NDƐ NG’Ɔ KLƐ FLUWA’N SU’N | ?NDƐ ONIN YƐ Ɔ O BIBLU’N NUN ƆN?
Jasin fɛ kun m’ɔ ti sran kwlakwla liɛ’n
Kɛ Ɲanmiɛn cɛnnin Zezi’n, i sɔnnzɔnfuɛ’m be wa ɲannin wunmiɛn be dili Ɲanmiɛn junman’n i juejue su kpa. Be nun kun yɛle akoto Pɔlu. Ɔ dili i junman liɛ’n sinnin blɔfuɛ’m be lika nga kɛ é sé yɛ’n be flɛ i Turki’n, i su lɔ lele fa juli Mediterane jenvie’n i akpasua’n su. Ɔ takali asɔnun mun, kpɛkun ɔ wlali Klistfuɛ’m be yakpa kɛ be jran be ɲrun tanndanfuɛ’m be ɲrun kekle. Yɛ nán be yo sa tɛtɛ nga be blɛ sufuɛ’m be yo’n wie. Nanwlɛ, lika’n yoli kekle Klistfuɛ’m be su. Ɔ nin i sɔ ngba’n, sran kpanngban be kacili Klistfuɛ.
Kɛ ɔ́ kɔ́ i ɲrun’n, be wa wlali Pɔlu bɔbɔ bisua. Sanngɛ kɛ ɔ o lɔ’n, ɔ klɛli i niaan Klistfuɛ’m be fluwa wlali be fanngan yɛ ɔ tuli be fɔ. Ɲanmiɛn wawɛ’n maan ɔ wlali be su nun kɛ be nian be wun kpa. Afin sran wie’m bé wá jáso Ɲanmiɛn wun. Pɔlu seli kɛ: “Gboklo wlɛfuɛ’m bé wá wlú amun nun [...] bé kán ndɛ b’ɔ ti-mɛn i su’n bé fá láka Kristfuɛ mun naan be su be su.”—Sa Nga Be Yoli’n 20:29, 30.
Akoto’m be blɛ su’n, sran sɔ’m be yili be wun nglo blɛblɛblɛ. Zezi yili sa nga bé wá jú blɛ sɔ nun’n, be nglo kleli akoto Zan aolia nun. Sa sɔ’m be o fluwa nga be flɛ i Sa Nglo Yilɛ nun. Ndɛ nga Zan klɛli i fluwa sɔ nun’n, ɔ kle kɛ like nga Ɲanmiɛn sunnzunnin kɛ ɔ́ yó mán sran mun asiɛ’n su’n, ɔ́ yó. Afin i kpɔfuɛ fi yɛ ato like klefuɛ fi su kwlá tɛnndɛnmɛn i ɲrun. “Sran nga be o asiɛ’n su bɔ be fin mɛnmɛn nin nvle-nvle’n kwlaa nun’n, ɔ nin be kwlaa nga be aniɛn’n ti fanunfanun’n, ɔ nin sran wafa-wafa’n kwlaa” bé tí Ɲanmiɛn Sielɛ’n i jasin fɛ’n. (Sa Nglo Yilɛ 14:6) Asiɛ wunmuan’n wá káci lika klanman. Yɛ sran kwlaa ng’ɔ yo Ɲanmiɛn klun sa’n, ɔ́ kwlá trán nun wie!
?Nán jasin fɛ’n yɛle sɔ’n? É wlá ɔ fanngan kɛ a suan Biblu’n nun like naan w’a wun ndɛ nga Ɲanmiɛn waan ɔ́ kán klé sran mun’n i wlɛ. Sɛ a yo sɔ’n, á wún kɛ Biblu’n nun ndɛ’n kwla yo wɔ ye tititi.
Sɛ a kɔ ɛntɛnɛti’n i lika nga be klɛli i kɛ www.pr418.com nun’n, á wún Biblu’n aniɛn ko ju 50 nun. Nga a klo kɛ á kánngan nun’n, a kwla kanngan. Ɛntɛnɛti i lika kunngba sɔ nun’n, á wún fluwa wie mɔ be klɛli be ɔ klɔ aniɛn nun’n. Be nun wie yɛle fluwa Jasin fɛ kpa kun fin Ɲanmiɛn! ɔ nin ?Ngue like yɛ Biblu’n kle i sakpasakpa ɔ? Like nga ti yɛ ɔ fata kɛ a lafi su kɛ Biblu’n ti Ɲanmiɛn Ndɛ fluwa’n, fluwa sɔ’m be yiyi nun. Kpɛkun wafa nga i nun ndɛ’n kwla yo wɔ nin wɔ awlobo’n amun ye’n, bé klé wɔ. Sɛ a le ndɛ uflɛ usa’n, kunndɛ Zoova i Lalofuɛ mun naan fa usa be.
—Sa Nga Be Yoli’n, nin Efɛzfuɛ Mun, nin Filipfuɛ Mun, nin Kolɔsfuɛ Mun, nin Filemɔn, nin 1 Zan ɔ nin Sa Nglo Yilɛ fluwa’n be su yɛ ndɛ’n taka ɔ.
[Foto, bue 7]
[Foto, bue 7]