Tataramon nin Dios—An Pinakamarahay na Pandepensa!

KUN may gustong habonan kamo, ano an gigibohon nindo? Listo daw nindong itatao an saindong mga rogaring o makikilaban sa paghihingoa na ingatan an saindo? Sa madahas na kinaban ngonyan, dakol an naniniwala na an paggamit nin kosog sa pagprotehir sa rogaring makatanosan. An pagkaigwa nin badil o pag-adal nin mga abilidad sa pakikilaban ibinibilang na proteksion tumang sa mga pagsalakay. Alagad iyan daw talagang nagtatao kan pinakamarahay na resulta? Parate, an mga naggamit nin armas pinagbasolan iyan sa huri. Alagad sa kabaliktaran, an madonong na si Hadeng Salomon nagsabi: “Dai ka magsabi: ‘Mabalos ako nin maraot!’ Maglaom ka ki Jehova, asin ililigtas ka nia.”​—Talinhaga 20:22.

Kasuarin pa sana, an sarong nagtatrabaho sa pankinaban na opisina prinsipal nin mga Saksi ni Jehova sa Brooklyn, Nueva York, nagduman sa harong nin nagkapirang amigo sa Brooklyn. “Pag-abot ko sa atubangan kan edipisyo, dinaguso ako nin sarong lalaki na nakasulot nin diyaket sa armi na may kapot na lanseta, na an sabi: ‘Tawan sako an kuwarta mo! Tawan sako an gabos mong kuwarta!’

“Kan maheling na dai ako natakot sa pagsalakay nia, sia nagboot: ‘Laog sa edipisyo! Habo kong may makadangog! Laog!’ Kan makalaog na, hinagad nia an sakong pitaka. $2.00 sana an nakua nia. Kan sinusuwaysuway nia an ibang laog kaiyan, ipinaliwanag ko saiya na saro ako sa mga Saksi ni Jehova.

“Sa pagsagin dai ako nadangog, naghagad pa sia nin dagdag na kuwarta. Dangan, sa paglaog kan saiyang kamot sa bulsa kan sakong pantalon mantang kapot kan sarong kamot an lanseta, nakua nia an sarong 20-dolyares na papel na itinago ko. Sa paglaom na makakua pa, ipinagpadagos nia an paghanap nia, na iinaapon sa salog an ano man na makua nia sa bulsa ko. ‘Saen mo gagamiton an kuwarta?’ an hapot ko. ‘Sa droga?’ ‘Iyo,’ an simbag nia. Dangan ipinaliwanag ko: ‘Aram mo daw na kun bako akong Saksi ni Jehova, gadan ka na? Tatao ako nin karate. Bako sanang sarong beses dai ka nagin maingat sa lansetang iyan.’

“Kan sambiton ko an Biblia tanganing ipaliwanag an sakong paninindogan bilang saro sa mga Saksi ni Jehova, may kinua sia sa saiyang bulsa sa atubangan asin ilinuwas an sarong sadit na libro asin nagsabi, ‘Helinga, may Biblia ako!’ Idto sadit-sadit na Bibliang pambulsa.

“‘Dai man iyan nin ikinatatabang saimo,’ sabi ko. ‘Dai mo ngani ginigibo an sinasabi dian.’ Kinua ko an Biblia nia asin binasa ko saiya an Mateo 6:​33 asin Juan 17:​3 asin idinoon an halaga bako sanang kan pagkaigwa nin kaaraman sa Biblia kundi kan pag-​aplikar man kaiyan sa saiyang buhay.

“Sia nagtuga na kan duwang bulan na an nakaagi sia nakaluwas sa preso. Huling mayo nin trabaho asin nagkakaipo nin kuwarta, nanhabon sia. Sa pagbasa kan 1 Corinto 6:​9, 10, ipinaliwanag ko saiya na an mga parahabon dai magmamana kan Kahadean nin Dios. Idinugang ko: ‘Maabot an aldaw na tibaad may manompongan kang tawo na ipakikipaglaban an saiyang kuwarta, asin tibaad magadan mo sia, o tibaad ika an magadan nia, o sa huri madadakop ka asin mabuwelta ka sa preso!’ ‘Dai mo pagsabihon iyan!’ an kurahaw niang may takot. Ipinagirumdom ko saiya na ‘an mga nabubuhay sa minasbad sa minasbad man magagadan.’​—Mateo 26:52.

“Napahiro kan Kasuratan, sia naghagad nin tawad. Sa pagdoko, narisa nia an iinapon nia sa salog kan hinahalean nia nin laog an sakong mga bulsa. May pagkasopog, pinurot nia an gabos asin itinao iyan sako, pero kinua nia an kuwarta. Sa pagrani sa pinto, ihinapot nia kun ipamimibi ko sia. Ipinaliwanag ko, ‘Sala an ginibo mo sako, alagad orog sa gabos, ika nagkasala tumang ki Jehova. Kamo nang duwa an mag-​oolay dian.’

Sa paghale, naghapot sia kun puwede ko siang tawan nin pabor. Sa pag-abot kan saiyang palad, na may kapot na lanseta, sia naghapot, ‘Puwede mo daw na iapon ini para sa sako? Tapos na an panhabon ko.’ Kinua ko an lanseta asin sinalidahan iyan nin sarong magasin na Awake!”​—Sono sa pagbareta ni Ricky Hanagami.