An sasa amun wun mmusu’m be lika

LIKA nga nzue bo sin yiɛ i mɔ be flɛ i îles Salomon i lika kun suan Malaita. Malaita sɔ’n i lika mmuammua kun nun lɔ yɛ be tali Zaki ɔ. Kɛ ɔ fɛ i i bakan nun lele’n, be kleli i kɛ i ɲin yi mmusu mun. Ɔ seli kɛ: “M’an bumɛn i akunndan le kɛ ń sé mmusu mun naan be yo sran wie i abɔlɛ. Kusu m’an bumɛn i kɛ sɛ sran kun yoman rarafono fa sɛsɛmɛn i wun’n, ɔ kwla di aklunjuɛ.”a

Kɛ nga mɛn i bue uflɛ nun sran kpanngban be fa bu i sa’n, îles Salomon lɔfuɛ’m be bu i kɛ mmusu’m be kwla uka sran kun annzɛ be kwla yo i abɔlɛ. I kpa’n, mɛn’n i bue sɔ’n nun lɔfuɛ’m be bu i kɛ mmusu’m be nian be su. Ɔ maan be sroman be, klolɛ li yɛ be klo be ɔ.

Be nga be lafi mmusu’m be su’n, be yi i nglo wafa kpanngban. I nun mɔ Zaki te yo kaan, kɛ be klɔ lɔ mmla’m be ti anunman ng’ɔ suan korokoro i kpanlɛ’n, be fa be mma mun be wanndi wlu sua lɔ. ?Ngue ti yɛ be yo sɔ ɔ? Afin be bu i kɛ anunman’n i kpanlɛ’n kle kɛ sa tɛ kun su wa ju sran kun su.

Be klɔ lɔfuɛ wie’m be fa yɛbuɛ ufue kun be fa sie i be sua anuan’n i ti su nglo lɛ. Zaki yoli sɔ wie afin ɔ buli i kɛ yɛbuɛ sɔ’n sɛsɛ i mmusu tɛtɛ’m be lika. Kpɛkun kɛ ɔ kɔ junman’n, like kwlaa ng’ɔ di’n, ɔ fɛ i onga’n sie naan sɛ ɔ yo’n nn w’a guɛ i blo. Sa nga ti yɛ ɔ yo sɔ’n, yɛle kɛ ɔ bu i kɛ amuinfuɛ wie kwla fa to i amuin naan ɔ tɔ tukpacɛ.

Kannzɛ bɔbɔ be yoman i sɔ ninnge mun amun lɔ trele sa’n, sanngɛ atrɛkpa’n kɛ Zaki sa’n, ɔ yo amun kɛ ɔ fata kɛ amun fa amun lɔ nzuɛn wie’m be su naan amun a kwla sasa amun wun mmusu tɛtɛ’m be lika. Atrɛkpa’n, amun bu i kɛ sɛ amun a yomɛn i sɔ ninnge mun’n, sa tɛ wie kwla tɔ amun su.

Sɛ amun ɲin yi Biblu’n, amun kunndɛ kɛ amún sí wafa ng’ɔ tɛ kosan nga be lɔngɔ su yɛ’n be su’n: (1) ?Ngue abɔlɛ yɛ mmusu’m be kwla yo amun ɔn? (2) ?Sɛ amun fa amun lɔ nzuɛn wie’m be su’n, mmusu’m be kwla ɲan amun? (3) ?Wafa sɛ yɛ amun kwla sasa amun wun mmusu’m be lika kpa sa naan amun a di aklunjuɛ ɔ?

?Wafa sɛ yɛ mmusu’m be yo sran’m be abɔlɛ ɔ?

Biblu’n kle kɛ nán wunmiɛn mun yɛle mmusu mun mlɔnmlɔn. Ɲanmiɛn Ndɛ’n se kɛ: “Be nga be nyin o su’n, be si kɛ bé wú cɛn kun, sanngɛ be nga b’a wu’n be liɛ’n be wun-man sa fi wlɛ.” (Akunndanfuɛ’n 9:4-5) Anzi ɲin keklefuɛ mɔ be nin Satan be bo yoli kun kɛ bé láka klɔ sran mun’n, be yɛle mmusu mun.—Sa Nglo Yilɛ 12:9.

