LIKE SUANLƐ 17
Zoova fanngan nun’n e kwla jran Satan nin mmusu’m be ɲrun kekle
‘E nin aolia nun sran tɛtɛ mɔ be o ɲanmiɛn su lɔ’n yɛ e kun-ɔn.’—EFƐ. 6:12.
JUE 55 Nán an sro be!
I SU FITILƐa
1. ?Kɛ nga e fa wun i Efɛzifuɛ Mun 6:10-13 nun sa’n, ninnge nga Zoova yo mɛn i sufuɛ mun’n, i kun yɛle benin? An yiyi nun.
NINNGE nga Zoova yo mɛn i sufuɛ mun m’ɔ kle kɛ be ndɛ lo i’n, i kun yɛle kɛ ɔ uka be naan b’a kwla jran be kpɔfuɛ’m be ɲrun kekle. E kpɔfuɛ sɔ’m be nun wlɛfuɛ mun yɛle Satan nin mmusu mun. Zoova se e kɛ e nian e wun su be lika. Kpɛkun ɔ kle e like ng’ɔ fata kɛ e yo naan y’a sasa e wun’n. (An kanngan Efɛzifuɛ Mun 6:10-13 nun.) Sɛ e nanti afɔtuɛ ng’ɔ man e’n su’n, naan e fa e wla’n kwlaa e guɛ i su’n, é kwlá jrán Satan i ɲrun kekle. Asa ekun’n, é kwlá kán ndɛ kunngba nga akoto Pɔlu kannin’n wie. Ɔ seli kɛ: “?Sɛ Ɲanmiɛn jin e sin’n, wan yɛ ɔ kwla yo e sa-ɔ?”—Rɔm. 8:31.
2. ?Ngue yɛ é wá kɛ́n i ndɛ like suanlɛ nga nun-ɔn?
2 Klisifuɛ kpa’m be faman be ɲin be siemɛn i ninnge nga Satan nin mmusu’m be yo be’n, be su ngboko. Zoova i su like suanlɛ’n, nin i sulɛ’n yɛ ɔ ti be cinnjin-ɔn. (Jue. 25:5) Sanngɛ ɔ ti cinnjin kɛ e si ninnge nga Satan yo be’n. I liɛ’n, ɔ su kwlá lakaman e. (2 Kor. 2:11) Like suanlɛ nga nun’n, é wá kán ninnge nga Satan nin mmusu’m be fa laka sran mun’n be nun wie’m be ndɛ. Kpɛkun é kán wafa nga e kwla jran be ɲrun kekle’n, i ndɛ wie.
WAFA NGA SATAN NIN MMUSU’M BE LAKA SRAN MUN’N
3-4. (1) ?Ninnge benin wie mun yɛ Satan nin mmusu’m be fa laka sran mun-ɔn? (2) ?Ninnge sɔ’m be su ndɛ benin yɛ sran sunman be kan-ɔn?
3 Ninnge nga Satan nin mmusu’m be fa laka sran mun’n, i wie yɛle amuin sɔlɛ’n nin bae dilɛ’n, nin i wunsu ninnge wie mun ekun. Be nga be yo i sɔ ninnge mun’n, be waan be si ninnge wie mun yɛ be kwla yo ninnge wie mɔ klɔ sran onga’m be kwlá yoman-ɔn. I wie yɛle kɛ wie’m be waan be kwla si e ɲrun lɔ sa mun, annzɛ be kwla nian nzraama’m be yi wunnzue. Wie mun ekun be waan be nin be nga be wuli’n be kwla ijɔ. Wie’m be yo abonuan sa wie mun, annzɛ be to sran’m be amuin.b
4 Amlɛnkɛn’m be mɛn’n i nglo lɔ lika nun’n, be usali sran wie’m be kosan nvle 18 nun. Be nga be usali be kosan’n, sɛ be bu be nun akpasua nsan’n, akpasua kun lafi su kɛ sran wie’m be yo abonuan sa sakpa, annzɛ be di bae. Yɛ akpasua kun ekun lafi su kɛ sran wie’m be nin aolia nun sran’m be kwla ijɔ. Sran ble’m be mɛn’n nun kusu’n, be usali sran wie’m be kosan nvle 18 nun. Be nun kpanngban kpa be lafi su kɛ sran wie’m be di bae sakpa. Ɔ maan Lika kwlaa nga e o’n, ɔ fata kɛ e nian e wun su bae dilɛ’n i lika. Afin Satan kunndɛ kɛ ‘ɔ́ láka asiɛ’n i sufuɛ’m be kwlaa.’—Ngl. 12:9.
