛ aniaan nga be o e Ɲrun dinfuɛ’m be anuannzɛ’n nun blɛ sɔ’n nun bé yíyí ndɛ’n nun’n, nn Piɛli nin Pɔlu nin Barnabasi be o lɛ. Wafa nga Zoova fɛli i ɲin sieli be nga be timan Zuifu mɔ b’a wlaman klɛn’n be su’n be kɛnnin i ndɛ. (Yol. 15:7-12) Aniaan’m be fali ndɛ sɔ’n be sunnzunnin Biblu’n i bue nga laa be klɛli i Ebre nun’n i nun ndɛ’n. Kpɛkun Ɲanmiɛn wawɛ’n kusu wa ukali be. Ɔ maan e Ɲrun dinfuɛ’m be anuannzɛ’n fali ajalɛ. I sin’n, be klɛli fluwa ko mannin asɔnun mun naan b’a kle be ajalɛ nga be fali’n.—An kanngan Sa Nga Be Yoli’n 15:25-30 ɔ nin 16:4, 5 be nun; Efɛ. 3:5, 6.
7. ?Ngue yɛ maan be kwla yiyili nanwlɛ ndɛ nga be bo ti kploun kpa’n be nglo ɔ?
7 Be niannin fluwa nga Ɲanmiɛn maan Zan nin Piɛli nin Zaki nin Pɔlu be klɛli be’n be nun be yiyili ndɛ cinnjin uflɛ wie’m be nun. Sanngɛ kɛ be wa wieli Biblu’n i akpasua nga be flɛ i aenguɛ uflɛ’n kwlaa klɛ’n, ninnge kɛ Ɲanmiɛn nuan ijɔlɛ nin atrɛ yilɛ’n be wa wieli. (1 Kor. 13:8) ?Ɲanmiɛn wawɛ’n klé sran’m be like yɛ ɔ́ kpɛ́n be wla sɔ titi? ?Ɔ́ úka Klistfuɛ mun titi naan be si Ɲanmiɛn bɔbɔ i akunndan’n? ?Ɲanmiɛn nuan ndɛ’n kle kɛ ɔ́ yó sɔ?
Mɛn’n i awieliɛ blɛ’n nun
8, 9. ?Mɛn’n i awieliɛ blɛ nun’n, wan mun yɛ Ɲanmiɛn bɔbɔ i akunndan’n i silɛ nun’n, sɛ é kwlá sé’n “bé kpája” ɔ?
8 Kɛ anzi kun kán mɛn’n i awieliɛ blɛ’n i ndɛ’n, ɔ seli kɛ: “Sran ngwlɛlɛfuɛ’m bé yó nyɛnmɛn kɛ nyanmiɛn su lɔ’n fa yo klanman’n sa. Be nga be kle sran’m be Nyanmiɛn i atin’n, bé kpája kɛ nzraama’m be sa tititi. [...] Yɛ be silɛ’n ɔ́ úka su.” (Dan. 12:3, 4) ?Wan mun yɛle sran ngwlɛlɛfuɛ nga be kan be ndɛ’n? ?Yɛ wan mun yɛ bé yó ɲɛnmɛn’n niɔn? Zezi kleli e ajalɛ kun ɲanndra ng’ɔ buli i awie nin awie ijre’n i su’n, i nun. Kɛ Zezi kán “mɛn’n i awieliɛ” i ndɛ’n, ɔ seli kɛ: “Sanngɛ sran nanwlɛfuɛ’m bé wá yó kɛ wia’n sa, bé kpája be Si i mɛn’n nun.” (Mat. 13:39, 43) Zezi i ndɛ’n i nun yiyilɛ nun’n, i waan ‘sran nanwlɛfuɛ’ mun yɛle “Nyanmiɛn mma mun.” Be yɛle Klistfuɛ nga be kpali be sieli be ngunmin’n.
