SURAT SA MGA HEBREO

1 Kaidtong haloy nang panahon, an Diyos nakipag-ulay sa mga apuon niyato paagi sa mga propeta sa dakul na pagkakataon asin sa dakul na paagi.+ 2 Ngunyan sa katapusan kan mga aldaw na ini, nakipag-ulay siya sa sato paagi sa sarong Aki,+ na ninombrahan niyang magin tagapagmana kan gabos na bagay,+ asin paagi sa saiya ginibo niya an mga sistema nin mga bagay.*+ 3 Siya an repleksiyon kan kamurawayan nin Diyos+ asin an eksaktong ladawan kan Saiya mismong pagkapersona,+ asin sinususteniran niya an gabos na bagay paagi kan saiyang makapangyarihan na tataramon. Asin pagkatapos niya kitang dalisayon sa satuyang mga kasalan,+ nagtukaw siya sa may tuo* kan Kamahalan na nasa kaitaasan.+ 4 Kaya nagin siyang mas urog kisa sa mga anghel,+ mala ta nagmana siya nin sarong pangaran na mas nakakalabi kisa kan sa sainda.+

5 Halimbawa, siisay sa mga anghel an sinabihan nin Diyos kasuarin man nin arog kaini: “Ika an sakuyang aki; sa aldaw na ini ako nagin saimong ama”?+ Asin nin arog pa kaini: “Ako magigin saiyang ama, asin siya magigin sakuyang aki”?+ 6 Alagad pag dinara niya giraray sa iniistaran na daga an saiyang Panganay,+ sasabihon niya: “Asin an gabos na anghel nin Diyos magruluhod* sa saiya.”

7 Siring man, sinasabi niya manungod sa mga anghel: “Ginigibo niyang makusog na mga puwersa* an saiyang mga anghel, asin ginigibo niyang naglalaad na kalayo+ an saiyang mga lingkod.”*+ 8 Alagad manungod sa Aki, sinasabi niya: “An Diyos an saimong trono+ sagkod nuarin pa man, asin an setro kan saimong Kahadian iyo an setro nin katanusan.* 9 Namutan mo an katanusan, asin ikinaungis mo an katampalasanan. Iyan an dahilan kaya an Diyos, an saimong Diyos, linahidan* ka+ nin lana asin tinawan ka nin mas dakulang kagaya-gayahan kisa saimong mga kairiba.”+ 10 Asin: “Sa kapinunan, O Kagurangnan, ilinatag mo an mga pundasyon kan daga, asin an kalangitan gibo kan saimong mga kamot. 11 An mga iyan magkakaparara, alagad ika magdadanay; asin siring sa sarong bado, gabos iyan magkakaruluma, 12 asin papatuson mo an mga iyan siring sa sarong alikboy, siring sa sarong bado, asin an mga iyan masasalidahan. Alagad ta ika iyo man giraray, asin an saimong mga taon dai nuarin man magkakaigwa nin katapusan.”+

13 Alagad manungod sa mga anghel, siisay sa sainda an sinabihan niya kasuarin man nin arog kaini: “Tumukaw ka sa may tuo* ko sagkod na ibugtak ko an saimong mga kaiwal na magin tungtungan kan mga bitis mo”?+ 14 Bako daw na sinda gabos mga espiritu para sa banal na paglilingkod,*+ na isinugo tanganing maglingkod duman sa mga magmamana nin kaligtasan?

2 Iyan an dahilan kaya kaipuhan tang magtao nin mas urog pa sa dati nang atensiyon sa mga bagay na satuyang nadangog,+ tanganing dai kita nuarin man luway-luway na maanod parayo.+ 2 Huli ta kun an tataramon na ipinahayag paagi sa mga anghel+ nagin sigurado nanggad, asin an lambang paglapas saka pagsuway nag-ako nin padusa kauyon nin hustisya,+ 3 paano kita makakadulag kun binaliwala niyato an sarong dakulaon na kaligtasan?+ Huling pinunan iyan na ipahayag paagi sa satuyang Kagurangnan+ asin kinumpirmar iyan sa sato kaidtong mga nakadangog sa saiya, 4 mantang an Diyos uminiba man sa pagpatotoo paagi sa mga tanda asin ngangalásan* saka manlain-lain na makapangyarihan na mga gibo+ asin paagi sa banal na espiritu na idinidistribwir uyon sa saiyang kabutan.+

5 Huli ta bako niya sa mga anghel ipinasakop an iniistaran na daga na maabot,+ na manungod kaiyan kami nagpapahayag. 6 Alagad ta may sarong parte na diyan sinabi nin sarong saksi: “Siisay man an tawo ta ginigirumdom mo siya, o an aki nin tawo ta inaataman mo siya?+ 7 Ginibo mo siyang mas hababa nin dikit kisa sa mga anghel; kinoronahan mo siya nin kamurawayan asin onra, asin ninombrahan siya na mamahala sa mga gibo kan saimong mga kamot. 8 Ipinasairarom mo an gabos na bagay sa saiyang mga bitis.”+ Sa pagpasairarom kan gabos na bagay sa saiya,+ mayong itinada an Diyos na dai ipinasairarom sa saiya.+ Pero ngunyan, dai ta pa nahihiling na nasa irarom niya an gabos na bagay.+ 9 Alagad nahihiling ta si Jesus, na ginibong mas hababa nin dikit kisa sa mga anghel,+ na nakokoronahan ngunyan nin kamurawayan asin onra dahil sa pagsakit niya sagkod sa kagadanan,+ tanganing paagi sa daing kapantay na kabuutan* nin Diyos manamitan niya an kagadanan para sa lambang tawo.+

10 Huli ta angay sana na an saro na para sa saiya asin paagi sa saiya an gabos na bagay nag-eeksister, pag dinadara niya sa kamurawayan an dakul na aki,+ gibuhon niyang magin lubos* paagi sa pagsakit+ an Panginot na Instrumento kan saindang kaligtasan.+ 11 Huli ta an saro na nagpapabanal asin idtong mga pinapabanal+ saro sana an ginikanan,+ asin dahil kaini dai niya ikinakasupog na apudon sindang mga tugang,+ 12 siring kan sabi niya: “Ipapahayag ko sa sakuyang mga tugang an saimong pangaran; uumawon taka sa tahaw kan katiripunan* paagi sa kanta.”+ 13 Asin an sabi pa niya: “Magtitiwala ako sa saiya.”+ Asin sa giraray, an sabi niya: “Uya! Ako asin an saradit na aki, na itinao sa sako ni Jehova.”*+

14 Kun siring, mantang an “saradit na aki” mga tawong may* dugo asin laman, siya man nagin tawong may dugo asin laman kapareho ninda,*+ tanganing paagi sa saiyang kagadanan mapara niya an saro na igwa kan kakayahan na magkawsa nin kagadanan,+ an buot sabihon, an Diyablo,+ 15 asin tanganing mapatalingkas* niya an gabos na nagin uripon kan saindang takot sa kagadanan sa bilog nindang buhay.+ 16 Huli ta bako man talaga an mga anghel an tinatabangan niya, kundi an mga gikan* ni Abraham.+ 17 Huli kaini, kinaipuhan niyang magin kapareho kan saiyang “mga tugang” sa gabos na bagay,+ na sa siring magin siyang sarong mahihirakon asin maimbod na halangkaw na saserdote sa mga bagay may koneksiyon sa Diyos, tanganing makapagdulot siya nin pampagian nin buot na atang*+ para sa mga kasalan kan mga tawo.+ 18 Mantang siya mismo nagsakit kan siya binabalo,+ magigibo niyang tabangan idtong mga binabalo.+

3 Huli kaini, mga tugang na banal, mga kahiras sa langitnon na pag-apod,*+ isipon nindo an apostol asin halangkaw na saserdote na satuyang minimidbid*—si Jesus.+ 2 Nagin maimbod siya sa Saro na nagnombra sa saiya,+ kun paanong nagin maimbod man si Moises sa bilog na harong kan Sarong iyan.+ 3 Huli ta ibinilang siya* na maninigo sa mas urog na kamurawayan+ kisa ki Moises, palibhasa an saro na nagtutugdok kan harong mas may urog na onra kisa sa harong mismo. 4 Siyempre, an lambang harong igwa nin nagtugdok, alagad an nagtugdok kan gabos na bagay iyo an Diyos. 5 Buweno, si Moises nagin maimbod bilang sarong paralingkod sa bilog na harong kan Sarong idto, na nagserbing patotoo kan mga bagay na ipapahayag sa maabot na panahon, 6 alagad si Cristo nagin maimbod bilang sarong aki+ na namamahala sa harong nin Diyos.+ Kita an Saiyang harong kun pangangaptan tang higot an satong pagigin libreng magtaram asin an paglaom na ipinaghahambog niyato sagkod sa katapusan.