5. ?Wafa sɛ yɛ Zoova bu amuin sɔlɛ’n, nin bae dilɛ’n, yɛ i wunsu ninnge wie mun-ɔn?
5 Zoova “buaman ato.” (Jue. 31:6) ?Ɔ maan wafa sɛ yɛ ɔ bu amuin sɔlɛ’n, nin bae dilɛ’n, yɛ i wunsu ninnge mun-ɔn? Ɔ kpɔ be. Ɔ seli Izraɛlifuɛ’m be kɛ: “Nán amun nun wie fɛ i wa yasua annzɛ i wa bla ɔ yi i sin nun kɛ ɔ́ fá sɔ amuɛn. Nán amun nun wie di bae annzɛ ɔ yi wunnzue. Nán amun nun wie cici sran annzɛ ɔ nin wunmiɛn be ijɔ. Nán amun yo fuɛn kannganfuɛ. Sran nga be yo i sɔ sa’n, wuun b’a bo tete Anannganman nyrun.” (Mml. 18:10-12) Klisifuɛ’m be diman Moizi mmla’n su kun. Sanngɛ Zoova w’a kaciman. Ɔ te kpɔ ninnge tɛtɛ sɔ mun.—Mal. 3:6.
6. (1) ?Ngue ti yɛ Zoova se e kɛ e nian e wun su kpa amuin sɔlɛ’n, nin bae dilɛ’n, yɛ i wunsu ninnge’m be lika-ɔ? (2) ?Be nga be wuli’n be su ndɛ benin yɛ Akunndanfuɛ’n 9:4-5 kan-ɔn?
6 Zoova si kɛ Satan sin amuin sɔlɛ’n, nin bae dilɛ’n yɛ i wunsu ninnge wie mun ekun be lika yo sran’m be abɔlɛ. Satan fa ninnge sɔ mun laka sran mun. I wie yɛle kɛ ɔ yo maan sran’m be bu i kɛ sran le wawɛ naan kɛ ɔ wu’n, ɔ ko tran lika uflɛ. (An kanngan Akunndanfuɛ’n 9:4-5 nun.) Asa ekun’n, ɔ fɛ i sɔ’n ninnge mun wla sran’m be srɛ, ɔ maan be kwlá faman be wun be mantanman Zoova. Like nga Satan kunndɛ’n yɛle kɛ sran’m be yaci Zoova lɛ naan be lafi i bɔbɔ nin mmusu’m be su. I sɔ’n ti’n Zoova se e kɛ nán e kan ninnge sɔ mun.
WAFA NGA E KWLA JRAN SATAN NIN MMUSU’M BE ƝRUN KEKLE’N
7. ?Ngue like yɛ Zoova kle e-ɔ?
7 Zoova kle e like ng’ɔ fata kɛ e yo naan y’a tɔman Satan nin mmusu’m be aya’n nun’n. É wá kán ninnge wie mɔ e kwla yo naan y’a kwla jran Satan nin mmusu’m be ɲrun kekle’n, be ndɛ.
8. (1) ?Like cinnjin kpafuɛ nga e kwla yo naan Satan nin mmusu’m b’a lakaman e’n yɛle benin? (2) ?Wafa sɛ yɛ Jue Mun 146:4 kle kɛ Satan i ndɛ’n ti ato-ɔ?
