Nán maan e se e wun kɛ e siman like kle
1. ?Ngue ti yɛ aniaan wie’m be kunndɛman kɛ bé klé sran’m be Biblu’n nun like ɔ?
1 ?Ɔ yo amun kɛ amun siman like kle ti’n, amun kunndɛman kɛ amún klé sran’m be Biblu’n nun like? Laa kpa nun’n, kɛ blɛ wie nun Ɲanmiɛn mɛnnin i sufuɛ kpa’m be junman’n, be nun wie’m be buli i kɛ be kwlá diman. Afin b’a lafiman be wun su. Be yɛle Moizi nin Zeremi. (Tul. 3:10, 11; 4:10; Zer. 1:4-6) Ɔ maan, nán amun ngunmin yɛ ɔ yo amun kɛ amun kwlaman junman kun di ɔ. ?Sanngɛ, ɔ yo sɛ yɛ maan be nga’m be yacili i sɔ akunndan’n i bulɛ ɔ?
2. ?Ngue ti yɛ ɔ fataman kɛ e bo jasin fɛ’n awloawlo’m be nun ngunmin naan e se kɛ aniaan uflɛ yɛ ɔ kle sran’m be Biblu’n nun like ɔ?
2 Maan e wun i wlɛ kɛ like ng’ɔ tra e kpɛn’n, Zoova su seman e kɛ e yo i le. (Jue. 103:14) Ɔ maan kɛ ɔ se kɛ e ‘kle sran’m be like’ naan be ‘kaci [Zezi] i sɔnnzɔnfuɛ’n,’ e kwla di i sɔ junman’n ti yɛ ɔ fa man e ɔ. (Mat. 28:19, 20) Nán ngwlɛlɛfuɛ mun, annzɛ be mɔ be si ninnge’m be yo kpa’n, be ngunmin yɛ Zoova fɛli i sɔ junman’n mannin be ɔ. (1 Kor. 1:26, 27) I sɔ’n ti’n, nán maan e bo jasin fɛ’n awloawlo’m be nun ngunmin naan e se kɛ aniaan uflɛ yɛ ɔ fata kɛ ɔ kle sran’m be Biblu’n nun like ɔ.
3. ?Wafa sɛ yɛ Zoova kle e sran’m be Biblu’n nun like klelɛ ɔ?
3 Zoova yɛ maan e si like kle ɔ: Sɛ e si sran’m be like kle’n, i sɔ’n fin Zoova. (2 Kor. 3:5) I fanngan nun’n, i anuannzɛ’n kle e Biblu’n nun like nga mɛn’n nun ngwlɛlɛ sifuɛ dandan mun bɔbɔ be simɛn i’n. (1 Kor. 2:7, 8) Wafa nga Zezi m’ɔ ti Like Klefuɛ Danfuɛ’n kleli sran’m be like’n, Zoova klɛ sieli naan e nian su. Ɔ sin asɔnun’n i lika yɛ blɛblɛblɛ, ɔ kle ɔ. Asa ekun’n, kɛ ɔ ko yo naan sran kun bɔbɔ w’a kpɛmɛn i ti nun’n ti’n, Zoova man e like nga e kwla fa kle sran’m be Biblu’n nun like’n. I kun yɛle fluwa Biblu’n kle’n. I nun ndɛ’m be ti weinwein, kpɛkun be wlɛ wunlɛ timan kekle. Ɔ maan, Biblu’n nun like klelɛ’n timan kekle kɛ nga e fa bu i’n sa.
4. ?Ngue ti yɛ e kwla lafi su kɛ Zoova súan e bo ɔ?
4 Zoova fanngan nun’n, Moizi nin Zeremi be kwla dili be junman ng’ɔ fa mannin be’n. (Tul. 4:11, 12; Zer. 1:7, 8) E kwla srɛ Zoova kɛ ɔ suan e bo wie. Afin kɛ é klé sran’m be Biblu’n nun like’n, i kwlaa yoli o, Zoova i su ndɛ nanwlɛ’n yɛ e kle ɔ. Yɛ i sɔ’n jɔ i klun. (1 Zan 3:22) Nanwlɛ, sran’m be Biblu’n nun like klelɛ’n ɔ man aklunjuɛ dan. I sɔ’n ti’n, maan e ta nda kɛ é dí junman sɔ’n wie.