An Punto-de-Vista kan Biblia

Kasal o Nagsasaro?​—Arin?

“NOARIN kita mapakasal?” Kasin dikit nin 35 taon na an nakaagi, an hapot na ini tibaad pinag-isipan nin duwang nagkakaminootan na magkatrato. Pero ngonyan, may marahay na posibilidad na an siring na hapot palalatawon nin duwang magkasaroan na. Nagliwat na an mga panahon siring man an mga kaisipan sa pag-agom. Arin na paagi an mas marahay: Magpakasal, o makisaro sa tawong pinili nindo?

An mga pagsiyasat nagpaparisa na sa Brazil, Pransia, Sweden, Estados Unidos, asin sa dakol pang ibang nasyon, nasa uso an pagsasaro na dai kasal. Iyan tibaad kaoyon kan modernong moral na kaisipan, pero bako iyan bago. An bago iyo an kaisipan sa gaweng iyan. An kan dati kinokonsiderar na namumuhay sa kasalan ngonyan kinokonsinti o inooyonan nin dakol bilang tama nanggad.

Pagsasaro​—Igwa daw nin mga Bentaha?

An ibang tawo nangangatanosan na an areglong pagsasaro makatanosan, mantang pinangyayari kaiyan an duwang tawo na mamidbid nin marhay an kada saro bago lumaog sa mas permanenteng bogkos nin pag-agoman. An iba pang bentaha na itinotokdo nin iba iyo an: Pinangyayari kaiyan na an nagsasaro makaina sa paggasto paagi sa pagbanga kan arkila; nagtatao iyan sainda nin katalingkasan sa mga magurang; nagtatao iyan kan kinakaipuhan na pag-iba-iba, kabilang na an relasyon sa sekso. An mas may edad nang nagsasaro nagsasabi na paagi sa pagsasaro dai ninda ikinawawara an mga benepisyo kan seguro-sosyal kan gobyerno.

Minsan siring, an saro pang makosog na argumento tumang sa pagsasaro na dai kasal iyo ini: An arin man na lado puwedeng tapuson an areglo ano man na oras paagi sa pagbaya. An totoo, an Pranses na peryodikong Le Monde nagbareta na sa Sweden asin Norway, an kabanga sa mga relasyon nin pagsasaro dai natagal nin duwang taon, asin magpoon sa 60 sagkod sa 80 porsiento an nagbubulag na dai pang limang taon.

Kasal​—An Mas Marhay na Paagi

An mga nagsusuportar sa areglo nin pagsasaro tibaad apodon an sertipiko sa kasal bilang saro sanang “pidasong papel,” bagay na daing praktikal na halaga. An kaisipan na ini ipinaririsa man sa drama sa telebisyon asin pelikula, siring man sa pribadong buhay nin mga artista. Kun siring, konsideraron ta ngonyan an tunay na halaga kan “pidasong papel” na iyan.

Kun makisosyo kamo sa negosyo o bumakal nin kapidasong rogaring o magpautang nin kuwarta sa iba, taano ta kaipuhan nindong isurat an mga kondisyon asin ipinanonotario pa ngani? An sarong rason iyo na an pangako ginibo nin duwang lado, asin bentaha kan duwa na isurat an mga kondisyon. Halimbawa, kun nagadan an sarong lado, nawara, o basta na sana nakalingaw, an mga kondisyon ootobon pa man giraray sono sa legalidad. Totoo man iyan sa kasal. Kun magadan an saro o an duwa, an ley sa kadaklan na nasyon may probisyon para sa nabubuhay na mga miembro kan pamilya. Parateng mayo ini sa areglo nin pagsasaro. An pangakong ini an kalaenan sa pag-oltanan nin pagsasaro asin kasal. Asin an sertipiko sa kasal pagirumdom sa mag-agom kan pangakong iyan na mamotan, igalang, asin atamanon an kada saro asin kan legal na mga implikasyon sa sumpa kan pag-agom.

