Bua tafuɛ mun, an yo kɛ Zoova nin Zezi mɔ be ti bua tafuɛ dan’n be sa

1, 2. (a) ?Kɛ bua tafuɛ’n niɛn i bua’m be lika kpa’n, bua’m be yo sɛ? (b) ?Ngue ti yɛ sran’m be yoli Zezi i ɲrun kɛ bua m’ɔ be leman sunianfuɛ’n sa ɔ?

BUA nga be tafuɛ’n nian be lika kpa’n, be yo kpa. I sɔ yɛ fluwa kun m’ɔ kan bua talɛ ndɛ’n, ɔ kannin ɔn. I waan bua tafuɛ ng’ɔ fɛmɛn i ɲin siemɛn i bua’m be su m’ɔ aliɛ ngunmin yɛ ɔ man be’n, kɛ ɔ́ kɔ́ i ɲrun’n, bua’m be tɔ tukpaciɛ. Sanngɛ kɛ bua tafuɛ’n fɛ i ɲin sie i bua’m be tinuntinun be su m’ɔ nian be lika’n, bua’m be yo kpa, be lo lɔklɔɔ.

² I kunngba’n yɛle asɔnun’n i nunfuɛ’m be liɛ’n. Kɛ asɔnun kpɛnngbɛn’m be fa be ɲin sie be tinuntinun be su’n, asɔnun’n i nunfuɛ’m be su Zoova kpa. Cɛn kun’n, kɛ Zezi wunnin sran mun’n, be yoli i annvɔ. Afin ɔ wunnin kɛ “be ti afɛfuɛ yɛlɛ kɛ b’a bo je kɛ bua bɔ be lɛ-man sunianfuɛ’n sa.” Atrɛkpa’n, amun si ndɛ sɔ’n. (Mat. 9:36) ?Ngue ti yɛ sran’m be yoli Zezi i ɲrun kɛ bua m’ɔ be leman sunianfuɛ’n sa ɔ? Afin be ng’ɔ fata kɛ be fa Ɲanmiɛn ndɛ’n kle be’n, be siman aunnvuɛ, be mianmian be yɛ like nga be se sran mun kɛ be yo’n, be bɔbɔ be yoman. Sran ndɛ loman be, yɛ be ukaman sran mun naan b’a su Ɲanmiɛn kpa. “Trɔ nɔnnin-nɔnnin” yɛ be wlawla jin sran’m be ti su ɔ.​—Mat. 23:4.

3. ?Ngue yɛ ɔ fata kɛ asɔnun kpɛnngbɛn’m be fa sie be klun titi ɔ?

³ Junman nga be fa wlali asɔnun kpɛnngbɛn’m be sa nun’n, ɔ cɛnnin. Afin be kusu be ti kɛ bua tafuɛ sa. Bua nga be nian be su’n, be timan be liɛ. Be ti Zoova nin Zezi m’ɔ seli kɛ ɔ ti “bua tafuɛ kpa’n” be liɛ. (Zan 10:11) Zezi fɛli i “mmoja’n b’ɔ ti kpa’n” yɛ ɔ fa ‘toli be gua kpan’ ɔn. (1 Kor. 6:20; 1 Piɛ. 1:18, 19) Zezi klo i bua mun dan. Ɔ maan ɔ fɛli i wun yili be ti tɛ. I sɔ’n ti’n, maan asɔnun kpɛnngbɛn’m be fa sie be klun titi kɛ Zezi Klist m’ɔ ti “Bua Tafuɛ Dan’n,” yɛ ɔ sie be ɔ. Ɔ maan bé wá kán wafa nga be nian i bua’m be lika’n, i ndɛ klé i.​—Ebr. 13:20.

4. ?Kosan benin yɛ é wá yíyí nun like suanlɛ nga nun ɔn?

