Ezekiel
19 “Magkanta ka nin sarong panambitan* manungod sa mga pamayo kan Israel, 2 asin sabihon mo,
‘Sa ano ikakaagid an saimong ina? Sa sarong babaying leon sa tahaw nin mga leon.
Naghigda siya sa kaibanan nin mga makusog na durudakula nang leon* asin inataman an mga ugbon niya.
3 Pinadakula niya an saro sa saiyang mga ugbon, asin nagi ining sarong makusog na durudakula nang leon.+
Nakanuod ining manggutay-gutay nin biktima,
Naniba pa ngani ini nin mga tawo.
4 Nabaretaan kan mga nasyon an manungod sa saiya asin dinakop siya paagi sa saindang kalot,
Tapos dinara ninda siya sa daga nin Ehipto gamit an mga kawit.+
5 Naghalat an inang leon asin kan huri nahiling niya na mayo nang paglaom na makabalik pa an saiyang ugbon.
Kaya kinua niya an saro pa niyang ugbon asin isinugo bilang sarong makusog na durudakula nang leon.
6 Naglakaw-lakaw man ini kaiba kan iba pang mga leon asin nagin sarong makusog na durudakula nang leon.
Nakanuod siyang manggutay-gutay nin biktima, asin naniba pa ngani siya nin mga tawo.+
7 Naghikap siya sa saindang mga tore na may matibay na depensa asin rinaot an saindang mga siyudad,
Kaya dangog-dangog sa tiwangwang na daga an saiyang pag-ungal.+
8 An mga nasyon hali sa nakapalibot na mga distrito nag-abot laban sa saiya tanganing itsahan siya kan saindang hikot,
Asin nadakop siya sa saindang kalot.
9 Ilinaog ninda siya sa lauman gamit an mga kawit asin dinara siya sa hadi kan Babilonya.
Linaom ninda siya duman, tanganing an boses niya dai na madangog sa mga bukid kan Israel.
10 An saimong ina arog nin sarong puon nin ubas+ sa saimong dugo,* na nakatanom sa gilid nin tubig.
Namunga iyan asin pano-pano nin sanga dahil sa abundang tubig.
11 Nagin masarig an mga sanga* kaiyan, na angay na gibuhon na setro kan mga tagapamahala.
Nagtubo iyan asin mas nagin halangkaw sa iba pang mga kahoy,
Asin nagin hiling-hiling iyan dahil sa langkaw kaiyan asin dahil sa rambong kan mga dahon kaiyan.
12 Pero huli sa grabeng kaanggutan, ginabot siya+ asin iinapon sa daga,
Asin pig-alang kan duros na hali sa sirangan an saiyang bunga.
An saiyang masarig na mga sanga nagkabarari asin naalang+ saka tinumtom nin kalayo.+
13 Ngunyan nakatanom siya sa kaawagan,
Sa sarong daing tubig asin alang na kadagaan.+
14 Naglakop an kalayo hali sa saiyang mga sanga* asin tinumtom an saiyang mga supang saka an saiyang bunga,
Asin mayong masarig na sanga na natada, daing setro para sa pamamahala.+
“‘Saro iyan na panambitan, asin magseserbi iyan na sarong panambitan.’”