9 ?Klistfuɛ nga be kpali be sieli be ngunmin’n, be kwlaa be yo “nyɛnmɛn”? I yo, e kwla se sɔ. Afin be kwlaa be bo jasin fɛ’n, be kle sran’m be like maan be kaci Zezi i sɔnnzɔnfuɛ. Kpɛkun be yo maan be wiengu’m be yo sran asɔnun aɲia’m be bo. I kwlaa sɔ’n nun’n, be kle Klistfuɛ’m be kwlaa be ajalɛ. (Zkr. 8:23) Sanngɛ, i kwlaa ngalɛ’n nun’n, ɔ fata kɛ mɛn’n i awieliɛ blɛ nun’n, be yiyi Ɲanmiɛn bɔbɔ i akunndan’n nun. Afin, Ɲanmiɛn nuan ndɛ nga Daniɛli kannin’n “bé yó fiawa” lele saan awieliɛ blɛ’n ɔ́ jú. (Dan. 12:9) ?Wafa sɛ yɛ Ɲanmiɛn wawɛ’n kunndɛ Ɲanmiɛn bɔbɔ i akunndan’n niɔn? ?Yɛ wan sin yɛ ɔ sin yo sɔ ɔ?
10. (a) ?Mɛn’n i awieliɛ blɛ nga nun’n, wan sin yɛ Ɲanmiɛn wawɛ’n sin naan w’a yiyi ndɛ nga be bo ti kploun’n be nun ɔn? (b) Wafa nga be yiyili Zoova i sua dan mɔ naan sran yɛ ɔ kplannin’n nun’n, an yiyi nun.
10 E blɛ nga nun’n, ɔ ju wie’n ɔ fata kɛ be yiyi Ɲanmiɛn i ndɛ wie’m be nun. Kɛ ɔ ko yo sɔ’n, Ɲanmiɛn wawɛ’n uka “sran kpa nanwlɛfuɛ b’ɔ si ngwlɛlɛ’n,” i ja nunfuɛ nga be o kan anuannzɛ’n i bo bia’n wo lɔ’n mɔ be di junman kpa’n. Ɔ yo sɔ naan b’a wun nanwlɛ nga b’a wunmɛn i wlɛ kpa laa’n i wlɛ. (Mat. 24:45; 1 Kor. 2:13) E Ɲrun dinfuɛ’m be anuannzɛ’n i nunfuɛ’m be kwlaa be bu ndɛ’n i nun yiyilɛ uflɛ sɔ’n i akunndan. (Yol. 15:6) Like nga be wun i’n, be klɛ naan aniaan’m be kwlaa b’a ɲan su ye. (Mat. 10:27) Sanngɛ kɛ lika’n kɔ́ i ɲrun’n, wie liɛ’n ɔ fata kɛ be yiyi ndɛ sɔ’n i nun uflɛ ekun. I sɔ’n nun kusu’n, e ɲrun dinfuɛ’m be anuannzɛ’n yiyi nun weiin nanwlɛ su.—An nian kuku nga be flɛ i “Wafa nga Ɲanmiɛn wawɛ’n yiyili Ɲanmiɛn i sua mɔ nán sran yɛ ɔ kplannin’n i bo’n” i nun.
Maan e ɲan junman nga Ɲanmiɛn wawɛ’n di i andɛ’n i su
11. ?Junman nga Ɲanmiɛn wawɛ’n di i Ɲanmiɛn bɔbɔ i akunndan’n i wlɛ wunlɛ nun’n, wafa sɛ yɛ Klistfuɛ’m be kwlaa be ɲan su andɛ ɔ?
11 Kɛ Ɲanmiɛn wawɛ’n yo maan e wun Ɲanmiɛn bɔbɔ i akunndan’n i wlɛ’n, Klistfuɛ kpa’m be kwlaa be ɲan su. Andɛ kusu’n, kɛ Klistfuɛ klikli’m be sa’n, e suan ninnge nga Ɲanmiɛn wawɛ’n maan e wun be wlɛ’n be su like. I sin’n, e wla kpɛn su kpɛkun e nanti su. (Lik 12:11, 12) Ɔ nunman nun kɛ e di suklu e wɔ mmua naan y’a wun Ɲanmiɛn Ndɛ’n nga be bo’n ti kploun’n, be wlɛ. (Yol. 4:13) ?Sanngɛ wafa sɛ yɛ e kwla wun Ɲanmiɛn bɔbɔ i akunndan’n i wlɛ kpa tra laa ɔ? Maan e fa e ɲin e sie i ninnge nga’m be su.
