Isaias

20 Kan taon na isinugo ni Hading Sargon kan Asiria an Tartan* pasiring sa Asdod,+ nakipaglaban ini sa Asdod asin nasakop iyan.+ 2 Kan panahon na iyan, nagtaram si Jehova paagi ki Isaias+ na aki ni Amoz, na sinasabi: “Lakaw, hubaa an telang sako sa piad mo, asin halia an mga sandalyas sa mga bitis mo.” Asin iyan an ginibo niya, naglakaw siyang huba* asin nakabitis.

3 Dangan sinabi ni Jehova: “Kun paanong an lingkod kong si Isaias tulong taon na naglakaw na huba asin nakabitis bilang sarong tanda+ asin senyales laban sa Ehipto+ asin Etiopia,+ 4 arog man kaiyan dadarahon kan hadi kan Asiria an mga bihag na taga Ehipto+ asin an mga taga Etiopia na puwersahan na dinara, mga aking lalaki asin mga gurang na lalaki, na mga huba saka nakabitis asin hiling-hiling an mga lubot—an kahubaan* kan Ehipto. 5 Asin magkakatarakot sinda asin ikakasupog an Etiopia na linalauman ninda asin an Ehipto na saindang ipinag-oorgulyo.* 6 Sa aldaw na iyan, an mga nag-iistar sa dagang ini sa gilid nin dagat masarabi, ‘Hilinga an nangyari sa linalauman ta, na diyan kita nagdulag tanganing magpatabang na iligtas kita sa hadi kan Asiria! Paano na kita makakadulag ngunyan?’”