⁴ ?Wafa sɛ yɛ asɔnun kpɛnngbɛn’m bé klé asɔnun’n i nunfuɛ mun kɛ be ndɛ lo be ɔ? E si kɛ Ɲanmiɛn Ndɛ’n waan maan e kwlakwla ‘e nyin yi kpɛnngbɛn mun.’ Nɛ́n i sɔ’n kusu ti yɛ asɔnun kpɛnngbɛn’m bé míanmían asɔnun’n i nunfuɛ mun ɔn. I kpa bɔbɔ’n, Zoova se be kɛ ‘nán be tin be nga be fa be mannin be kɛ be nian be su’n be su.’ (Ebr. 13:17; an kanngan 1 Piɛr 5:2, 3 nun.) ?Ngue yɛ asɔnun kpɛnngbɛn’m bé yó naan b’a kle kɛ be tinman be nga be fa be mannin be kɛ be nian be su’n, be su ɔ? Kosan sɔ’n yɛ é wá yíyí nun like suanlɛ nga nun ɔn.

“Ɔ́ FÁ BE SÍE I WUE’N NUN”

5. ?Wafa sɛ yɛ ndɛ ng’ɔ o Ezai 40:11 nun’n kle kɛ sran’m be ndɛ lo Zoova ɔ?

⁵ Ɲanmiɛn i nuan ijɔfuɛ Ezai kannin wafa nga Ɲanmiɛn yo i sufuɛ mun’n, i ndɛ. Ɔ seli kɛ: “Sran’m be ti kɛ i bua sa, ɔ́ tá be kɛ bua tafuɛ kpa’n ɔ fa ta i bua mun’n sa. Ɔ́ fɛ́ i sa’n flɛ́ i bua ba mun yɛ ɔ́ tían be nuan, ɔ́ fá be síe i wue’n nun, yɛ bua nga be tɛ man be mma’m be nyɔnflɛn’n, kɛ ɔ́ klé be atin’n, ɔ́ yó be cɛcɛ.” (Eza. 40:11) Ndɛ sɔ’n ɔ kle weiin kɛ be nga asɔnun’n nun be leman wunmiɛn’n, annzɛ be ɲin nin a timan’n, be ndɛ lo Zoova dan. Bua tafuɛ kpa’n si i bua’m be tinuntinun. Yɛ ɔ si like ng’ɔ mian be’n. I wafa kunngba’n yɛ Zoova yo ɔ. Ɔ si i sufuɛ’m be tinuntinun yɛ like ng’ɔ mian kun sa’n, ɔ fa mɛn i aklunjuɛ su. Ɔ ju wie’n, bua tafuɛ’n fa bua nɔnman’n sie i wue’n nun. I wafa kunngba’n, kɛ kekle tɔ e su’n, e kaci kɛ bua nɔnman sa. Kɛ ɔ yo sɔ’n, Zoova yaciman e lɛ sa, ɔ uka e. Afin “ɔ ti e Si, ɔ si aunnvuɛ.”​—2 Kor. 1:3, 4.

6. ?Wafa sɛ yɛ asɔnun kpɛnngbɛn’m be kwla nian Zoova i ayeliɛ’n su ɔ?

⁶ ?Wafa sɛ yɛ asɔnun kpɛnngbɛn’m be kwla nian e Si Zoova i ayeliɛ’n su ɔ? Yɛle kɛ ɔ fata kɛ be fa be ɲin sie asɔnun’n i nunfuɛ’m be tinuntinun be su naan be si sa ng’ɔ o be su’n. I liɛ’n, bé kwlá wún like nga bé yó bé fá úka be’n. (Nya. 27:23) Kɛ ɔ ko yo naan i sɔ’n w’a yo ye’n, ɔ fata kɛ asɔnun kpɛnngbɛn’m be nin asɔnun’n i nunfuɛ’m be koko yalɛ. Sanngɛ, ɔ fata kɛ be nian be wun su naan b’a faman be nuan a wlaman ndɛ ng’ɔ timan be ndɛ’n i nun. Sɛ be fa be ɲin sie aniaan’m be su naan be sie be su ndɛ nga be kan’n i bo’n, bé sí like nga bé yó’n. Ɔ maan, ‘bé úka be bɔ be lɛ-man wunmiɛn’n.’​—Yol. 20:35; 1 Tɛs. 4:11.