8 Maan e kanngan Ɲanmiɛn Ndɛ’n nun yɛ e bu su akunndan. Like cinnjin kpafuɛ nga e kwla yo naan Satan nin mmusu’m b’a lakaman e’n yɛle ngalɛ’n. Ɲanmiɛn Ndɛ’n uka e maan e wun Satan i ato ndɛ’m be wlɛ weiin. (Efɛ. 6:17) I wie yɛle kɛ Ɲanmiɛn Ndɛ’n kle kɛ e nin be nga be wuli’n, e kwlá ijɔman. (An kanngan Jue Mun 146:4 nun.) Asa ekun’n, ɔ kle kɛ Zoova kunngba cɛ yɛ ɔ kwla kan sa nga bé wá jú e ɲrun lɔ’n be ndɛ-ɔ. (Eza. 45:21; 46:10) Sɛ e kanngan Ɲanmiɛn Ndɛ’n nun cɛn kwlakwla’n, yɛ e bu su akunndan’n, e su faman e ɲin e siemɛn i Satan i ato ndɛ’m be su mlɔnmlɔn.
9. ?Ninnge benin wie mun yɛ mmusu’m be sa o nun mɔ e faman e wun wlaman nun-ɔn?
9 Nán e yo like wie mɔ mmusu’m be sa o nun’n. Ninnge nga e si kɛ mmusu’m be sa o nun, e faman e wun wlaman be nun wie fi nun. E kɔman amuin sɔfuɛ sin, yɛ e faman ajalɛ wie mun naan e nin be nga be wuli’n é ijɔ́. Asa ekun’n, kɛ nga e fa kɛnnin i like suanlɛ ng’ɔ sinnin lɛ nun sa’n, e faman e wun e wlɛmɛn i sɛ yolɛ nun ninnge nga be kle kɛ be nga be wuli’n be o lɔ’n, be nun. E kɔman wunnzue yifuɛ mun nin be nga be tɔn be wun suɛn kɛ be kan sa nga bé wá jú’n be ndɛ’n be sin. (Eza. 8:19) E si kɛ ninnge kwlaa sɔ’m be kwla kpɛ ndɛ man e, yɛ be kwla yo maan e nin Satan nin mmusu mun e wla asa.
Klisifuɛ klikli’m be wɔli be amuin sɔlɛ nin bae dilɛ ninnge’m be kwlaa be nun. Yo kɛ be sa. Be ɲin su yiyilɛ ninnge nga bae dilɛ o nun’n, nán fa yiyi ɔ ɲin su. (An nian ndɛ kpɔlɛ 10-12 nun.)
10-11. (1) ?Kɛ be nga be tran Efɛzi lɔ laa’n be nun wie’m be sili ndɛ nanwlɛ’n, ajalɛ’n cinnjin benin yɛ be fali-ɔ? (2) ?Kɛ nga 1 Korɛntifuɛ Mun 10:21 fa kan sa’n, ngue ti yɛ ɔ fata kɛ e nian be ajalɛ’n su-ɔ?
10 Maan e gua amuin sɔlɛ’n nin bae dilɛ ninnge’m be kwlaa be blo annzɛ e wɔ be nun. Klisifuɛ klikli’m be blɛ su’n, be nga be tran Efɛzi lɔ’n be nun wie’m be sɔ amuin, wie’m be di bae annzɛ be yo i wunsu ninnge wie mun. Sanngɛ kɛ be sili ndɛ nanwlɛ’n, be fali ajalɛ cinnjin kpa kun. Biblu’n se kɛ: “Atrɛ yifuɛ kpanngban be fali be fluwa mun bali. Be tiannin be nuan, kpɛkun be wɔli be nun sran’m be kwlaa be ɲrun lɛ.” (Yol. 19:19) Ɔ maan, be yoli like kwlaa nga be kwla yo naan be nin mmusu’m b’a sanman nun kun’n. Be fluwa sɔ’m be le gua kpa. Sanngɛ b’a seman kɛ bé yó be atɛ annzɛ bé gúa be blo ngbɛn. Be wɔli be nun. I sɔ’n kle kɛ nán fluwa sɔ’m be gua’n i su yɛ be fali be ɲin be sieli-ɔ. Sanngɛ like nga be ko yo naan Zoova i klun w’a jɔ be wun’n, i su yɛ be fali be ɲin sieli-ɔ.
