?Ngue ti yɛ sran’m be wu-ɔ?

Ndɛ nga Biblu’n kan’n

Sɛ e usa e wun sɔ’n, ɔ ti su. I li kɛ e sran kpa wie wu’n, yɛ e usa e wun sɔ kpa’n niɔn. Biblu’n se kɛ: “Bɔyre ng’ɔ kpɛ wie’n i ba’n yɛle sa tɛ’n.”—1 Korɛntifuɛ Mun 15:56.

?Ngue ti yɛ sran’m be kwlaa be yo sa tɛ mɔ be wu-ɔ?

Kɛ Adan nin Ɛvu mɔ be ti klɔ sran klikli’n be fɔnnin Ɲanmiɛn wun’n, be wuli. (Bo Bolɛ 3:17-19) Kɛ be jasoli Ɲanmiɛn i wun’n, saan wulɛ cɛ yɛ bé wú-ɔ. Afin “nguan’n i bo’n” wo Ɲanmiɛn i wun lɔ.—Jue Mun 36:9; Bo Bolɛ 2:17.

Adan fali sa tɛ’n sali i osu’n nunfuɛ’m be kwlaa. Biblu’n se kɛ: “Sran kunngba ti yɛ sa tɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Ɔ maan wie’n wo sran’m be kwlaa be su’n, afin be kwlaa be yoli sa tɛ.” (Rɔmunfuɛ Mun 5:12) Ɔ maan like nga ti yɛ sran’m be kwlaa be wu’n, yɛle kɛ be kwlaa be ti sa tɛ yofuɛ.—Rɔmunfuɛ Mun 3:23.

Ɲanmiɛn wá núnnún wie’n

Ɲanmiɛn tali e nda kɛ cɛn wie lele’n, “ɔ́ núnnún wie’n mlɔnmlɔnmlɔn.” (Ezai 25:8) Sanngɛ ɔ́ dún mmua núnnún sa tɛ’n ka. Afin sa tɛ’n ti yɛ wie’n wo lɛ-ɔ. Ɔ́ wá sín Zezi Klisi i lika naan w’a yo sɔ. Zezi yɛ ‘ɔ yi sa tɛ’n mɛn’n nun-ɔn.’—Zan 1:29; 1 Zan 1:7.