Jeremias
4 “Kun mabalik ka, O Israel,” an sabi ni Jehova,
“Kun mabalik ka sa sakuya
Asin kun hahalion mo sa atubangan ko an saimong mga makababalding idolo,
Dai ka maglalagaw-lagaw.+
2 Asin kun ika manumpa,
‘Isinusumpa ko sa ngaran kan buhay na Diyos na si Jehova!’ sa katotoohan, hustisya, asin katanusan,
Dangan an mga nasyon magkakamit* nin bendisyon para sa saindang sadiri paagi sa saiya,
Asin maghahambog sinda huli sa saiya.”+
3 Huli ta ini an sabi ni Jehova sa mga taga Juda asin sa Jerusalem:
“Mag-arado kamo nin dagang puwedeng umahon,
Asin dai na kamo magparasabwag sa tahaw nin matunok na mga tanom.+
4 Turion nindo an saindong sadiri para ki Jehova,
Asin halion nindo an kublit sa puro kan saindong mga puso,+
Kamong mga taga Juda asin mga nag-iistar sa Jerusalem
Tanganing an sakong grabeng kaanggutan dai mag-arab-adab na siring sa kalayo
Asin dai iyan maglaad na mayong siisay man na makakasigbo,
Huli kan saindong maraot na mga gibo.”+
5 Ipahayag nindo iyan sa Juda, asin ibalangibog nindo iyan sa Jerusalem.
Magkurahaw kamo asin magpatanog nin hamudyong sa bilog na daga.+
Magkurahaw kamo nin makusog asin magsabi: “Magtiripon kamo,
Asin magdurulag kita palaog sa mga siyudad na may matibay na depensa.+
6 Magpatindog kamo nin senyal* na paatubang sa Sion.
Maghanap kamo nin pahiplian, asin dai kamo magdanay na sanang nakatindog,”
Huling hali sa norte magdadara akong kapahamakan,+ sarong grabeng kalaglagan.
7 Nagluwas na siya na garo leon hali sa saiyang pigtataguan na mga palungpong;+
Nagpuon nang mag-abante an paralaglag kan mga nasyon.+
Naghali na siya sa lugar niya para gibuhon an daga mo na magin dahilan na an mga tawo tarakigan.
An mga siyudad mo magigin kagabaan, mayo nang mag-iistar diyan.+
8 Kaya, magsulot kamo nin telang sako,+
Magmundo* asin magtangis kamo,
Huling an naglalaad na kaanggutan ni Jehova dai pa minarayo sa sato.
9 “Sa aldaw na iyan,” an sabi ni Jehova, “mangluluya an buot* kan hadi,+
Pati an buot* kan mga pamayo;*
Magkakatarakot an mga saserdote, asin mapapangalas an mga propeta.”+
10 Dangan sinabi ko: “O Soberanong Kagurangnan na Jehova! Talagang nalansi mo an banwaan na ini+ asin an Jerusalem, kan sabihon mong, ‘Magkakaigwa kamo nin katuninungan,’+ ata nang nakatutok na sa halunan mi an espada.”*
11 Sa panahon na iyan, sasabihon sa banwaan na ini asin sa Jerusalem:
“Sarong nakakapasong duros hali sa tagiltil na mga bulod sa disyerto
An pababang masagubsob sa aking babayi nin* sakuyang banwaan;
Maabot iyan bako para magpapalid* o para maglinig.
12 Minaabot an makusugon na duros hali sa mga lugar na ini pag iyan sakong isinusugo.
Ipapahayag ko ngunyan an mga paghukom laban sa sainda.
13 Hilinga! Maabot siya na siring sa mga panganuron na may darang uranon,
Asin an saiyang mga karwahe na siring sa duros nin bagyo.+
An saiyang mga kabayo mas marikas pa kisa sa mga agila.+
Hirak man sa satuya, huling katapusan ta na!
14 Linigon mo an saimong puso para mahali an karatan, O Jerusalem, tanganing maligtas ka.+
Sagkod nuarin magdadanay sa saimo an maraot na mga kaisipan?