11 ?Wafa sɛ yɛ e kwla nian Klisifuɛ sɔ’m be ajalɛ’n su-ɔ? Sɛ e le amuin sɔlɛ like annzɛ bae dilɛ like annzɛ i wunsu like wie’n, maan e wɔ be nun annzɛ e gua be blo. I wie yɛle tinwa nga mun, nin banzrɛ mun, yɛ be wun sasalɛ ninnge wie mun ekun.—An kanngan 1 Korɛntifuɛ Mun 10:21 nun.
12. ?Kosan benin mun yɛ ɔ fata kɛ e fa usa e wun-ɔn?
12 Maan e bu ninnge nga e fa yiyi e ɲin su’n, be sin kpa. I lɛ nun e kwla usa e wun kɛ: ?N kanngan fluwa nga be kan amuin sɔlɛ ndɛ’n be nun? ?Annzɛ amuin sɔlɛ’n i su ndɛ nga be kɛn i ɛntɛnɛti su’n, n kɔ lɔ n ko kanngan nun’n? ?Miziki nga n tie be’n, nin ninnge nga n nian be televiziɔn nun’n, nin video nun ngowa ninnge mun’n, be kan amuin sɔlɛ ndɛ? ?Ninnge nga n fa yiyi min yi su’n, be kan amuin sɔlɛ nin bae dilɛ nin i wunsu ninnge wie’m be ndɛ? ?Annzɛ be kan atrɛ yilɛ nin sran amuin tolɛ’n, nin sran cicilɛ’n be ndɛ? Nán be ɲin su yiyilɛ ninnge nga be yo abonuan sa nun’n, be ngba yɛ be ti bae dilɛ annzɛ amuin sɔlɛ like-ɔ. Sɛ e waan é yíyí e su’n, maan e fua kpa kɛ e su faman ninnge nga Zoova kpɔ be’n. E kunndɛ kɛ é ‘mían e ɲin kpa cɛn kwlaa naan e akunndan’n w’a buman e fɔ’ Ɲanmiɛn ɲrun.—Yol. 24:16.c
13. ?Ngue yɛ ɔ fataman kɛ e yo-ɔ?
13 Nán e kan abonuan sa nga Satan nin mmusu’m be yo be’n be ndɛ e sin. I lɛ nun’n, ɔ fata kɛ e nian Zezi i ajalɛ’n su. (1 Piɛ. 2:21) Zezi si Satan nin mmusu’m be su ninnge kaka kpa. Afin laa’n, be ngba be o ɲanmiɛn su lɔ. Sanngɛ kɛ Zezi bali asiɛ’n su’n w’a kanman ninnge nga Satan nin mmusu’m be yoli’n be ndɛ. Afin w’a baman Satan i ndɛ kanlɛ. Zoova i ndɛ kanlɛ yɛ ɔ bali-ɔ. E kusu ninnge nga Satan nin mmusu’m be yoli be’n, nán e kan be ndɛ e sin. Sanngɛ, maan ndɛ nanwlɛ m’ɔ ti “ndɛ fɛfɛ kpa’n” yɛ ɔ fin e nuan fite-ɔ.—Jue. 45:2.
Satan nin mmusu’m be kwlá yoman e like fi. Afin Zoova nin Zezi yɛ anzi’m be le tinmin tra be. (An nian ndɛ kpɔlɛ 14-15 nun.)d
14-15. (1) ?Ngue ti yɛ ɔ fataman kɛ e sro Satan nin mmusu mun-ɔn? (2) ?Ngue yɛ ɔ kle kɛ Zoova sɛsɛ i sufuɛ mun-ɔn?