7. (a) ?Ezekiɛli nin Zeremi be blɛ su’n, nvle sunianfuɛ’m be yoli Ɲanmiɛn i nvle’n sɛ? (b) ?Kɛ Zoova yili i sa bua tafuɛ tɛtɛ sɔ’m be su’n, ngue yɛ i sɔ’n kle asɔnun kpɛnngbɛn mun ɔn?

⁷ Be mɔ Ezekiɛli nin Zeremi blɛ su Zoova sieli be kpɛnngbɛn i nvle’n su’n, maan e kan be ndɛ kan e nian. Kɛ ɔ yo naan be nian nvle’n i lika’n, b’a yoman sɔ. Zoova fali be ayeliɛ’n tali be ɲrun. Ɔ seli be kɛ: ‘Min bua’m b’a kaci nnɛn tɛtɛ nga be o blo lɔ be aliɛ’n sunianfuɛ bɔ be nyɛn-mɛn i’n ti, bua tafuɛ’m be ta be bɔbɔ be wun, sanngɛ be ta-man min bua mun.’ Nvlefuɛ’m be fɛli kpa. Afin be sunianfuɛ’m be buli be bɔbɔ be wun akunndan yɛ be yoli aɲinkplifuɛ. (Eze. 34:7-10; Zer. 23:1) Be nga be tɔn be wun suɛn kɛ be ti Klistfuɛ’n be su kpɛnngbɛn’n, be ti sɔ wie. Ɔ maan Zoova i sa nunman be su. ?Ngue yɛ i sɔ’n kle asɔnun kpɛnngbɛn mun ɔn? I sɔ’n kle be kɛ ɔ fata kɛ be nian Zoova i bua fa’n i lika kɛ ɔ nin i fata’n sa.

‘AN NIAN NGA N YOLI’N SU YO’

8. ?Sɛ aniaan’m be yo sa wie m’ɔ timan su’n, wafa sɛ yɛ asɔnun kpɛnngbɛn’m be kwla nian Zezi i ajalɛ’n su ɔ?

⁸ Fɔ m’ɔ o e nun ti’n, aniaan wie’m be wunman like nga Zoova kunndɛ kɛ be yo’n i wlɛ kpa. Wie liɛ’n, sa nga be yo’n, ɔ takaman Ɲanmiɛn Ndɛ’n su. Wie liɛ kusu’n, ajalɛ nga be fa’n kle kɛ Ɲanmiɛn i sulɛ’n nun be ɲin nin a timan. ?I lɛ nun’n, ngue yɛ ɔ fata kɛ asɔnun kpɛnngbɛn’m be yo ɔ? Ɔ fata kɛ be tra be awlɛn kɛ Zezi trɛli i awlɛn i sɔnnzɔnfuɛ’m be wun’n sa. Blɛ sunman i sɔnnzɔnfuɛ’m be sili akplowa. Be kunndɛli kɛ bé sí sran ng’ɔ́ yó be nun sran dan Ɲanmiɛn Sielɛ’n nun lɔ’n. Sanngɛ Zezi w’a faman ya be wun. Ɔ kleli be like titi amanniɛn su. Yɛ ɔ kleli be titi kɛ be yo wun ase kanfuɛ. (Lik 9:46-48; 22:24-27) Cɛn kun liɛ bɔbɔ’n, ɔ wunnzinnin i sɔnnzɔnfuɛ’m be ja kleli be sɔ. Andɛ kusu’n, ɔ fata kɛ asɔnun kpɛnngbɛn’m be yo wun ase kanfuɛ wie.​—An kanngan Zan 13:12-15 nun; 1 Piɛ. 2:21.