12. ?Blɛ benin nun yɛ ɔ fata kɛ e srɛ Ɲanmiɛn kɛ ɔ fɛ i wawɛ’n man e ɔ?
12 Maan e srɛ Ɲanmiɛn kɛ ɔ fɛ i wawɛ’n man e. Ka naan y’a suan Ɲanmiɛn Ndɛ’n, ɔ fata kɛ e srɛ Ɲanmiɛn naan ɔ fɛ i wawɛ’n man e naan y’a wun ninnge nga é wá súan’n i wlɛ. Kannzɛ e ngunmin yɛ e su wa suan like’n, annzɛ e su cɛman’n, sanngɛ ɔ nin i fata kɛ e yo sɔ. Srɛlɛ mɔ e kan e wun ase e srɛ Ɲanmiɛn kɛ ngalɛ sa’n, e si kɛ ɔ yo e Si m’ɔ o ɲanmiɛn su lɔ’n i fɛ dan. Ɔ maan kɛ Zezi fa kannin sa’n, srɛlɛ mɔ e tuli e klun e srɛli Zoova ti’n, i kusu ɔ́ fɛ́ i wawɛ’n mán e.—Lik 11:13.
13, 14. ?Kɛ e siesie e wun naan y’a wɔ aɲia’m be bo’n, wafa sɛ yɛ i sɔ’n uka e naan y’a wun Ɲanmiɛn ndɛ nga be bo ti kploun be bo ɔ?
13 Maan e siesie e wun naan y’a wɔ aɲia’m be bo. Sran kpa nanwlɛfuɛ’n m’ɔ si ngwlɛlɛ’n maan e ɲan ‘aliɛ blɛ ng’ɔ ti i nuan su’n i su.’ “Sran kpa nanwlɛfuɛ b’ɔ si ngwlɛlɛ’n” sɔ’n, yɛ be sieli i kɛ ɔ nian Ɲanmiɛn Ndɛ’n nun yi fluwa mun naan ɔ siesie like nga e suan’n, ɔ nin wafa nga é yó aɲia mun’n niɔn. Nanwlɛ, sɛ be se be “niaan Kristfuɛ mun” kɛ be fa be ɲin sie i ndɛ wie’m be su’n, be si like ti’n. (1 Piɛ. 2:17; Kol. 4:16; Zid 3) Sɛ e mian e ɲin naan e fa ninnge nga ɔ kle e’n su’n, ɔ kle kɛ Ɲanmiɛn wawɛ’n sie e.—Ngl. 2:29.
14 Kɛ é síesíe e wun naan y’a wɔ aɲia’m be bo’n, maan e kanngan Biblu’n nun ndɛ mma nga be o lɛ’n be nun naan e bu be su akunndan. I liɛ’n, e kwla wun wafa nga e kwla nanti like nga e su suan’n su. Sɛ e yo i sɔ blɛblɛblɛ’n, ninnge nga be bo ti kploun mɔ be o Biblu’n nun’n, e kwla wun be wlɛ. (Yol. 17:11, 12) Kɛ mɔ e dun mmua kunndɛli Biblu’n nun ndɛ mma mun’n ti’n, e si kɛ Ɲanmiɛn wawɛ’n wá yó maan e wla kpɛ́n be su. Asa kusu’n, sɛ ɔ fata kɛ e fa Biblu’n nun ndɛ mma’n e di junman’n, e wla kwla kpɛn be su.
15. ?Ngue ti yɛ ɔ fata kɛ e kanngan Biblu’n i akua’m be nun titi ɔ? ?Wafa sɛ yɛ e kwla yo naan y’a kanngan be nun titi ɔ?