Arog kaini an pakasabi nin sarong may agom na babae: “Tibaad lihis na sa uso ako, pero an pangako sa kasal nagpapamate sakong mas tiwasay.” Inotro nia an sinabi nin Dios kan pinagsaro nia sa kasal an enot na magkapadis na tawo: “Kaya ngani babayaan nin lalaki an saiyang ama asin ina asin sia magdadanay kaiba kan saiyang agom asin sinda magigin sarong laman.”a (Genesis 2:24) Pambihira nanggad na pagkasaro! Kaya, an “sarong laman” posible sana sa kompleto, esklusibo, legal, sagkod nabubuhay na relasyon​—dai nang iba.

Pero, nangangatanosan an ibang tawo, na may midbid sindang nagsasaro na dai kasal alagad may marigon na relasyon.

“Mag-agom Sinda”

An Biblia nagtatao kan pinakamarahay na rason para sa duwang tawo na dai magsaro na dai kasal. “Magin logod kagalanggalang sa gabos an pag-aragoman, asin dai pagdigtaan an higdaan, huli ta hohokoman nin Dios an mga parapakisaro asin parasambay,” an sabi kan Hebreo 13:4. An Biblia sa malinaw asin simpleng paagi nagsasabing an pag-iibahan na dai kasal pakikisaro. Ano an kahulogan kan “pakikisaro”? Ilinadawan iyan nin sarong diksionaryo bilang an “seksuwal na pagdorog nin tawo apuwera sa pag-oltanan kan lalaki asin kan saiyang agom.” Tanganing magkaigwa kita nin marahay na konsensia, dapat na sunudon an sadol na ini kan Biblia: ‘Iyo ini an kabotan nin Dios na kamo lumikay sa pakikisaro.’​—1 Tesalonica 4:3.

Pero halimbawa an iba may problema sa pagpogol kan saindang mga horot sa sekso? Nagsurat si apostol Pablo: “Alagad kun sinda dai makapagpogol, mag-agom sinda, huli ta marahay pang mag-agom sinda kisa maglaad sa horot.” Asin liwat: “Alagad kun an siisay man naghohona na sia naggigibo kan bakong maninigo sa saiyang pagkasoltero, . . . mag-agom sinda.” (1 Corinto 7:​9, 36) Mangnohon na dai sinabi ni Pablo na ‘gibohon an boot ninda asin magsaro’ kundi, “Mag-agom sinda.”

Bako na an pag-agom dapat na mansayon sana bilang paagi tanganing mapanigoan an seksuwal na mga pagmawot. An duwa dapat na magkamidbidan bago sinda mag-agom. Pero paano nindo magigibo an siring kun dai kamo magsaro? An kagalanggalang na pag-ilusyonan nagtatao nin igong oportunidad para dian. Dapat nindong madeterminaran kun ano an malalaoman nindo sa pag-agom asin sa saindong agom. Ano an saindong pisikal, emosyonal, asin espirituwal na mga pangangaipo? An persona daw na iniisip nindo bilang posibleng agom makatatabang saindo na mapanigoan iyan?​—Mateo 5:3.

Pakatapos na konsideraron an nasa enotan, daing duwa-duwa na maoyon kamo na sa duwang paagi​—an pagsasaro o kasal—​an huri an mas marhay. An mag-agom na kasal nagsasaro na daing pagkakulpable o takot, asin nakakamtan ninda an paggalang nin mga katood asin paryentes. An saindang mga aki dai magkakaigwa nin emosyonal na mga pinilaan huli sa pagkamundag na bakong kasal an mga magurang. Asin pinakamahalaga, an siring na mga mag-agom nagpapaogma sa Dios paagi sa pagpaheling nin paggalang sa saiyang areglo sa pag-agom.

[Nota sa Ibaba]

[Ritrato sa pahina 20]

Kasal kan ika-16 na siglo

[Credit Line]

Kasal nin Paraoma, ni Pieter Bruegel the Elder, ika-16 na siglo

Sa maboot na pagtogot kan Kunsthistorisches Museum, Vienna