9. ?Kpɛnngbɛn dilɛ’n i su akunndan benin yɛ Zezi kunndɛli kɛ i akoto’m be bu ɔ?

⁹ Kɛ be se kɛ be ti be wiengu’m be su kpɛnngbɛn’n, akoto Zaki nin Zan b’a wunmɛn i bo kpa. Be buli i kɛ yɛle sran dan yolɛ. I sɔ’n ti be ko srɛli Zezi kɛ, kɛ ɔ́ wá dí i famiɛn’n ɔ sie be sran dan Ɲanmiɛn Sielɛ’n nun lɔ. Sanngɛ Zezi tinngɛli be akunndan sɔ’n. Ɔ seli be kɛ: “An si kɛ nvle wie’m be famiɛn’m be mian-mian be sran mun, yɛ sran dandan’m be tin be sran’m be su. Amun liɛ’n su yo-man sɔ, sanngɛ amun nun sran ng’ɔ klo kɛ ɔ́ yó dan’n, maan ɔ su i wiengu mun.” (Mat. 20:25, 26) Nanwlɛ, ɔ fata kɛ akoto’m be tra be awlɛn naan b’a ‘mian-mianman’ be niaan mun, annzɛ b’a tinman be su.

10. ?Wafa sɛ yɛ Zezi kunndɛ kɛ asɔnun kpɛnngbɛn’m be yo i bua fa’n niɔn? ?Wafa sɛ yɛ Pɔlu niannin su ɔ?

¹⁰ Zezi kunndɛ kɛ asɔnun kpɛnngbɛn’m be yo i bua fa’n kɛ nga i bɔbɔ fa yoli be’n sa. Yɛle kɛ nán asɔnun kpɛnngbɛn’m be tin aniaan’m be su. Sanngɛ maan asɔnun kpɛnngbɛn’m be su be. Pɔlu kɛnnin i wun ase kɛ Zezi sa, ɔ suli i wiengu mun. Afin ɔ seli Efɛzi lɔ asɔnun kpɛnngbɛn mun kɛ: “Kɛ ɔ fin cɛn bɔ n juli Azi mɛn’n nun wa’n, an si tranlɛ wafa kwlaa nga min nin amun trannin’n. Kɛ ń dí min Min’n i junman’n, min nyin yi i.” Akoto Pɔlu kunndɛli kɛ asɔnun kpɛnngbɛn’m be yo wun ase kanfuɛ yɛ be tu be klun be su be wiengu kɛ i sa. Ɔ seli kɛ: “N yoli i sɔ n fa kleli amun naan amun kusu an di junman sɔ, naan an uka be bɔ be lɛ-man wunmiɛn’n.” (Yol. 20:18, 19, 35) Asa ekun’n, ɔ seli Korɛnti lɔfuɛ mun kɛ ɔ mianman be Ɲanmiɛn atin’n su. Sanngɛ ɔ ti Ɲanmiɛn i sufuɛ kɛ be sa wie, naan ɔ kunndɛ kɛ ɔ́ úka be naan be su Ɲanmiɛn aklunjuɛ su. (2 Kor. 1:24) Pɔlu yoli wun ase kanfuɛ yɛ ɔ tuli i klun ukɛli i niaan mun. I sɔ wie yɛ ɔ fata kɛ asɔnun kpɛnngbɛn’m be yo i andɛ ɔ.

AN FA ‘NDƐ NANWLƐ’N’ MAN ANIAAN’M BE AFƆTUƐ

11, 12. ?Wafa sɛ yɛ asɔnun kpɛnngbɛn kun kwla uka aniaan kun naan w’a fa ajalɛ ɔ?

