Pagmamasid sa Kinaban

Nakararaot na mga Video

An operasyon na open-heart na an pasyente nagadan sa atake sa puso, mga paggadan sa mga rebolusyonaryo paagi sa firing squad, preso na nagagadan sa silya elektrika, asin bantay sa parke na kinakamros sagkod na magadan nin sarong buaya nagkapira sana sa mga eksena nin aktuwal na pagkagadan na puwede nang maheling ngonyan sa pinaaarkilahan na mga videotape. An may tolong tomong serye na may titulong Faces of Death makatatakot na ipinaheheling an klarong pelikula nin nagagadan na mga tawo. Ano an reaksion kan publiko sa seryeng ini sa video? “Dai iyan nagdadanay sa estante,” an sabi nin sarong tindero sa tindahan nin video sa Virginia Beach, Virginia, sa The Virginian-Pilot and the Ledger-Star, sarong peryodiko sa Virginia. “Oras na iyan umabot, may makua naman kaiyan.” An sarong anggot na nakaheling na habo sa pelikula may ginigibong kampanya tanganing haleon kan lokal na mga tindahan an mga video. Sa pagkomento sa pelikula, sia nagsabi: “Iyan madahas na pornograpiko.”

Magastos na Proteksion

Mantang an napipierde sa mga may tindahan sa Estados Unidos huli sa pag-ikit mga $30 bilyones kada taon, bakong makangangalas na igwa nin nag-aasensong industriya sa paggibo nin mga kasangkapan kontra sa pag-ikit. Kabilang digdi an mga produktong EAS (Electronic Article Surveillance) na inaapod target. Iyan magsalang lidong na plastik na idinudukot sa mga bagay na arog baga nin mga gubing, sarong magnetikong awat na “arog kasadit nin buhok nin tawo,” o “sirkito elektroniko na ilinalaog sa nahahaleng tag.” An mga “target” puwedeng haleon o deaktibaron kan mga empleyado sa pagbayad nindo sa saindong mga binakalan. An mga parokyano kan mga tindahan na naggagamit sa mga kasangkapan na ini kaipuhan na umagi sa sarong yunit na nagtatao nin senyal kun an “target” dai nadeaktibar nin tama. An ikinapabakal na mga kasangkapan na ini nakaabot na sa $150 milyones.

Bagong Bolong sa Sipon?

Taano ta sinasabi na an mga parapalod nin kahoy na Noruego bihirang magkasipon? Sono ki Dr. Olav Braenden, an simbag yaon sa hinahangos nindang aso nin kahoy, an bareta kan The Times nin Londres. An mikrobyo nin sipon nagkakaipo nin dakol na oksiheno tanganing magdakol. Minsan siring, iyan puwedeng mapogolan nin mga bitamina B asin C saka, sono sa paniniwala, nin polyphenol. An mga sustansiang ini, na yaon sa aso nin kahoy sa Norway, pinopogolan an suplay na oksiheno sa mucous membrane kan dongo. Ibinabareta na an mga pantoro sa dongo na igwa kan tolong ingredienteng ini prinobaran sa 300 na tawohan kan air force sa Norway na may 82 porsientong naomayan an sipon. “An mahalaga patoroan sa enot na senyal nin sipon,” an idinodoon kan direktor sa pagsiyasat na si Dr. Anton Rodahl, “bago an mikrobyo makagibo nin ano man na danyos sa mucous epithelium [lining] sa dongo.” An komersial na pagpabakal kan bolong nagpoon sa Norway ngonyan na taon.

Pagsamba Paagi sa Transmisyon

An mga eskuwela sa Hapon, sa pagmawot na makalaog sa marahay na mga eskuwelahan, ginagamit an teknolohiya tanganing makadolok sa saindang mga dios. Paano man? Sono sa Asahi Shimbun, sarong peryodiko sa Tokyo, ibinubugtak nin sarong eskuwela an saiyang ngaran, adres, taon nin pag-eskuwela, asin ngaran kan eskuwelahan na linalaoman na laogan sa sarong yunit nin transmisyon na konektado sa sarong telepono. Dangan an impormasyon na ini dinadara sa sarong templong Shinto na duman an sarong padi binabasa iyan nin makosog asin namimibi sa kantidad na 3,000 yen ($20, E.U.). An mga autoridad sa templo nagsasabi, “Siyempre mas marahay an pagsamba nindo mismo sa altar.” Pero, an sarong padi sa Dazaifu Tenmangu sa Kyushu, an pinakapopular na templo sa Hapon na dusay sa edukasyon, nagpaliwanag na an madonong na mga tawo na nag-iistar harani sa templo naniningil sagkod sa 20,000 yen ($140, E.U.) tanganing magrepresentar sa mga masamba. An mga padi nagreklamo sa paggibo sa pagsamba na magin negosyo nin mga tawo na dai konektado sa templo. Sinda nagdesisyon: “An transmisyon nagpapahayag man kan mga saboot kan puso. An epekto pareho,” asin nag-opresir sinda nin serbisyong mas barato.