15 Maan e kanngan Biblu’n i akua’m be nun titi. Biblu’n i akua wie mun’n, e nianman be nun aɲia’m be bo lɔ. Sanngɛ e bɔbɔ e kpa yolɛ ti yɛ be yili be ɔ. E Sasafuɛ Tranwlɛ’n nin e Réveillez-vous ! nga e fa man sran mun’n, kɛ bé síesíe i nun ndɛ’n bɔbɔ’n, e akunndan yɛ be bu ɔ. Mɛn nga w’a yo kekle yɛ’n nun’n, ɔ ju wie’n, ɔ fata kɛ e minndɛ sran annzɛ e minndɛ like wie. Blɛ sɔ’n nun’n, e kwla fa e Biblu’n i akua nga e nin a kannganman nun’n, annzɛ nga e nin a wieman nun kanngan bɔbɔ’n e tra nun. Sɛ e yo sɔ’n, e kwla kanngan e Biblu’n i akua’m be nun. Wie’m be liɛ nga be yo’n yɛle kɛ, kɛ bé nánti kɔ́ lika annzɛ kɛ be o be loto nun’n, be tie Biblu’n i akua nga be fa sie i CD nin kasɛti’m be su’n. Kwlaa naan b’a klɛ Biblu’n i akua mun’n, be kunndɛ be su like kpa. Sanngɛ wafa nga be klɛli’n ti’n, sran kwlaa kwla kanngan nun. Ninnge sɔ’m be kwlaa be yo maan Ɲanmiɛn ninnge nga be bo ti kploun’n, e klo be kpa ekun.—Aba. 2:2.
16. ?Kɛ é súan like’n, ngue ti yɛ ɔ ti kpa kɛ e klɛ kosan nga be ba e ti nun mɔ e wunman be wlɛ naan i sin’n y’a kunndɛ be bo ɔ?
16 Maan e bu su akunndan. Kɛ é kánngan Biblu’n annzɛ Biblu’n i akua’m be nun’n, maan e bu be su akunndan kpa. Atrɛkpa’n, kɛ é kánngan nun é kɔ́’n, ndɛ nga e kanngan nun’n ti’n, kosan wie’m be kwla ba e ti nun. Kɛ ɔ yo sɔ’n, e kwla klɛ kosan mun e sie naan sɛ ɔ yo’n y’a kunndɛ be su tɛlɛ. Blɛ sunman nun’n, kɛ é kúnndɛ ndɛ nga e wunmɛn i wlɛ kpa’n i silɛ’n, yɛ e suan like kpa ɔ. Like nga e wunnin i wlɛ lɛ’n, ɔ kaci kɛ e bɛtrɔ sa. Ɔ maan sɛ e sa mian’n, e kwla nian nun e fa.—Mat. 13:52.
17. ?Wafa sɛ yɛ amun tinuntinun amun siesieli amun bɔbɔ amun Biblu’n nun like suanlɛ’n annzɛ amun nin amun awlofuɛ’m be Biblu’n nun like suanlɛ’n niɔn?
17 Maan e sie blɛ naan e nin e awlofuɛ mun y’a su Ɲanmiɛn. E Ɲrun dinfuɛ’m be anuannzɛ’n wlali e kwlaa e fanngan kɛ le mɔcuɛ kwlaa nun’n, e fa nnɔsua kun annzɛ blɛ uflɛ naan e bɔbɔ annzɛ e nin e awlofuɛ mun e su Ɲanmiɛn. E aɲia’m be siesielɛ mɔ be siesieli be uflɛ’n ti’n, e ɲan atin naan y’a kwla nanti afɔtuɛ sɔ’n su. ?Nnɔsua nun mɔ amun nin amun awlofuɛ’m bé sú Ɲanmiɛn’n, ngue fluwa yɛ amun suan nun like ɔ? Awlofuɛ wie’m be liɛ’n, be kanngan Biblu’n nun. Kɛ bé yó sɔ’n, sɛ Biblu’n nun ndɛ mma’m be su kosan wie’m be ba be ti nun’n, kpɛkun be kunndɛkunndɛ be su tɛlɛ. I sin’n, be klɛ kosan’m be su tɛlɛ’n kpe kan, be bɔbɔ be Biblu’n liɛ’n nun. Wie’m be kusu’n, wafa nga like nga be su suan’n, ɔ kwla uka be awlofuɛ mun’n, be kɛn i ndɛ. Awlobo kpɛn wie’m be wunnin kɛ ndɛ wie’m be o lɛ’n, ɔ fata kɛ be awlofuɛ’m be fa be ɲin sie su. Ɔ maan i sɔ ndɛ mun yɛ be kpa be sie ɔ. Wie’m be kusu be awlofuɛ’m be seli be kɛ be wunman ndɛ wie’m be wlɛ. Yɛ blɛ sɔ’n nun’n, awlobo kpɛn’n yiyi ndɛ sɔ’n nun kle be. Kɛ ɔ́ yó kɔ́’n, atrɛkpa’n, amun kwla wun ndɛ uflɛ mɔ amun kwla suan be blɛ sɔ’n nun ɔn.a
18. ?Ngue ti yɛ ɔ fataman kɛ Ɲanmiɛn bɔbɔ i akunndan m’ɔ o Ɲanmiɛn Ndɛ’n nun’n be su like suanlɛ’n kun e srɛ ɔ?
