Inot na Cronica

19 Pag-abot nin panahon, nagadan si Nahas na hadi kan mga Ammonita, asin an saiyang aki an nagsalida sa saiya bilang hadi.+ 2 Huli kaini, sinabi ni David: “Mapahiling ako nin maimbod na pagkamuot+ ki Hanun na aki ni Nahas ta nagpahiling man sako nin maimbod na pagkamuot an saiyang ama.” Kaya nagsugo si David nin mga mensahero tanganing rangahon si Hanun huli sa pagkagadan kan saiyang ama. Pero pag-abot kan mga lingkod ni David sa daga kan mga Ammonita+ tanganing rangahon si Hanun, 3 an mga pamayo* kan mga Ammonita nagsarabi ki Hanun: “Paghuna mo gustong tawan ni David nin onra an saimong ama kun kaya nagsugo siya sa saimo nin mga pararanga? Bako daw na nagdigdi an saiyang mga lingkod para maingat na magmanman saka mag-espiya sa nasyon tanganing mapabagsak ka niya?” 4 Kaya dinakop ni Hanun an mga lingkod ni David asin inahitan sinda+ saka pinutol an saindang bado puon sa habayan* pababa asin pinapuli sinda. 5 Kan ibareta ki David an nangyari sa sainda, nagsugo tulos siya nin iba pa tanganing sabaton sinda, huling grabe an pagkasupog ninda; asin sinabi sa sainda kan hadi: “Duman nguna kamo sa Jerico;+ saka na lang kamo magpuli pag nagtubo na an barabas nindo.”

6 Dangan narealisar kan mga Ammonita na angguton na sa sainda si* David, kaya nagpadara si Hanun saka an mga Ammonita nin 1,000 talentong* pirak na pambayad nin mga karwahe saka mga parakabayo hali sa Mesopotamia,* Aram-maaca, asin Zoba.+ 7 Kaya nagbayad sinda para sa 32,000 na karwahe, pati na sa hadi kan Maaca saka sa mga suldados kaini. Dangan nagpasiring an mga ini sa atubangan kan Medeba+ asin nagkampo duman. Nagtiripon man hali sa saindang mga siyudad an mga Ammonita tanganing maghanda sa pakikipaglaban.

8 Kan mabaretaan ini ni David, isinugo niya si Joab+ asin an bilog na hukbo, pati an pinakamatitibay niyang mga parapakilaban.+ 9 Dangan, nagruluwas an mga Ammonita asin puminormada sa may entrada kan siyudad para makipaglaban, mantang an mga nag-arabot na hadi puminuwesto sa may kalangtadan.

10 Kan mahiling ni Joab na nagsasalakay an mga kalaban sa atubangan saka sa likudan niya, nagpili siya nin mga pinakamatitibay na suldados sa Israel asin pinapormada niya sinda para makipaglaban sa mga Siriano.+ 11 Asin an ibang mga suldados ipinamahala niya sa* saiyang tugang na si Abisai,+ tapos pinapormada niya sinda para makipaglaban sa mga Ammonita. 12 Dangan sinabi niya: “Kun mahiling mong nadadaog na ako kan mga Siriano,+ tabangan mo ako; pero kun nadadaog ka na kan mga Ammonita, tatabangan taka. 13 Magpakakusog kita asin kusugan niyato an satong buot+ alang-alang sa satong mga kahimanwa asin alang-alang sa mga siyudad kan satong Diyos, asin gigibuhon ni Jehova kun ano an sa hiling niyang marahay.”

14 Dangan uminabante si Joab asin an saiyang mga tawuhan tanganing makipaglaban sa mga Siriano, asin nagdurulag an mga ini sa atubangan niya.+ 15 Kan mahiling kan mga Ammonita na nagdurulag an mga Siriano, nagdurulag man sinda sa saiyang tugang na si Abisai asin nagralaog sinda sa siyudad. Pagkatapos kaini, nagbalik na si Joab sa Jerusalem.

16 Kan mahiling kan mga Siriano na nadaog sinda kan Israel, nagsugo sinda nin mga mensahero tanganing ipaapod an mga Siriano na nasa rehiyon kan Salog,*+ asin pinanginutan sinda ni Sofac, an pamayo kan hukbo ni Hadadezer.+

17 Kan ibareta ini ki David, tiniripon niya tulos an bilog na hukbo kan Israel asin nagbalyo sinda sa Jordan asin nagpasiring sa sainda tapos puminormada sinda tanganing makipaglaban sa sainda. Puminormada sa ralaban si David tanganing sabaton an mga Siriano, asin nakipaglaban an mga ini sa saiya.+ 18 Pero nagdurulag an mga Siriano sa atubangan kan Israel, asin 7,000 na suldados na nakasakay sa karwahe saka 40,000 na suldados kan mga Siriano an nagadan ni David. Nagadan man niya si Sofac na pamayo kan hukbo. 19 Kan mahiling kan mga lingkod ni Hadadezer na nadaog sinda kan Israel,+ nakipagkatuninungan tulos sinda ki David asin nagin mga sakop niya;+ asin habo na kan Siria na magtabang pa sa mga Ammonita.