Ezekiel
41 Dangan dinara niya ako sa santuwaryo sa luwas,* asin sinukol niya an mga harigi sa gilid; anom na maniko* an lakbang kan mga iyan sa sarong ibong asin anom na maniko an lakbang sa saro pang ibong. 2 An lakbang kan entrada sampulong maniko, asin an lanob sa pagirilid* kan entrada limang maniko sa sarong ibong asin limang maniko sa saro pang ibong. Sinukol niya an laba kaiyan, asin 40 maniko iyan, asin 20 maniko an lakbang kaiyan.
3 Dangan naglaog* siya asin sinukol an harigi sa gilid kan entrada, asin duwang maniko an hibog kaiyan, asin anom na maniko an lakbang kan entrada. An lanob sa pagirilid* kan entrada pitong maniko. 4 Tapos sinukol niya an kuwartong nakaatubang sa santuwaryo sa luwas, asin 20 maniko an laba kaiyan saka 20 maniko an lakbang.+ Asin sinabi niya sako: “Ini an Kabanal-banali.”+
5 Dangan sinukol niya an lanob kan templo, asin anom na maniko an hibog kaiyan. An lakbang kan mga kuwarto sa gilid sa palibot kan templo apat na maniko.+ 6 Tulong eskalon an mga kuwarto sa gilid, asin may 30 kuwarto an kada eskalon. Igwa nin garo mga pasamano sa palibot kan lanob kan templo na nagsusuportar sa salog kan mga kuwarto sa gilid, tanganing an mga biga dai nakatalbong sa lanob kan mismong templo.+ 7 Sa mag-ibong na gilid kan templo may paitok na hagyan na pahiwas nin pahiwas mantang pasakat iyan sa mga kuwartong nasa itaas.+ An lakbang kan mga kuwarto nagigin mas mahiwas mantang naglalangkaw an eskalon. Hali sa pinakaibabang eskalon, puwedeng sumakat pasiring sa pinakaitaas na eskalon paagi sa pag-agi sa tahaw na eskalon.
8 Nakahiling ako nin halangkaw na plataporma sa palibot kan templo, asin an langkaw kan mga pundasyon kan mga kuwarto sa gilid may sukol na sarong bilog na tambo, na anom na maniko, sagkod sa kanto. 9 Limang maniko an lakbang kan pangluwas na lanob kan mga kuwarto sa gilid. Igwa nin bukas na espasyo* sa pagirilid kan mga kuwarto sa gilid na parte kan templo.
10 Igwa nin espasyo sa pag-ultanan kan templo saka kan mga kuwartong kakanan*+ na 20 maniko an lakbang sa mag-ibong na gilid. 11 May duwang laugan pasiring sa mga kuwarto sa gilid hali sa bukas na espasyo; an saro yaon sa parteng norte asin an saro pa yaon sa parteng timog. Limang maniko an lakbang kan bukas na espasyo sa bilog na palibot.
12 An edipisyong nasa parteng sulnupan na nakaatubang sa bakanteng lugar may lakbang na 70 maniko asin may laba na 90 maniko; limang maniko an hibog kan palibot na lanob kan edipisyo.
13 Sinukol niya an templo, asin 100 na maniko an laba kaiyan. An laba kan bakanteng lugar kaiba an edipisyo* pati an mga lanob kaiyan 100 na maniko man. 14 An lakbang kan atubangan kan templo na nakaatubang sa sirangan kaiba an bakanteng lugar 100 na maniko.
15 Sinukol niya an laba kan edipisyo na nakaatubang sa bakanteng lugar sa likod, kaiba an mga pasilyo sa mag-ibong na gilid, asin 100 na maniko iyan.
Sinukol niya man an santuwaryo sa luwas, an santuwaryo sa laog,+ asin an mga portiko kan patyo, 16 pati an mga entrada, an mga papasadit na bintana,+ asin an mga pasilyo sa tulong lugar na iyan. Pinatungan nin kahoy an lanob harani sa entrada,+ puon sa salog sagkod sa mga bintana; asin may tahob an mga bintana. 17 Sinukol an ibabaw kan entrada asin an laog kan templo saka an luwas pati an nakapalibot na lanob. 18 Igwa diyan nin inukit na mga kerubin+ asin mga puon nin palma;+ may sarong puon nin palma sa kada pag-ultanan kan duwang kerubin, asin an lambang kerubin may duwang lalawgon. 19 An lalawgon nin tawo nakaatubang sa puon nin palma sa sarong kampi, asin an lalawgon nin leon* nakaatubang sa puon nin palma sa ibong na kampi.+ Arog kaiyan an pagkakaukit sa mga iyan sa enterong templo. 20 Puon sa salog sagkod sa may itaas kan entrada igwa nin inukit na mga kerubin saka mga puon nin palma sa lanob kan santuwaryo.
21 Kuwadrado an mga poste kan pintuan* kan santuwaryo.+ Sa atubangan kan banal na lugar* igwa nin garo 22 sarong kahoy na altar+ na tulong maniko an langkaw asin tulong maniko an laba. Igwa iyan nin mga posteng panganto, asin an pamitisan* kaiyan saka an mga gilid gibo sa kahoy. Dangan sinabi niya sako: “Ini an lamesa na nasa atubangan ni Jehova.”+
23 Igwa nin tigduwang pinto an santuwaryo sa luwas saka an banal na lugar.+ 24 An mga pinto igwa nin duwang panel na natitiklop sa tahaw, duwang panel sa kada pinto. 25 May inukit na mga kerubin saka mga puon nin palma sa mga pinto kan santuwaryo, kapareho kan nasa mga lanob.+ Igwa man nin nakalabaw na kahoy na atop sa atubangan kan portiko sa luwas. 26 Igwa man nin mga papasadit na bintana+ saka mga disenyong puon nin palma sa mag-ibong na gilid kan portiko, pati sa mga kuwarto sa gilid kan templo saka sa mga nakalabaw na atop.