18 Zezi seli kɛ Ɲanmiɛn wawɛ’n wá yó e ukafuɛ. I sɔ’n ti’n, ndɛ kploun nga be o Ɲanmiɛn Ndɛ’n nun’n, ɔ fataman kɛ be su like suanlɛ’n kun e srɛ. Nanwlɛ ndɛ sɔ’m be kwla yo naan y’a ‘kwla si Ɲanmiɛn.’ Maan e tra e awlɛn naan e kunndɛ be bo. (An kanngan Nyanndra Mun 2:1-5 nun.) Ndɛ sɔ’m be ti’n, e kwla wun like nga ‘Nyanmiɛn yo mɛnnin i klofuɛ mun’n,’ i wlɛ. Sɛ e mian e ɲin naan e suan Zoova Ndɛ’n nun like kpa’n, i wawɛ’n wá úka e. “Afin kɛ Nyanmiɛn Wawɛ’n kunndɛ sa’n kwlaa bo’n ti’n, ɔ si Nyanmiɛn bɔbɔ i akunndan’n.”—1 Kor. 2:9, 10.
[Ja ngua lɛ ndɛ’n]
a An nian Ɲanmiɛn Sielɛ Blɛ junman fluwa, afuɛ nga be flɛ i 2008, Ɔktɔblu anglo liɛ’n i bue 8 su’n, i nun.
?Amún tɛ́ su sɛ?
• ?Ajalɛ nɲɔn benin yɛ Ɲanmiɛn wawɛ’n kle e naan y’a kunndɛ “Nyanmiɛn bɔbɔ i akunndan’n” niɔn?
• ?Klistfuɛ klikli’m be blɛ su’n, wan sin yɛ Ɲanmiɛn wawɛ’n sinnin naan w’a yiyi ndɛ nga be bo ti kploun’n, be nun ɔn?
• ?Wafa sɛ yɛ Ɲanmiɛn wawɛ’n uka e naan y’a wun ndɛ wie’m be wlɛ andɛ ɔ?
• ?Ngue yɛ e kwla yo naan y’a ɲan junman nga Ɲanmiɛn wawɛ’n di’n, i su mmlusuɛ ɔ?
[Kuku, bue 30]
Wafa nga Ɲanmiɛn wawɛ’n yiyili Ɲanmiɛn i sua mɔ nán sran yɛ ɔ kplannin’n i bo’n
Klistfuɛ klikli’m be blɛ su’n, ‘Ɲanmiɛn bɔbɔ i akunndan’n’ nga be yiyili nun’n, i wie yɛle tannin sua’n, ɔ nin Ɲanmiɛn i sua’n mɔ i sin’n be kplannin’n. Sua nɲɔn sɔ’m be ti Ɲanmiɛn sulɛ nun sa cinnjin wie mɔ bé wá jú’n, be nzɔliɛ. Pɔlu kannin kɛ ɔ ti “tannin sua kpa nga nán sran yɛ ɔ kplannin bɔ e Min’n bɔbɔ yɛ ɔ kplannin’n.” (Ebr. 8:2) Ɲanmiɛn sua sɔ’n ti nzɔliɛ like. Ɔ ti ajalɛ kwlaa nga be fali naan y’a kwla fa e wun y’a mantan Ɲanmiɛn’n i nzɔliɛ. I wie yɛle e ti mɔ Zezi Klist kpɔli’n, nin Ɲanmiɛn ɲrun jranlɛ junman m’ɔ di’n.