¹¹ Kɛ asɔnun kpɛnngbɛn’m bé mán be niaan’m be afɔtuɛ’n, ɔ fata kɛ be fɛ i Ɲanmiɛn ndɛ m’ɔ ti ‘ndɛ nanwlɛ’n’ i nun titi. (Tit 1:9) Kusu kɛ bé mán’n, maan be mɛn i “amanniɛn su.” (Gal. 6:1) Yɛle kɛ, asɔnun kpɛnngbɛn’m be su seman kɛ san fii aniaan’m be yo sa, annzɛ be yo sa. Sanngɛ wafa nga be kwla kan ndɛ’n kle aniaan mun naan b’a bu akunndan’n, i sɔ yɛ bé yó ɔ. Bé yó sɔ naan aniaan’m be nian klolɛ mɔ be klo Zoova ɔ nin i nuan ndɛ’n be su fa ajalɛ. Yɛle kɛ sɛ aniaan kun waan ɔ́ fá ajalɛ cinnjin wie’n, asɔnun kpɛnngbɛn’n kwla fa Biblu’n nun ndɛ annzɛ fluwa nga anuannzɛ yili be’n be nun ndɛ kle aniaan’n. Kpɛkun ɔ nin i be koko su yalɛ. I sin’n, ajalɛ fanunfanun nga aniaan kwla fa’n, maan asɔnun kpɛnngbɛn’n usɛ i naan ɔ kan. Kpɛkun sɛ ajalɛ sɔ’m bé yó Zoova fɛ annzɛ be su yomɛn i fɛ’n, maan aniaan’n kan. Maan asɔnun kpɛnngbɛn’n, ɔ kpɛn aniaan’n i wla kɛ kwlaa naan w’a fa ajalɛ’n, ɔ ti cinnjin kpa kɛ ɔ srɛ Zoova, ɔ fa ndɛ’n wlɛ i sa nun. (Nya. 3:5, 6) I sin’n, maan aniaan’n bɔbɔ fɛ i ajalɛ’n.​—Rɔm. 14:1-4.

¹² Asɔnun kpɛnngbɛn’m be like kunngba cɛ ng’ɔ o be sa nun kɛ kpɛnngbɛn dilɛ kpɔnman sa’n, yɛle Ɲanmiɛn Ndɛ’n. I sɔ’n ti’n, ɔ ti cinnjin kpa kɛ afɔtuɛ kwlaa nga bé mán’n, be cisa su titi. Sɛ be yo sɔ’n, be su mianmianman Zoova i bua fa’n. Afin bua fa’n timan be liɛ. Asa ekun’n, Zoova nin Zezi be ɲrun’n, sran kun bɔbɔ yɛ ɔ́ súɛ i trɔ’n niɔn.—Gal. 6:5, 7, 8.

“AN YO SA NG’Ɔ TI KPA’N MAAN BE NIAN SU”

13, 14. ?Sa kpa benin yɛ asɔnun kpɛnngbɛn’m be kwla yo naan aniaan’m b’a nian su ɔ?

¹³ Akoto Piɛli seli asɔnun kpɛnngbɛn mun kɛ nán be “tin” be wiengu’m be su. I sin’n, ɔ seli kɛ be “yo sa ng’ɔ ti kpa’n maan be nian su.” (1 Piɛ. 5:3) ?Sa kpa benin yɛ asɔnun kpɛnngbɛn’m be kwla yo naan aniaan’m b’a nian su ɔ? Maan e kan like nɲɔn m’ɔ fata kɛ be wun i “sran ng’ɔ klo kɛ ɔ́ yó asɔnun sunianfuɛ’n” i lika’n, be ndɛ. I klikli’n yɛle kɛ, ɔ fata kɛ ɔ yo sran “b’ɔ si ngwlɛlɛ” ɔ. Yɛle kɛ ɔ wun ndɛ nga Biblu’n kan’n, ɔ nin wafa ng’ɔ kwla nian su nanti’n, be wlɛ weiin. Kɛ sa tɔ’n, ɔ kpli faman ajalɛ. Sanngɛ ɔ guɛ i wla ase yɛ ɔ bu akunndan kpa naan w’a fa ajalɛ. Like’n i nɲɔn su’n yɛle kɛ maan sran sɔ’n, “ɔ si i bɔbɔ i awlo’n su nian.” ?Afin “sɛ sran kun si-mɛn i bɔbɔ i awlo’n su nian’n, ɔ́ yó sɛ yɛ ɔ́ kwlá nían Nyanmiɛn i asɔnun’n su-ɔ?” I sɔ’n ti’n, asɔnun kpɛnngbɛn nga be ti awlobo kpɛnngbɛn’n, ɔ fata kɛ be si be yi nin be mma’m be lika nian. (1 Tim. 3:1, 2, 4, 5) Kɛ aniaan’m be wun kɛ asɔnun kpɛnngbɛn’m be le i sɔ nzuɛn’n, be fa be wla gua be su.