7 Kun siring, arog kan sinasabi kan banal na espiritu,+ “Sa aldaw na ini, kun kamo nagdadangog sa boses niya, 8 dai nindo pagpatagason an saindong mga puso siring kan nangyari kan paangguton ninda ako nin grabe, siring kan aldaw nin pagpurbar sa kaawagan,+ 9 na duman pinurbaran asin inagyat ako kan saindong mga apuon, dawa nahiling ninda an sakong mga ginibo sa laog nin 40 taon.+ 10 Ini an dahilan kaya ikinabaldi ko an henerasyon na ini asin sinabi ko: ‘Pirmi na sanang minarayo sa sako an saindang mga puso, asin dai ninda naaaraman an sakuyang mga dalan.’ 11 Kaya sa kaanggutan* ko suminumpa ako: ‘Dai sinda malaog sa sakuyang kapahingaluan.’”+

12 Mag-ingat kamo, mga tugang, ta tibaad igwa nin siisay man sa saindo na huli sa pagrayo sa buhay na Diyos tubuan nin maraot na puso na mayong pagtubod;+ 13 imbes, padagos nindong pakusugon an lambang saro sa kada aldaw, sagkod na inaapod pa ining “Sa aldaw na ini,”+ tanganing mayo nin siisay man sa saindo an mapatagas kan mapandayang kapangyarihan nin kasalan. 14 Huli ta magigin kahiras lang kita kan Cristo kun pangangaptan ta nin higot sagkod sa katapusan an pananarig na igwa kita puon pa sa kapinunan.+ 15 Siring kan sinabi, “Sa aldaw na ini, kun kamo nagdadangog sa boses niya, dai nindo pagpatagason an saindong mga puso siring kan nangyari kan paangguton ninda ako nin grabe.”+

16 Huli ta siisay an mga nakadangog alagad ta pinaanggot siya nin grabe? Bako daw na, an totoo, idtong gabos na nagluwas sa Ehipto sa panginginot ni Moises?+ 17 Saro pa, kiisay nabaldi an Diyos sa laog nin 40 taon?+ Bako daw na duman sa mga nagkasala, na an mga bangkay nagkawaralat* sa kaawagan?+ 18 Asin laban kiisay siya suminumpa na dai sinda malaog sa saiyang kapahingaluan? Bako daw na duman sa mga nagin masinuway? 19 Kaya nahiling niyato na dai sinda makalaog huli sa kawaran nin pagtubod.+

4 Kun siring, mantang nagdadanay pa an panuga na paglaog sa saiyang kapahingaluan, mag-ingat* kita ta tibaad may saro sa saindo na magin bakong angay para diyan.+ 2 Huli ta an maugmang bareta ipinahayag man sa sato,+ kun paanong ipinahayag iyan sa sainda; pero an tataramon na nadangog ninda daing naitaong pakinabang sa sainda, huling mayo sinda kan pagtubod na arog kaidtong sa mga naghimati. 3 Huli ta kitang mga nagtutubod talagang minalaog sa kapahingaluan, alagad kun para sa sainda, ini an sinabi niya: “Kaya sa kaanggutan ko suminumpa ako, ‘Dai sinda malaog sa sakuyang kapahingaluan,’”+ maski ngani an saiyang mga gibo tapos na puon pa kan pagkaestablisar kan kinaban.+ 4 Sa sarong parte kaya kan Kasuratan sinabi niya an arog kaini manungod kan ikapitong aldaw: “Asin nagpahingalo an Diyos kan ikapitong aldaw sa gabos niyang gibo,”+ 5 dangan sinabi man niya: “Dai sinda malaog sa sakuyang kapahingaluan.”+

6 Kun siring, mantang igwa pa nin nagkapira na maralaog* diyan, asin idtong inot na pinahayagan kan maugmang bareta dai nakalaog diyan dahil sa pagsuway,+ 7 nagtalaga giraray siya nin sarong partikular na aldaw kan sabihon niya pakalihis nin haloy na panahon sa salmo ni David, “Sa aldaw na ini”; siring kan sinabi sa inutan, “Sa aldaw na ini, kun kamo nagdadangog sa boses niya, dai nindo pagpatagason an saindong mga puso.”+ 8 Huli ta kun giniyahan na sinda ni Josue+ palaog sa sarong lugar nin kapahingaluan, dai na kutana nagtaram pa an Diyos manungod sa iba pang aldaw. 9 Kaya igwa pa nin pagpahingalo na siring sa Sabbath para sa banwaan nin Diyos.+ 10 Huli ta an tawo na luminaog na sa kapahingaluan nin Diyos nagpahingalo na man sa sadiri niyang mga gibo, kun paanong an Diyos nagpahingalo man sa saiyang mga gibo.+

11 Kaya gibuhon niyato an satong pinakamakakaya na makalaog sa kapahingaluan na iyan, tanganing mayo nin siisay man na mahulog sa arog kaidtong klase nin pagsuway.+ 12 Huli ta an tataramon nin Diyos buhay asin igwa nin puwersa+ asin mas matarom pa kisa sa ano man na espada na mag-inibong an tarom+ saka minalagbas nanggad sagkod sa mapagsiblag kaiyan an kalag* saka an espiritu,* asin an mga pagsukmulan saka an mga hutok nin tulang, asin kaya kaiyan na sabuton an mga kaisipan saka mga intensiyon kan puso. 13 Asin mayo ni sarong linalang na natatago sa saiyang paghiling,+ kundi an gabos na bagay daing tahob asin lantad na marhay sa mga mata kan saro na sa saiya kita maninimbag.+

14 Kun siring, mantang igwa kita nin nangungurog na halangkaw na saserdote na luminaog sa kalangitan, si Jesus na Aki nin Diyos,+ pangaptan niyato an satong hayagan na pagpahayag kan satong pagtubod sa saiya.+ 15 Huli ta an halangkaw na saserdote na igwa kita, bako su dai nakakasabot kan satong mga kaluyahan,+ kundi su saro na arog tang binalo sa gabos na bagay, pero mayo nin kasalan.+ 16 Kaya, dumulok kita sa trono nin daing kapantay na kabuutan,* na yaon an pagigin libreng magtaram niyato,+ tanganing mag-ako kita nin pagkahirak asin daing kapantay na kabuutan na matabang sa sato sa tamang panahon.

5 Huli ta an lambang halangkaw na saserdote na kinua hali sa mga tawo ninombrahan na mag-asikaso kan mga bagay na may koneksiyon sa Diyos alang-alang sa mga tawo,+ tanganing makapagdulot siya nin mga regalo asin atang para sa mga kasalan.+ 2 Nagigibo niyang trataron na may pagmalasakit* an mga daing aram saka napapasala,* huling siya man napapaatubang* sa sadiri niyang mga kaluyahan, 3 asin huli kaiyan kaipuhan niyang mag-atang nin mga dulot para sa sadiri niyang mga kasalan kun paanong ginigibo man niya iyan para sa mga kasalan kan mga tawo.+

4 Dai nakukua nin sarong tawo an onrang ini sa sadiri niyang kagustuhan, kundi naaako lang niya iyan pag inapod siya nin Diyos, arog ni Aaron.+ 5 Kaagid kaiyan, dai pinamuraway kan Cristo an sadiri niya+ paagi sa paggibo sa saiyang sadiri na magin sarong halangkaw na saserdote, kundi pinamuraway siya kan Saro na nagsabi sa saiya: “Ika an sakuyang aki; sa aldaw na ini ako nagin saimong ama.”+ 6 Siring kan sinabi man niya sa saro pang parte kan Kasuratan, “Ika sarong saserdote sagkod lamang sa paaging kapareho kan pagkasaserdote ni Melkizedek.”+