Be kplannin “tannin sua kpa” sɔ’n i nun mɔ Zezi o asiɛ’n su wa afuɛ nga be flɛ i 29 nun’n. Afuɛ sɔ’n nun’n, be yoli Zezi i batɛmu, kpɛkun Zoova kplinnin su kɛ Zezi kunngba cɛ yɛ ɔ yi klɔ sran’m be ti tɛ ɔ, ɔ yo ye ɔ. (Ebr. 10:5-10) Kɛ Zezi wuli mɔ be cɛnnin i’n, ɔ wluli tannin sua kpa sɔ’n i nun lika mɔ be flɛ i lika kpa tra su’n i nun. Ɔ fɛli i tɛ m’ɔ yili’n i gua’n, ɔ fa “ɔli nyanmiɛn bɔbɔ’n su lɔ Nyanmiɛn wun lɔ.”—Ebr. 9:11, 12, 24.
Biblu’n i bue uflɛ nun’n, akoto Pɔlu kannin Klistfuɛ nga be kpali be sieli be ngunmin’n be ndɛ kɛ be ti ‘sua m’ɔ nyin, ɔ yo kpa, yɛ ɔ yo Nyanmiɛn i sua.’ (Efɛ. 2:20-22) ?Sua ng’ɔ kɛn i ndɛ wa’n, i kunngba’n yɛle “tannin sua kpa” nga i sin’n, ɔ kɛnnin i ndɛ fluwa nga ɔ kleli ko mannin be nga be ti Ebre mun’n i nun’n? Zoova i sufuɛ’m be buli i sɔ cɛli kpa. Be buli i kɛ blɛ mɔ Klistfuɛ nga be kpali be sieli be ngunmin’n be o asiɛ’n su wa’n, be uka be naan b’a kaci kɛ “yɛbuɛ” sa, Zoova i sua ng’ɔ o ɲanmiɛn su lɔ’n nun.—1 Piɛ. 2:5.
Sanngɛ kɛ afuɛ nga be flɛ i 1971 wá jú’n, aniaan nga be nian mɛn wunmuan’n nun junman’n su, mɔ be ti sran kpa nanwlɛfuɛ m’ɔ si ngwlɛlɛ’n i janunfuɛ’n, be wunnin i wlɛ kɛ Ɲanmiɛn sua nga Pɔlu kɛnnin i ndɛ Efɛzfuɛ Mun be fluwa nun’n, nɛ́n i kunngba’n yɛle Zoova i tannin sua kpa’n. Afin sɛ ɔ ti kɛ ‘Tannin sua kpa’n’ yɛle be nga be kpali be sieli be ngunmin mɔ be cɛnnin be ɔli ɲanmiɛn su’n, nn blɛ nga ‘e Min’n bali’ nun mɔ be boli ɲanmiɛn su kɔlɛ bo’n, yɛ be kplannin ɔn. (1 Tɛs. 4:15-17) Sanngɛ kɛ Pɔlu kannin tannin sua’n i ndɛ’n, ɔ klɛli i kɛ: ‘Tannin sua klikli liɛ’n ɔ ti blɛ nga e o nun yɛ’n liɛ’n i nzɔliɛ.’—Ebr. 9: 9.
Kɛ e nian Biblu’n nun ndɛ mma nga mun, ɔ nin Biblu’n nun ndɛ mma uflɛ wie mun ekun’n be nun’n, e wun i weiin kɛ Ɲanmiɛn i tannin sua’n m’ɔ ti nzɔliɛ like’n, nán kɛ be su kplɛn i jrɛiin sa ɔ. Kusu, e wun i kɛ be nga be kpali be sieli be ngunmin’n, be timan kɛ “yɛbuɛ” mɔ kɛ be o asiɛ’n su wa’n, be uka be naan b’a wlu sua sɔ’n nun ɔn. Sanngɛ Klistfuɛ sɔ’m be su Ɲanmiɛn i sua sɔ’n i awlo’n i klun, yɛ be su i sua’n i lika kpa’n i nun. Ɔ maan, cɛn kwlakwla be “manman Nyanmiɛn.”—Ebr. 13:15.
[Foto, bue 31]
?Wafa sɛ yɛ e kwla yo naan y’a si “Nyanmiɛn bɔbɔ i akunndan’n” i kpa y’a tra laa ɔ?