15 Huli ta sarong boses an nagbabareta hali sa Dan,+
Asin nagbabalangibog iyan nin kapahamakan hali sa kabukidan nin Efraim.
16 Ibareta nindo ini, iyo, ibareta nindo sa mga nasyon;
Ibalangibog nindo ini laban sa Jerusalem.”
“Padangadang an mga guwardiya* hali sa sarong harayong lugar,
Asin makururahaw sinda laban sa mga siyudad kan Juda.
17 Minasalakay sinda laban sa saiya sa gabos na direksiyon na garo mga bantay sa kalangtadan,+
Huling nagrebelde siya laban sa sakuya,”+ an sabi ni Jehova.
18 “Sasaparon mo an saimong sadiring mga dalan asin an saimong mga ginigibo.+
Mapaiton nanggad an magigin kapahamakan mo,
Huling uminabot na iyan sa saimong puso!”
19 O grabe an pagsakit ko,* grabe an pagsakit ko!
Grabeng kulog an namamatian ko sa puso ko.*
Nagkukurab-kutab an sakuyang puso.
Dai ko kayang magdanay na silensiyo,
Huling nadadangog ko na* an tanog kan hamudyong,
20 Sunod-sunod an ibinaretang kapahamakan,
Huling linaglag na an bilog na kadagaan.
Bigla sanang naraot an sadiri kong mga tolda,
Madalion sana, an sakong mga telang pantolda.+
22 “Huli ta an banwaan ko lulong;+
Dai sinda nagtataong atensiyon sa sako.
Mga mangmang sindang aki, na mayong pakasabot.
Listo an isip ninda* kun manungod sa paggibo nin maraot,
Alagad mayo sindang aram sa paggibo nin marahay.”
23 Nahiling ko an kadagaan, asin uya! tiwangwang iyan asin mayong nag-iistar.+
Nagtangad ako sa kalangitan, asin mayo na an liwanag kaiyan.+
24 Nahiling ko an mga bukid, asin uya! nagkakaruyugyog an mga iyan,
Asin an mga bulod nagkakataranyog.+
25 Naghiling ako, asin uya! mayo nin tawo,
Asin an gabos na gamgam* sa kalangitan nagdurulag na parayo.+
26 Naghiling ako, asin uya! an tatamnan nagin nang kaawagan,
Asin an mga siyudad na yaon diyan gabos garaba na.+
Dahil iyan ki Jehova,
Huli sa naglalaad na kaanggutan niya.
27 Huli ta ini an sabi ni Jehova: “Magigin tiwangwang an bilog na kadagaan,+
Pero dai ko lubos na pupuhuon iyan.
Huli iyan ta nagtaram na ako, tapos na akong magdesisyon,
29 Huli sa tanog kan mga parakabayo asin kan mga parapana,
An bilog na siyudad nagdudulag.+
Nagsusuruksok sinda sa kapalungpungan,
Asin nagsasarakat sinda sa kagagapuan.+
An lambang siyudad binarayaan,
Asin mayo nang tawo na nag-iistar sa mga iyan.”
30 Ano an gigibuhon mo ngunyan na gaba ka na?
Dati kang nagsusulot nin badong kulor iskarlata,*
Nagsusulot ka nin mga alahas na bulawan,
Asin nagbubugtak ka nin itom na kulorete tanganing padakulaon an saimong mga mata.
Alagad sayang sana an pagpagayon mo,+
Huling su mga dating naglalaad an pagmawot sa saimo hinabuan ka na;
31 Huling may nadangog akong agrangay na siring sa babaying may hilang,
An pagsakit na siring kan sa babaying nangangaki kan saiyang panganay,
An boses kan aking babayi nin Sion na kinakapos nin hinangos.
Sinasabi niya mantang iinuunat an mga palad niya:+
“Hirak man sa sako, ta pagal-pagal na ako* huli kan mga paragadan nin tawo!”