Ɲanmiɛn Ndɛ’n kan weiin kɛ ɔ fata kɛ e sasa e wun mmusu’m be lika. Akoto Pɔlu klɛli ndɛ yɛ’n ko mannin Klistfuɛ nga be o Efɛzi lɔ’n. I waan: “Nán e nin klɔ sran yɛ e kun-ɔn, sanngɛ e nin [...] mmusu tɛtɛ bɔ be o nglo lɔ’n yɛ e kun-ɔn.” Akoto Piɛli kannin mmusu’m be kpɛnngbɛn’n mɔ yɛle Satan’n i ndɛ seli kɛ ɔ ti kɛ “asɔmɔli b’ɔ wlan-wlan ɔ kpan kunndɛ nnɛn’n sa.”—Efɛzfuɛ Mun 6:12; 1 Piɛr 5:8.

Kɛ Satan yó sran’m be abɔlɛ’n, ɔ dun mmua laka be, yɛ ɔ sa be nian naan be yo like nga Ɲanmiɛn klomɛn i’n. Biblu’n se kɛ Satan “bɔbɔ kaci i wun kɛ anz b’ɔ kpaja’n sa.” (2 Korɛntfuɛ Mun 11:14) Ɔ bua ato kɛ ɔ ti aolia nun sran kun m’ɔ sasa sran mun ɔn. Sanngɛ nn i klun akunndan’n ti tɛ. Satan saci sran’m be akunndan’n naan b’a simɛn i bɔbɔ nin Ɲanmiɛn be su ndɛ nanwlɛ’n. (2 Korɛntfuɛ Mun 4:4) ?Ngue ti yɛ ɔ lakalaka sran mun ɔn?

Satan kunndɛ kpa kɛ be su i. Ɔ maan kannzɛ sran’m be si kɛ i yɛ be su i o, kannzɛ be siman sɔ o, i liɛ ng’ɔ kunndɛ’n yɛle kɛ be su i. I nun mɔ Zezi m’ɔ ti Ɲanmiɛn Wa’n o asiɛ’n su wa’n, Satan kunndɛli kɛ ɔ ‘koto i bo ɔ mɛnmɛn i.’ Zezi seli i kɛ: “Satan, jaso lɛ! Afin be klɛli i kɛ: ‘Koto ɔ Min Nyanmiɛn’n i bo, yɛ su i kunngba cɛ.’” (Matie 4:9, 10) Zezi w’a kplinman su kɛ ɔ́ yó like kun m’ɔ kwla kle kɛ ɔ su Satan ɔn.

Zoova i tinmin’n ti dan tra aolia nun sran’m be kwlaa be liɛ’n. Yɛ ɔ su yaciman be nga be ɲin yi i’n be lɛ naan Satan saci be mlɔnmlɔnmlɔn. (Jue Mun 83:19; Rɔmfuɛ Mun 16:20) Sanngɛ sɛ amun kunndɛ kɛ Ɲanmiɛn Zoova klun jɔ amun wun’n kɛ nga i klun jɔli Zezi wun’n sa’n, ɔ fataman kɛ amun yo like kun m’ɔ kwla kle kɛ amun su Satan nin i mmusu mun ɔn. I sɔ’n ti’n, ɔ fata kɛ amun wun aeliɛ nga be manman mmusu mun’n be wlɛ. ?Wafa sɛ yɛ amun kwla yo sɔ ɔ?

An wun aeliɛ nga Ɲanmiɛn kloman be’n be wlɛ

Ɲanmiɛn Zoova wlali Izraɛlifuɛ mɔ laa be ti i nvle’n be su nun kɛ nán be nian nvle nga be mantan be lɛ’n be aeliɛ wie’m be su. Ɔ seli kɛ: “Nán amun nun wie di bae annzɛ ɔ yi wunnzue. Nán amun nun wie cici sran.” Biblu’n kan be nga be yo i sɔ ninnge’m be ndɛ se kɛ: “Sran nga be yo i sɔ sa’n, wuun b’a bo tete Anannganman nyrun.”—Mmla’n 18:10-12.