7 Sa panahon kan buhay niya digdi sa daga,* nagpahayag si Cristo nin mga pagngayo-ngayo* saka mga pakiulay, na may kaibang makusog na mga pag-agrangay saka mga luha,+ sa Saro na may kakayahan na magligtas sa saiya sa kagadanan, asin dinangog siya nin may pag-uyon huli sa saiyang diyosnon na pagkatakot. 8 Minsan ngani aki siya nin Diyos, nanudan niya an pagsunod huli sa mga bagay na saiyang tinios.+ 9 Asin pagkatapos na gibuhon siyang sangkap,+ siya an nagin paagi para magkamit nin daing katapusan na kaligtasan idtong gabos na nagsusunod sa saiya,+ 10 huling pinili siya nin Diyos na magin sarong halangkaw na saserdote sa paaging kapareho kan pagkasaserdote ni Melkizedek.+

11 Kadakul ming masasabi manungod sa saiya, pero masakit iyan ipaliwanag, huling nagin maluya kamo sa saindong pagdangog. 12 Huli ta dapat kutana mga paratukdo na kamo ngunyan,* pero kaipuhan nindo giraray na may saro na magtukdo sa saindo puon sa kapinunan kan pundamental na mga bagay+ kan sagradong mga kapahayagan nin Diyos, asin gatas na naman giraray an kaipuhan nindo imbes na matagas na kakanon. 13 Huli ta an lambang saro na gatas an padagos na pig-iinom dai nakakaaram kan tataramon nin katanusan, huling siya sarong sadit na aki.+ 14 Pero an matagas na kakanon para sa mga tawong adulto na,* sa mga tawong paagi sa paggamit kan saindang kakayahan na makasabot* nasanay ninda iyan na mamidbid an pagkakalain kan tama asin sala.

6 Kun siring, ngunyan na nalampasan na niyato an pundamental na doktrina+ manungod sa Cristo, maghinguwa kitang makaabot sa pagigin adulto,*+ na dai na naglalatag giraray nin pundasyon—an pagsulsol sa gadan na mga gibo asin an pagtubod sa Diyos, 2 an katukduan manungod sa mga bawtismo asin an pagpatong nin mga kamot,+ an pagkabuhay liwat kan mga gadan+ asin an sentensiyang daing katapusan. 3 Asin ini an gigibuhon ta, kun talagang itutugot nin Diyos.

4 Huli ta kun manungod duman sa mga naliwanagan kaidto+ asin nakanamit kan libreng langitnon na regalo asin nagin mga kahiras sa banal na espiritu 5 asin nakanamit kan marahay na tataramon nin Diyos saka kan mga kapangyarihan kan maabot na sistema nin mga bagay* 6 pero tuminalikod sa pagtubod,+ imposible nang mapabalik sinda para magsulsol, huling pigpapako giraray mismo ninda sa harigi an Aki nin Diyos asin ilinalantad siya sa kasusupgan sa atubangan kan mga tawo.+ 7 An daga baga nag-aako nin bendisyon hali sa Diyos pag iniinom kaiyan an uran na parating minabagsak diyan dangan minapatubo nin mga pananom na kapaki-pakinabang para sa mga nagkukultibar kaiyan. 8 Pero kun an minatubo diyan matunok na mga tanom asin mga awot,* isinisikwal an dagang iyan asin madali nang isumpa, asin sa huri iyan susuluon.

9 Alagad kun manungod sa saindo, mga namumutan, kumbinsido kami na yaon sa saindo an mas marahay na mga bagay, mga bagay na may koneksiyon sa kaligtasan, dawa ngani nagtataram kami nin arog kaini. 10 Huli ta an Diyos bakong biko para lingawan niya* an saindong ginibo asin an pagkamuot na ipinahiling nindo para sa saiyang pangaran+ paagi sa paglilingkod asin padagos pang paglilingkod sa mga banal. 11 Alagad mawot niyamo na ipahiling kan lambang saro sa saindo an siring na kahigusan tanganing magkaigwa kamo nin lubos na kasiyertuhan kan paglaom+ sagkod sa katapusan,+ 12 na sa siring dai kamo magin mga hugakon,*+ kundi magin kamong mga paraarog sa mga nagmamana kan mga panuga huli sa pagtubod asin pakatios.

13 Huli ta kan sambiton nin Diyos an saiyang panuga ki Abraham, dahil ngani mayo nin siisay man na mas urog kisa saiya na puwede niyang ipanumpa, an sadiri niya mismo an saiyang ipinanumpa,+ 14 asin sinabi niya: “Sinisigurado ko sa saimo, bebendisyunan taka asin papadakulon taka.”+ 15 Kaya pagkatapos magpahiling ni Abraham nin pakatios,* nakamtan niya an panugang ini. 16 Pag nanunumpa kaya an mga tawo, ipinapanumpa ninda an saro na mas urog kisa sainda, asin an saindang sumpa minatapos kan gabos na dai pagkakasundo, huling iyan sarong legal na garantiya para sa sainda.+ 17 Sa arog man kaiyan na paagi, kan an Diyos magdesisyon na ipahiling nin mas malinaw sa mga tagapagmana kan panuga+ an pagigin dai nababago kan saiyang katuyuhan,* ginarantiyahan niya iyan* paagi sa sarong sumpa, 18 tanganing paagi sa duwang bagay na dai mababago, na sa mga iyan imposibleng magputik an Diyos,+ kita na mga nagdurulag pasiring sa pailihan magkaigwa nin makusog na pamparigon nin buot tanganing pangaptan nin higot an paglaom na ibinugtak sa atubangan niyato. 19 Yaon sa sato an paglaom+ na ini bilang angkla para sa kalag,* sigurado asin marigon, asin minalaog ini sa laog kan kurtina,+ 20 kun sain luminaog alang-alang sa sato an saro na nainot, si Jesus,+ na nagin sarong halangkaw na saserdote sagkod lamang sa paaging kapareho kan pagkasaserdote ni Melkizedek.+

7 Huli ta an Melkizedek na ini, na hadi nin Salem asin saserdote kan Kahuruhalangkawing Diyos, sinabat si Abraham kan magbalik ini pagkatapos na garadanon an mga hadi asin binendisyunan niya ini,+ 2 asin tinawan* siya ni Abraham nin ikasampulong kabtang kan gabos na bagay. Inot, an saiyang pangaran itinatradusir na “Hadi nin Katanusan,” dangan, siya man an hadi nin Salem, na an buot sabihon, “Hadi nin Katuninungan.” 3 Huling mayo siyang ama, mayong ina, mayong rekord nin ginikanan, mayo nin kapinunan nin mga aldaw o katapusan nin buhay, kundi ginibo siyang kapareho kan Aki nin Diyos, nagdadanay siyang saserdote sa gabos na panahon.*+

4 Hilinga kun gurano kaimportante kan tawong ini, na sa saiya nagtao si Abraham, an payo nin pamilya,* kan ikasampulong kabtang kan pinakamarahay na mga samsam.+ 5 Totoo, sigun sa Katugunan, an mga aking lalaki ni Levi+ na ninombrahan na magin mga saserdote pinagbutan na magkolekta nin ikasampulong kabtang* hali sa banwaan,+ an buot sabihon hali sa mga tugang ninda, maski ngani an mga ini mga gikan* ni Abraham. 6 Pero an tawong ini, na an ginikanan nin lahi dai masususog sa sainda, nag-ako nin ikasampulong kabtang* hali ki Abraham asin binendisyunan niya an saro na nagkamit kan mga panuga.+ 7 Buweno, dai maninigaran na an mas hababa binebendisyunan kan mas halangkaw. 8 Sa sarong kamugtakan, an nag-aako nin ikasampulong kabtang* iyo an mga tawong nagagadan, pero sa saro man na kamugtakan, an nag-aako nin ikasampulong kabtang* iyo an saro na igwa nin patotoo na siya nabubuhay.+ 9 Asin puwede nganing sabihon na pati si Levi, na nag-aako nin ikasampulong kabtang,* nagbayad nin ikasampulong kabtang* paagi ki Abraham, 10 huling magigin gikan* pa lang siya kan saiyang apuon kan sabaton ini ni Melkizedek.+

11 Kaya, kun an saro puwedeng magin perpekto paagi kan pagkasaserdoteng Levitico+ (huling saro iyan na aspekto kan Katugunan na itinao sa banwaan), taano ta kaipuhan pang magkaigwa nin ibang saserdote na an paagi nin pagkasaserdote kapareho kan ki Melkizedek+ asin bakong kapareho kan ki Aaron? 12 Huling binabago an pagkasaserdote, kaipuhan man na baguhon an Katugunan.+ 13 Huli ta an tawo na pinapanungdan kan mga bagay na ini naggikan sa ibang tribo, na hali diyan mayo nin siisay man an naglingkod sa altar.+ 14 Huli ta malinaw na an satuyang Kagurangnan naggikan sa Juda,+ pero mayong sinabi si Moises na igwa nin magigin mga saserdote hali sa tribong iyan.