14 Ɔ fataman kɛ e sro Satan nin mmusu mun. Mɛn tɛ nga nun’n, sa tɛtɛ’m be ju e su titi. I wie yɛle kɛ e kwla yo asidan, e kwla tɔ tukpacɛ annzɛ wie’n kwla kun e. Sanngɛ ɔ fataman kɛ e bu i kɛ Satan nin mmusu mun yɛ be fa sa sɔ’m be yi e su-ɔ. Biblu’n kle kɛ sa nga y’a sunnzunman’n, ɔ kwla ka lɛ tɔ e kwlaa e su. (Aku. 9:11) Kusu’n Zoova i tinmin’n tra mmusu’m be liɛ’n leleele. I wie yɛle kɛ Ɲanmiɛn w’a kplinman su kɛ Satan kun Zɔbu. (Zɔb 2:6) Moizi blɛ kusu’n, Zoova yili i nglo weiin kɛ ɔ le tinmin tra Ezipti lɔ atrɛ yifuɛ mun. (Tul. 8:14; 9:11) Kɛ Zoova sieli Zezi i famiɛn’n, ɔ mɛnnin i tinmin. Ɔ maan, ɔ kannin Satan nin mmusu’m be bo guali be asiɛ’n su wa. Ɔ ka kan’n, Zezi wá tó be yi i kunman dan kun mɔ be simɛn i bo’n nun. Ɔ maan, be su kwlá yoman sran fi abɔlɛ kun.—Ngl. 12:9; 20:2, 3.
15 Sa kpanngban be kle kɛ Zoova sɛsɛ i sufuɛ mun. I kun yɛle kɛ Zoova fanngan nun’n, e kwla bo jasin fɛ’n yɛ e kle sran’m be like naan be si ndɛ nanwlɛ’n asiɛ’n wunmuan’n su. (Mat. 28:19, 20) Kɛ e yo sɔ’n, e yiyi Satan bo. Sɛ ɔ ti kɛ Satan kwla yo maan e jran junman sɔ’n, nn ɔ yoli w’a cɛ. Ɔ maan, ɔ fataman kɛ e sro Satan nin mmusu mun mlɔnmlɔn. E si kɛ Zoova “nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.” (2 Nyo. 16:9) Sɛ e fa e wun e mantan Zoova’n, kannzɛ Satan klé e yalɛ sɛ’n, sanngɛ Zoova maan é ɲán e ti.
ZOOVA YRÁ BE NGA BE LAFI I SU’N BE SU
16-17. An kan sran kun m’ɔ jrannin Satan nin mmusu’m be ɲrun kekle’n i ndɛ.
16 Kɛ ɔ ko yo naan y’a jran Satan nin mmusu’m be ɲrun kekle’n ɔ fata kɛ e yo yakpafuɛ. I li kɛ e janvuɛ nin e osufuɛ’m be tanndan e ɲrun’n yɛ ɔ kwla yo kekle kpa’n niɔn. Sanngɛ be nga be jran kekle’n Zoova yra be su. Maan e kan aniaan bla kun m’ɔ suan Erika’n i ndɛ. Ɔ tran Gannan. Kɛ ɔ́ bó Biblu’n nun like suanlɛ bo’n nn ɔ le afuɛ 21. I baba sɔ amuin. Ɔ maan ɔ kunndɛ kɛ Erika di nnɛn ng’ɔ fa sɔ i amuin mun’n wie. Kɛ mɔ Erika w’a kplinman su’n, i awlofuɛ’m be waan w’a wɔ amuin’m be safle. Ɔ maan be bu i kɛ sa sɔ’n ti’n amuin’m bé wá fá tukpacɛ wie mun yí be su.
17 Erika i awlofuɛ’m be miɛnnin i kɛ ɔ yo kɛ be sa. Sanngɛ w’a kplinman su. Ɔ maan be nin i kpɛli duo nun, be fuɛnnin i awlo’n nun, yɛ be wɔli i ninnge’m be nun bɔbɔ. Ɔ nin i sɔ ngba’n Erika w’a kpɔciman Zoova. Zoova i Lalofuɛ wie’m be sɔli i nun. I lɛ nun’n Zoova yrɛli i su dan. Afin ɔ ɲannin awlobo uflɛ. (Mar. 10:29, 30) I sin’n be yoli i batɛmun. Yɛ kɛ é sé yɛ’n ɔ ti titi atin bofuɛ. Ɔ sroman mmusu mun. Erika bɔbɔ seli kɛ: “N srɛ Zoova cɛn kwlakwla kɛ min osufuɛ’m be si i, naan be su e Ɲanmiɛn m’ɔ klo e’n. I liɛ’n bé ɲán be ti.”