Ɔ maan kɛ amún bú amun lika’n nun lɔ aeliɛ’m be akunndan’n, amun fa kosan yɛ mun usa amun wun. ?Aeliɛ sɔ’n yo maan amun lafi ndɛ nga wunnzue yifuɛ’m be kan’n su? ?Ɔ kle kɛ ninnge nga nguan nunman be nun’n be le tinmin naan be kwla sasa sran? ?Sran amuin tolɛ annzɛ be wun sasalɛ ndɛ o nun? ?I sɔ aeliɛ’n kwla yo naan amun yaci Zoova nin Zezi m’ɔ ti i janunfuɛ’n be lɛ be su aolia nun sran uflɛ mun?—Rɔmfuɛ Mun 14:11; Filipfuɛ Mun 2:9, 10.

Ɔ ti cinnjin kpa kɛ amun yaci i sɔ ninnge’m be yolɛ. ?Ngue ti ɔ? Ɲanmiɛn maan akoto Pɔlu klɛli i kɛ: “Amun nin e Min’n kwlá wla-man asa naan amun kunngba’n amun nin mmusu mun amun a wla asa.” Ɔ seli kɛ be nga be kunndɛ kɛ Ɲanmiɛn nin mmusu’m be klun jɔ be wun’n, bé “kán e Min’n i ya.” (1 Korɛntfuɛ Mun 10:20-22) Ɲanmiɛn Zoova waan saan i kunngba cɛ yɛ be su i ɔ, yɛ kusu ɔ nin i sɔ’n fata.—Ezipt Lɔ Tulɛ 20:4, 5.

Maan amun bu kosan nga i akunndan wie. ?Amun lɔ aeliɛ kun yo maan sran’m be bu i kɛ sɛ sran kun yo like’n, like kun yɛ ɔ su i bo maan ɔ yo ɔ? Amun bɔbɔ amun nian, lika sunman nun’n, be wun bo bian kunndɛlɛ annzɛ be yi bo bla kunndɛlɛ annzɛ bla nga be dun mmua kunndɛ naan b’a ja bian annzɛ bla’n, be ti like tɛ. Biblu’n kusu bu be fɔ wie. (1 Korɛntfuɛ Mun 6:9, 10) Sanngɛ jenvie nga be flɛ i Pasifiki’n i bue wie’m be su’n, sɛ talua kun se kɛ “be fali nɲa be yoli i are’n,”b yɛle kɛ sɛ i waan sɛ ɔ kunndɛ bian’n nɛ́n i ɲinfu ɔ, naan be cicili i ti yɛ ɔ yo sɔ’n, sran’m be bumɛn i fɔ.

Sanngɛ Biblu’n liɛ’n, ɔ kle kɛ sɛ sran kun yo like kun’n, ɔ ti i bɔbɔ i ti su trɔ. (Rɔmfuɛ Mun 14:12; Galasifuɛ Mun 6:7) I wie yɛle Ɛvu m’ɔ ti bla klikli nga Ɲanmiɛn yili’n i liɛ’n. Kɛ ɔ yoli ɲin kekle Ɲanmiɛn su’n, i waan Satan yɛ ɔ lɛkɛli i yɛ maan ɔ yoli sɔ ɔ. Ɔ seli kɛ: “Wuo yɛ ɔ lakali min yɛ maan n dili-ɔ.” Sanngɛ Ɛvu bɔbɔ su yɛ Zoova fali i ninnge ng’ɔ yoli’n fa guali ɔ. (Bo Bolɛ 3:13, 16, 19) E kusu ninnge nga e yo be’n, ɔ su seman kɛ sran uflɛ yɛ maan e yoli be ɔ.—Ebre Mun 4:13.

?Ngue yɛ ɔ fata kɛ amun yo ɔ?

Sɛ amun kunndɛ kɛ Ɲanmiɛn klun jɔ amun wun naan amún nían Biblu’n su nánti’n, ɔ fata kɛ amun fa ajalɛ juejue su. Klistfuɛ klikli’m be blɛ su’n, Efɛzi lɔ sran nga be awlɛn’n ti kpa’n, be kleli e ajalɛ kpa. Kɛ ɔ ko yo naan be nin mmusu mun b’a kpɛ duo nun mlɔnmlɔn’n, be tiantiannin be amuin fluwa’m be nuan kpɛkun “be yrali be sran’m be kwlaa be nyrun lɛ.”—Sa Nga Be Yoli’n 19:19.