Mga Card Para sa Kaligtasan

An paghanap sa mga biktima nin pagtupas haloy nang kahaditan nin mga apisyonadong mag-ski asin magtukad sa bukid. Minsan ngani igwa nin laen-laen na klase nin mga transmitter-receiver, pipira sana an naggagamit kaiyan huli sa kantidad asin sa gabat saka kadakulaan nin pirang modelong de bateriya. Minsan siring, an sarong grupo nin mga parasiyasat na Pranses may ginigibong bagong ideya—mga card para sa kaligtasan. Dara-dara sa daghan asin likod kan kada para-ski o paratukad, an halaga kaiyan mga pira sanang dolyar, dai nagkakaipo nin bateriya, asin arog sana kadakula nin credit card. Paano iyan ginagamit? An diaryong Pranses na Le Figaro nagbabareta na iyan magigin garo mga salming, na ibinabalik an sarong kabtang nin radio signal sa grupong parasalbar na igwa nin makosog na transmitter. Sa mga pagprobar sa orihinal na mga modelo, nakua na nin mga parasiyasat an mga tawo na natalbong nin sagkod sa 30 piye (9 m) kararom na niyebe.

Paghahabon sa Gobyerno

An bago pa sanang pagsiyasat sa mga kasangkapan kan gobyerno nin Canada nagpaheling nin pagkapierde nin poon $3 milyones sagkod $4 milyones sa mga sadiri kan gobyerno taon-taon. Minsan ngani an mga kasangkapan sa opisyal sinasabing nawawara, inadmitir na iyan “tibaad hinabon.” An The Toronto Star nagbareta na kabilang sa mga nawawara an arak, de kolor na mga TV set, mga makinilya, ilaw sa ibabaw nin lamesa, dictaphone, 35-mm na kamera, overhead projector, calculator, sarong motor sa bangka, asin sarong freezer. An saro pang klase nin paghabon sa gobyerno narisa sa haros $60 milyones na kinua sa unemployment insurance kan Canada nin mga tawo na nagprobar na dayaon an gobyerno. “Nagkaigwa nin 180,458 pangyayari nin pandadaya,” sono sa peryodikong The Globe and Mail. Marahay sana ta, sa napierdeng iyan, “$32.3-milyones an nabawi.”

Napapalaen na mga Paghibi

Namimidbid daw nin sarong ina an hibi kan saiyang aki sa hibi nin ibang aki? Iyo, an bareta kan The Sunday Times nin Londres. Alagad an pagkamidbid nin ina orog pa dian, sono sa mga nadiskobre ni Dr. Alain Lazartigues, sarong sikayatrista nin aki sa La Pitié Salpetrière Hospital sa Paris. Sa tono kan hibi, naaaraman man nia an dahelan kaiyan, kun baga an aki nagugutom, basa, anggot, o may helang. An gutom, an pinakausong dahelan nin paghibi nin aki, may halangkaw na tono na nasa pag-oltanan nin 270 asin 450 hertz asin magpoon 80 sagkod 85 decibel. An mga hibi huli sa kolog, kaanggotan, pagkapungot, asin kaogmahan, sabi kan doktor, igwa man nin napapalaen na tono. Sinabi nia na para sa nagkapirang helang, an mga hibi kan aki puwedeng makatabang sa pag-eksamen.

An mga Beterano Asin Guerra sa TV

An kadahasan asin guerra regular na pinaluluwas sa telebisyon asin mga bareta. Nangorogna an mga pelikula may tendensia na iatubang an guerra sa mamuraway na paagi. Alagad an mga beterano sa guerra na nakaeksperyensia sa mapait na mga pangyayari parate na dai naaaling kan mga paluwas na iyan sa telebisyon. Si Stan Knorth, sarong beterano kan Guerra Mundial I, na ngonyan 90 anyos na an edad, sinabihan an St. Louis Magazine: “Kun naheheling ko an gabos na baradilan na iyan sa TV, pinopondo ko iyan.” An dahelan? “Dai ko iyan kaya. Habo kong girumdomon iyan,” an paliwanag ni Knorth.

Dai Naoomayan na Dai Pakatorog

An sarong tawo na may dai naoomayan na helang na dai pakatorog dai napatorog nin siyam na bulan dangan nagadan, an bareta kan Evening Press sa Dublin, Irlandia. Sa pagpaliwanag kan dahelan nin kagadanan, si Propesor Elio Lugaresi, neurologo sa University of Bologna Medical School sa Italia, nagpaliwanag na an pambihirang helang nakaaapektar sa thalamus, sarong cerebral nerve circuit na nagtatao nin mga mensahe sa pag-oltanan nin hotok asin hawak. Kan maputol an komunikasyon, “an hotok nagin siring sa motor na dai napapopondo.” Minsan ngani pinaglabanan kan biktima an helang, sia an nagin ika-14 miembro kan saiyang pamilya na nagadan, poon kan 1822, huli sa dai pakatorog. An report ni Lugaresi sa kaso nakapaisi sa ibang sientista kan malinaw na kabtang kan henetika asin kan thalamus sa mga kaso nin grabeng helang na dai pakatorog. Si Lugaresi nagpapaliwanag: “Aram niato an mekanikal na mga detalye kan helang, pero dai kita nin paagi na mapapondo iyan.”