15 Asin urog pa ining nagin malinaw kan may mag-abot na ibang saserdote+ na kapareho ni Melkizedek,+ 16 na nagin siring, bakong base sa legal na kahagadan na nakadepende sa ginikanan sa laman, kundi paagi sa kapangyarihan nin buhay na dai malalaglag.+ 17 Huli ta sinambit bilang patotoo manungod sa saiya: “Ika sarong saserdote sagkod lamang sa paaging kapareho kan pagkasaserdote ni Melkizedek.”+

18 Kaya, an nainot na mga tugon ipinapagilid huling maluya iyan asin bakong epektibo.+ 19 Pa’no kaya, dai nagibo kan Katugunan na magin perpekto an arin man na bagay,+ pero nagibo iyan kan umabot an mas marahay na paglaom,+ na paagi kaiyan nakakarani kita sa Diyos.+ 20 Siring man, mantang dai ini ginibo na mayong kaibang sinumpaan na sumpa 21 (huli ta sa katunayan, igwa nin mga lalaking nagin mga saserdote na mayo nin kaibang sinumpaan na sumpa, alagad an sarong ini nagin saserdote paagi sa sinumpaan na sumpa kan Saro na nagsabi: “Suminumpa si Jehova,* asin dai magbabago an saiyang isip,* ‘Ika sarong saserdote sagkod lamang’”),+ 22 si Jesus nagin garantiya nin* sarong mas marahay na tipan nin huli kaiyan.+ 23 Dugang pa, dakul an kinakaipuhan na magin saserdote para iyo an magsalida+ huling inuulang sinda kan kagadanan na magpadagos sa paglilingkod, 24 alagad huling nagdadanay siyang buhay sagkod lamang,+ an saiyang pagkasaserdote dai nangangaipo nin mga kasalida. 25 Kaya magigibo man niyang iligtas nin lubos an mga minadulok sa Diyos paagi sa saiya, huling pirmi siyang buhay para makiulay para sa sainda.+

26 Huli ta angay nanggad na magkaigwa kita nin arog kaiyan na halangkaw na saserdote na maimbod, mayo nin karatan, daing digta,+ suway sa mga parakasala, asin ilinangkaw nin mas halangkaw pa sa mga langit.+ 27 Bakong arog kan mga halangkaw na saserdoteng idto, dai niya kaipuhan na aroaldaw na magdulot nin mga atang,+ inot para sa sadiri niyang mga kasalan dangan para sa mga kasalan kan banwaan,+ huling ginibo na niya ini nin saro sanang beses para sa gabos na panahon kan idulot niya an saiyang sadiri.+ 28 Huli ta an Katugunan nagnonombra sa mga may kaluyahan na lalaki para magin mga halangkaw na saserdote,+ alagad an tataramon sa sinumpaan na sumpa+ na itinaram pagkatapos kan Katugunan nagnonombra sa sarong Aki, na ginibong sangkap+ sagkod lamang.

8 Ngunyan ini an panginot na punto kan samuyang sinasabi: Igwa kita nin siring kaiyan na halangkaw na saserdote,+ asin tuminukaw siya sa may tuo kan trono kan Kamahalan sa kalangitan,+ 2 sarong lingkod* sa banal na lugar+ asin sa tunay na tolda, na pinatindog ni Jehova,* asin bako nin tawo. 3 An lambang halangkaw na saserdote ninombrahan na magdulot nin mga regalo saka mga atang; kaya kaipuhan na an sarong ini igwa man nin maidulot.+ 4 Kun yaon siya digdi sa daga, dai siya magigin saserdote,+ huling igwa na nin mga lalaking nagdudulot nin mga regalo uyon sa Katugunan. 5 An mga lalaking ini nagsasagibo nin sagradong paglilingkod bilang simbolikong ladawan asin anino+ kan langitnon na mga bagay;+ kun paanong si Moises, kan itutugdok na niya an tolda, tinawan nin Diyos nin pagbuot: An sabi Niya: “Siyertuhon mo na magibo mo an gabos na bagay sigun sa arugan kaiyan na ipinahiling sa saimo sa bukid.”+ 6 Alagad ngunyan, nag-ako si Jesus nin sarong mas nakakalabing paglilingkod* huling siya man an tagapangultanan+ nin saro man na mas marahay na tipan,+ na legal na inestablisar sa mas marahay na mga panuga.+

7 Kun an inot na tipan na idto mayo nin depekto, dai na kutana kaipuhan nin ikaduwa.+ 8 Huli ta may nahiling nanggad siyang depekto sa banwaan kan sabihon niya: “‘Uya! Maabot an mga aldaw,’ an sabi ni Jehova,* ‘na makikipagtipan ako sa nasyon* nin Israel asin sa nasyon* nin Juda nin sarong bagong tipan. 9 Dai iyan magigin kapareho kan tipan na ipinakipagtipan ko sa mga apuon ninda kan aldaw na kinaputan ko an saindang kamot tanganing darahon sinda paluwas sa daga nin Ehipto,+ huling dai sinda nagdanay sa sakuyang tipan, kaya ipinundo ko an pag-ataman sa sainda,’ an sabi ni Jehova.*

10 “‘Huli ta ini an tipan na ipapakipagtipan ko sa nasyon nin Israel pakalihis kan mga aldaw na idto,’ an sabi ni Jehova.* ‘Ibubugtak ko sa saindang isip an sakuyang mga pagbuot, asin sa saindang mga puso isusurat ko an mga iyan.+ Asin ako magigin Diyos ninda, asin sinda magigin sakuyang banwaan.+

11 “‘Asin an lambang saro sa sainda dai na magtutukdo sa saiyang kahimanwa asin sa saiyang tugang, na sinasabi: “Midbidon nindo si Jehova!”* Huli ta gabos sinda makakamidbid sa sako, puon sa pinakahamak sagkod sa pinakaprominente sa sainda. 12 Huling magpapahiling ako nin pagkahirak sa sainda kun manungod sa saindang maraot na mga gibo, asin dai ko na gigirumdumon an mga kasalan ninda.’”+

13 Sa pagsabi niyang “sarong bagong tipan,” pinangyari niyang magin lihis na idtong inot na tipan.+ Ngunyan, an lihis na asin paluma na madali nang mapara.+

9 Kun para sa nainot na tipan, igwa iyan kaidto nin legal na mga kahagadan para sa sagradong paglilingkod asin nin banal na lugar+ sa daga. 2 Huling may itinugdok na inot na kuwarto kan tolda, na diyan yaon an kandelero+ asin an lamesa saka an mga tinapay na pandulot;*+ asin inaapod iyan na Banal na Lugar.+ 3 Alagad sa likod kan ikaduwang kurtina+ iyo an kuwarto kan tolda na inaapod na Kabanal-banali.+ 4 Yaon diyan an sarong bulawan na insensaryo+ saka an kaban kan tipan+ na enterong nakakalupkupan nin bulawan,+ na kun sain yaon su bulawan na dulay na nasa laog an manna+ asin su sugkod ni Aaron na nagburak*+ saka su mga tablang gapo+ kan tipan; 5 asin sa ibabaw kaiyan yaon an mamuraway na mga kerubin na nakalindong sa takop na pampagian nin buot.*+ Pero bako ini an panahon para magtaram nin detalyado manungod sa mga bagay na ini.