¹⁴ Sa kpa kun ekun m’ɔ fata kɛ asɔnun kpɛnngbɛn’m be yo naan aniaan’m be nian su’n, yɛle kɛ maan be fa jasin fɛ’n bolɛ’n i nun ta kɛ Zezi fa yoli’n sa. I nun nga Zezi o asiɛ’n su wa’n, jasin fɛ’n i bolɛ’n yɛ ɔ fa cicili i ti ɔ. Yɛ ɔ kleli i sɔnnzɔnfuɛ mun wafa ng’ɔ fata kɛ be di junman sɔ’n wie’n. (Mar. 1:38; Lik 8:1) Kɛ aniaan’m be nin asɔnun kpɛnngbɛn’m be bo jasin fɛ’n, ɔ yo be fɛ dan. Be wun kɛ junman sɔ’n i dilɛ’n ti asɔnun kpɛnngbɛn’m be cinnjin kpa. Yɛ be nian wafa nga asɔnun kpɛnngbɛn’m be kle sran’m be like’n su. Asɔnun kpɛnngbɛn’m be su junman’n sɔnnin. Sanngɛ be mian be ɲin be bo jasin fɛ’n i titi. Kɛ aniaan’m be wun i sɔ’n, ɔ wla be fanngan kɛ be yo sɔ wie. Like kun ekun m’ɔ fata kɛ asɔnun kpɛnngbɛn’m be yo’n yɛle kɛ, maan be siesie be wun kpa naan b’a wɔ aɲia’m be bo. Yɛ aɲia’m be bo lɔ’n, maan be tɛ kosan’m be su. Asa ekun’n, kɛ bé dí junman kɛ asɔnun sua’n i nun lɔ yɛinyɛin yolɛ annzɛ lɔ ye siesielɛ’n sa’n, maan be di wie. Kɛ be yo sɔ’n, aniaan’m be ‘nian kɛ be fa lafi Nyanmiɛn su’n, be lafi i su sɔ wie.’​—Efɛ. 5:15, 16; Ebr. 13:7.

“AN UKA BE NGA BE LƐ-MAN WUNMIƐN’N”

15. ?Ngue ti yɛ asɔnun kpɛnngbɛn’m be ko nian aniaan’m be osu ɔ?

