MAAN E FA E WUN E MANTAN ƝANMIƐN
‘Zoova yacili sa nga an yoli i’n cɛli amun’
Be flɛ Angle fluwa sifuɛ kun kɛ Edward Herbert. Ɔ seli kɛ sran ng’ɔ kwlá yaciman i wiengu wun sa cɛnmɛn i’n, ɔ tannin i wun atin. Ndɛ sɔ m’ɔ kannin’n, ɔ kle like kun mɔ i ti yɛ ɔ fata kɛ e yaci sran wun sa cɛ i’n. Yɛle kɛ kannzɛ e yo sɛ’n, ɔ lɛ cɛn kun mɔ é kúnndɛ kɛ be yaci e wun sa cɛ e ɔ. (Matie 7:12) Sanngɛ, ɔ lɛ like cinnjin kpa kun mɔ i ti yɛ ɔ fata kɛ e yaci sa cɛ ɔ. Akoto Pɔlu kɛnnin i ndɛ seli kɛ: ‘Sa nga amun wiengu yo bɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i. Zoova yacili sa nga an yoli i’n cɛli amun, ɔ maan amun kusu, sa nga be yo amun’n, an yaci cɛ.’—Kolɔsfuɛ Mun 3:13.
Fɔ’n wo e kwlaa e nun. I ti’n, e kwla e lo e wiengu i ngasi yɛ e wiengu’m be yo e sa wie. (Rɔmfuɛ Mun 3:23) ?Ngue yɛ é yó naan e nin e wiengu y’a tran fɛfɛ ɔ? Ɲanmiɛn maan akoto Pɔlu seli kɛ maan sa nga e wiengu yo e’n sɔn e nun yɛ e yaci sa cɛ. Be nga Pɔlu blɛ su be fali afɔtuɛ sɔ’n su’n, be liɛ yoli ye. Andɛ kusu sɛ e fa su’n, e liɛ yó ye wie. Maan e fa ndɛ sɔ’n naan e yiyi nun e nian.
‘Sa nga amun wiengu yo bɔ an wun i’n, maan ɔ sɔn amun nun.’ Glɛki nun ndɛ mma nga be kacili i Wawle’n nun kɛ ‘ɔ sɔn amun nun’n,’ be kwla se ekun kɛ be blu sa su annzɛ be yo kɛ be wunman sa nga be wiengu fa yo be’n. Fluwa kun waan kɛ Klistfuɛ’m be wiengu yo be sa annzɛ be klomɛn i ayeliɛ wie mɔ sanngɛ be tra be awlɛn’n, be kle kɛ sa sɔn be nun. Kɛ mɔ e lo e wiengu ngasi wie ti’n, sa nga be yo e’n, nán e fa yo ndɛ naan e afiɛn saci. ?Ngue yɛ ɔ fata kɛ e yo ɔ?
‘Sɛ sran kun yo i wiengu sa’n, maan ɔ yaci cɛ i.’ Fluwa sifuɛ kun seli kɛ Glɛki nun ndɛ mma nga be fa kannin sa yaci cɛlɛ ndɛ Kolɔsfuɛ Mun 3:13 nun’n, i bo ti kploun kpa. Ndɛ mma sɔ’n kle kɛ sran ng’ɔ yaci sa cɛ’n, ɔ yo i klun ufue su. Fluwa uflɛ seli kɛ ‘be yo sran’n i ye.’ Ɔ maan kɛ ‘e wiengu yo e sa mɔ e yaci e cɛ i’n,’ e yo i ye. ?Ngue ti yɛ ɔ fata kɛ e yo sɔ ɔ? Afin kannzɛ e yo sɛ’n, ɔ le cɛn kun mɔ e kusu é kúnndɛ kɛ be yo e ye wie ɔ.
‘Zoova yacili sa nga an yoli i’n cɛli amun, ɔ maan amun kusu, sa nga be yo amun’n, an yaci cɛ.’ Like cinnjin kpa nga ti yɛ kɛ e wiengu yo e sa’n, ɔ fata kɛ e yaci e cɛ i’n yɛ: Ɲanmiɛn Zoova yaci sa nga e yo i’n cɛ e. (Mise 7:18) Kɛ sran’m be yo sa tɛ mɔ be yaci i yolɛ’n, Zoova yaci cɛ be. Zoova loman sran ngasi naan se kɛ bé yáci sa ng’ɔ yo’n cɛ́ i. Ɔ nin i sɔ ngba’n, ɔ yaci sa cɛ klun ufue su. Sa yaci cɛlɛ nun’n, Zoova leman wunsu.
Zoova si aunnvuɛ dan. I sɔ’n ti’n, e fa e wun mɛntɛn i kpɛkun e kunndɛ kɛ é fɛ́ i nzuɛn’n. (Efɛzfuɛ Mun 4:32—5:1) ?Sɛ Zoova si aunnvuɛ’n niɔn, e bɔbɔ yɛ sɛ e wiengu yo e sa naan ɔ yo i nsisɔ’n, e su yaci cɛmɛn i ɔ?—Lik 17:3, 4.
Biblu’n i bue ng’ɔ ti mɔ be kanngan nun Ɔktɔblu nun’n
Galasifuɛ Mun 1-6; Efɛzfuɛ Mun 1-6; Filipfuɛ Mun 1-4; Kolɔsfuɛ Mun 1-4; 1 Tɛsalonikfuɛ Mun 1-5; 2 Tɛsalonikfuɛ Mun 1-3; 1 Timote 1-6—2 Timote 1-4
[Ndɛ kwle, bue 8]
Sa yaci cɛlɛ nun’n, Zoova leman wunsu.