Kwlaa naan sran sɔ’m b’a ra fluwa sɔ mun’n, “be wa dili sa nga be yoli’n i nanwlɛ nzra’n nun.” (Sa Nga Be Yoli’n 19:18) Like nga Pɔlu kleli be Klist su’n, ɔ kannin be awlɛn’n. Ɔ maan be rali be amuin fluwa mun. Sanngɛ b’a kɛmɛn i sɔ’n su, yɛle kɛ akunndan nga be bu i ninnge sɔ’m be su’n, be kacili i wie.

Ɔ ti su kɛ atrɛkpa’n ninnge sɔ’m be ase wlalɛ’n su yoman pɔpɔ. I sɔ’n w’a yoman pɔpɔ w’a manman Zaki mɔ e dun mmua e kɛnnin i ndɛ’n wie. Ɔ nin Zoova i Lalofuɛ mun be boli Biblu’n nun like suanlɛ bo. Yɛ like ng’ɔ suannin’n yoli i fɛ. Sanngɛ w’a yaciman rarafono’n i yolɛ. Kɛ ɔ fɛ i ɲin sieli i wafa ng’ɔ bu ninnge sɔ mun’n i su’n, ɔ wunnin i kɛ ɔ lafi ninnge nga Zoova waan cɛn wie lele ɔ́ yó be’n be su. Sanngɛ ɔ yoli i kɛ sɛ i waan nán sa tɛ wie ɲɛn i dɔ nga su’n, ɔ fataman kɛ ɔ wla i nannan’m be nzuɛn’n i ase.

?Ngue yɛ ɔ ukali Zaki naan w’a kaci i akunndan’n niɔn? I waan: “N srɛli Zoova naan ɔ sasa min yɛ ɔ uka min naan n lafi i su. Kɛ ɔ́ yó sɔ kusu’n, n yacili min nannan’m be nzuɛn’n i su falɛ.” ?Kɛ ɔ yoli sɔ’n, sa tɛ wie ɲɛnnin i? Zaki tɛ su kɛ: “Cɛcɛ. Like ng’ɔ yoli min’n yɛle kɛ n suannin Zoova i su lafilɛ. N wunnin wafa nga sran kun nin Zoova be afiɛn’n kwla mantan kɛ sran kun nin i janvuɛ sa’n.” Afuɛ nso nga be sinnin lɛ’n, Zaki dili Ɲanmiɛn junman blɛ kwlaa nun. Ɔ ukali sran uflɛ mun naan be si like nga Biblu’n kle’n.

?Yɛ sɛ amun fa Zaki i ajalɛ’n su’n nin? Amun fa “ngwlɛlɛ” naan amun nian amun nvle nun lɔ aeliɛ mun, sɛ be nin “Ɲanmiɛn i klun sa’n” be kɔ likawlɛ o. (2 Timote 1:7; Rɔmfuɛ Mun 12:2) I sin’n, amun tra amun awlɛn naan amun yaci ninnge ngbɛnngbɛn’m be su falɛ’n. Sɛ amun yo sɔ’n, amun kwla lafi su kɛ Zoova “sɔ́ amun nun” yɛ ɔ́ sásá amun. (2 Korɛntfuɛ Mun 6:16-18) Kɛ Zaki sa’n, amún wún kɛ Biblu’n nun ndɛ yɛ’n ti su. I waan: “Anannganman ti kɛ awa dan wie bɔ b’a si’n sa. Sran kpa ng’ɔ wanndi ko talo i’n, ɔ nyan manndran.”—Nyanndra Mun 18:10.

[Ja ngua lɛ ndɛ mun]

[Foto, bue 30]

“Korokoro”

[Foto cifuɛ mun, bue 30]

Courtesy of Dr. Bakshi Jehangir

[Foto, bue 30]

Talua kun su isaisa i aliɛ onga’n naan b’a fa tomɛn i amuin.