¹⁵ Kɛ bua tafuɛ kpa kun wun kɛ like yaya w’a yo i bua’n annzɛ i bua’n w’a tɔ tukpaciɛ’n, ɔ yo i ayre ndɛndɛ. Like kunngba’n yɛ ɔ fata kɛ asɔnun kpɛnngbɛn’m be yo ɔ. Yɛle kɛ sɛ be wun kɛ afɛ’n su tin aniaan kun su’n, annzɛ ɔ fata kɛ be mɛn i afɔtuɛ’n, maan be ukɛ i ndɛndɛ kpa. I wie yɛle aniaan nga b’a yo kpɛnngbɛn’n nin be nga be timan juejue be liɛ’n. Ɔ fata kɛ asɔnun kpɛnngbɛn’m be uka be, yɛ be fa Ɲanmiɛn ndɛ’n wla be fanngan. (1 Tɛs. 5:14) Gbanflɛn nin talua mun kusu’n, ɔ fata kɛ be uka be naan b’a jran kekle “like nga gbanflɛn [nin talua’m be] konvi sɔ i’n” i ɲrun. (2 Tim. 2:22) Asɔnun kpɛnngbɛn’m be ko nian aniaan’m be osu wie. Kɛ be yo sɔ’n, be sie afɛ ng’ɔ o aniaan’m be su’n, i nzɔliɛ. Kpɛkun be fa Ɲanmiɛn ndɛ’n wla be fanngan yɛ be fa fɔnvɔ be. Kɛ asɔnun kpɛnngbɛn’m be uka aniaan mun ndɛ nun’n, aniaan’m be tɔman sa sunman nun.

16. ?Sɛ aniaan kun w’a yo sa wie naan ɔ nin Zoova be afiɛn w’a saci’n, ngue yɛ ɔ fata kɛ asɔnun kpɛnngbɛn’m be yo ɔ?

¹⁶ ?Sɛ aniaan kun w’a yo sa wie naan ɔ nin Zoova be afiɛn w’a saci’n, ngue yɛ ɔ fata kɛ asɔnun kpɛnngbɛn’m be yo ɔ? Zak m’ɔ ti Biblu’n i klɛfuɛ’m be nun kun’n seli kɛ: “Sɛ amun nun wie wunnɛn yo i ya’n, maan ɔ flɛ asɔnun kpɛnngbɛn mun. Maan be guɛ i su ngo e Min’n i dunman nun yɛ be srɛ Nyanmiɛn kɛ ɔ yo i juejue. Nyanmiɛn su bɔ be lafi’n ti’n, Nyanmiɛn srɛlɛ sɔ’n maan tukpacɛfuɛ sɔ’n nyɛ́n i ti, yɛ e Min’n maan ɔ́ jáso. Yɛ sɛ ɔ yoli sa wie’n, ɔ́ yáci cɛ i.” (Zak 5:14, 15) Wie liɛ’n, aniaan’n flɛman “asɔnun kpɛnngbɛn mun.” Sanngɛ sɛ be ti aniaan’n i su ndɛ’n, ɔ fataman kɛ be sisi be bo, maan be ukɛ i ndɛndɛ. Kɛ kekle tɔ aniaan’m be su’n, asɔnun kpɛnngbɛn’m be nin be srɛ Ɲanmiɛn. Asɔnun kpɛnngbɛn’m be ngunmin be srɛ aniaan’m be ti sɔ wie. Kɛ be yo sɔ’n, be kle kɛ aniaan’m be ndɛ lo be naan be kunndɛ kɛ bé úka be naan be ɲan wunmiɛn be su Ɲanmiɛn aklunjuɛ su.​—An kanngan Ezai 32:1, 2 nun.

17. ?Kɛ asɔnun kpɛnngbɛn’m be mian be ɲin be nian Zezi Klist m’ɔ ti “Bua Tafuɛ Dan’n” i liɛ’n su, i bo gua sɛ?

¹⁷ Like kwlaa nga asɔnun kpɛnngbɛn’m be yo i Zoova i anuannzɛ’n nun’n, be mian be ɲin be nian Zezi Klist m’ɔ ti “Bua Tafuɛ Dan’n” i liɛ’n su. Kɛ mɔ aniaan sɔ’m be uka e’n ti’n, e ɲan fanngan e su Ɲanmiɛn titi yɛ e wun kpaja e. I kwlaa sɔ’n ti’n, é lá be ase yɛ é lá Zoova m’ɔ ti bua tafuɛ m’ɔ leman wunsu’n, i ase dan wie.