6 Pagkatapos na maitugdok sa arog kaining paagi an mga bagay na ini, an mga saserdote regular na minalaog sa inot na kuwarto kan tolda tanganing isagibo an sagradong mga paglilingkod;+ 7 alagad an halangkaw na saserdote solong minalaog sa ikaduwang kuwarto sarong beses sa sarong taon,+ asin dai siya minalaog na mayong darang dugo,+ na idinudulot niya para sa saiyang sadiri+ asin para sa mga kasalan na nagibo kan banwaan+ nin dai tinutuyo. 8 Sa siring linilinaw kan banal na espiritu na an dalan palaog sa banal na lugar dai pa ihinahayag mantang nakatindog pa an inot na tolda.+ 9 An toldang ini sarong ilustrasyon para sa presenteng panahon,+ asin uyon sa areglong ini, parehong idinudulot an mga regalo saka mga atang.+ Alagad, dai kaya kan mga ini na lubos na linigon* an konsiyensiya kan tawo na nagsasagibo nin sagradong paglilingkod.+ 10 An mga iyan may koneksiyon sana sa mga kakanon asin mga inumon saka manlain-lain na seremonyal na paghugas.*+ An mga iyan mga legal na kahagadan may koneksiyon sa hawak*+ asin ipinautob sagkod na umabot an itinalaan na panahon para itanos an mga bagay-bagay.

11 Alagad, kan si Cristo mag-abot bilang sarong halangkaw na saserdote kan marahay na mga bagay na nangyayari na, naglaog siya sa sarong mas importante asin mas perpektong tolda na bakong gibo nin mga kamot, an buot sabihon, bakong kabilang sa mga piglalang digdi sa daga. 12 Luminaog siya sa banal na lugar na an dara bako an dugo nin mga kanding asin nin mga torilyong baka, kundi an sadiri niyang dugo,+ asin ginibo niya iyan nin saro sanang beses para sa gabos na panahon, na paagi kaiyan nagibo niyang magkamit kita nin daing katapusan na kaligtasan.*+ 13 Huli ta kun an dugo nin mga kanding asin nin mga torong baka+ saka an abo nin sarong tarnerang baka* na iwinirik duman sa mga nadigtaan nakakapagpabanal para sa ikakalinig kan laman,+ 14 bako daw na an dugo kan Cristo,+ na paagi sa daing katapusan na espiritu nagdulot sa Diyos kan saiyang sadiri na mayong digta, lalo nang makakalinig kan satuyang mga konsiyensiya hali sa gadan na mga gibo+ tanganing makapagtao kita nin sagradong paglilingkod sa buhay na Diyos?+

15 Iyan an dahilan kaya tagapangultanan siya nin sarong bagong tipan,+ tangani na, huling nagadan siya para mapatalingkas sinda sa mga paglapas sa irarom kan nainot na tipan paagi sa pantubos,+ idtong mga inapod mag-ako kan panugang daing katapusan na mana.+ 16 Pag igwa kaya nin sarong tipan, hinahagad kaiyan an kagadanan kan tawong nagpangyari kan tipan, 17 huli ta an sarong tipan nagigin balido sana paagi sa kagadanan, palibhasa mayo iyan nin epekto sagkod na buhay pa an tawong nagpangyari kan tipan. 18 Huli kaini, an nainot na tipan dai man nagkaepekto* nin mayong dugo. 19 Huli ta kan masabi na ni Moises sa bilog na banwaan an lambang pagbuot sa Katugunan, nagkua siya nin dugo nin mga torilyong baka asin mga kanding saka nin tubig, asin winirikan an libro* asin an bilog na banwaan gamit an mapulahon na telang lana* asin hisopo, 20 na an sabi: “Ini an dugo kan tipan na ipinagbuot nin Diyos na utubon nindo.”+ 21 Winirikan man niya kan dugo an tolda asin an gabos na lalagan para sa banal na paglilingkod.*+ 22 Iyo, sigun sa Katugunan haros gabos na bagay nalilinig nin dugo,+ asin kun mayo nin dugo na pinabulos mayo man nin mangyayaring kapatawadan.+

23 Kun siring, an mga nagseserbing simbolikong ladawan+ kan mga bagay sa kalangitan kaipuhan na linigon sa arog kaiyan na paagi,+ alagad an langitnon na mga bagay nangangaipo nin mas marahay nanggad na mga atang. 24 Huli ta si Cristo dai naglaog sa sarong banal na lugar na gibo nin mga kamot,+ na sarong kopya kan tunay na banal na lugar,+ kundi sa langit mismo,+ kaya nasa atubangan siya ngunyan* nin Diyos para sa sato.+ 25 Ginibo ini bako tanganing parating idulot an saiyang sadiri, siring kan paglaog kan halangkaw na saserdote sa banal na lugar taon-taon+ dara an dugo na bako man saiya. 26 Ta kun bakong siring kaiyan, kaipuhan niyang parating magsakit puon sa pagkaestablisar kan kinaban. Alagad ngunyan ihinayag na niya an saiyang sadiri nin saro sanang beses para sa gabos na panahon sa pagtatapos kan mga sistema nin mga bagay* tanganing paraon an kasalan paagi sa pag-atang kan saiyang sadiri.+ 27 Asin kun paanong an mga tawo nakatagamang magadan nin saro sanang beses para sa gabos na panahon, alagad pagkatapos kaini sinda huhusgaran, 28 an Cristo man idinulot nin saro sanang beses para sa gabos na panahon tanganing darahon an mga kasalan nin dakul;+ dangan sa ikaduwang beses na siya magpahiling, iyan magigin suway sa kasalan,* asin mahihiling siya kan mga udok na naghahanap sa saiya para sa saindang kaligtasan.+

10 Mantang an Katugunan igwang anino+ kan marahay na mga bagay na maabot,+ pero bako an mismong katunayan kan mga bagay na iyan, dai kaiyan nuarin man makakaya,* paagi sa pararehong mga atang na dagos-dagos na idinudulot taon-taon, na gibuhon na perpekto idtong mga minadulok.+ 2 Ta kun iyo, bako daw na nagpundo na kutana an pagdulot nin mga atang, dahil oras na nalinig na idtong mga nagsasagibo nin sagradong paglilingkod dai na sinda makakamati na igwa sinda nin kasalan? 3 Sa kabaliktaran, an mga atang na ini ipinapagirumdom taon-taon an mga kasalan,+ 4 huli ta imposibleng makahali nin mga kasalan an dugo nin mga torong baka asin kanding.

5 Kaya kan mag-abot siya sa kinaban, an sabi niya: “‘Habo mo nin atang asin dulot, alagad nag-andam ka nin sarong hawak para sa sako. 6 Dai mo inuyunan an mga bílog na dulot na pigtututong asin an mga dulot para sa kasalan.’+ 7 Dangan sinabi ko: ‘Uya! Nag-abot ako (manungod sa sako an sinambit na iyan sa rolyo*) tanganing gibuhon an saimong kabutan, O Diyos.’”+ 8 Pagkatapos ngunang magsabi: “Habo mo asin dai mo man inuyunan an mga atang asin an mga dulot asin an mga bílog na dulot na pigtututong asin an mga dulot para sa kasalan”—mga atang na idinudulot uyon sa Katugunan— 9 dangan sinabi niya: “Uya! Nag-abot ako tanganing gibuhon an saimong kabutan.”+ Hinahali niya an inot tanganing iestablisar an ikaduwa. 10 Paagi kan “kabutan”+ na ini, pinabanal kita paagi sa pagdulot kan hawak ni Jesu-Cristo nin saro sanang beses para sa gabos na panahon.+

11 Siring man, an lambang saserdote minaduman sa saiyang puwesto sa kada aldaw tanganing magsagibo nin banal na paglilingkod*+ asin parating magdulot kan iyo man sanang mga atang,+ na dai nuarin man lubos na makakahali nin mga kasalan.+ 12 Pero an tawong ini nagdulot nin sarong atang para sa mga kasalan para sa gabos na panahon asin tuminukaw sa may tuo* nin Diyos,+ 13 asin puon kaidto naghahalat siya sagkod na ibugtak an saiyang mga kaiwal na magin tungtungan kan saiyang mga bitis.+ 14 Huli ta paagi sa sarong dulot na atang, ginibo niyang magin perpekto+ sa gabos na panahon idtong mga pinapabanal. 15 Saro pa, an banal na espiritu man nagpapatotoo sa sato, huling pagkatapos kaiyan na sabihon: 16 “‘Ini an tipan na ipapakipagtipan ko sa sainda pakalihis kan mga aldaw na idto,’ an sabi ni Jehova.* ‘Ibubugtak ko sa saindang mga puso an sakuyang mga pagbuot, asin sa saindang mga isip isusurat ko an mga iyan.’”+ 17 Dangan sinabi kaiyan: “Asin dai ko na gigirumdumon an mga kasalan ninda asin an mga maraot nindang gibo.”+ 18 Ngunyan na pinatawad na an mga ini, dai na kaipuhan nin dulot para sa kasalan.

