4 Ɲanmiɛn yoman sa i nuan su ?Ndɛ sɔ’n ti nanwlɛ?

Atrɛkpa’n amun a ti ndɛ nga le: “Mɛn’n wo Ɲanmiɛn i sa nun. Sa kwlaa ng’ɔ ju’n, ɔ fin i. Ɔ maan sɛ sran nun kpalɛ’n nin sa i nuan su mɔ be yoman’n nin sran mianmianlɛ’n b’a tru’n, Ɲanmiɛn ti ɔ.”

Ndɛ nga Biblu’n kan’n: Nán Ɲanmiɛn ti yɛ sran’m be yoman sa i nuan su ɔ. Biblu’n kan Zoova i ndɛ se kɛ: “Sa ng’ɔ yo be’n be ti kpa lele tra su. I atin’m be ti seiin. [...] Ɔ di-man ndɛ kwlɛ.”—Mmla’n 32:4.

Ɲanmiɛn yo sran kwlaa i klun ufue. Be nga mɔ kɛ a nian be sa’n, be nin i sɔ’n fataman bɔbɔ’n, ɔ yo be ye wie. I wie yɛle kɛ “ɔ bo wia’n man be bɔ be ti tɛ’n nin be bɔ be ti kpa’n, yɛ ɔ tɔ nzue’n man nanwlɛfuɛ nin be bɔ be ti-man nanwlɛfuɛ’n.” (Matie 5:45) Ɔ buman sran wie kpa traman wie. Kɛ Sa Nga Be Yoli’n 10:34, 35 kle sɔ ɔ. I waan: “Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.”

?Yɛ nn wan ti yɛ be yoman sa i nuan su ɔ? Sran kpanngban be bɔbɔ be fa ajalɛ kɛ be liɛ’n, be su yoman sa i nuan su, naan be su yoman sɛsɛfuɛ kɛ Ɲanmiɛn sa. (Mmla’n 32:5) Asa’n, Biblu’n kle kɛ Ɲanmiɛn mannin mmusu’m be si Satan m’ɔ ti i kpɔfuɛ’n, i atin kɛ ɔ sie mɛn’n.a (1 Zan 5:19) Sanngɛ ɔ ka kaan’n, Ɲanmiɛn yó maan Satan i sran sielɛ tɛ sɔ’n wíe. Ɲanmiɛn w’a kpɛ “sa nga mmusu’m be si Satan yo’n i nuan nnya bulɛ” i wun atin w’a sie.—1 Zan 3:8.

Wafa nga nanwlɛ’n i silɛ’n kwla yo amun ye’n: Ndrunmun dilɛ’n, nin sran mianmianlɛ’n ɔ nin ndɛ kwlɛ dilɛ’n, be su ndɛ ng’ɔ gua e su nun titi m’ɔ wieman’n ti’n, amun akunndan’n kwla sanngan. Sɛ amun si sran nga ti yɛ sran’m be yo i sɔ sa mun’n, ɔ́ yó maan amún sí like nga ti yɛ lika’n w’a saci’n. Yɛ amún wún like nga ti yɛ kannzɛ sran’m be mian be ɲin kɛ bé yó naan lika’n yo kpa’n, ɔ yoman ye’n i wlɛ. (Jue Mun 146:3) Nán amun kle amun wun yalɛ be se kɛ amún wlá amun wun ase yó ninnge mun naan mɛn nga yo kpa . Afin kannzɛ amun ɲin mianlɛ sɔ’n i bo’n gua kpa’n, ɔ su cɛman. Sanngɛ amun fa amun wla’n gua ninnge nga Ɲanmiɛn waan ɔ́ yó’n su.—Sa Nglo Yilɛ 21:3, 4.

Kɛ e si sa nga ti yɛ sran’m be yoman sa i nuan su’n, i sɔ’n kwla uka e kpa. Blɛ kekle nun bɔbɔ yɛ ɔ kwla uka e kpa ɔ. Sɛ be bu e lufle’n, e wun kwla yo e kɛ Ɲanmiɛn i sufuɛ Abakiki sa. Ɔ kpannin kɛ: “Sran’m be bu-man mmla’m i like fi kun, be di-man ndɛ nanwlɛ kun.” (Abakik 1:4) Ɲanmiɛn w’a tuman Abakiki fɔ ndɛ sɔ’n m’ɔ kannin’n ti. I kpa bɔbɔ’n, ɔ cicili i wla. Ɔ kleli i kɛ w’a sie sa sɔ’m be kwlaa be wielɛ blɛ. Yɛ ɔ ukɛli i naan blɛ kekle nun’n w’a kwla di aklunjuɛ. (Abakik 2:2-4; 3:17, 18) Kasiɛ nga Ɲanmiɛn boli i kɛ ɔ́ yó maan bé yó sa i nuan su lika kwlaa nun’n, kɛ Abakiki sa’n, sɛ amun lafi su’n, mɛn tɛ nga nun’n amun wla’n gúa ase.

[Ja ngua lɛ ndɛ’n]

[Ndɛ kwle, bue 7]

?Ɲrɛnnɛn’n nin sa i nuan su mɔ sran’m be yoman’n, be fin Ɲanmiɛn sakpa?

[Foto cifuɛ mun, bue 7]

© Sven Torfinn/Panos Pictures