18. ?Sɛ e lafi Zoova su’n, i su ye benin yɛ é ɲɛ́n i-ɔ?
18 Nán e ngba yɛ sa kɛ ngalɛ’n sa’n, ɔ́ tɔ́ e su-ɔ. Sanngɛ ɔ fata kɛ e tinuntinun e lafi Zoova su yɛ e jran Satan nin mmusu’m be ɲrun kekle. Sɛ e yo sɔ’n Satan su kwlá lakaman e, kpɛkun Ɲanmiɛn yrá e su dan. Asa ekun’n, e su yaciman Zoova sulɛ mmusu’m be srolɛ ti. Like ng’ɔ ti cinnjin trɛ i ngba’n, yɛle kɛ e nin Zoova e afiɛn mántan kpa. Akoto Zaki seli kɛ: “An lo amun wun man Ɲanmiɛn. Sanngɛ an jran Suɛn tɔnfuɛ’n i ɲrun kekle, i liɛ’n ɔ́ wánndi amun. An fa amun wun mantan Ɲanmiɛn, yɛ ɔ́ fɛ́ i wun mántan amun.”—Zak. 4:7, 8.
JUE 150 An mantan Ɲanmiɛn maan ɔ de amun
a Zoova se e kɛ e nian e wun su Satan nin mmusu’m be lika. Kpɛkun ɔ kan like nga be kwla yo’n, i ndɛ kle e. ?Wafa sɛ yɛ Satan nin mmusu’m be laka sran mun-ɔn? ?Ngue yɛ e kwla yo naan y’a jran be ɲrun kekle-ɔ? Like suanlɛ nga nun’n, é wá fá e ɲin é síe i wafa nga Zoova uka e naan b’a kwlá lakaman e’n, i su.
b NDƐ WIE’M BE NUN YIYILƐ: Be kwlaa nga be sɔ amuin’n, mɔ be di bae’n, mɔ be yo i wunsu ninnge wie mun ekun’n, be nin mmusu mun yɛ be di junman-ɔn. I wie yɛle be nga be lafi su kɛ sran le wunmiɛn mɔ be kɔ wunnzue yifuɛ kun sin kɛ be nin wunmiɛn’n bé íjɔ’n. Abonuan sa nga e kɛn i ndɛ wa’n, yɛle nga mɔ mmusu’m be sa o nun’n. I wie yɛle sran cicilɛ’n, nin amuin tolɛ’n, nin i wunsu ninnge wie mun ekun.
c Nán asɔnun kpɛnngbɛn mun yɛ ɔ fata kɛ be kle like nga aniaan’m bé fá yíyí be ɲin su’n, ɔ nin like ng’ɔ fataman kɛ be fa yiyi be ɲin su’n niɔn. Sɛ aniaan kun waan ɔ́ fá like wie yíyí i ɲin su’n, ɔ fata kɛ i bɔbɔ nian Ɲanmiɛn Ndɛ’n nun naan w’a si like ng’ɔ fata kɛ ɔ yo’n. Ɔ fata kɛ awlobo kpɛn’m be uka be awlofuɛ mun naan like nga be fa yiyi be ɲin su’n, ɔ jɔ Zoova klun.—Nian Y a-t-il des films, des livres ou des chansons qui sont interdits aux Témoins de Jéhovah? nun. Ɔ o jw.org su. Tin QUI SOMMES-NOUS > QUESTIONS FREQUENTES su.
d DESƐN NIN FOTO’M BE SU NDƐ: Famiɛn Zezi nin anzi mun. Zoova ti i famiɛn bia’n su be sin lɔ.