19 Kun siring, mga tugang, mantang paagi sa dugo ni Jesus igwa kita nin pagkapusuan* na gamiton an dalan palaog sa banal na lugar,+ 20 na binuksan* niya para sa sato bilang sarong bago asin buhay na dalan paagi sa paglagbas sa kurtina,+ na iyo an saiyang laman, 21 asin mantang igwa kita nin sarong nangungurog na saserdote na namamahala sa harong nin Diyos,+ 22 dumulok kita nin may sinserong puso saka lubos na pagtubod, huling an satuyang mga puso nawirikan na tanganing malinig hali sa sarong maraot na konsiyensiya+ asin an satuyang mga hawak naparigusan na nin malinig na tubig.+ 23 Pangaptan niyato nin higot na daing pagduwa-duwa an satong ginigibong hayagan na pagpatotoo mapadapit sa satuyang paglaom,+ huli ta an saro na nanuga maimbod. 24 Asin isipon ta an* kada saro sa katuyuhan na mapahiro* an lambang saro na magpahiling nin pagkamuot asin marahay na mga gibo,+ 25 na dai pinapabayaan an satuyang pagtiripon,+ siring kan nakaugalian na nin nagkapira, kundi pinapakusog an lambang saro,+ lalo na ta nahihiling nindo na an aldaw paparani na.+

26 Huli ta kun padagos kitang tuyong nagsasagibo nin kasalan pagkatapos niyatong maako an tamang kaaraman mapadapit sa katotoohan,+ mayo nang ano man na atang na natatada pa para sa mga kasalan,+ 27 kundi an yaon na sana iyo an may grabeng takot na paghalat sa paghukom asin sa naglalaad na kaanggutan na matumtom sa mga nagtutumang.+ 28 An siisay man na nagbaliwala sa Katugunan ni Moises nagagadan na dai kinakahirakan, sa testimonya nin duwa o tulong tawo.+ 29 Gurano pa daw kagabat na padusa, sa paghuna nindo, an maninigo sa sarong tawo na tinimak-timakan an Aki nin Diyos asin na ibinilang na ordinaryo sana an halaga kan dugo kan tipan+ na paagi kaiyan siya pinabanal asin na ininsultong may paghamak an espiritu nin daing kapantay na kabuutan* nin Diyos?+ 30 Midbid baga niyato an Saro na nagsabi: “Sakuya an pagbalos; ako an mabalos.” Asin sinabi pa: “Huhusgaran ni Jehova* an saiyang banwaan.”+ 31 Makatatakot nanggad an mahulog sa mga kamot kan buhay na Diyos.

32 Alagad, padagos nindong girumdumon an nainot na mga aldaw na diyan, pagkatapos kamong maliwanagan,+ nagtagal kamo nin matinding pakikipaglaban kaiba nin mga kasakitan. 33 May mga panahon na pigtutuya-tuya kamo asin pinapasakitan na lantad sa publiko,* asin may mga panahon na dinadamayan nindo* idtong mga nag-aagi nin siring na mga bagay. 34 Huli ta nagpahiling kamo nin simpatiya duman sa mga nasa presuhan asin maugma nindong inako an pananamsam sa saindong mga pagsadiri,+ huling aram nindo na igwa kamo nin sarong mas marahay asin nagdadanay na pagsadiri.+

35 Kun siring, dai nindo iapon an saindong pagkapusuan,* huling babalusan iyan nin dakula.+ 36 Huli ta kaipuhan nindo nin pakatagal,+ tanganing pagkatapos nindong magibo an kabutan nin Diyos, makamtan nindo an kautuban kan panuga. 37 Huli ta “dikiton na sanang panahon,”+ asin “an saro na padangadang maabot asin dai mag-aatraso.”+ 38 “Alagad an sakuyang matanos na lingkod mabubuhay dahil sa pagtubod,”+ asin “kun siya umatras, dai ako mauugma* sa saiya.”+ 39 Ngunyan bako kita an klase na minaatras pasiring sa pagkalaglag,+ kundi an klase na may pagtubod na paagi kaiyan mapagdadanay an satuyang buhay.*

11 An pagtubod iyo an pag-antisipar nin may garantiya sa mga bagay na piglalauman,+ an malinaw na pagpapatunay* na an mga bagay na dai nahihiling totoo. 2 Huli ta paagi kaiyan, an mga tawo kan suanoy na mga panahon* nag-ako nin patotoo hali sa Diyos na inuuyunan niya sinda.

3 Huli sa pagtubod, namamansayan niyato na an mga sistema nin mga bagay* inareglar paagi sa tataramon nin Diyos, kaya an mga bagay na nahihiling nag-eksister hali sa mga bagay na dai nahihiling.

4 Huli sa pagtubod, si Abel nagdulot sa Diyos nin sarong atang na mas urog an halaga kisa kan ki Cain,+ asin paagi sa pagtubod na iyan nag-ako siya nin patotoo na siya matanos, huli ta inuyunan nin Diyos an* mga regalo niya,+ asin dawa ngani nagadan siya, nagtataram+ pa man giraray siya paagi sa saiyang pagtubod.

5 Huli sa pagtubod, si Enoc+ ibinalyo tanganing dai niya mahiling an kagadanan, asin dai siya manumpungan maski sain huling ibinalyo siya nin Diyos;+ huli ta bago siya ibinalyo nag-ako siya nin patotoo na napaugma niyang marhay an Diyos. 6 Dugang pa, kun mayo nin pagtubod imposibleng mapaugmang marhay an Diyos, huli ta an siisay man na minadulok sa Diyos dapat na maniwala na siya nag-eeksister asin na siya an nagigin paratao nin balos sa mga udok na naghahanap sa saiya.+

7 Huli sa pagtubod, si Noe,+ pagkatapos niyang mag-ako nin patanid hali sa Diyos manungod sa mga bagay na dai pa nahihiling,+ nagpahiling nin diyosnon na pagkatakot asin nagtugdok nin arka+ para sa kaligtasan kan saiyang pamilya; asin paagi sa pagtubod na ini kinondenar niya an kinaban,+ asin nagin siyang tagapagmana kan katanusan na resulta nin pagtubod.

8 Huli sa pagtubod, si Abraham,+ kan siya apudon, nagsunod asin nagpasiring sa sarong lugar na aakuon niya bilang mana; naghali siya maski ngani dai niya aram kun sain siya maduman.+ 9 Huli sa pagtubod, nag-istar siya bilang dayuhan sa ipinanugang daga na garo yaon siya sa ibang nasyon,+ na nag-iistar sa mga tolda+ kaiba si Isaac asin Jacob, an mga kaiba niyang tagapagmana kan iyo man sanang panuga.+ 10 Huli ta hinahalat niya an siyudad na igwa nin tunay na mga pundasyon, na an disenyador* asin nagtugdok iyo an Diyos.+

11 Huli man sa pagtubod, si Sara nag-ako nin kakayahan na magkaaki,* maski ngani lampas na siya sa edad,+ huling para sa saiya, Siya na nanuga maimbod.* 12 Huli kaini, hali sa sarong lalaki na garo naman sana gadan,+ may namundag na mga aki,+ na arog kadakul kan mga bituon sa langit asin dai mabilang arog kan mga baybay sa gilid kan dagat.+

13 An gabos na ini nagadan na may pagtubod, maski ngani dai ninda nakamtan an kautuban kan mga panuga;+ pero nahiling ninda an mga iyan sa harayo+ asin maugma nindang inako an mga iyan saka hayagan nindang sinabi na sinda mga estranghero asin temporaryong mga residente sa kadagaan. 14 Huli ta an mga nagtataram nin arog kaiyan malinaw na ipinapahiling na maigot sindang naghahanap nin sadiri nindang lugar. 15 Pero kun pigparagirumdom ninda an lugar na pinaghalian ninda,+ nagkaigwa na kuta sinda nin oportunidad na bumalik. 16 Alagad ngunyan inaabot ninda an sarong mas marahay na lugar, an buot sabihon, saro na may koneksiyon sa langit. Kaya, dai ikinakasupog nin Diyos na mag-apod sinda sa saiya bilang saindang Diyos,+ huli ta nag-andam siya nin sarong siyudad para sa sainda.+

