Ezekiel

42 Dangan giniyahan niya ako pasiring sa patyong nasa luwas sa parteng norte.+ Asin dinara niya ako sa mga kuwartong kakanan na kataid kan bakanteng lugar,+ na nasa norte kan kataid na edipisyo.+ 2 An laba kaiyan sa norteng entrada 100 na maniko,* asin 50 maniko an lakbang kaiyan. 3 Yaon iyan sa pag-ultanan kan patyong nasa laog, na 20 maniko an lakbang,+ asin kan palitada kan patyong nasa luwas. Tulong eskalon an mga kuwartong kakanan, asin magkaharampang an mga pasilyo kaiyan. 4 Sa atubangan kan mga kuwartong kakanan* may agihan sa tahaw+ na 10 maniko an lakbang asin 100 na maniko an laba,* asin an mga entrada kaiyan nakaatubang sa norte. 5 An mga kuwartong kakanan na nasa itaas kan edipisyo mas sadit kumpara sa mga nasa ibaba saka sa mga nasa tahaw na eskalon, dahil dakulang espasyo an nakua kan mga pasilyo sa mga kuwartong kakanan na nasa itaas na eskalon. 6 Tulong eskalon kaya an langkaw kan mga iyan, pero mayo iyan nin mga harigi na arog kan mga harigi na nasa mga patyo. Kaya mas dakulang espasyo an nakua sa mga kuwartong kakanan na nasa itaas kisa kan sa mga nasa ibaba saka mga nasa tahaw na eskalon.

7 An laba kan pangluwas na lanob na gapo na harani sa mga kuwartong kakanan asin nasa kampi kan patyong nasa luwas saka kahampang kan iba pang mga kuwartong kakanan 50 maniko. 8 Huli ta an laba kan mga kuwartong kakanan na nasa kampi kan patyong nasa luwas 50 maniko, pero an mga nasa kampi kan santuwaryo 100 na maniko. 9 Sa bandang sirangan, igwa nin laugan pasakat sa mga kuwartong kakanan hali sa patyong nasa luwas.

10 Igwa man nin mga kuwartong kakanan sa parteng timog. Nasa sirangan kan mga iyan an lanob na gapo kan patyo. An mga kuwartong kakanan na iyan harani sa bakanteng lugar saka sa edipisyo.+ 11 May agihan sa atubangan kan mga iyan arog kan sa mga kuwartong kakanan sa norte.+ Magkaparareho man an laba saka lakbang kan mga iyan, pati an mga luwasan saka mga pagkadisenyo. An mga entrada kan mga iyan 12 kapareho kan mga entrada kan mga kuwartong kakanan na nasa parteng timog. May laugan pasiring sa agihan, na nasa lanob na gapo na nasa sirangan, kun sain puwedeng maglaog an saro.+

13 Dangan sinabi niya sako: “An mga kuwartong kakanan sa norte saka an mga kuwartong kakanan sa timog na kataid kan bakanteng lugar+ iyo an mga banal na kuwartong kakanan kun sain kinakakan kan mga saserdoteng nagdudulok ki Jehova an kabanal-banaling mga dulot.+ Duman ninda ilinalaag an kabanal-banaling mga dulot—dulot na tipasi, dulot para sa kasalan, asin dulot para sa pagkakasala—huling banal an mga lugar na iyan.+ 14 Pag naglaog an mga saserdote sa banal na lugar, dai sinda dapat magluwas pasiring sa patyong nasa luwas na dai nguna hinuhuba an mga bado na sinulot ninda sa paglilingkod,+ huling banal an mga iyan. Masulot sinda nin ibang bado bago magduman sa mga lugar na puwedeng dumanan kan ibang mga tawo.”

15 Kan tapos na niyang sukulon an bilog na templo,* dinara niya ako sa luwas. Nag-agi kami sa trangkahan na nakaatubang sa sirangan,+ tapos sinukol niya an bilog na lugar.

16 Sinukol niya an parteng sirangan gamit an pansukol na tambo,* asin 500 na tambo an laba kaiyan puon sa sarong gilid sagkod sa ibong na gilid.

17 Sinukol niya an parteng norte gamit an pansukol na tambo, asin 500 na tambo an laba kaiyan.

18 Sinukol niya an parteng timog gamit an pansukol na tambo, asin 500 na tambo an laba kaiyan.

19 Nagpasiring siya sa parteng sulnupan. Sinukol niya iyan gamit an pansukol na tambo, asin 500 na tambo an laba kaiyan.

20 Sinukol niya an apat na gilid kaiyan. May nakapalibot diyan na pader+ na 500 na tambo an laba asin 500 na tambo an lakbang,+ para pagsuwayon an banal na lugar saka an lugar na para sa ordinaryong gibuhon.+