17 Huli sa pagtubod, si Abraham, kan siya baluon,+ garo na man sana idinulot si Isaac—an tawong iyan na maugmang nag-ako kan mga panuga nagpurbar na idulot an saiyang bugtong na aki+— 18 dawa ngani sinabi na sa saiya: “An aapudon na saimong gikan* iyo idtong magikan ki Isaac.”+ 19 Alagad inisip niya na kaya nin Diyos na ibangon ini maski pa hali sa mga gadan, asin ibinalik man nanggad ini sa saiya hali sa kagadanan sa simbolikong paagi.+

20 Huli man sa pagtubod, binendisyunan ni Isaac si Jacob+ asin Esau+ may koneksiyon sa mga bagay na maabot.

21 Huli sa pagtubod, si Jacob, kan siya madali nang magadan,+ binendisyunan an kada saro sa mga aking lalaki ni Jose+ asin suminamba mantang nakahungko sa kapot niyang sugkod.+

22 Huli sa pagtubod, si Jose, kan harani na an saiyang kagadanan, nagtaram mapadapit sa paghali* kan mga aki ni Israel, asin nagtao siya nin mga instruksiyon* manungod sa saiyang mga tulang.*+

23 Huli sa pagtubod, itinago si Moises kan saiyang mga magurang sa laog nin tulong bulan pagkamundag sa saiya,+ huling nahiling ninda na magayon siyang aki+ asin dai sinda natakot sa pagbuot kan hadi.+ 24 Huli sa pagtubod, si Moises, kan dakula na,+ nagsayumang apudon na aki kan aking babayi ni Faraon,+ 25 na mas pinili pang apihon kaiba kan banwaan nin Diyos kisa kamtan an temporaryong kaugmahan sa kasalan, 26 dahil para sa saiya, an tuya-tuyaon bilang Saro na Linahidan* mas dakulang kayamanan kisa sa mga kayamanan kan Ehipto, huling naghiling siyang marhay sa itataong balos. 27 Huli sa pagtubod, binayaan niya an Ehipto,+ pero dai siya natatakot sa kaanggutan kan hadi,+ huli ta nagdanay siyang marigon na garo nahihiling an Saro na dai nahihiling.+ 28 Huli sa pagtubod, isinagibo niya an Paskuwa asin an pagwirik kan dugo, tanganing dai paggadanon* kan paralaglag an saindang mga panganay.+

29 Huli sa pagtubod, nagbalyo sinda sa Dagat na Pula siring kan sa marang daga,+ pero kan purbaran kan mga Ehipsiyo na gibuhon iyan, hinalon sinda kan tubig.+

30 Huli sa pagtubod, an mga pader kan Jerico narumpag pagkatapos na an banwaan magmartsa sa palibot kaiyan sa laog nin pitong aldaw.+ 31 Huli sa pagtubod, si Rahab na hostes* dai nagadan kaiba kan mga nagin masinuway, huli ta inako niya nin matuninong an mga espiya.+

32 Asin ano pa an sasabihon ko? Kukulangon ako nin panahon kun isasaysay ko pa an manungod ki Gideon,+ Barak,+ Samson,+ Jefte,+ David,+ pati na an ki Samuel+ asin sa iba pang mga propeta. 33 Paagi sa pagtubod, nandaog sinda nin mga kahadian,+ nagpangyari nin katanusan, nag-ako nin mga panuga,+ nagtikom kan mga nguso nin mga leon,+ 34 nakasigbo kan puwersa nin kalayo,+ nakadulag sa tarom nin espada,+ napakusog hali sa maluyang kamugtakan,+ nagin pusuan sa giyera,+ nagpasibog sa minasalakay na mga hukbo.+ 35 Nakaibanan giraray nin mga babayi an saindang nagadan na mga mahal sa buhay dahil binuhay liwat an mga ini,+ pero an ibang mga lalaki pinasakitan nin grabe huling sinayumahan ninda an pagkatalingkas paagi sa ano man na pantubos, tanganing makamtan ninda an mas marahay na pagkabuhay liwat. 36 Iyo, an iba nag-ako nin pagbalo paagi sa panunuya saka panglalatigo, sa katunayan, labi pa diyan, paagi sa mga kadena+ asin mga presuhan.+ 37 Ginarapo sinda,+ binalo sinda, linagadi sa duwa,* ginadan paagi sa espada,+ naglakaw sinda na nakasulot nin anit nin karnero, nakasulot nin anit nin kanding,+ mantang sinda nasa katikapuhan, nasa kasakitan,+ minamaltrato;+ 38 asin an kinaban bakong maninigo sa sainda. Naglagaw-lagaw sinda sa mga disyerto asin kabukidan asin mga kuweba+ saka mga lungib kan daga.

39 Alagad gabos sinda, minsan ngani nag-ako sinda nin marahay na patotoo hali sa Diyos huli sa saindang pagtubod, dai ninda nakamtan an kautuban kan panuga, 40 huli ta patiinot na nahiling nin Diyos an sarong bagay na mas marahay para sa sato,+ tanganing dai sinda magin perpekto na inot* sa sato.

12 Kun siring, huling napapalibutan kita nin siring kaiyan kadakulang panganuron nin mga saksi, iapon man niyato an lambang pagabat asin an kasalan na madalion sanang minasabod sa sato,+ asin magdalagan kita na may pakatagal sa daralaganan na ibinugtak sa atubangan ta,+ 2 mantang nakahiling kitang marhay sa Panginot na Instrumento asin Parasangkap kan satuyang pagtubod, si Jesus.+ Huli sa kaugmahan na ibinugtak sa atubangan niya, tinagalan niya an hariging pasakitan,* na dai iniintindi an kasusupgan, asin tuminukaw siya sa may tuo kan trono nin Diyos.+ 3 Iyo, isipon nindong marhay an saro na nagtagal kan malanit na pananaram hali sa mga parakasala+ laban sa sadiri nindang kapakanan, tanganing dai kamo mapagal asin magsuko.*+

4 Sa pakikipaglaban nindo sa kasalan na iyan, dai pa lamang kamo nakipaglaban sagkod sa punto na magagadan na kamo.* 5 Asin nalingawan na nindo nin lubos an sadol na ipinapanungod sa saindo bilang mga aki: “Aki ko, dai mo paghamakon an disiplina hali ki Jehova,* asin dai ka man pangluyahan nin buot pag itinatanos ka niya; 6 huli ta an mga namumutan ni Jehova* dinidisiplina niya, sa katunayan, hinahampak* niya an lambang saro na inaako niya bilang aki.”+

7 Kaipuhan nindong magtagal bilang parte kan disiplina* sa saindo. Mga aki an trato sa saindo nin Diyos.+ Siisay bayang aki an dai dinidisiplina kan saiyang ama?+ 8 Pero kun gabos kamo dai nag-ako kan disiplinang ini, talagang mga aki kamo sa luwas, asin bakong tunay na mga aki. 9 Saro pa, dinisiplina kita kan satuyang mga ama na tawo,* asin iginalang niyato sinda. Bako daw na mas lalo kitang dapat na andam na magpasakop sa Ama kan satong espirituwal na buhay asin sa siring mabuhay?+ 10 Huli ta dinisiplina ninda kita sa halipot na panahon uyon sa kun ano an pighuhuna nindang marahay, pero siya ginigibo niya iyan para sa satong kapakinabangan tanganing magin banal man kita arog niya.+ 11 Totoo, mayong disiplina na sa presente garo nakakaugma, kundi makulog* iyan; alagad pagkatapos, nagtatao iyan nin matuninong na bunga nin katanusan para duman sa mga sinanay kaiyan.

12 Kaya, pakusuga an mga kamot na nakalaylay saka an mga tuhod na nangluluya,+ 13 asin padagos na gumibo nin tanos na mga dalan para sa saindong mga bitis,+ tanganing an parteng may lapo dai magkalpos sa pagsukmulan, kundi maumayan. 14 Pagmaigutan na magibo an pakipagkatuninungan sa gabos na tawo+ asin an pagpapabanal*+ na kun mayo kaini an sarong tawo dai niya mahihiling an Kagurangnan. 15 Magbantay nanggad kamo na mayo nin siisay man sa saindo an dai makaako kan daing kapantay na kabuutan nin Diyos, tanganing mayo nin gamot na nakakahilo* an magtubo na makawsa nin mga problema asin dakul an madigtaan kaiyan;+ 16 asin magbantay kamo para masigurado na mayo sa tahaw nindo nin siisay man na tawong imoral,* o nin siisay man na dai nagpapahalaga sa sagradong mga bagay, arog ni Esau, na itinao an saiyang deretso bilang panganay karibay nin sarong pagkakan.+ 17 Aram baga nindo na pagkatapos kaidto, kan gusto na niyang makua an bendisyon, isinayuma iyan sa saiya; huli ta maski ngani maigot niyang pinurbaran na magkaigwa nin pagbabago nin isip* na may pagluha,+ mayo man sanang nangyari.*

18 Huli ta dai kamo nagdulok sa sarong bagay na puwedeng kaputan+ asin na pinalaad nin kalayo,+ asin sa sarong maitom na panganuron saka mahibog na kadikluman asin makusugon na duros,+ 19 asin sa makusog na tanog nin trumpeta+ asin sa boses na nagtataram,+ na kan madangog kan banwaan nakimahirak sinda na dai na kaiyan ipagpadagos an pagtaram sa sainda.+ 20 Huli ta dai ninda makayanan an pagbuot: “Maski kun sarong hayop sana an magtungtong sa bukid, dapat iyan na gapuon.”+ 21 Siring man, makangingirhat nanggad an eksena kaya nasabi ni Moises: “Natatakot ako asin pigtatakigan.”+ 22 Dai, kundi nagdulok kamo sa sarong Bukid nin Sion+ asin sarong siyudad kan buhay na Diyos, an langitnon na Jerusalem,+ asin sa dakulon na* mga anghel 23 na nagkakatiripon,+ asin sa kongregasyon kan mga panganay na nakalista sa langit, saka sa Diyos na Hukom nin gabos,+ asin sa espirituwal na buhay+ kan mga matanos na ginibo nang perpekto,+ 24 asin ki Jesus na tagapangultanan+ nin sarong bagong tipan,+ asin sa iwinirik na dugo, na nagtataram sa mas marahay na paagi kisa sa dugo ni Abel.+

25 Siyertuhon nindo na dai kamo magsayumang magdangog sa* saro na nagtataram. Huli ta kun idtong mga nagsayumang magdangog sa nagtatao kan patanid nin Diyos digdi sa daga dai nakadulag, mas lalo nang dai kita makakadulag kun tatalikudan ta siya na nagtataram hali sa kalangitan!+ 26 Kan panahon na idto an daga yinugyog+ kan saiyang boses, pero ngunyan nanunuga siya: “Saro pang beses, yuyugyugon ko bako sana an daga kundi pati an langit.”+ 27 Ngunyan an mga tataramon na “saro pang beses” nagpaparisa nin paghali sa mga bagay na yinuyugyog, mga bagay na ginibo, tanganing magdanay an mga bagay na dai yinuyugyog. 28 Kun siring, mantang mag-aako kita nin sarong Kahadian na dai mayuyugyog, padagos lugod kitang mag-ako nin daing kapantay na kabuutan,* na paagi kaiyan makakatao kita sa Diyos nin akseptableng sagradong paglilingkod na may diyosnon na pagkatakot sa saiya asin hararom na paggalang. 29 Huli ta an satuyang Diyos sarong kalayo na minatumtom.+

13 Padagos kamong magpahiling nin pagkamuot na sa-magturugang.+ 2 Dai paglingawan an pagkamapag-istimar,*+ huling paagi kaiyan an nagkapira nag-asikaso nin mga anghel nin dai ninda naaaraman.+ 3 Girumdumon idtong mga nasa presuhan,*+ na garo man sana nakapreso kamong kaiba ninda,+ asin idtong mga minamaltrato, huling kamo man mismo mga nasa hawak.* 4 Magin kagalang-galang para sa gabos an pag-inaguman, asin magin daing digta an higdaan kan mag-agom,+ huli ta huhukuman nin Diyos an mga tawong imoral* asin mga parasambay.+ 5 An saindo lugod na pamumuhay dai mahilingan nin pagkamuot sa kuwarta,+ mantang kontento na kamo sa mga bagay na igwa kamo.+ Huli ta siya nagsabi: “Dai taka nuarin man babayaan, asin dai taka nuarin man papabayaan.”+ 6 Sa siring mákusog na marhay an satuyang buot asin masabi: “Si Jehova* an sakuyang paratabang; dai ako matatakot. Ano an magigibo sa sako nin tawo?”+

7 Girumdumon nindo idtong mga nanginginot diyan sa saindo,+ na nagtaram kan tataramon nin Diyos sa saindo, asin miyentras na pighuhurop-hurop nindo an mga resulta kan saindang paggawi, arugon nindo an saindang pagtubod.+

8 Si Jesu-Cristo iyo man giraray kasuudma, ngunyan, asin sagkod lamang.

9 Dai kamo magpalagalag sa manlain-lain asin kakaibang mga katukduan, huli ta mas marahay sa puso na mapakusog paagi sa daing kapantay na kabuutan imbes na paagi sa mga kakanon,* na dai man nin naitataong pakinabang duman sa mga okupado kan mga iyan.+

10 Igwa kita nin sarong altar na diyan mayong awtoridad na magkakan idtong mga nagsasagibo nin sagradong paglilingkod sa tolda.+ 11 Huli ta an mga hawak kan mga hayop, na an dugo dinadara kan halangkaw na saserdote sa banal na lugar bilang dulot para sa kasalan, sinusulo sa luwas kan kampo.+ 12 Kaya, si Jesus nagsakit man sa luwas kan trangkahan kan siyudad+ tanganing pabanalon an mga tawo paagi sa sadiri niyang dugo.+ 13 Kun siring, magduman kita sa saiya sa luwas kan kampo, na dinadara an panunuya na saiyang dinara,+ 14 huli ta mayo kita digdi nin siyudad na nagdadanay, kundi udok niyatong hinahanap an saro na maabot.+ 15 Paagi sa saiya, pirmi lugod kitang magdulot sa Diyos nin atang nin pag-umaw,+ an buot sabihon, an bunga kan satuyang mga ngabil+ na hayagan na nagpapahayag sa mga tawo manungod sa saiyang pangaran.+ 16 Dugang pa, dai nindo paglingawan na gumibo nin marahay asin na maghiras sa iba kan kun ano an igwa kamo,+ huling nauugmang marhay an Diyos sa siring na mga atang.+

17 Magin masinunod sa mga nanginginot sa saindo+ asin magin mapagpasakop,+ huling padagos sindang nagbabantay sa saindo* nin siring sa mga maninimbag,+ na sa siring magibo ninda ini na may kaugmahan asin dai nagagabatan an buot,* huli ta makakadanyar ini sa saindo.

18 Padagos nindo kaming ipamibi, huli ta nagtitiwala kami na igwa kami nin sadiyosan* na konsiyensiya, asin mawot niyamo na gumawi kami nin sadiyosan* sa gabos na bagay.+ 19 Pero lalo nang nakikiulay ako na ipamibi nindo ako na makabalik diyan sa saindo sa mas madaling panahon.

20 Ngunyan an Diyos nin katuninungan, na iyo an nagbangon hali sa mga gadan sa dakulang pastor+ kan mga karnero—an satuyang Kagurangnan na Jesus, na may dugo kan daing sagkod na tipan— 21 lugod na sangkapan kamo nin lambang marahay na bagay para magibo an saiyang kabutan, na pinapahiro kita paagi ki Jesu-Cristo na gibuhon an nakakapaugma sa saiyang paghiling. Mapasaiya an kamurawayan sagkod nuarin pa man. Amen.

22 Sinasadol ko kamo ngunyan, mga tugang, na matiyagang magdangog sa pampakusog na mga tataramon na ini, huling halipot man sana an surat ko sa saindo. 23 Gusto kong maisihan nindo na pinalibre na an tugang niyatong si Timoteo. Kun mag-abot tulos siya, sabay kaming madiyan sa saindo.

24 Ipaabot nindo an sakuyang pangungumusta sa gabos na nanginginot diyan sa saindo asin sa gabos na mga banal. Nagpapaabot sa saindo kan saindang pangungumusta an mga taga Italia.+

25 Mapasaindo gabos an daing kapantay na kabuutan.